1 Samuel 3 - Biblia Dc en Mixe de Quetzaltepec

Yë Wintsën tmëkäjpxy yë Samuel

¹ Ja Samuel janty'oy ijty ja Wintsën tmëtuny jam ma kyë'ë'am'atyën ja Eli. Jä'ä jëmëjt ka'ap ënety nëkooyë pën ja Wintsën tuknijawë ja y'aaw y'ayuk ets ka'ap nëkooyë pën wyinkuma'ay ëkë t'ixy tnijawë kuma'ayjoty mëti'ipë ja Wintsën tyunäämpyën.

² E tu'kxëëw tu'kjëmëjtëty ma ënety yë Eli tëë y'ijxën myoonën, jap ënety myä'äy ma ja tyëjkën.

³ Yë Samuel jap ënety myä'äy ma ja Dios ja jyëën tyëjkën winkon ma y'ityën ja kaaxë mëti'ipë yë Dios jyä'ä'ajtypyën ets ma ja jëën tyi'kxyën.

⁴ Ënet ojts myëkäjpxyë ja Wintsën: Samuel. Tyaajës, jëtu'un y'ëtsooy.

⁵ Ënet ojts pëyi'ikyë nyijkxy ma jap ja Eli myä'äyën ets t'ënëmaay: Tyaajës Wintsën. ¿Tiis ko xymyëkäjpxy? Ka'ap pën mëkäjpxyë, jëtu'un y'ëtsooy ja Eli. Nëjkx jatëkok ma maataknën. Tä ojts jatëkok nyäkyo'okyë.

⁶ E ja Wintsën ojts jatëkok tmëkäjpxy ja Samuel: Samuel. Yë Samuel pëyi'ikyë jatëkok pyëti'ky ets ojts nyijkxy ma ja Eli myä'äyën, tä t'ënëmaay: Tyaajës wintsën ¿Tiijës ko xymyëkäjpxy. U'unk, ka'ap pën mëkäjpxyë, jëtu'un y'ëtsooy ja Eli, nëjkx ma mmaataknën.

⁷ Yë Samuel ka'anëm ënety nijëna'a yë Wintsën t'ixynyën, jä'ä ko ka'ap ënety jëtu'un nyänyikëxë'ëkyënëm.

⁸ Ënet ja Wintsën ojts jatëkok tmëkajpxkojnëpë ja Samuel, jä'ä ja mëtëkëëk'okpë. Ënet pyëti'ky ënätyë ets ojts jap nyijkxy ma ja Eli myä'äyën, tää t'ënëmaay: Tyaajës nminy Wintsën, ¿Tiijës ko xymyëkäjpxy? Tää ja Eli twinja'awëy ko ja Wintsën Dios ënety mëkajpxëp ja Samuel.

⁹ Ënet t'ënëmaay: Nëjkx mnäkyo'okyë; pën mëkajpxëp jatëkok yë Wintsën, tyaa xy'ëtsowëty: Nikajpx Wintsën tyamës nmëtoow'ity. Tä ja Samuel ojts nyijkxy ma ja myaataknën ets nyäkyo'kë jatëkok.

¹⁰ Ënet jatëkok ja Wintsën myiiny ets ojts tmëkäjpxy ja Samuel. Samuel, Samuel. Kajpx, Wintsën, tyamës nmëtoow'ity. Jëtu'un y'ëtsooy yë Samuel.

¹¹ Ets ja Wintsën y'ënäny: Ëjts yë'ëjës yam nikajpxäämpy mëti'ipës ntunäämpyën ma Israel kajpnën, mëk ja aaw ayuk yajmëtoy mëti'ipës nikajpxäämpyën.

¹² Ko ënety jëtu'un ja xëëw jëmëjt jyä'ty, jëtu'unës nëjkx winë ntuny tääjës të nikäjpxyën mëëtpë yë Eli y'u'unk tyo'oxytyëjk.

¹³ Tëës ntuk'ëwaanë ko ntëytyunäämpyës yë y'u'unk tyo'oxytyëjk, mëët ja nëë poky mëti'ipë tyuuntëpën; jä'ä ko ja y'u'unk y'ëna'k ëxëëkjatyës të xytyijtë ets yë'ë ka'ap tuk'ojy.

¹⁴ Paatyës yajxon ntimkyajpxwë'ëmy mëëtpë yë Eli y'u'unk tyo'oxytyëjk, ko yë nyëë pyokyëty ka'ap nijëna'a nimä'kxëtyës, oyxyëp tjayajktëpë kanaak yë wintsë'kën.

¹⁵ Ko kyajpxtaay ja Wintsën, ënät ojts ja Samuel jatëkok nyäkyo'okyë, jëtu'un ojts xyinyënë, jopyëp ojts tyaj'ëwatskojy yë Samuel ja tëjk'akë'ë ma ja tsajptëjkën. Samuel tsë'këp jä'ä, ka'ap tukmëmëtya'aka'any ja Eli mëti'ipë të t'ijxyën kuma'ayjoty.

¹⁶ E ja Eli ojts wyoowtsoyë ets y'ënëmaayë: Samuel, u'unk maay. Tyaa jä'ä Wintsën, jëtu'un ja Samuel y'ëtsooy.

¹⁷ Ets ja Eli yajtëëwë: ¿Wi'ix yë Wintsën të m'ënë'ëmxëty? Tun yë mëyajtën tuk'ëwa'anëkës, këtii xykyuyu'utsy. Yë Dios mtëytyunëtëp yë'ë pën mijts mkuyu'tsyp mëti'ipë yë'ë të mtuk'ëwa'axëtyën.

¹⁸ Ënet ja Samuel tyëjkëy mëtyakpë, wa'ats tuk'ëwa'anëtyääy ja Eli. Ets ja Eli y'ënäny: Dios yë'ë Wintsënajtp. Wa'ats ttuny mëti'ipë yë'ë y'oyjya'apën.

¹⁹ Samuel ojts oy tsuj yeeky pyety ets xëmë ojts oy winë tuny tä ënety ja Dios tsokyën, ets jëtu'un tä ënety të twaantä'äkyën winë.

²⁰ Tu'kë'ëyë ja naax kajpy jampë yajpaatën ma Dan y'itjotmën ets ma txëëwatyën Beerseba ojts tnijawëtë ko yë Samuel yë'ë ënety tu'uk mëj Dios mëtuunpë mëti'ipë nyikajpxëpën ja Wintsën ja y'aaw y'ayuk jëwyiin jëyëjp.

²¹ Ënet jatëkok ojts ja Wintsën nyänyikëxë'ëkyë ma ja Samuelën jam Siló, jä'ä ko jam ënety ja it naaxwiinyëtë të twin'ixy ets ja Samuel tuknijawë ja y'aaw y'ayuk.