2 Corintios 2 - Biblia Dc en Mixe de Quetzaltepec

¹ Paaty ka'apës nwinmay nnëjkxëty ma miitsëtyën jä'ä ko nëkoo nyajjotmaytyëkëtëty ko ninëjkxtëty.

² Ko miits nyajjotmaytyëkëtëty, ¿pën ntukjotkujk'atëpës? Miits je'eyë të nyajmon të nyajtuktë.

³ Paaty je'eyë të nijayëtë, këtiipës ok nmëmay nmëtajëty, ijxtëm jeexyë ni'ikyë nxoontä'äkyënës. Njëjp'ijxypës ënety ko miitsëty näjyëtu'un mxoonta'aktëty mëët ëjts.

⁴ E ko ja noky ojts ntuknijayëtë, määpy tajpës ënety ets amutskëpës ets yaxpës. Ka'ap miits të nnijäyëtë ets nyajjotmaytyëkëja'antë, yë'ëkyëjxm ets miits xy'ixtëty xynyijawëtëty ko miits ni'ik ntsoktë.

Ma yajnime'kxyën mëti'ipë ja Pablo ënäty të yajjoot'anpëkyën

⁵ Pën jam pën ja myëku'uk të tyajmony të tyajtuky, ka'ap y'ëjtsëty nätyu'uk të xyajmony të xyatuky. Tsojk na'ëna'anmëty näjyëtu'un miitsëty të mmontë mtuktë. Paatyës n'ëna'any tsojk na'ëna'anmëty, këtiipë yajwinmëtowëty nyajni'ikëpës yowë ja n'ayuk.

⁶ Ja tëytyu'unën mëti'ipë mtuknipëjktën tääpë ja'ayëty, tëë ja kyëjääjënë.

⁷ Mëti'ipë tëy tyam mtuntëp, nimä'kxtë ets putëkëtë, ko nëjkx ja ma'ayën tajën tkamëmëtä'äky.

⁸ Paatykyëjxm miits nmënu'kxta'aktë ets xytyuk'ix xytyuknijawëtëty ko miits yë'ë xytsyoktë.

⁹ Miitsëty tëë n'ëktuk'ëwa'anëtëpë ya'atë jotmay, yë'ëjës ënety n'ixäämpy pën mpatuuntëp ja n'aaw n'ayukës.

¹⁰ Jëtu'un, pën jam miits pën xynyimä'kxtë, näjyëtu'unës nimä'kxëty; ets koos pën nimä'kxëty, ënät pën jam tii të tuuntëkoy mëti'ipë yajnimä'kxëpën; ko ënety miits të m'ëna'antë ets ja Kristë myëjnaxëty.

¹¹ Jëtu'un ka'ap ja mëjku'u xymyëmëtakmëty mëti'ipë nija'awëmën ko je'eyë wyin'ëëny.

Ko Pablo ka'ap jyotkujk'aty jam Troas

¹² Koos nja'ajty jam Troas etsës nkajpxwä'kxy ja oy aaw oy ayuk ma Kristë yajnimëtyä'äkyën, ja nWintsënës yaj'ëwats ja nnë'ë ntu'ujës.

¹³ Oy jyajëtu'unëty, ka'apës ja n'aaw njot xyoontä'äky. Jä'ä ko ka'ap ojts jam npaatyës ja mmëku'uk'ajtëmë Tito, paaty ojts näjyëkyäjpxyës jam ets ojts nnëjkxyës Macedonia.

Ja kukajpxën ja'awëkyëtakën

¹⁴ Nkukajpxëpës ja Dios ko xëmë xyajmëtakëmë mëët ja Kristë ja xyëëw, ets yajnijawë ja y'aaw y'ayuk ko ëëtsajtëm nkajpxwa'kxëmë, mëti'ipë ye'eywya'kxpën ijxtëm ja pa'akxu'kpë nëëjën.

¹⁵ Jä'ä ko jëtu'un ja Dios xyajnajxëmë ma ja Kristën ijxtëm ja pa'akxu'kpë nëëjën ma ja mëti'ipë mëpëjktëpën ets mëti'ipë ka'ap myëpëktën.

¹⁶ Pën ja Kristë ja y'aaw y'ayuk kyamëjpëjktakëtëp, jëtu'un tjawëtë ya'atë pa'akxu'kpë ijxtëm yë tok xyuukyën; e mëti'ipë ja Kristë ja y'aaw y'ayuk myëjpëjktaktëpën, jëtu'un tjawëtë ijxtëm ja pa'akxu'kpë nëëjën ma jyuuky'ajtënëtyën. ¿Pën mëta'akëp ets tunëty ya'atë Dios ja jyä'ä?

¹⁷ Ka'apës ja Dios ja y'aaw y'ayuk nyajtuunëtë etsës ja wit meeny npaatëty ijxtëm may y'ëtë'ëtstën; ni'ikyë ëmuumtu'ukjot nikajpx nimëtya'aktës ja Dios ja y'aaw y'ayuk, ko yë'ë të xykyäxtës ets ko tu'ukyë mëët n'itës ja Kristë.