1 Timoteo 4 - Biblia Dc en Mixe de Quetzaltepec

Mëti'ipë y'ëxmatsantëp ja mëpëjkën

¹ Wa'ats ja Kënu'kxymyëkajtën tnikäjpxy ko ja ja'ay t'ëxmatsa'antë ja mëpëjkën ko ënety ja tiempo kyëxanë, yë'ë pyatunantëp ja ijxpëjkën ka'apë myëtëyëtyën mëti'ipë ku'oypyë jyä'ä'ajtypyën.

² Yë'ë myëjpëjkta'akantëp ja ja'ay mëti'ipë wiinkë'ëy akë'ëy ja'ay'ajtpën ets mëti'ipë win'ë'ënpën, jap jyootjoty wyinma'anyjoty tsa'ay jap yajpaaty mëët ja ëxëëkpë.

³ Ya'atë ja'ayëty yajkupojktëp ja pëjkën ukën, ja kääky uuky mëti'ipë ja Dios të tuknipëjktaakën ets ja mëpëjkpëtëjk tkaytyëty t'uuktëty mëti'ipë nyija'awëtëpën ja tëyajtën ets tkukajpxëtëty.

⁴ Jä'ä ko tu'kë'ëyë mëti'ipë Dios të tyajkojyën aak'oy yë'ë; ets ka'ap tjëkyepy yajjëjpmëkajpxëty mëti'ipë ja Dios jëyëjp të yajkukajpxën,

⁵ jä'ä ko yë Dios yë y'aaw y'ayuk ets nu'kxtakën yë'ë mëët winë wyä'ätsy.

Jesukristë y'oymyëtuunpë

⁶ Tukni''ixë ya'atë mëku'uk, Kristë Jesús ënety jëtu'un oy mmëtuumpy, ets mnaxëty tu'uk ja mëtuunpë mëti'ipë yajnikëxëypyën ja mëpëjkën ets ja ijxpëjkën mëti'ipë mkuuyjyuuky'äjtypyën.

⁷ Këtii xymyëtoowkukëty yë käjpxy mëtyä'äky mëti'ipë ka'ap tsyoowpaatyën. Yë'ë tun ja pa'ëyo'ow najts'ëyo'owën.

⁸ Oy ja ni'kx kopk tjatuk'oy'äty ko näwyo'on näpyojtëmëty, ja pa'ëyo'ow najts'ëyo'owën ni'ik tyuny oymyaajëty, jä'ä ko yë'ë nyimëtyäkpy yë juukyajtën tyampë ets mëti'ipë miimp wiinkoonpën.

⁹ Tëyajtën yë'ë ets paat'ajtëp ja'ay tmëpëktëty.

¹⁰ Paaty ëëts ntuntë mëk, jä'ä ko yë Dios ntuk'ijxpätës juukpyë, mëti'ipë ni'ëmukë ja'ay yajnitsokpyën, yë'ë ni'ik mëti'ipë mëpëjktëpën.

¹¹ Ya'atë mni'ënä'ämëp ets yë'ë ja'ay mtuk'ijxpëkëp.

¹² Këtii xykyupëkëty ko pën mkawintsë'ëkëtëty ko mutsknëmëty; mijts ni'ikyë mëpaat ijxpäjtën xyäky ma mëpëjkpëtëjkëtyën, ko oy mkajpxëty, oy winë xytyunëty; mmëët'atëp ja tsojkën ja'awën ets ja mëpëjkën ets oy yajxon mnäyajjuuky'atëtëty.

¹³ Naamka'anëmës jam nnëjkxy, tukwinkajpxë ja'ay ja Dios ja y'aaw y'ayuk. Yajjotkujkta'ak ja jëëky mëku'uk ets Yaj'ijxpëk.

¹⁴ Këtii ja mtuunk xyajtëkoyëty mëti'ipë mëët'ajtypyën, mëti'ipë ja Dios të mmo'oyën ets käjpxynyajxpë m'itëty ko ojts ja mëjja'aytyëjk mkënu'kxyë.

¹⁵ Mëtoow'it ya'atë yajxon ets ja ja'ay t'ixtëty wi'ix ja mmëpëjkën yeeky pyetyën.

¹⁶ Mnäkyëwent'atëtëp kë'ëm ets mëk xykyëwent'atëty mëti'ipë ja'ay mtuk'ijxpëjkpyën ets jotkujk myajpaatëty. Pën mtuumpy jëtu'un, mpaatëp ja nitsokën ets myajnitso'okëp ja mëti'ipë ënety mëtoow'ijtëpën.