2 Corintios 10 - Biblia Dc en Mixe de Quetzaltepec

Ja jemypyë ja winma'any

¹ Ëjts, Pablo, n'amëtoy npëjktsoyës ja mëyajtën ma miitsëtyën, mëët ja Kristë yujy'ajt nyäxym'ajtën; oy pën y'ëna'anëty ko amonyës n'ity koos jam nyajpaaty ma miitsëtyën, ko ku'aawës näpyëjktä'äkyë koos jëkäm nyajpaaty.

² Ka'ap wyi'ixëty, tyamës n'amëtoy npëjktsoy ja mëyajtën, ko ënety nëjkx nku'ixëtë, këtii xy'ëwa'atstëty etsës ntukjoot'anpëkëty ja jä'äjëty mëti'ipës xynyiwaanpäjtëpën, mëti'ipë ënantëpën koos jëtu'un winë ntuny nkäjpxy ijxtëm ja ja'ayëtyën mëti'ipë ja naaxwiinyëtë winma'any yajtuuntëpën.

³ Tëy yë'ë ko naaxwiinyëtë ja'ay ëëts'ajtëmë, je'eyëp ko ka'ap jëtu'un ntsiptu'unëmë ijxtëm ja naaxwiinyëtë ja'ayëtyën.

⁴ Ja mëti'ipë yajmëtsiptuunpën ka'ap yë'ëjëty mëti'ipë yaajën naaxwiiny, yë'ë ja Dios ja myëk'ajtën mëti'ipë maayëpën ja kuttujkën tyajkutëkoyëty. Jëtu'unës nyajkutëkoytyë ja mëti'ipës nanëkoo xynyi'ë'ënëtëpën,

⁵ ets tëkokyë ja mëj këjxmëpë ja winma'any mëti'ipë y'ëtujkpyën ets ka'ap tyu'uye'eyëty ja Dios ja myëk'ajtën. Tu'kë'ëyë ja ëxëëk winma'any jamës npëjktakta'atë ma ja Kristën ets yë'ë tmëmëtowtëty,

⁶ ets jëjp'ixyës nyajpaatë ets tkumëtowtëty mëti'ipë käjpxy kyumëtoownajxtëpën, ko ënety miitsëty mëtëy winë xytyuntë.

⁷ Miits yi'iyë m'ijxtëp mtuntëp wi'ix tii nyikëxë'ëkyën. Pën ënaanp ko ja Kristë jä'ä'ajtëp, wa'ats tnijawëty koos näjyëtu'un ja Kristë xyjyä'ä'atë.

⁸ Oyës janaam jatsojk ja n'aaw n'ayuk niwinpity ets ka'ap jëtu'un kyutukyëty, ka'apës ntuktsëtyuny; jä'äkyëjxmës ja Wintsën të xymyo'otë ja kuttujkën ets miits mwinpätëty, ka'ap yë'ëjëty ets miits nyajkutëkoytyëty.

⁹ Ka'apës ntsoky ets m'ëna'antëty ko miits ya'atë noky ntuk'ëtsë'ëkëja'antë.

¹⁰ Jä'ä ko tam mëti'ipë ënaanpën: Yë Pablo nëkoo y'ëk'ënä'ämnë mëët yë noky, koos muum nyajpaaty ka'apës pën tii ntuk'atsip'aty ets ka'apës pën tii atsip ntuktuny.

¹¹ E mëti'ipë jëtu'un ënaanpën yë'ë nyijawëp, ko ijxtëm winë nimëtya'aktënës ets ijxtëm winë nja'atënës oyës jëkäm nyajpaatë, jëtu'unës winë ntuna'antë koos jam nyajpaatëty ma miitsëtyën.

¹² Ka'apës nnätyuk'a'ixëtë etsës jëtu'un nnäpyëjkta'akëtëty ijxtëm yë ja'ayëtyën mëti'ipë amëj akëjxm näyajnajxëtëpën. Tsuuwinma'any yajtuuntëp ko xim yam kë'ëm nyäy'ijxkijpxëtë.

¹³ Ëëtsëty, ka'apës nätyukmëjjawëja'anëtë mëti'ipës ka'ap xypyaatën, Tiosës të xymyo'otë yë tuunk; yë tuunk paatyës të nyajmo'otë etsës ntuntëty ma miitsëtyën Corinto ja'ayëty.

¹⁴ Paatykyëjxm ja nkë'ëmwinma'any nkayajtuntës. ¿Tii jëtu'un jeexyë tuunëp jajtëp ko jeexyë ëëts jëwyiin të nkanëjkxtë ma miitsëtyën? Ëëtskyëjxm miits të xynyijawëtë ja oy ja aaw oy ayuk ma ja Kristë yajnimëtyä'äkyën.

¹⁵ Ka'apës yë'ëjëty ntukxoonta'aktë ja tuunk mëti'ipë wiinkëtypë të tuntën, yë'ëjës njëjp'ijxtëp ets miits mwinpätëty mëpëjkënkyëjxm etsës njaaktuntëty mëët miitsëty ijxtëm ja Dios tsokyën.

¹⁶ Njëjp'ijxtëpës etsës ja oy aaw oy ayuk njaakkajpxwa'kxtëty ma ja itjotmën jamtsowpën, ma miitsëtyën; ka'apës ntëkëja'antë ma ja wiinkëtypë tëë tyuntën, këtiipës nätyukyajmëjnaxëtëty ja wiink ja'ay ja tyuunk.

¹⁷ Pën jää pën nyämyëjpëjktä'äkyë, nikë oy ko ja Wintsën yë'ë tmëjpëjkta'akëty.

¹⁸ Jä'ä ko ja ja'ay mëti'ipë mëpaat mëj'äämpy nyäxyën Dios wyintum, ka'ap yë'ëjëty mëti'ipë kë'ëm nämyëjpëjktakëpën, yë'ë mëti'ipë ja Wintsën yajmëjnajxëpën.