1 Samuel 4 - Biblia Dc en Mixe de Quetzaltepec

¹ Ok ja Samuel tuknija'awëy ja naax kajpn tä ënety ja Wintsën të y'ënë'ëmxëtën. Jä'ä xëëw jä'ä jëmëjt ojts yë filistejë ja'ayëty tuknipëjktaakëtë ets tsyiptuna'antë mëët yë Israel ja'ayëty. Yë Israel ja'ayëty ojts näjyëtu'un tniwinmayëtë ja tsip, paaty ojts jam nyëjkxtë ma tu'uk yë it naaxwiinyëtë txëëwatyën Eben-ézer, tyam ja filistejë ja'ayëty jam ënety të jyajta'aktë ma txëëwatyën Afec.

Wi'ix ja filistejë ja'ayëty tmëkäktën ja kaaxë mëti'ipë yë käjpxytyu'unën myë'ijtypyën

² Jam ja filistejë ja'ayëty tnitsoontë ja Israel ja'ayëty ets mëët tyëjkëtyë tsiptuunpë. Yë filistejë ja'ayëty yë'ë ojts myëta'aktë, jä'ä y'o'ktë yë Israel ja'ayëty nimajktaxk mil jam tsipjotm.

³ Ko yë Israel ja'ayëty jam wyimpijtë ma jyajta'aktën, ënät ja mëjja'aytyëjk y'ënantë: ¿Tii ko yë Wintsën të t'ëwa'atsy ets tyam o'ktëy njajtmëty ma filistejë ja'ayëtyën? Ja'amtë nyajtso'onëmë yë kaaxë jam Siló mëti'ipë ja käjpxytyu'unën myë'ijtypyën mëti'ipë ja Wintsën jyä'ä'ajtypyën. Yë'ë itkujky nyajnëjkxmëp ets xykyuwa'anmëty ma ja nmëtsip'ajtëmën.

⁴ Ënet ja Israel ja'ayëty tkäjxtë ja tsiptuunpë nikanaak jam Siló ets tyajmintëty ja kaaxë mëti'ipë ja käjpxytyu'unën myë'ijtypyën mëti'ipë ja Wintsën, mëti'ipë maaytyääyëpën jyä'ä'ajtypyën. Jam ënety yajpaaty itkujky ma ja Wintsën ja kyukäjpxy y'itën mëti'ipë xyëëwajtëpën querupines. Ojts myintë ja Ofní ets ja Finees, ja nimäjtskpë ja myaank ja Eli, jä'ä pyamiintë ja Dios ja kyaaxë mëti'ipë ja käjpxytyu'unën myë'ijtypyën.

⁵ Ënet ko jam jyä'äjty ja Wintsën ja kyaaxë mëti'ipë ja käjpxtyu'unën myë'ijtypyën, ja Israel ja'ayëty ënät tyëjkëtyë yaxpë jojkpë ets janty mëk ja naax tsyëyuuypyijky.

⁶ Ko ja filistejë ja'ayëty tmëtoowtë jëtu'un ja Israel ja'ayëty tyäty ya'ax tyäty jyoktë, ënät y'ënantë: ¿Wi'ix ko nëkoo ja'ay yaxnëtë jyojknëtë ma hebreo ja'ayëtyën? E ko tnija'awëtyë ko ja Dios ja kyaaxë ënety të jyä'ty jam ma ja hebreo ja'ayëtyën.

⁷ Ënet ja tsë'ëkë tyuktëjkëtyë ets y'ënantë: Yë Dios yë'ë jam të jyä'ty, ëëtsajtëm tëë nitujkëmë, ka'ap nijëna'a jëtu'un jyäty kyëpetynyën ma ëëtsajtëmën.

⁸ ¿Tii ënät ntuuntakmëp? ¿Pën ënät xyajtsokmëp ko jam nka'amëty Dios kyë'ë'am mëti'ipë maaytyääyëpën winë? Wa'ats nija'awëmë ko yë'ë ojts tyaj'o'kta'ay tëkokyë yë Egiptë ja'ayëty jam të'ëts'itjotm mëët ja kanaaknaxpë ja pa'am ëyo'on.

⁹ Paaty tyam tsojk amëk jotmëk näpyëjktakëmë, pëjkë'ëktë yë ntuunpäjnëty mëti'ipë mëtsiptuuntëpën, tsojk ntsipjëtu'unëmë amëjaaw ma nxëëw'ajtëmën filistejë ja'ay. Këtiipë jëna'a yë xytyuunpë'ajtmëty yë hebreo ja'ayëty jëtu'un tä yë'ëjëtyën jeky të yajpaatën ma ëëtsajtëmën.

¹⁰ Ënet ja filistejë ja'ayëty tyëjkëtyë tsiptuunpë mëët ja Israel ja'ayëty, ja filistejë ja'ayëty yë'ë ojts myëtakojnëtëpë; ja Israel ja'ayëty jëtu'unyë ja kyäktaaytyë ets nyëjkxtaaytyë ma ënety y'ijta'aktën. Nimay yajxon ja ja'ay y'o'ktë jä'ä xëëw. Mëti'ipë naaxkëjxy tsiptuuntën ja Israel ja'ayëty, jä'ä y'o'ktë ni''i'px majk mil.

¹¹ Ojts näjyëtu'un tjä'äpëktë ja Dios ja kyaaxë ets tyaj'o'ktë näjyëtu'un ja Ofní ets Finees mëti'ipë myaank'ajtypyën ja Eli.

¹² E ojts tu'uk oywyi'ix jyaakke'eky jam tsipjotm, yë jyä'äy yë Benjamín ets pëyi'ikyë jyä'äjty jam Siló, jä'ä xëëw, nikëëts ixkëëts jyä'äjty ets ninaax ëxnaax.

¹³ Ko jam jyä'äjty, yë Eli jam ënety y'u'unyë tsajptëjk ëkë'ëm ma tu'uk yë mëj sillën, yë kyëwen'ajtyp ja në'ë tu'u, jä'ä ko janty määpy janty tajp ënety mëëtpë ja Dios ja kyaaxë. Ko tääpë ja tsiptuunpë tuk'ëwa'anëy ja naax kajpn mëti'ipë ënety të tyuny të jyätyën, ënät ja ja'ayëty ojts tyëkëtë yaxpë jojkpë jampë tsyëënëtën.

¹⁴ Ko ja Eli tmëtooy ja ja'ay tyäty ya'ax tyäty jyoktë, tä tyajtëëy: ¿Tiitën ko ja'ay yaxtëpë jyojktëpë? Ënet tääpë ja ja'ay ojts pëyi'ikyë nyijkxy ma ja Eli yajpaatyën ets tuk'ëwa'anëy.

¹⁵ Eli jä'ä ënety ja jyëmëjnë majkta'px majkmokx tëkëëk ets ka'ap ënety y'ëk'ijxnë.

¹⁶ Tääts ja ja'ay y'ënëmaayë: Ëjts jamës tyam ntsoony tsipjotm, oyës wi'ix të njaakke'eky. ¿E wi'ixts jam të xy'ixy winë u'unk maay? Jëtu'un tyajtëëy ja Eli.

¹⁷ Tääts ja ja'ay y'ënëmaayë: Tëë ja Israel ja'ayëty kyäkta'atë ets janty may yë ja'ay të y'ëk'o'knëtë, tëë y'ooktë nimäjtsk ja mmaank Hofní ets Finees, ets näy tëë ja filistejë ja'ayëty tmënëjkxtë ja Dios ja kyaaxë.

¹⁸ Tim je'eyë ojts tnikäjpxy ja ja'ay ja Dios ja kyaaxë, jëtu'unyë yë Eli tsyajpënë'ka'tsy jam tëjkwinm, e komë tëë ënety myëjja'ayënë ets je'emty yajxon. Jëtu'unyë ojts ja jyëwiits tyimtëjtuky ets y'o'ky. Jä'ä ënät të tyuny teety jam ma Israel kajpnën wëxtyikxy jëmëjt.

¹⁹ Ja xyä'kxy mëti'ipë yë Finees tyo'oxytyëjk'ajtypyën, u'unk mëët ënety yajpaaty, ko tmëtoowpaty tëë ja Dios ja kyaaxë yajmënëjkxy ets ko tëë ja tyeety myë't y'ooky ets ja nyiye'etyëjk, ënät ja jyotmay ni'ikyë myëjtäky ets ja pëjkën ato'onën tmënajxy tyajnajxy koonëm ja y'u'unk naaxwiiny jyä'äjty.

²⁰ E ko t'ijxtë ja to'oxytyëjkëty ko mëpaatëp y'o'knë, ënät t'ënëmaaytyë: Këtii mtsë'ëkë mjawë, ye'etyëjk m'u'unk'ajtypy. Yë'ë ka'ap y'ëtsooy ets ka'ap tuuny këwentë.

^21-22 Ets tyajxëëwpejty ja myaank Icabod, jä'ä ko tyaa y'ënäny: Yë Israel jëtu'unyë të wyi'imy mëj'ajtëntuk, jä'ä ko tëë yajpëjkëtë ja Dios ja kyaaxë. Mëët ko jëtu'un y'ënäny, jä'ä ënety tyijpy ko ja Dios ja kyaaxë wiink ja'ay të myënëjkxyë, ko ja tyeety myë't të y'ooky ets ko ja nyiye'etyëjk ënety näjyëtu'un të y'ooky.