2 Corintios 4 - Biblia Dc en Mixe de Quetzaltepec

¹ Paatyës ka'ap n'ëxëëkjawëtë, jä'ä ko Tiosës të xytyuknipëktë ya'atë tuunk mëët yë pya'ëyo'ow nyajts'ëyo'owën.

² Ka'apës tii ayu'utsy të ntuntë jëtu'un tä jeexyë tii yajtsëtyu'unjawën; ka'apës pën je'eyë të nwin'ëëntë ets ja Dios ja y'aaw y'ayuk të nyajtëkajtsëtë, tëy jaantyës të nnikäjpxy të nnimëtya'aktë mayjyä'äyjoty Dios wyintum.

³ Pën kyaja'akyujkëtëp ja oy aaw oy ayuk mëti'ipës nkajpxwa'kxtëpën, yë'ë ka'ap tja'akyukëtë mëti'ipë tëkooytyëpën.

⁴ Jä'ä ko ka'ap myëpëktë, ja mëpëjkën yääyëpë naaxwiinyëtën yë'ë yajwinma'anytyëkajtsëtëp këtiipë t'ijxpaatëty ja jajën të'kxën, ja oy aaw oy ayuk ma yajnimëtyä'äkyën ja Kristë ja myëj'ajt jyääntyajtën, ja Kristë mëti'ipë Dios nyäjxypyën.

⁵ Ka'apës kë'ëm nänyimëtya'akëtë, ja Kristë mëti'ipë Wintsënën ëëts nikajpx nimëtyaktëp; ëëtsëty tuunpës je'eyë näyajnaxëtë koos ja Jesús xytsyoktë.

⁶ Jä'ä ko nän Dios ojts kë'ëm tni'ënä'ämë ets jyää'atëty ja kutë'kxnën akootstum, yë'ëts të tyajjajwä'kxy ja y'ajaj y'atë'kxën ma ja njoot'ajt nwinma'any'ajtëmën ets nnija'awëmëty ja Dios ja myëj'ajt jyääntyajtën mëti'ipë ja Kristë myëët'ajtypyën.

Ko jotkujk nyajpatmëty jotmayjoty

⁷ Ijxtëm ja ja'ay ja myeeny tpëjkë'ëkyën naax tu'tsjoty, jëtu'un ya'atë oyajtën nmëët'ajtëmë ma ja ni'kx'ajt nkopk'ajtëmën ets nyikëxë'ëkëty ko jam tsyoony ma Tiosën.

⁸ Oy ja ëyo'on jotmay npaatës, ka'apës nmaytyë ntajtë; oyës nkanijawëtë pën tiijës ntuntëp, ka'apës nmaytyë ntajtë.

⁹ Xy'ixjëtijt xypyajëtijtëpës ja ja'ay, je'eyëp ko ka'apës ja Dios xy'ëxmatstë; oyës nyajkuj nyajjëpiptë, ka'apës n'ooktë.

¹⁰ Oy tyimmaajëty maas nnëjkxtën, xëmës ja ja'ay xyaj'ooka'antë ijxtëm ja Jesús jyäjtyën; je'eyëp ko Jesús xypyutëjkëtëpës ets nyikëxë'ëkëty mëët ëëtsëty ko yë'ë jyuuky'äty.

¹¹ Jëtu'unës njuuky'atë, xëmës ja ja'ay xyaj'ooka'antë koos ja Jesús nmëpëktë ets ja jyuukyajtën nyikëxë'ëkëty ma ëëts ja njot nini'kxëtyën.

¹² Jëtu'unts, oyës o'kënjëjp'am njatimy'itë, miits ja juukyajtën mpatëp m'ijxtëp.

¹³ Jëtu'un ja Dios ja y'aaw y'ayuk kyëxja'ayëty: Paatyës nnikäjpxy koos nmëpëky. Näyjyëtu'un ëëtsëty koos të nmëpëktë, paatyës näjyëtu'un nikajpxtë.

¹⁴ Jä'ä ko nnija'awëm ëëtsajtëm ko ja Dios mëti'ipë yajjuukpyëjkën ja Jesús, näjyëtu'un xyajjuukpyëka'anëmë, ets mëët miitsëty mëët tu'ukyë xyajnëjkx'anëmë wyintum wyinkujk.

¹⁵ Tu'kë'ëyë ya'atë, paaty jëtu'un të tyuny të jyätyë ets miits xytyuk'oy'atëty; nyimayë'ëtë'ëtstëty ja ja'ay mëti'ipë Dios kënu'kxëtëpën, näjyëtu'un nyimay'atëty ja ja'ay mëti'ipë kyukajpxëtëpën ja Dios ets ja Dios yajmëjjaw yajjaantyjyawëty.

¹⁶ Paatyës ka'ap ntsaatyjyäwë, oyës ja ni'kx nkopk tëë jyamëjja'ayënë, ajemyëpës njawë xëmë ja njot nwinma'anyëtyës winjëpom.

¹⁷ Ja ëyo'on mëti'ipës yaa nmënajx nyajnajxtëpën, ka'ap yë myëjwiin kyëjääjëty, tsojk nyäxy; wäänë mëj ja mëj'ajtën jaanty'ajtën xytyukpatmëty xëmëkyëjxmëpë.

¹⁸ Ka'ap yë'ëjëty n'ixta'ayëm mëti'ipë yaj'ijxpën, yë'ë n'ixta'ayëm mëti'ipë ka'ap yaj'ixyën. Mëti'ipë yaj'ijxpën, këjxp najxp yë'ë; e mëti'ipë ka'ap yaj'ixyën, xëmëkyëjxm yë y'ijtëy.