2 Corintios 1 - Biblia Dc en Mixe de Quetzaltepec

¹ Ëjts Pablo, Jesukristë y'ayuk kajpxwa'kxpë. Ëjts, mëët ja Timoteo ntuknikäxtës ya'atë noky ja mëpëjkpëtëjkëty mëti'ipë jam ye'eymyujktëpën Corinto ets ja Dios ja jyä'äyëty mëti'ipë yajpatëpën ma Acaya itjotmën.

² Wä'än ja Dios Teety ets ja Wintsën Jesukristë myo'ojëtë ja kënu'kxën ets ja jotkujk'ajtën.

Kukajpxën ja'awëkyëtakën

³ Mëjjaw jaantyjawë mëpaat nyäxy ja nWintsën'ajtëm Jesukristë ja Tyeety, jä'ä ko yë'ë Tios'ajtp mëti'ipë të xypya'ëyo'owëmën ets ja Dios mëtipë xëmë xyajjotkujktakëmën.

⁴ Yë'ë xyjyotmëkmo'oyëm ko nyajpatmëty ëyo'onjoty ets jëtu'un nyajjotkujk'ajtmëty näjyëtu'un mëti'ipë ëyoowtëpën ijxtëm ja Dios Teety të xyajjotkujk'ajtëmën.

⁵ Jä'ä ko jëtu'un ijxtëm ja Kristë y'ëyooyën, jëtu'un ëëtsajtëm n'ëyo'owëmë mëët yë'ë, näjyëtu'un mëët ja Kristë npatëmë ja jotkujk'ajtën.

⁶ Pën ëyoowtëp ëëtsëty, yë'ëkyëjxm ets miitsëty xypyaatëty ja jotkujk'ajtën ets ja nitsokën; ets pën xyajjotkujk'ajtpës ja Dios, yë'ëkyëjxm ets miits mjotkujk'atëty ets amëk jotmëk xymyënax xyajnaxtëty ja ëyo'on mëti'ipë ëëts näjyëtu'un të nmënax nyajnaxtën.

⁷ Ntukjotkujk'ajtëp miitsëty, jä'ä ko yajnijawë ko jëtu'un ijxtëm miits xymyëj'ëyoowpätësën, näjyëtu'un ja jotkujk'ajtën xypyaata'antë.

⁸ Mëku'uktëjkëty, yë'ë miits ntuk'ëwaanëjantëp wi'ixës ja jotmay të ntuknaxtën jam Asia y'itjotm. Mëk ëëts ja ëyo'on të npaat të n'ixtë, ka'ap myëtënaaynyëty; ka'apës n'ëkjëjp'ijxnëtë ënety ets jam npëtsëmtëtyës juuky.

⁹ Jëtu'unës ënety ja n'aaw njot nja'awënëtës ijxtëm jeexyë ja o'kën tëë xymyëwinkoonëtës. E yë'ëjës të xytyukni''ixëtë wi'ix ja Dios ntuk'ijxpätëtyës, mëti'ipë ja o'kpë yajjuukpyijkpyën.

¹⁰ Ets ja Dios të xyaj'ëwaatsëpëtsëmtës o'kënjëjp'am. Njëjp'ijxtëpës ets xëmë xy'akëëytyuk xy'axajtuktëtyës

¹¹ pën miitsëty xypyutëjkëtëpës mëët ja mjëëytyak mnu'kxtakënëty ma Tiosën. Pën nimay mëti'ipë xykyënu'kxtaktëpës, näjyëtu'un nimay tkukajpxëja'antë ja Dios ko ënety ëëtsëty ja Dios nmëtuntës.

Wi'ix ko ja Pablo ojts kyanëjkxyën jam Corinto

¹² Nmëët'ajtëpës ja mëk'ajtën ets mëj këjxm näyajnaxëtëtyës, yë'ë ko näjya'awëtëpës koos oy njuuky'atë yaa naaxwiiny ets oyës ja jot winma'any të nyajkëxë'ëktë ma miitsëtyën. Ka'apës yë'ëjëty yë naaxwiinyëtë wijyajtën të nyajtuntë, Dios yë mëyajtën të tuny etsës oy njuuky'atëty.

¹³ Ma ja nokyën, ka'ap jap ojts nkëxja'atës mëti'ipë ka'ap tjëkyepy xykyajpxtëtyën ets xywyinmëtowtëtyën. Njëjp'ijxtëpës ets yajxon xyjyä'äkyukëtëty

¹⁴ ko miits tëë xynyijawëtë wi'ix ëëts ja jot winma'any nmëët'atën, ko ënety wyimpity ja Wintsën Jesús, jää nëjkx mnäyjyawëtë akëtä'äky jotkëtä'äky ëëtskyëjxmëty, näjyëtu'un ijxtëm ëëts nëjkx näjyawëtën akëtä'äky jotkëtä'äky mëët miitskyëjxmëty.

¹⁵ Mëët ya'atë ja jotkujk'ajtën, jëtu'unës nja'ëna'any ko miits nni''ixa'antë jëwyiin mäjtsk ok nipëtë'ëkën.

¹⁶ Jëtu'unës ojts n'ëk'ënaanpë ko ënety miits jam ninaxa'antë koos nnëjkxëty Macedonia ets jatëkok koos nwinpitëty. Jëtu'un xypyutëkëtëtyës koos ënety nnëjkxy jam Judea.

¹⁷ ¿Ka'apës jëtää ojts oy nmëmay nmëtajyë? ¿Wä'än m'ëna'antë koos je'eyës nkajpxminy nkajpxëpyë?

¹⁸ Wa'ats ja Dios nijawë ko mëtëy winë të ntukmëmëtya'aktë.

¹⁹ Jä'ä ko yë Jesukristë, Dios yë y'u'unk, mëti'ipë Silvano, Timoteo ets ëjts të nimëtya'aktën ma miitsëtyën, ka'apës je'eyë të nkajpxmin të nkajpxëptë,

²⁰ ma yë'ë tëë tyuunta'ay jyajta'ayë mëti'ipë ja Dios wyaantakën. Paaty ko ja Dios nmëjja'aw njaantyja'awëmë, jëtu'un n'ëna'anëmë: Tëy jëtu'un mëët yë Kristë Jesús yë xyëëw.

²¹ Dios tëë tuknipëjktaakë ets ëëtsëty mëët miitsëty tu'ukyë nyajpatmëty mëët ja Kristë, ets kënu'kxy nwë'ëmëty.

²² Tëë ja ijxwë'ëmën tpëjktä'äky ma ëëtsajtëmën ets tëë ja Kënu'kxymyëkajtën tpëjktä'äky ma ja njoot'ajt nwinma'any'ajtëmën ets yajnijawëty ko xypyaat'ajtëmë ja oyajtën mëti'ipë miinpën.

²³ Wa'ats ja Dios nijawë ko ka'anëm nnëjkxyës jam Corinto, jä'äkyëjxm ko miits nkayajjotmaytyëkëja'antë, ets Dios yë'ë wa'ats nyija'ap tii koojën.

²⁴ Ka'ap ëëts niwintsën'atë ja mmëpëjkënëty; yë'ëjës ntsojktëp ets nputëkëja'antë ets tu'kmukyë akujk jotkujk myajpatmëty, jä'ä ko miitsëty mëk myajpatnëtë ma ja mëpëjkënën.