1 Timoteo 2 - Biblia Dc en Mixe de Quetzaltepec

Ko ja Pablo tuk'ëwaanë ja Timoteo wi'ix yë Tios yajja'amyätsëtyën

¹ Tim mëwyiin, npëjktsoyës ets ja Dios yaj'amëtowëty winë, yajmëkajpxëty, yajmënu'kxta'akëty, yajkukajpxëty ma ni'ëmukë ja'ayëtyën.

² Yajninu'kxta'aktëty ja yajkutujkpëtëjk ets kutuunktëjk; jëtu'un jotkujk n'ijtmëty njuuky'ajtmëty, mëët ja pa'ëyo'owën ets oy tsuj njuuky'ajtmëty.

³ Ya'atë jëtu'unpë y'oyjya'ap yë Dios mëti'ipë xyajnitsokëmën,

⁴ yë Dios tsyojkpy ets ni'ëmukë ja'ay nyitsokta'atëty ets nijawëtëty ja tëyajtën.

⁵ Jä'ä ko tu'ukyë je'eyë Dios, ka'ap maa wiinkpë ets tu'ukyë ja ja'ay mëti'ipë itkujky yajpatpën ma ja Tiosën mëët ja naaxwiinyëtë ja'ay: Yë Kristë Jesús.

⁶ Jesukristë tëë tku'ookë ja ja'ay ni'ëmukë ets ja nitsokën tpaatëty mëti'ipë yë'ë yajnikëxë'kën jëna'a ënety ja nyixëëw të tpaatyën.

⁷ Paatyës të nyajpëjktä'äky ayuk käjpxynyajxpë etsës yë ja'ay ntuk'ijxpëkëty yë mëpëjkën ets tëyajtën mëti'ipë ka'ap jyutiis'atën. Tëyës n'ëna'any, ka'apës n'antä'äky.

⁸ Ntsojkpyës ets ja ja'ay tja'amyätstëty ja Dios oymyaatsowëty, ets ja kyë'ë tyujkxajtëty ma ja Tiosën mëët ja oyjyot oywyinma'any ets ka'ap myëëtëty ja tsip äkë.

⁹ Ntsojkpyës näjyëtu'un ets ja to'oxytyëjk nyäxyoxëtëty wintëy wiinkujk ets nyäy'oytyunëtëty ijxtëm pyaat'atyën; ka'ap nëkooyë ja wyääy kyopk nëkaax tsajpkaaxtëty, nän ka'ap ja tsowëtypë ja kë'ëjiits ëkë ja nantsëm tyajtuntëty.

¹⁰ Yë'ë mëpaat oy nyätyukyajkëxë'ëkëtë ja oypyë tuunk, ijxtëm pyaat'atëtën ja to'oxytyëjkëty mëti'ipë yajmëjnajxtëpën ja Dios.

¹¹ Wä'än ja to'oxytyëjk näyyaj'itëtë ënä'ämënpa'tkë'ëm, amonyë t'amëtoow'itëty ja kajpxwijën;

¹² ka'apës nyajkutuky ets ja to'oxytyëjk yaj'ixpëkëty ëkë ja ye'etyëjk t'ënä'ämëty; wä'än amonyë tmëtoow'ity je'eyë,

¹³ jä'ä ko ja Dios, yë'ë ojts jëyëjp tyajkojy ja Adán ok ja Eva ojts kyojy.

¹⁴ Ja Adán ka'ap ojts yë'ëjëty yajwin'ëëny, to'oxytyëjk ojts yajwin'ëëny ets ojts kyuka'ajë pokyjoty.

¹⁵ Ja to'oxytyëjk näyajtso'okanëp kë'ëm ma y'ityën taak tsi'tsk, ets ni'ik ko wijy yajpaatëty ma ja mëpëjkënën, ma tsojkën ja'awënën ets ko wa'ats jyuuky'atëty.