1 Samuel 6 - Biblia Dc en Mixe de Quetzaltepec

Jëtu'un ja filistejë ja'ayëty tmëwinpijtë jatëkok ja kaaxë

¹ Ja Dios ja kyaaxë jä'ä ënety jam të y'ity wëxtujk po'o ma ja filistejë ja'ayëtyën.

² Ets ja filistejë ja'ayëty tyaxmujktaaytyë ja teetytyëjkëty, xëëwmääpyëtëjkëty ets tyajtëëwtë: ¿Tii mëpaat n'ëktu'unëmë mëët ja Wintsën ja kyaaxë? Tuk'ëwa'anëtëkës wi'ixës mëpaat jatëkok nyajwinpitë.

³ Tä y'ëtsoowtë: Pën myajwinpitantëp jatëkok ja Dios ja kyaaxë mëti'ipë yë Israel ja'ayëty y'ëwtajtën, këtii jëtu'unyë xymyënëjkxtëty. Kwanë ko miitsëty winë xymyo'otëty yë Wintsën mëti'ipë mtukyajjotxäämtëpën. Jëtu'un'äämpy miitsëty mtso'oktëty ets xyjyä'äkyukëtëty wi'ixykyëjxm ko mtëytyunëtë.

⁴ ¿E tiitsës mëpaat nmo'otë etsës ntukyajjotxäämtëty? Jëtu'un ojts tyajtëwtë. Ets ja teetytyëjkëty y'ëtsoowtë: Yë'ë m'oytyuntëp wëxtujk yë pu'ts pujxn ets xyajnikojtu'utëty yë ki'ix, tu'ukjaty këëktu'uk tkutänyëty ja filistejë ja'ay. Ja wëxtujkpë mëti'ipë nyikopk'ajtëpën ja filistejë kajpn, ëpëky näjyëtu'un xyajnikojtutëpëty mëkoxk yë tsuk, yë'ë mtuk'oytyuntëp yë pu'ts pujxn, pën mnija'awëtyëp ko yë mkopktëjkëty nän yë'ë jëtu'unpë pya'am'ajtëp.

⁵ Paaty, yajnikojtu'utë yë ki'ix pa'am ets tsuk mëti'ipë këtye'eytyëpën ma naax kajpnën ets mëjpëjkta'aktë yë Dios mëti'ipë y'ëwtajtëpën yë Israel ja'ayëty; jëtu'un n'ëk'ijxmëty kooxyëp näyajjëwa'akëty yë ëyo'on jotmay ma miitsëtyën, ma tiosëtyën ets ma naax kamën.

⁶ ¿Wi'ix ko ënät miitsëty janty juun yë mjot mwinma'any xypyëjkta'aktëty jëtu'un tä y'ëtë'ëtstën yë Egiptë ja'ayëty ets yajkutujkpë, koonëm ojts ëxëëk ja Dios tyunëtë täänëm t'ëxmajtstë ja Israel ja'ayëty?

⁷ Paaty nëjkx oytyuntë tu'uk yë kepy wintëkäämpë jemypyë ets xy'ixta'atëty nimäjtsk yë tsajpkaa mëti'ipë jam yë y'u'unkën ka'apë nijëna'a yu'uynyëmën, yë'ëts mtukmëtsumëtëp yë kepy wintëkäämpë, je'eyëp tëy ko këtii ja y'u'unk xytyukpanëjkxtëty, jam ja ëpëky xyajwë'ëmtëty kemjyotm.

⁸ Jamts xykyëxpëktëty ja Wintsën ja kyaaxë ma ja kepy wintëkäämpën ets näjyëtu'un jam pë'am xypyëjkta'aktëty kaaxëjoty ja pu'ts pujxn mëti'ipë je Wintsën ënety mooytyëpën ets jyotxäämëty. Ets nëjkx jam tu'ujëjp'am xytyu'ujëjpwopëtë je'eyë ets xy'ëxmatstëty wä'än atu'uk tnëjkxy.

⁹ Je'eyëp tëy ko yajxon xytyim'ixtëty pën jamtsow nyijkxy Bet-semes ma të tsyoonyën ma tnaax'aty tkajpn'atyën. Yë'ë yajtujknijawëp ko janty Dios ënety o'ktëy xyajjajt xyajkëpäjtëm mëti'ipë y'ëwtajtëpën yë Israel ja'ayëty. E pën kajts jamtsow nyijkxy jää näjyëtu'un ntuknija'awëmëty ko ka'ap yë'ëjëty, tim pa'amën ënety jëtu'un të tyimmiimpë.

¹⁰ Ja ja'ayëty jëtu'un ojts tuntë, ojts nimäjtsk ja tsajpkaato'oxy t'ixta'atë ets tyajku'ëtujktë ja y'u'unkëty jam ma ja tsyënaaytyaknën, tä ja tsajpkaato'oxy tukmëtsu'umëtyë ja kepy wintëkäämpë.

¹¹ Ënet jam tkëxpëjktë ja Wintsën ja kyaaxë, ets näjyëtu'un ja kaaxë ma jap y'itën ja pu'ts pujxn mëti'ipë jëtu'un yaj'ijxpën tä yë ki'ix pa'amën ets tsukën.

¹² Ko ja tsajpkaato'oxy yajtu'ujëjpwojpëtyë jamtsow ojts nyëjkxtë Bet-semes, muup ojts nyëjkxtë ets tu'ukyë ja tu'u tpëjktë nimaa kyakuye'eyëtë. Yë filistejë ja'ayëty ojts tpatsoontë ja kepy wintëkäämpë, ix'am je'eyë tpaye'eytyë, jampaat tpaja'ajtë ma ja Bet-semes ja tsyëpa'an nyaxtën.

¹³ Ja ja'ayëty mëti'ipë jam kukajpnajtëpën Bet-semes jampë ënety tyuntën kyamjotmëty ma ja tsajpmok tyajpëtë'ëktën, yajxon ojts xyoontaknëtë ko ja kaaxë yajmëminy.

¹⁴ Ko ja kepy wintëkäämpë jam jyä'äjty ma Josué kyamën jampë kyukajpnëtyën Bet-semes jam wya'ak'o'oyëy. Jam ijty tu'uk yë mëjtsaa. Ënet ja ja'ayëty mëti'ipë jam kukajpnajtëpën ojts tpujxta'aktë ja kepy wintëkäämpë ets tja'axy'ajtë, tääts tyaj'o'ktë ja nimäjtskpë ja tsajpkaato'oxy ets ja Wintsën jä'ä tukwintsë'këtyë.

¹⁵ Ja Leví ja'ayëty tëë ënety tyajjënaktë ja Dios kyaaxë ets ja kaaxë ma jap myintën ja pu'ts pujxn mëti'ipë jëtu'un këxë'ktëpën tä yë ki'ixën ets tä yë tsukën ets jam tkëxpëjktaaytyë tsaakëjxm. Jä'ä xëëw yë ja'ayëty jampë kyukajpn'atën Bet-semes ojts tjanty myo'otë ja Wintsën ja wyintsë'kën kanaakpëky.

¹⁶ Ko ja filistejë ja'ayëty jëtu'un t'ijxtë ja niwëxtujkpë, mëti'ipë mëj'äämpy ijtëpën kyajpnjotmëty, ënät ojts wyimpijnëtë ets nyëjkxnëtë ma ja kyajpnëtyën jam Ecrón.

¹⁷ Ja mëkoxkpë ja pu'ts pujxn jëtu'unpë kyëxë'ëkyën tä ki'ixën mëti'ipë ojts ja Wintsën jä'ä yajtukë'ëtëkën ets jyotxäämëty, yë'ë ënety kyutënaaytyëp ja kajpn mëti'ipë xyëëwajtëpën Asdod, Gaza, Ascalón, Gad ets Ecrón.

¹⁸ E ja tsuk näjyëtu'un nyiwinë'atë tä ja filistejë ja kyajpnëtyën, ma ja nimëkoxpë kyukajpn'atën ja filistejë ja'ayëty. Ja mëjtsaa mëti'ipë yajnikajpxpën ma tpëjktaktën ja kaaxë, tyampaat je'eyën jam yaj'ixy ma jam ja kyamën ja Josué mëti'ipë jam kukajpn'ajtpën Bet-semes.

¹⁹ E ja Wintsën ojts tyaj'o'knë ja ja'ayëty jampë kyukajpn'atën Bet-semes, mëët ko ënety të kyu'ixëtë jap kaaxëjoty kë'ëmwinma'any. Jä'ä y'o'ktë ja ja'ayëty oy nitëkë'px majkën. Ja naax kajpn mëk tja'awëtyë mëët ko ënety ja Wintsën të tyajkutëkoy ja mayjyä'äy ko tukjoot'anpëjky.

²⁰ Paaty y'ënantë ja Bet-semes ja'ayëty: Pën jëtää jampaat jeky y'ëk'ity juuky Dios wintum mëti'ipë wa'atsën? ¿Pën jëtää jam ëxëëk winë y'ëktuunpy ko yaa tsyoonëty ma ëëtsajtëmën?

²¹ Ënet ja käjpxy tkäjxtë jam Quiriat-jearim ets t'ënëmaaytyë ja ja'ayëty jampë kyukajpn'atën: Yë filistejë ja'ayëty tëë jatëkok tyajwinpitë ja Wintsën ja kyaaxë, paaty miits yam npëjktsowtë ets xynyimintëty tääts xymyënëjkxtëty.