1 Samuel 28 - Biblia Dc en Mixe de Quetzaltepec

¹ Ënet ja filistejë ja'ayëty nyiye'eypyäjtaaytyë jä'ä xëëw jä'ä jëmëjt ets tsyiptuna'antë mëët ja Israel ja'ayëty ets ja Aquis t'ënëmaay ja David: Mijts David wa'ats xynyijawë ko xypyatsoonëpës jëtu'un ënät tsiptuunpë mëët yë mja'ay.

² Tä ja David y'ëtsooy: Oy'atëp Wintsën, tyam jëtu'un xy'ixtëty wi'ix tyaapë mtuunpë tjatyën tsyiptunëty. Pën jëtu'un ni'ikë oy mijts xynyiwintsën'atëty yë ntuunpëtëjkës mëti'ipës xykyëwent'ajtpën. Jëtu'un ja Aquis y'ëtsooy:

Saúl ets ja najtsja'apë jampë yajpaatyën Endor

³ Tääpë jëmëjt ja Samuel tëë ënety y'o'knë, ko y'o'ky mëk ja Israel ja'ayëty ojts tnijë'ë tniya'axtë, jam tyajnaaxtëjkëtyë Ramá ma myiinyën naaxwiiny. Yë Saúl ojts tëkok t'ëxwojpta'ay ja najtsja'apëtëjkëty ets mëti'ipë myëkajpxtëpën ja o'kpë.

⁴ Ko ja filistejë ja'ayëty myujktaaytyë, ënät tsyo'ontë ets ojts nyëjkxtë jam Sunem, jamts nyäpyëjktakëtë. Ja Saúl ojts näjyëtu'un tyajmujkta'ay ja Israel ja'ayëty ets jam nyäpyëjktakëtë Guilboa.

⁵ E ko jamtsow nyajts'ijxëy ets t'ijxy ja may filistejë ja'ay, ënät ja tsë'ëkë tyuktëjkëyë, ka'ap ojts y'ëkmaayënë wi'ix jyotmëkta'akëtyën.

⁶ Paaty tyajtëëy ja Wintsën tii tyunëpën, e yë'ë ka'ap ja ojts y'ëtsoowinpityë. Ka'ap y'ëtsoowinpijtë kuma'ayjoty, ka'ap y'ëtsoowinpijtë mëët ja Urim ets nän ka'ap mëët ja Wintsën ja kyäjpxynyajxpë.

⁷ Paaty t'ënëmaay ja tsiptuunpë wintsën: Ixta'atë tu'uk yë to'oxytyëjk mëti'ipë myëkäjpxypën yë o'kpë, yë'ëjës nëjkx n'ixa'any. Tääts y'ëtsoowtë ja tsyiptuunpë wintsënëty: Jam Endor tam tu'uk yë to'oxytyëjk mëti'ipë yajmëtyäkpyën yë o'kpë.

⁸ Tä ja Saúl tëkatsy nyäxyojxë ets wiink wit pyëjktak; tääts tsyo'ony koots mëët nimäjtsk yë jyä'äy ets ojts tninëjkxtë ja to'oxytyëjk. Ko jam jyä'äjty tääts t'ënëmaay: Mëyajtënës yam npëjktsoop ma mijtsën ets xynyajtsjawëty wi'ix yë njuukyajtënës myiny ets xyajminëty tu'uk yë ja'ay mëti'ipës yam nikajpxäämpyën.

⁹ Tääts ja to'oxytyëjk y'ëtsoowë: Mijts wa'ats xynyijawë wi'ix yë Saúl y'ëti'itsyën. Tëë wa'ats t'ëxwojpta'ay yë ja'ay mëti'ipë najtsja'awëtëpën ets mëti'ipë o'kpë yajmëtyaktëpën. ¿Wi'ix ko xy'amëtoyës ets ntunëtyës ja mëti'ipë je'eyë n'ëkku'o'kënëpës?

¹⁰ E ja Saúl ja Dios ojts ja xyëëw tukkajpxpety ets t'ënëmaay: Tyamës yë Dios yë xyëëw ntukkajpxpety ko mijts ka'ap tii mjatëtëty.

¹¹ ¿Pën mtsojkpy etsës nyajminëty? Jëtu'un y'ënäny ja to'oxytyëjk. Mëkajpx yë Samuel. Jëtu'un y'ëtsooy yë Saúl.

¹² Ajotkumonë ja to'oxytyëjk t'ijxpaty ja Samuel ets yujkyäxy mëk ets t'ënëmaay ja Saúl. ¿Wi'ixës ko mijts xywin'ëëny? Pën mijtstëm Saúl.

¹³ Tä ja mëj'ënä'ämpë y'ënëmaayë: Këtii mtsë'ëkë, ¿tii të xy'ixy? Jëtu'unës n'ixy tä tu'uk yë tiosën, mëti'ipë naaxjoty pëtsëëmpën. Jëtu'un y'ëtsooy ja to'oxytyëjk.

¹⁴ ¿Wi'ix y'ixëty? Jëtu'un ja Saúl tyajtëëy. Mëjja'ay ets tam yë nyijän. Jëtu'un y'ëtsooy ja to'oxytyëjk. Tä ja Saúl tja'akyujkëy ko jä'ä ja Samuel, tääts wyintäky nyaaxkooy tyajnikëxë'ëky jëtu'un ja wintsë'kën.

¹⁵ Tä ja Saúl y'ënëmaayë: ¿Tiijës ko nëkoo xy'atsip etsës yaa xyajminy? Tä ja Saúl y'ëtsooy: Jä'ä ko janty moonp janty tujkpës ëjts nyajpaaty, yë filistejë ja'ayëty yë'ëjës nëkoo xymyëma'ayëtëp e yë Wintsën tëëjës xy'ëxmajtsnë. Koos njamëkäjpxy, ka'apës xy'ëk'ëtsoownë, ni kuma'ayjoty ets ni yë'ë mëët yë tyuunpëtëjk. Paatykyëjxm mijts të nyajmëkäjpxyë etsës xytyuk'ëwaanëty tiijës mëpaat ntuny.

¹⁶ Tä ja Samuel y'ëtsoowë: ¿Wi'ix ko ënät xyajtëyës, pën tëë yë Wintsën m'ëxmajtsënë ets tëë mmëtsiptso'onënë?

¹⁷ Yë Wintsën yë'ë tyam tyuunpy mëti'ipës ojts njanikäjpxyën. Yë'ë tëë mpëjkëty ja mkutujktakn ets tëë tmooynyë ja mmëku'uk David.

¹⁸ Jä'äkyëjxm ko mijts ka'ap të xypyatuny ijxtëm ja Dios të mja'ëne'emyën, ni të xykyayajkutëkoy ja Ismael ja'ayëty, tä ojts mjayaj'ënëëmën. Paatykyëjxm yë Dios tyam ka'ap m'ëtsoyë.

¹⁹ Ëpëky näjyëtu'un yë Wintsën tkë'ëyakanë yë Israel kajpn ma filistejë ja'ayëtyën ets näjyëtu'un mijts. E jëpom mëët yë m'u'unk m'ëna'k tam ënety yajpatnëtë mëët ëjts. Yë Wintsën tëë näjyëtu'un tyajkutuky ko yë Israel ja'ayëty yë'ë mëmëta'akanëtëp yë filistejë ja'ayëty.

²⁰ Ajotkumonë yë Saúl ojts jëtu'unyë jyëpijpkëtä'äky, jä'ä ko janty këjxm ënety. Ja Samuel ja y'aaw y'ayuk ojts y'ëtsë'ëkëty, paaty jëtu'unyë jyëpijpkëtäky. Ojts jyaaktimnyi'ikë, ka'ap ënety tu'kxëëw të kyäy ets jëtu'un ënety të tsyuunaxy ayuu.

²¹ Ko ja to'oxytyëjk t'ijxy ko ja Saúl jëtu'unyë jyënuunkëtaknë, tä ojts tmëwinkony ets t'ënëmaay: Ya'atë to'oxytyëjk, yë mtuunpë, tëë tkuuytyuny ijxtëm të xy'ënëëmën. Tëës yë nkë'ëmjuukyajtën npëjktä'äky atsë'ëkëtuuy mëët koos të npatuny mijts ja m'ënä'ämën.

²² Paaty tyam nmënu'kxtä'äky ets xyjyä'äkyukëty ya'atë aaw ayuk, minës yë kääky tojkx n'ëkyaj'oyë ets mkayëty m'uukëty jëtu'unts mëkpëkëty ets jatëkok mnëjkxëty.

²³ E ja Saúl ka'ap ja kyääky kyupëjky, ja to'oxytyëjk ets ja tsyiptuunpëtëjk mëktä'äky y'ënëmaayëtë ets kyäyëty, täänëm kyääy. Tääts pyëti'ky oywyi'ix ets jam kyëxwe'tsy wëëtykyijxy.

²⁴ Ja to'oxytyëjk tu'uk ja tsajpkaani'kx tyaj'o'ky, jampë ënety tmëëtëtyën ma tyëjkën ets näjyëtu'un ja tsajpmok kääky tyaj'o'oyëy, ka'apë tsyooymyëëtëtyën.

²⁵ Tä ojts tukninëjkxy ja Saúl mëët ja tsyiptuunpëtëjk ets kyääytyë y'uktë. Ko kyääytyääytyë, tää ojts nyäjyëkajpxëtë ets jä'ä tsu'um tsyo'ontë ets nyëjkxnëtë.