1 Samuel 5 - Biblia Dc en Mixe de Quetzaltepec

Ko jam ja kaaxë jyä'äjty ma filistejë ja'ayëtyën

¹ Ko yë filistejë ja'ayëty tjä'äpëjktë ja Dios ja kyaaxë, ënät jam tmëtso'ontë Eben-ézer ets ojts tmënëjkxtë jam Asdod.

² Ko jam tmëja'ajtë jap tpëjktaktë ma ja tyiosëty jap yajpaatyë mëti'ipë xyëëwajtypyën Dagón.

³ E komjëpom ko myiintë yë ja'ayëty mëti'ipë kukajpn'ajtëpën jam Asdod, ënät tuk'ijxpäjjë ko ja Dagón naaxkëjxy jyëpijpnë, winkon ma ja Wintsën ja kyaaxën. Ënet tyajpëtë'ktë ets jatëkok tpëjktaktë jam ma ënety të yajpaatyën.

⁴ E ko kyomjëpom'ajty näjyëtu'un ojts jatëkok tpatkojnëtëpë ja Dagón naaxkëjxy jyëpijpnë, jam kaaxë winkon mëti'ipë ja Wintsën jyä'ä'ajtypyën ets t'ijxtë ko tëëtëm ja kyëpajk nyëka'ay ets mäjtsk ja kyë'ë jam ëpëky jyëpijpnë naaxkëjxy. Yi'iyë ojts ëmuum jyaak wë'ëmy ja kepy'apujxtuky.

⁵ Paatykyëjxm tyampaat yë teetytyëjkëty ko jam tyëkëtë ma Dagón yë tsyajptëjkën, ka'ap tuktääntë yë tëjk'apu'uy.

⁶ Ok yë Wintsën mëk tëytyuuny yë ja'ayëty jampë tsyëënëtën Asdod ets mëti'ipë yajpatëpën ma jampë ja it naaxwiinyëtën, tääts tyukmiinëtë ja yuu pa'am mëkëtypë, tä yë pu'utspa'amën, xi'ikyë pa'amën ets tsaamaxnën.

⁷ Ko y'ijxtë jëtu'un ja Asdod ja'ayëty, ënät y'ënantë: Yë kaaxë mëti'ipë Dios jyä'ä'ajtypyën mëti'ipë y'ëwtajtëpën yë Israel ja'ayëty, ka'ap mëpaat yaa yajpaaty. Jä'ä ko paatykyëjxm jëtu'un tyam o'ktëy njajtëmë ets nëkooyë këxëty yë yuu pa'am myiinë ets ix näjyëtu'un yë Dagón yë'ëpaat pyatënë ja tëytyu'unën mëti'ipë ntios'ajtëmën.

⁸ Paaty ojts tëkokyë twoowmujkta'atë yë mëjja'aytyëjk ets kopktëjkëty jampë yajpaatën ma filistejë kajpnën ets tyajtëëwtë: ¿Tii mëpaat ntu'unëmë mëët yë Dios yë kyaaxë mëti'ipë yë Israel ja'ayëty y'ëwtajtëpën.? Tä y'ëtsoowtë: Mënëjkxtë jam Gad. Tääts ja filistejë ja'ayëty ojts jam tyajnëjkxtë.

⁹ E ko jam tyajtso'ontë, Dios mëk ojts jam ja ëyo'on tyajkëtä'äky ma ja naax kajpnën. Jä'ä ko wa'ats ja ja'ayëty ojts pya'ampäjta'atë mëët ja ki'ix pa'am ets ja pu'uts pa'am; ojts pya'ampäjta'atë mëjja'ay, mutskja'ay.

¹⁰ Ko jëtu'un t'ijxtë, ënät jatëkok tmëtso'ontë ets ojts tmënëjkxtë jam Ecrón, ko jam tmëja'ajtë, ja ja'ayëty mëti'ipë jam tsënaaytyëpën ënät y'ënaantaktë: Tëë ënät tmëmintë ja Dios ja kyaaxë mëti'ipë yë Israel ja'ayëty y'ëwtajtëpën yaa ets xytyukyaj'o'kta'aja'anëmë.

¹¹ Tëë ënety tëkokyë ja ja'ayëty tsyë'ëkëtëjkëtya'atë mëët ja mëk pa'am jampë jyëtityën mëti'ipë ja Dios të tkexyën, ënät ojts tyaxmujkta'atë ja kopktëjkëty mëti'ipë jam yajpaatën ma ja filistejë kajpnën ets t'ënëmaaytyë: Mënëjkxtë ya'atë Dios yë kyaaxë ma të xymyëtsoontën, nëjkx jam pëjkta'aktë jatëkok ma të y'ityën këtiipë n'o'ktä'ämyëty.

¹² Ja ja'ayëty jampë kyukajpn'atën nëkooyë yaxnëtë jyojknëtë mëët ja yuu pa'am mëti'ipë myënajx yajnajxtëpën. Jä'ä ko ja mëti'ipë ënety ka'ap y'ooktënën ujts ënety yajpatnëtë ja nyini'kxëty mëët ja ki'ix pa'am.