1 Tesalonicenses 2 - Biblia Dc en Mixe de Quetzaltepec

Mëti'ipë ja Pablo tyuunk'ajtypyën jam Tesalónica

¹ Mëku'uktëjkëty, mnija'awëtëp ko ojts miits nku'ixëtë, ka'apës ja nxëëw ntiempo nëkoo nyatëkë'ajty.

² Mnija'awëtëp näjyëtu'un ko oyës ojts nyajwinkäjpx nyajjëjpkajpxtë ëkë o'ktëyës nyajtuuntë jam Filipos, ojts ëëts ja Dios xypyutëkë ets myajtuk'ëwaanëtëty ja aaw ayuk oypyë. Aamëk jotmëkës ojts nkajpxwa'kxtë oy ja ëtujkpë jam ni'ik jyayajpaty.

³ Jä'ä ko ka'ap ja kyajpxtëko'oyënëty mëti'ipës nkajpxwa'kxtëpën, ni kya'ëxëëk winma'anyëty ets ka'apës pën nwin'ëëntë.

⁴ Ni'ikyë ja Dios ojts t'oy'ixy ets xytyuknipëjktës etsës nkajpxwa'kxtëty ja oy aaw oy ayuk ets jëtu'unës nimëtya'aktë. Ka'apës yë'ëjëty ntsoktë etsës ja ja'ay xy'oyjyawëtëty, yë'ëjës ntsojktë etsës ja Dios xytyukjotkëta'aktëtyës, mëti'ipë tyuk'ijxnajxypyën Wi'ixës ja n'aaw njotëty.

⁵ Ka'ap miits nëkoo je'eyë të nwinmëtya'aktë mëët ja aaw ayuk tsujpë ets ni të nka'amëtowtës eetsës xymyëjuytyëty. Dios yë'ë wa'ats nyija'ap.

⁶ Ka'apës yë'ëjëty njotmay'atë etsës ja ja'ay xymyëjjawëtëty ëkë miitsëty ëkë wiinkëtypë xyajmëjnaxtëtyës.

⁷ Mëët koos ja Kristë y'aaw y'ayuk xytyukkajpxwa'xtë, jyajjëkyejpy eets jeexyë miits n'ënä'ämtë nyajkutuktë. Ka'apës jëtu'un të ntuntë, ni'ikyës të näpyëjkta'akëtë pi'k ëna'kën: Yujyës ni'ikyë të mnäpyëjkta'akëtë ma miitsëtyën ijxtëm ja u'unktaak ja y'u'unk y'ëna'k tkëwent'atyën.

⁸ Jä'ä ko miits ntsoktë, paaty të ntuk'ëwaanëtë ja oy'aaw oy ayuk ets ka'ap yi'iyëty, nän ënantëpës ets nku'ookëtëty. Jä'ä ko n'oyjya'awëtëp nmëku'ukja'awëtëp, paaty jyëtu'unëty.

⁹ Mëku'uktëjkëty, wa'ats ënät miits xyjyä'ämyätstë wi'ix ijty ntuntënës xëëny koots këtiipë myaj'atsiptëty ko ntukmëmëtyaktë ja oy aaw oy ayuk, mëti'ipë Dios jyä'ä'ajtypyën.

¹⁰ Miits mnija'awëtëp ets Dios näjyëtu'un, ko oy ets mëtëyës winë të ntuntë, ka'ap maa pën të nyajjoot'anpëktës ëkë të nmëtëkoytyës.

¹¹ Näy mnija'awëtëp wi'ix të njotmëkmo'otën ets të nyajjotkujkta'aktën nitu'ukjaty ijxtëm ja u'unkteety y'ixy myëyätyën.

¹² Tëë njotmëkwinkajpxëtë, tëë nyajjotkujk'atë ets tëë ntukmënu'kxta'aktë wi'ix mja'ay'atëty ijxtëm pyaat'atyën mëti'ipë jä'ä''ajtëtëpën ja Dios, mëti'ipë të myaxtsowëtë ma yajkutukyën ets ma ja myëj'ajt y'oyajtënën.

¹³ Paatykyëjxmës xëmë ja Dios nkukajpxëtë, jä'ä ko miits xymyëtowtë ja Dios ja y'aaw y'ayuk mëti'ipës nkajpxwa'kxtën. Jëtu'un ojts xy'ëxajëtë tä Dios yë'ë t'aaw t'ayukëtyën ets ka'ap jyëtu'unëty tä jeexyë nyaaxwiinyëtë ja'ay t'ayukëtyën. E mëtëy jëtu'un, Dios jyänty ayuk'ajtyp, ets jam wyinkëxë'ëky ma miitsëtyën ko mmëpëktë.

¹⁴ Miits, mëku'uktëjkëty, ko ojts m'ëyowtë ko ja mmëkukajpn m'ixjëtijt mpajëtijtëtë, tim näjyëtu'un të mjatë ijxtëm ja Jesukristë myëpëjkpëtëjk jyajtën jam Judea; näjyëtu'un yë'ë të pyajëtijta'akëtë ja myëjutiis ja'ayëty.

¹⁵ Ya'atë jutiis ja'ayëty, yë'ë ojts tyaj'ooktë ja Wintsën Jesús, ijxtëm tyaj'o'ktën ja jëwyiinpë ja Dios ja kyäjpxynyajxpëtëjk ets näjyëtu'unës të xy'ixkäxtës. Ka'ap të tuntë ijxtëm ja Dios tukjotkëtä'äkyën ets aak mëtsip ja ja'ay të tjawëtë.

¹⁶ Yë'ë y'ëtujktëp koos ntuk'ëwaanëtë mëti'ipë ka'ap jyutiisëty wi'ix nyitso'oktëtyën. Jëtu'un ja pyoky tyajmayëtë. E jä'ä ko këxaanp ja jëtu'unpë, paaty ja Dios të tyuknikäxëtë ja mëj ëyo'on.

Ko ja Pablo jyanëjkxa'any jatëkok jam Tesalónica

¹⁷ Mëku'uktëjkëty ko ojts n'ëknäy'ëxmajtsëmëpë, oy jeky nka'ijxtë, xëmë ijty nja'amyätstë ets ojts njaninëjkxa'antë kanaak'ok.

¹⁸ Ojtsës njanëjkxa'antë, ëjts Pablo tëëjës njanëjkxa'any kanaak ok, je'eyëp ko mëjku'u ojts xy'ëtukyës.

¹⁹ Jä'ä ko ¿pën n'ëktukjotkujk'atëpës ets jotkujk xyajnäjyawëtëtyës, ëkë pën jëtää ëëts n'ëktukxoonta'aktëp ëkë mëj xyajnaxtëpës jam ma Wintsën Jesukristën ko ënety myiny? ¿Këtii myiits'atë, këtii tyiyëtyë?

²⁰ Miitskyëjxm ëëts nmëjnaxtë ets jotkujk nyajpaatës.