1 Tesalonicenses 3 - Biblia Dc en Mixe de Quetzaltepec

¹ Paaty, koos ënety ka'ap n'ëkmëmëta'akanëtë ja jotmay, paatyës ojts ntimwyë'ëmtë jam Atenas

² ets nkäjxtës ja nmëku'uk'ajtëm Timoteo, mëti'ipë Dios myëtuumpyën ets mëti'ipës mëët nkajpxwä'kxtën ja aaw ayuk oypyë ma Kristë yajnimëtyä'äkyën. Paatyës nkäjxtë ets nëjkx mku'ixëtë, mjotmëkwinkajpxëtë wi'ix tu'ukyë ja mëpëjkën xymyëët'attëty,

³ këtiipë pën myäyëty tyajëty ma ya'atë tsyiptä'äkyën. Wa'ats xynyijawëtë ko tëë nyajtuknipëjktakëmë ets n'ëye'eymyëty.

⁴ Näyjyëtu'un ko ënety ëëts jam njaakyajpaatë ma miitsëtyën, ojts ntuk'ëwaanëtë ko ja ëyo'on nmëët'ata'anëmë; jëtu'un të jyänty tyuny të jyänty jyätyë, tä xynyijawëtën.

⁵ Paaty, koos ënety ëjts ka'ap n'ëkmëmëta'akanë, ënätës nkejxy mëti'ipë myajtëwëtëpën wi'ix ja mëpëjkën xymyëët'attëty, jä'ä ko tsë'këpës ënety ko ntij yë mëjku'u tëë myajtuuntëkoyëtë ets ja ntuunkëtyës ka'ap tsyoowpaatëty.

⁶ E ja Timoteo ojts ja wyimpity ets tmëja'ajty ja ayuk oypyë wi'ix miits mmëpëktën ets ko ja mëku'uk oy xytsyoktë xyjyawëtë. Jëtu'unës të xynyëëmëtë ko xëmës miits xyjyä'ämyätstë ets ko näjyëtu'un ja tsojkën xymyëët'atë etsës xyjyapaata'an xyjya'ixa'antë, ijxtëm ëëts miits nja'ixa'antën näjyëtu'un.

⁷ Paaty, mëku'uktëjkëty, oy tsip'akuky ëyo'on akujky nja'ijtëmë, ntukxoontaktëpës koos tëë nmëtowtë wi'ix ja Dios xymyëpëktën.

⁸ Koos nijawëtë ko ja Dios tu'ukyë xymyëpëktë, xyajjotkujkëtëpës jatëkok.

⁹ ¿Wi'ix ëëts ja Dios n'ëkkukajpxëtëty, mëët tu'kë'ëyë ja xoontakën mëti'ipës nmëët'ajtëpën Dios wyintuuy, miitskyëjxmëty?

¹⁰ Xëënaxy tsuunaxyës ja Dios n'amëtowtë ets miits nëjkx nku'ixëtë ets kë'ëm ntimpyaatëty ets ntuk'ëwaanëtëty mmëpëjkën myëjwiin kyëjääjëtëty.

Ma ja Pablo ja Tios tmëpëjktsoyën

¹¹ Ntsojktëpës ets ja Dios mëti'ipë nTeety'ajtëmën ets ja Wintsën Jesukristë ëëts xypyutëkëtëty ets miits nëjkx nku'ixëtë.

¹² Wä'än ja Wintsën tjaakyajyeeky ja mtsojkënëty ets ni'ik mnätsyokëtëty nixim niyam, mëët ja wiinkëtypë mmëku'uktëjkëty, ijxtëm ëëts miits të ntsoktën.

¹³ Wä'än yë Wintsën tu'ukyë tyaj'ity ja mjot mwinma'anyëty, wa'ats, ka'ap tii poky xymyëët'attëty Dios wyintum ko ënety myiny ja Wintsën Jesús mëët ni'ëmukë mëti'ipë jyä'ä'ajtypyën. Jëtu'un y'itëty.