1 Samuel 7 - Biblia Dc en Mixe de Quetzaltepec

¹ Ënet ojts jam jyänty jya'të ja Quiriat-jearim ja'ayëty ets tyajtso'ontë ja Wintsën ja kyaaxë. Ko jam tmëja'ajtë kyajpntum jam ojts tpëjkta'aktë ma ja Abinadab ja tyëjkën, jam ijty tunkëjxm tsyëënë; ets tkënu'kxtë ja myaank mëti'ipë xyëëwajtypyën Eleazar ets yë'ë tkëwent'atëty.

Samuel twinye'ey ja naax kajpn ets ja tsip

² I'px jëmëjt ja kaaxë jam y'ijty Quiriat-jearim ets ja Israel ja'ayëty yajxon t'ixtaaynyëtë ja Wintsën ja pyutëjkën.

³ Paatykyëjxm ja Samuel t'ënëmaay tëkokyë ja naax kajpn: Pën miitsëty winë aaw winëjot yë Wintsën mnätyukë'ëtëkëtë ets pën mju'taaytyëp ja wiink tios ma mjëën mtëjkëtyën tä yë Astarté mëti'ipë wiink ja'ayëty y'ëwtajtëpën. Ets ja jyuukyajtën yë'ë Wintsën tmo'otëty ets yë'ë y'ëwtatëp. Yë Wintsën nëjkxëp myajtso'okëtë ma filistejë ja'ayëty tyam ëxëëk mtunëtën, pën mkumaaytyëp yë Wintsën ets pën mëjpëjktaktëp.

⁴ Ënet ja Israel ja'ayëty tjantyjyu'taaytyë ja Baal ets ja Astarté ja y'awinaxëty ets je'eyë t'ëwtajtë tu'ukyë ja wyintsën Tiosëty.

⁵ Ets ja Samuel ni'ënä'ämëy ets ja ja'ay ye'eymyuktëty jam Mispá, jëtu'un y'ënäny: tyamës yë Wintsën nmënu'kxta'akëty ets npa'ëyow mnajts'ëyowëtëty.

⁶ Yë Israel ja'ayëty ojts jam tyu'ukmukjta'atë Mizpá ets nëë jam may tniwijtspäjtë yë'ëts ojts yë Dios tukwintsë'ëkëtë tä yë ayajk ako'onën. Jä'ä xëëw ka'ap kyääytyë, jëtu'unyë ojts ayuu xyëëwnaxtë ets kë'ëm nyäja'awëy'ijtëtë ko tëë ënety ja Wintsën tmëtëkoytyë mëjwiin këjää. Jam Mizpá jam ojts yë Samuel y'awinpity tu'uwinye'epyë ets tsip twinye'eyëty ets ja naax kajpn näjyëtu'un twinye'eyëty.

⁷ E ko yë filistejë ja'ayëty nija'awëtyë ko yë Israel ja'ayëty tëë ënety jam tyu'ukmuktë Mizpá, ënät tnitso'ontë ja Israel ja'ayëty. Jä'ä ojts tyoontë mëti'ipë nyikopk'ajtëpën ja naax kajpn, e ko ja Israel ja'ayëty jëtu'un tnija'awëtyë mëk ojts tsyë'ëkëtë.

⁸ Tä ja Samuel t'ënëmaaytyë: Këtii m'ëmony, mënu'kxta'ak yë Wintsën mëti'ipës nTios'ajtëpën ets wä'än xykyuwa'antës ets wä'än xyajtso'oktës ma tääpë filistejë ja'ayëtyën.

⁹ Ënet yë Samuel ojts tu'uk tyaj'ooky yë kupixyny u'unk ets tukwinno'ky yë Dios, ets tkunu'kxtäky ja Israel ja'ayëty, e ja Wintsën ojts ja jyänty y'ëtsoyë.

¹⁰ Tam ënety yë Samuel tyäky ja wintsë'kën nino'okpyë, ko yë filistejë ja'ayëty jam tyukja'ajtëtë. E yë Wintsën ojts tu'uk yë mëk'ënääw tkukäjxnaxy ma filistejë ja'ayëtyën, yë'ëts ojts y'ëtsë'këtya'ajëtë. Jëtu'un'äämpy ojts yë Israel ja'ayëty yë'ë myëta'aktë.

¹¹ Yë Israel ja'ayëty ënätyë tsyo'ontë jam Mizpá ets tpatso'ontë ja filistejë ja'ayëty, ëxëëk ojts tuntë ets jëtu'un timypyaja'ajtë jam Bet-car.

¹² Tä ja Samuel tkoonë'ky tu'uk yë tsaa ets tpëjktäky ma mëët nyäpyaatëtën yë Mizpá ets Sen. Tä txëëwmooy jampë it naaxwiinyëtë Eben-ézer, jä'ä ko tyaa y'ënäny: tyampaat yë Wintsën të xypyutëjkëmë.

¹³ Yë filistejë ja'ayëty ka'ap ojts y'ëkmëtaknëtë, jääpaat jëtu'un kyijxy nyäjxy, ka'ap ojts y'ëkyajmëma'ayënëtë nëkoo Israel ja'ayëty. Mapaat yë Samuel jyuuky'äjtyën yë Wintsën ëxëëk tuuny yë filistejë ja'ayëty.

¹⁴ Ja kajpn mëti'ipë ënety të yajpëjkëtën ja Israel ja'ayëty ojts jatëkok tjä'äpëktë, jä'ä yajtijtë Ecrón ets Mizpá. Jëtu'un'äämpy jatëkok ja Israel ja'ayëty tpatë ja y'it nyaaxëty mëti'ipë ënety ja filistejë ja'ayëty të tyukniwojptu'utëtën ets jotkujk ojts yajpaatë mëët ja Amor ja'ayëty.

¹⁵ Mapaat yë Samuel jyuuky'äjtyën jëtu'un ojts twinye'ey ja tsip ets ja naax kajpn.

¹⁶ Winjëmëjt ijty nyijkxy jam Betel, Guilgal ets Mizpá, tääts ja amay jotmay tnipaye'ey mëti'ipë ja Israel ja'ayëty myëët'ajtëpën.

¹⁷ Ko tyajwintu'upëjktaay tääts ijty jatëkok jam wyimpity Ramá ma ja y'ijtaknën ets ijty t'ëne'emy tëkokyë ja Israel kajpn. Ojts jam näjyëtu'un tyajkojy tu'uk yë wintsë'këntyakn mëti'ipë yë Wintsën tyukyajnikojëyën.