1 Samuel 27 - Biblia Dc en Mixe de Quetzaltepec

David yajpaaty jam ma filistejë ja'ayëtyën

¹ David kä'äpyëm ënety jotkujk nyäjyawëty, paaty ojts myäy tyäjy: Yë Saúl tsojkës yë ëwään jëpom xyaj'ookëty. Ni'ik oy'atëp koos nkä'äkëty, jamës nnëjkxëty ma filistejë ja'ayëtyën. Jëtu'un'äämpy ka'apës xëmë nmayëty ntajëty ets ka'apës nëkoo Saúl xy'ixjëtit xypyajëtitëty ma Israel yë naaxjotmën. Ni'ik oyës ntimnyäjyëpëkëtëty.

² Jëtu'un yë David ojts jam tsyo'onë ma ënety jam yajpaatyën mëët nitëtujk mëko'px ja jyä'äy mëti'ipë ënät jämyëët'ajtëpën ets jam myëtuna'antë ma ja mëj'ënä'ämpën mëti'ipë txëëwajtpën Aquis, yë myaank yë Maoc, jampë y'ëne'emyën Gad naaxjotm.

³ David mëët nitëtujk mëko'px yë jyä'äy, jam ojts tsyënaaytyaknpëktë Gad, ma ja Aquis tsyëënën, aakmëët ja ja'ayëty ja y'u'unk tyo'oxytyëjkëty. David ojts twoownëjkxy nimäjtsk ja tyo'oxytyëjk: mëti'ipë xyëëwajtypyën Ahinóam, jampë kyukajpnëtyën Jezreel ets ja Abigail, ja kyu'ookytyo'oxy ja Nabal, jampë kyukajpnëtyën Carmel.

⁴ Ko ja Saúl tnija'awëy ko ja David tëë jam nyëjkxnë Gad, ka'ap ojts jam t'ëk panëjkxnë.

⁵ Ets ja David t'ënëmaay ja Aquis: Pën yë mëj'ënä'ämpë xy'oyjya'apës, mooykyës tu'uk yë it naaxwiinyëtë yaa ma mnaax mkajpnën maas n'itëty ntsëënëtyën ëpëky ets jëkämy. Ka'ap yowë tyim'oy'ajnë ets tu'ukyë mëët n'ijtmukëtyës yë mëj'ënä'ämpë ma kyutujktaknën.

⁶ Paatykyëjxm ja Aquis ojts tmo'oy ja David ja kajpn mëti'ipë xyëëwajtypyën Siglag. Tyampäät yë Siglag yë'ë nyiwäämpy yë Judá.

⁷ Yë David jä'ä jam tsyënaay ma filistejë ja'ayëtyën tu'kjëmëjt ja taxk po'o.

⁸ Xëmë ijty winjëpom tsyoontë ets nëjkx jam myäätstë Guesur, Guézer ets jam Amalec, jam tääpë ja'ay tsyëënëtë ma tsyo'ontä'äkyën Telaim nyaaxjotmën ets nyijkxy Shur ets jëtu'un tyimja'ty Egiptë.

⁹ Ko ijty tnitëkëtë tu'uk ja kajpn, nitu'uk tkayajwë'ëmtë ja ye'etyëjk to'oxytyëjk. Ja jëyujk tsajpkaa wa'ats tyajnëjkxta'atë, näjyëtu'un ja tsajppaxëty, kupixynyëty, jëyujk jëku'uxëty ets ja kruktsëty, yë'ëpaat yë wit tujkxy. Ko jëtu'un tyuunta'ay jyajta'ayë tääts ijty jatëkok jam Aquis wyimpitë.

¹⁰ Tääts ijty ja Aquis yajtëyë: ¿Mëti'ipë kajpn ojts tyam të xymyeetsy? Tä ja David y'ëtsoy: Jam ëpa'tkë'ëmtsow ma Judá y'itjotmën ets näjyëtu'un jam ëpa'tkë'ëmtsow ma Jerahmeel tnitänën, näjyëtu'un jam ëpa'tkë'ëmtsow ma quenitëja'ay yajpaatën.

¹¹ David nitu'uk ijty yë ye'etyëjk to'oxytyëjk tkayajwë'ëmy juuky, këtiipë pën tnikajpxëty jam Gad mëti'ipë tyuunpyën. Yë'ë jëtu'un ijty xëmë tyuunk'ajtyp mapaat ojts jam jyuuky'ätyën ma ja filistejë ja'ayëtyën.

¹² E ja Aquis tyuk'ijxpejtyp ja David näjyëtu'un ets ijty myäy tyäjy: Yë David yajxon yowë të tmëtsiptso'onë yë Israel ja'ayëty, oy jëtu'un, jëtu'un tjëkyäpëty ëjts xymyëtunëtyës.