1 Timoteo 5 - Biblia Dc en Mixe de Quetzaltepec

Wi'ix ja Timoteo jyä'äy'atëty ma ja mëpëjkpëtëjkën

¹ Ka'ap ja mëjja'aytyëjk xy'ojëty; mëët ja tëtä'äkyajtën winë xytyuknëëmëty jëtu'un tä jeexyë xytyeetyëtyën. Jëtu'un xyjyawëty ja ëna'ktëjk ijxtëm ja mmëkä'äxën.

² Ja mëj ja'ayëtypë ja to'oxytyëjktëjk jëtu'un xyjyawëty ijxtëm ja mtaakën; e ja to'oxy ëna'ktëjk jëtu'un xyjyawëty ijxtëm ja mmëka'axën, wa'ats wiin wa'ats jot.

³ Putëkë ja ku'ooky tyo'oxytyëjk mëti'ipë ka'ap tmëët'atyën maa nyëjkxëtyën.

⁴ E pën jam ja ku'ooky tyo'oxytyëjk ja y'u'unk y'ëna'k ëkë y'ok u'unk y'ok'ëna'k; yë'ë patëtëp tputëkëtëty ja tyaak ëkë ja nyanwelë, jä'ä ko yë'ë të yajyääk të yajpätëtë ma teety taak të txëëwatën. Jëtu'un ja Dios tukjotkëtä'äky.

⁵ Ja ku'ooky tyo'oxytyëjk mëti'ipë nätyu'uk të wyi'imyën, Dios ja yi'iyë tyuk'ijxpejtyp. Ka'ap t'ëxmatsy ja jëëytyak nu'kxtaak, ijtp ja xëëny koots ja Dios tja'amyetsy.

⁶ E ja ku'ooky tyo'oxytyëjk mëti'ipë ukp mukëpën ëkë äjtsp pujtpën, jëtu'un ja nyäxy tä jeexyë y'ooky'ityën ma jyuuky'ätyën.

⁷ Tuk'ëwaanë ya'atë ja ja'ayëty këtiipë pën tii yajtukpoky'ixëty.

⁸ Pën ka'ap nyämyëmay nyämyëtajyë ets ka'ap ja jyiiky myëku'uk tmëmay tmëtajy, ka'ap jëtu'unpë ja ja'ay myëpëky ets o'ktëy ni'ik y'ëti'itsy këtiinëm ja mëti'ipë ka'ap myëpëktën.

⁹ Yi'iyë kuja'ay itëp yë mëjja'ay to'oxytyëjkpë mëti'ipë tëë ja jyëmëjt nyajxnën tëkë'px ets mëti'ipë tu'uk je'eyë yë nyiye'etyëjk të tmëët'atyën.

¹⁰ Yajnija'awëp ko oy ënety winë tuny, pën tëë ja y'u'unk y'ëna'k tsuj tyajyeeky, pën tëë ja ja'ay oy tsuj tyajja'ty ma tyëjkën, pën tëë ja mëpëjkpëtëjk ja tyeky tpujë, pën tëë tputëkë mëti'ipë ëyo'onpatëpën. Ets pën tëë winë oy tuny.

¹¹ Ka'ap xykyuja'ajëty ja ku'ookytyo'oxy mëti'ipë ka'anëm nëkoo myëjja'ayënëm; jä'ä ko wä'änxyëp nëjkx ok pyiky ko ënety ja Kristë ka'ap t'ëkmëpëkanë,

¹² tääts nëjkx kë'ëm nyäyajpokytyëkëty ko ënety tkapatuny mëti'ipë të twaantä'äkyën.

¹³ Näy tää ja'ay jyëtitë winjëën wintëjk mëti'ipë nuuxëtyën ets ka'ap je'eyë nyuux'atë, nän pi'itskajpxtëp, xii yaa muum nyakuye'ey nyakunaxëtë ets wi'ix kawi'ixëty y'ëna'antë.

¹⁴ Paatyës nëëmëtë ja ku'ooky tyo'oxytyëjkëty ëna'këtypë ets ënätyë pyëktëty, wä'än tmëët'atë y'u'unk y'ëna'këty, wä'än jyëënjoty tyëkoty tuntë, këtiipë nëkoo tëkatsy ja mëtsip nyikajpx nyimëtya'akëtëty.

¹⁵ Jä'ä ko tëë jënaakën ja ku'ooky tyo'oxytyëjk t'ëxmajtsnëtë ja Dios ets ja mëjku'u të tpanëjkxtë.

¹⁶ Pën jam ja to'oxytyëjk mëti'ipë mëpëjktëpën tmëët'atë ja jyiiky myëku'uk mëti'ipë ku'ookyën ets to'oxytyëjk, wä'än tputëkëtë këtiipë tëkatsy yajnikajpx yajnimëtya'akëty ja mëpëjkpëtëjkëty. Jëtu'unts ja mëpëjkpëtëjk tjëkyäptëty wi'ix tputëkëtëty ja mëjja'aytyëjk to'oxytyëjkpë mëti'ipë ku'ookyën ka'apë tmëët'atyën maa nyëjkxëty ets pën putëkëtëp.

¹⁷ Ja mëjja'aytyëjk mëti'ipë nyikopk'ajtëpën ja mëpëjkpëtëjk, paat'ajtëtëp ja wintsë'kën ets ja putëjkën; wäänëni'ik pyaat'atëtë mëti'ipë ja Dios ja y'aaw y'ayuk kyajpxwa'kxtëpën ets yaj'ijxpëjktëpën.

¹⁸ Jä'ä ko jëtu'un ja Dios ja y'aaw y'ayuk y'ënä'äny mëti'ipë këxja'ay miinpën: Këtii ja tsajpkaa xytyuk'ajänëty ja xuumy ko ja tsajpmok twintäänëty. Näyjyëtu'un y'ënä'äny: Yë tuunpë patëp yajmëjuyëty.

¹⁹ Ka'ap xymyëjpëjkta'akëty ko yajkni'ëënëty tu'uk yë mëjja'ay, pën ka'ap nimäjtsk ëkë nitëkëëk ja'ay tnikajpxë.

²⁰ Pën pokytyuuntëpën, tuknëëmë ma ja mayjyä'äyën ets ja ja'ay tsyë'ëkëtëty.

²¹ Y'ijxyp myëtoopy ja Dios Teety ets ja Jesukristë ja tsajpjotmëtë kukäjpxy winwityëtsypë, ko ya'atë yam ntuknipëky ets xykyuuytyunëty. Tu'knax mpaye'eyëty, ka'ap wyin'ixy wyinkexyëty.

²² Ka'ap nëkoo ja ja'ay xykyë'ënixajëty pën ka'ap yajxon të xywyinmay të xywyintajy, këtiipë xymyëpokytyëkëty ja wiink ja'ay ja pyoky. Wa'ats mijts mnäyaj'itëtëty.

²³ Mëët ko xëmë mjotpëkyë, ka'ap yë tëtsyk nëë yi'iyë xy'uukëty, uuk wäänë näjyëtu'un ja tsatsym nyëë.

²⁴ Tää ja'ay jënaakën mëti'ipë pyoky nikëxë'kpën ka'anëm ënety yajpaye'ey, e ja nimaypyë jäänëm yajnijawëty ko ënety tëë yajpaye'ey.

²⁵ Näyjyëtu'un ko ja oypyë ntu'unmëty, nikëxë'kp jä'ä; e mëti'ipë ka'ap y'oyëtyën ka'ap xëmë yu'utsy y'ity.