2 Corintios 11 - Biblia Dc en Mixe de Quetzaltepec

Pablo ets mëti'ipë nëkoo nätyijëtëpën ijxpëjkpëtëjk

¹ Jääpëk wäänë xyjyä'äkyukëtë koos yam ja'aykupojën nkuxiik nkukajpxë. Oy y'ëkwi'ixëty tëëjës kupëjktëkës.

² Ni'ikës miits ntsoktë mëët ja Dios ja tsyojkën mëti'ipës të xymye'eyën. Jëtu'unës ëjts ijxtëm tu'uk ja u'unkteetyën mëti'ipë ja nyëëx nyi'ëtsoopyën ets pyëkëty mëët tu'uk ja yä'äy ëna'k. Jëtu'un miitsëty ijxtëm ja to'oxy ëna'kën ets ja Kristë ijxtëm tu'uk ja yä'äy ëna'kën. Ntsojkpyës ets miits nkë'ëyaktëty ets ja Kristë mëët mpëktëty m'uuktëty ijxtëm tu'uk ja to'oxy ëna'kën wintëy wiinkujkpë.

³ E tsë'këpës ko jëtu'un mjatëty ijxtëm ja Eva ojts ja tsa'any wyin'ëënyën, paatyës njëjpjawë ko miits nëjkx näjyëtu'un myajwin'ëëntë ets miits xykya'ëktsojknëtëty ja Kristë mëët ja oyjyot oywyinma'any.

⁴ Mmëtënaaytyëp miits ko pën mnija'tëtë ets mtuk'ëwa'anxëtë wiinkpë ja Jesús, ka'apë të ntuk'ëwaanëtë, ets xykyupëktë jotkujk ja wiinkpë winma'any, ka'apë jyä'äjëtyën mëti'ipë të xykyupëktën ets näjyëtu'un xy'ëxajëtë mëti'ipë tyijtëpën oy aaw oy ayuk, ka'apë jyä'äjëtyën mëti'ipë të xynyijawëtën.

⁵ Oy jyajëtu'unëty, ka'ap yë'ëjëty mëpaat xyaj'amutsktëkës, oy nëkoo jyanätyijëtë Jesús y'ijxpëjkpë kopk.

⁶ Oyës nyajtijy koos n'awë'ëmë, nija'apës mëti'ipës nikäjpxypën. Miitsëty tëë wa'ats ntuk'ix ntuknijawëtë wi'ixës winë të ntuntën.

⁷ ¿Tëkoopyës jëtää koos ka'ap nnipëky ko miits ntukmëmatya'aktë ja oy aaw oy ayuk ets ko yujy tëtä'äky të nnäpyëjktä'äkyës ets miits mëj këjxm nyajwë'ëma'antë?

⁸ Wiinkpë ja mëpëjkpëtëjk ja myeeny të nyajtuunës ets miits nmëtuntë.

⁹ E koos jam n'ojtsy ma miitsëtyën, ojtsës nyajmëyäty mëti'ipës ënety xykya'ijtëpën, je'eyëp ko kä'äp ojts miits n'amëtowtë, ka'ap ojts pën n'atsipyës. Ko ja nmëku'uk'ajtëm jyajtë mëti'ipë ënety tso'ontëpën Macedonia, yë'ë ojts xymyo'otë mëti'ipë ënety ëjts nyajmëyäjtypyën, kä'äp miits n'amëtoowtë tii ets kä'äpyëm tii n'amëtowa'antë.

¹⁰ Mëtëyës n'ëna'any ko nija'apës ja Kristë ja tyiyajtën. Ka'ap tjëkyepy pën xypyëjkëtyës ja xoontakën mëti'ipës nmëët'ajtypyën ma ja nmëku'uk'ajtëmën mëti'ipë yajpatëpën jam Acaya.

¹¹ ¿Tii ko jëtu'un n'ëna'anyës? ¿Wä'än jëtää yë'ëjëty ko ka'ap ntsoktë? Wa'ats ja Dios nijawë ko miits ntsoktë.

¹² E ëjts je'eyëmës ntuna'any mëti'ipës ntsojkpyën këtiipë yajtu'umo'otëty ja wiinkpë mëti'ipë nätyukmëjpëjktakëtëp ëëts ja ntuunkëty,

¹³ yë'ëjëty, ka'ap yë'ë'atë mëti'ipë mëtëy ijxpëjktëpën, win'ë'ënpë yë'ëjëty mëti'ipë näpyëjktakëtëpën ijxtëm ja Kristë ja y'ayukkäjpxynyajxpën.

¹⁴ Ets ka'ap mëk nja'awëmëty, yë'ëpaat yë mëjku'u nyäpyëjktä'äkyë ijxtëm yë Dios kukäjpxy mëti'ipë ajajp atë'kxpën.

¹⁵ Paaty yë tyuunpë jëtu'un nyäpyëjkta'akëtë ijxtëm ja ja'ayën mëti'ipë winë oy pyaye'epyën. E oknëm nëjkx ja Dios tyiytyunëtë, ijxtëm pyaat'atëtën.

Yë Pablo myëët'ajtyp yë mëk'ajtën wi'ix nyämyëjawëtëty

¹⁶ Tyam jatëkok nëëmëtë ko ka'ap pën y'ëna'anëty koos ëjts nkupojëty. Pën ënantëp koos nkupojëty, min n'ëkmëmëtya'aktë tä ja'akyupojën etsës näjyëtu'un mëj këjxm nëpyëjkta'akëtëty,

¹⁷ je'eyëp koos ënät nämyëjpëjktä'äkyë jëtu'un yaj'ixa'any tääjës jeexyë tëë nkupojtä'äkyën ets ka'ap ënety yë'ëjëty ja aaw ayuk n'ëkpatuunës mëti'ipë ja Wintsën tsyojkpyën.

¹⁸ Tää ja ja'ay may mëti'ipë kë'ëm nätyukmëjpëjktakëpën ja naaxwiinyëtë winma'any, minës ëjts näjyëtu'un n'ëknämyëjpëjktakëpë.

¹⁹ Miitsëty mëk wijyjyä'äy yë'ëjëty, paaty jotkujk xymyëtänëtë ja tsuuja'ayëty.

²⁰ Mmëmëtaktëp miits näjyëtu'un ko pën atsip tii mtuktuna'anëtë, mëti'ipë mtsuu'ijxëtëpën, mwin'ë'ënëtëpën, mëti'ipë mkamëj'ijxëtëp ets m'apojtsë'këtëp.

²¹ Oyës njatsëtyuntë koos jëtu'un n'ëna'any, ëëtsëty ka'apës ojts jëtu'unpë ja winma'any mpaatë. Je'eyëp ko pën jää ja wiinkëtypë mëti'ipë nätyukmëjja'awëtëpën, tyamës näjyëtu'un n'ëtë'ëtsëty oy wiink jyayaj'ixy.

²² ¿Hebreo ja'ay yë'ëjëtyë? Ëjts näjyëtu'un. ¿Israel ja'ay yë'ëjëtyë? Ëjts näjyëtu'un. ¿Abraham yë'ë y'u'unk y'okëtyë? Ëjts näjyëtu'un.

²³ ¿Kristë myutuuntëpë? Wäänë ni'ikës ëjts, oy jëtu'un yajmëtoy kupojës yowë koos jëtu'un n'ëna'any. Wäänë ni'ikës winë të ntuny këtiinëm yë'ëjëty, kanaak okës të nyajtsumy këtiinëm yë'ëjëty. Ni'ikës të nyajwopy të nyajka'atsy këtiinëm yë'ëjëty, kanaak okës o'kënjëjp'am të nyajpaaty.

²⁴ Mëkoxk okës ja Israel ja'ayëty të xywyop të xykya'atstë, i'px majk mokx majktaxk kë'ëjaty.

²⁵ Tëkëëk okës të nyajkepywyopy ets tu'k'okës të nyajtsaaka'atsy. Tëkëëk okës të xymyëkiny ja kepy nëëwinye'epyë ets jawäänjatyës të nkanëëji'kxy; tu'kxëëw tu'ktsuujës të n'ity mejy wiinkëjxy.

²⁶ Tëë xii yaa njëtityës. Nija'apës ja ëyo'on ma mëj nëëkomën, näjyëtu'un ma ja mä'tspëtyën, maas ja nmëkukajpnën, näjyëtu'un xynyë'ëtän xytyu'utänëtës mëti'ipë ka'ap jyutiis'atën. Tëës n'ixy ja ëyo'on ma ja mëjëtypë kajpnën ets näjyëtu'un aayjyotm pejyjotm ets ma ja mejyën; tëëjës n'ixy ja ëyo'on jotmay ma ja mëti'ipë nätyijëtëpën mëpëjkpëtëjk.

²⁷ Tëës nmënaxy nyajnaxy ja tuunk mëkpë tsaatsypë ets ja amay jotmay, ma nkama'ay nkapo'kxyës, ma ayuu nëëtëëtsë të n'ityësën ets ma ja potmjot näjyëtu'un të nyajnaxyës ets ko ja nwit nxoxës të kyaka'ty.

²⁸ Jëtu'un ya'atë ets oytyiijëty, jëpom jëpomës ja njotmay të myëjë të myäyë mëëtpë ja mëpëjkpëtëjk.

²⁹ Ko pën pya'ampety, näjyëtu'unës näpyëjktä'äkyë ijxtëm yë'ëjëtyën; ets pën jää pën tyajpokytyuny ja myëku'uk, ëjts määpy tajpës ets äjkëpës ijty.

³⁰ Pën xyjyäntypyaat'ajtpës ja nämyëjpëjkta'akë nikë yë'ëjës nnätyukmëjpëjkta'akëtëp koos n'ëyoopëja'ayëty.

³¹ Ja Dios, ja Wintsën Jesukristë Tyeety, mëti'ipë paat'ajtëp ja wyintsë'kën xëmëkyëjxmëpë, nyija'ap koos tëy n'ëna'any.

³² Ko ojts n'otyës Damaskë, ja yajkutujkpë mëti'ipë myëtuumpyën ja Aretas, ojts tni'ënä'ämë ets ja tu'u tyaj'ëtujkta'atëty mëti'ipëjaty kajpntum ja'ajtpën etsës nyajmatsëty.

³³ E tam y'ijtë mëti'ipë katsyjoty xykyutëëynyajxtësën ventana ëkë'ëm ma ja potsyën mëti'ipë ja kajpn nyapots'ajtypyën, jëtu'unts nkäktsokyës.