1 Samuel 25 - Biblia Dc en Mixe de Quetzaltepec

Ma ja Samuel y'o'knën

¹ Ko ja Samuel y'o'ky, wa'ats ja Israel ja'ayëty nyiye'eypyäjtaaytyë ets tnijëëy tniyaxtë. Jam tyajnaaxtëjkëtyë tyëkotm ma txëëwatyën Ramá. Ko jëtu'un kyijxy nyäjxy jam ojts ja David nyëjkxnë ma ja të'ëts'itjotm txëëwatyën Parán.

David mëët ja Abigail

² Jam Maón jam ijty tu'uk yë kumeenyjyä'äy tsyëënë, jä'ä yë kupixyny tmëëtëty tëkëëk mil ets tsyajppax tu'uk mil; jam tyooky yäky mëj kajpnjotm ma txëëwatyën Carmel. Jam ma xëmë tnikeepy tniwixyën ja kyupixyny.

³ Ya'atë ja'ay jä'ä ijty txëëwaty Nabal, yë'ë y'u'unk y'ok yë Caleb. Ets jä'ä ijty jyä'äy'äty janty ëwa'an ets ka'ap y'oyjyä'äyëty je'eyë y'ëxëëk wintukëty. E ja tyo'oxytyëjk mëti'ipë xyëëwajtypyën Abigail, jä'ä ënety jyä'äy'ajtpë tëtä'äky ets wijy ets oy tsuj y'ixëty.

^4-5 Ko ja David tnija'awëy ma ënety jam yajpaatyën të'ëts'itjotm, ko ja Nabal jam të nyijkxy Carmel ets tnikääpa'any ja kyupixyny ets ma jam näjyëtu'un tyook yäkyën. Majk ja David tkejxy ja jyä'äy ets ja kajpxpo'kxën tmo'otëty ja Nabal.

⁶ Näyjyëtu'un ja ayuk tmo'otëty: Jëëky mëku'uk ëxajë kupëk ya'atë nkajpxpo'kxënës ets ya'atë oy'aaw oy'ayuk yam ntuknikejxyp ma mijtsën ets ma ja mjëëky mëku'ukën.

⁷ Tëës nijawë'aty ko mëk jam mtuny ma xynyikeepy xynyipëkyën yë mkupixyny. E mijts wa'ats xynyijawë ko yë mtuunpëtëjk mëti'ipë myajkupixyny këwent'ajtëpën tëë yaa Carmel kanaak xëëw yajpaatë mëët ëëtsëty. E ma yaa yajpatën mëët ëëtsëty ka'ap yaj'ënajxëtyë ets ka'ap ojts nitii yajpëjkëtë.

⁸ Jyëkyejpy xyajtëwëty yë mtuunpëtëjk ets xymyëpëkëty. E paaty ënät yam npëjktsoy ets ya'atë ëna'ktëjkëty wäänë xypya'ëyowëty mëti'ipë yam mnimiinëpën ma mjëën mtëjkën ma myajpaatyën oy mëk ets xymyo'ojëty wäänë yë jë'kxy pëky ëkë tii jam mëët'ajtypyën, jëtu'un yë'ëjëty ets jëtu'unës ëjts, jä'ä ko jëtu'unës ëjts ma mijtsën tä jeexyë mmaankën.

⁹ Ënet ja David ja jyä'äy ojts jam jyänty nyëjkxtë ma ja Nabal ja tyëjkën ets ja aaw ayuk tmooytyë tä ënety ja David të y'ënë'ëmxëtën, ets wäänë t'ëwxijtë wi'ix ja Nabal y'ëk'ëtsoy.

¹⁰ E ja Nabal tyaa ja y'ëtsooy: ¿Pënën tääpë mtijtëp David? ¿Pën ja'ayën tääpë xynyikajpxtën ko Jesé tmaankëty? tyam ya'atë xëëw ya'atë jëmëjt may yë ja'ay kye'eky jyëtity, mëti'ipë mëtuuntëpën ko ja wyintsën wyintaj tkamëj'ixtë.

¹¹ Miitsëty jä'ä jëtääjën m'ënantëpë: ¿Ëjts tyamës ënät ja kääky tojkx ëkë jë'kxy pëky nyakëty mëti'ipës ja ntuunpëtëjk të ntuknipëjktaakën ets miits nmo'otëty ets tyam ka'ap n'ixy'atë?

¹² Tä ojts ja David jatëkok ja jyä'äy jëtu'unyë wyimpijnëtë. Ko jam jyajtë ma ja Davidjën wa'ats tukmëmëtyaktaaytyë wi'ix ënety ja Nabal të y'ëtsoyën.

¹³ Tä ja David ja jyä'äy t'ënëmaaytyääy: Tëkokyë pëjkjë'kta'atë mëti'ipë mëtsiptuuntëpën. Tääts ja yenypyujxnëty nyätyukmoxwë'ënëtyë ets ja David näjyëtu'un, nimajktaxk mëko'px ja ja'ay pyanëjkxë ets nimäjtsk mëko'px ojts wyë'ëmtë këwent'ajtpë ma ja y'ijtaknëtyën.

¹⁴ E tu'uk ja Nabal ja tyuunpë ojts tninëjkxy ja wyintaj Abigail, jä'ä ja Nabal ja tyo'oxtyëjk ets tukmëmëtyaktaay wi'ix ënety ja Nabal ja ja'ay të t'ëtsoyën ets t'ënëmaay: Tëë maxtejky mëtuukë yë David yë jyä'äy y'otstë, jam tyimtso'ontë të'ëts'itjotm ets të tjakajpxpo'kxa'antë ja wintsën Nabal, e yë'ë wiinkjaty të t'ëtsoy.

¹⁵ E tääpë ja'ayëty janty'oy yë jyot wyinma'any të tyajkëxë'ëktë mëët ëëtsëty. Jam jëkäm maas jam jeky të nkëwent'atën yë tsajppax ets të kupixyny, tääpë ja'ayëty ka'ap nijëna'a të xyajjotkëjxtës ets nitiijës të xykyapëjkëtë.

¹⁶ Ni'ikyës të xykyëwent'atë xëëny koots ets näjyëtu'un ja jëyujk tsajpkaa

¹⁷ E mijts wintaj wa'ats xynyijawë ko yë mniye'etyëjk ka'ap win'oy a'oy xy'ëtsoy. Paaty tyam, mijts ënät mëmay mëtaj tii mtunëpën, jä'ä ko pën ka'ap tii xytyuny yë nwintsënës Nabal kopkpëky ko ëxëëk jyata'any kyëpäta'any ets näjyëtu'un yë y'u'unk tyo'oxytyëjk.

¹⁸ Poj'am ojts yë Abigail mäjtsk mëko'px t'ixy yë tsajpkääky, mäjtsk'apëjkën yë uuky, mëkoxk ooky yë kupixyny tsyä'äy, wëxtyikxy pyok yë tsajpmokääky, mëko'px kony yë tsatym tyë'ëts ets mäjtsk mëko'px kony yë tsëtyu'un tsa'am të'ëts. Ko jëtu'un t'ijxmujktaay ënät ojts tukniwë'ënta'ay ja jyëyujk,

¹⁹ ets ja tyuunpë t'ënëmaay: Oy miitsëty mjaamë'ëktëty, ëjts ix'okës nëjkxa'any. Ja nyiye'etyëjk ka'ap ja tuk'ëwa'anëy ko tsyona'any.

²⁰ Tä ja Abigail ja jyëyujk tukwä'tspejty ets yu'utsy me'ty ojts jam tsyoony ma tyëjkën, wyinjënäjky jam ëtyä'äkyë'äämpy tunkëjxm, ajotkumonë t'ijxpaty ko tam ja David myintë mëët ja jyä'äy jamtsow awinm ets ënätyë tjëjpye'eyi'ky.

²¹ Ma ja David jam tyu'uye'eyën tyaa myäy tyäjy, ko natëkë të t'oyjyawë ja Nabal, ma ja jyëyujk tsyajpkaa të tkëwent'atën jam të'ëts'itjotm, ma ka'ap nitii ojts tpëjkën. Jä'ä ko ix tëkatsy ja oyjyot oywyinma'any të tyajwinpity.

²² Paaty ojts tnikäjpxy Dios wintum ets y'ënäny: Dios yë'ëjës xytyiytyunëp pën ëjts ka'apës tääpë ja'ay nyajkëjxta'ay mëët tëkokyë yë y'u'unk tyo'oxytyëjk, jyiiky myëku'uk.

²³ Ko ja Abigail t'ijxy ja David ënätyë ojts ja jyëyujk tukjënäky ets twinkujijtëy tääts jëtu'un tyaj'ijxë ja näwyinkutsë'ëkë.

²⁴ Ets twinkoxtënaay ma ja David ja tyeky'ëjxën ets t'ënëmaay: Wintsën ëjts winë npoky'atëpës. Mëyajtënës yam npëjktsowäämpy ets xymyëtoow'itëty mëti'ipës yam nikajpxäämpyën ets wäänë xytyunëty yë mëyajtën xyjyä'äkyukëty.

²⁵ Mpëjtsoyës ets këtii nëkoo xyjyä'äymyätsëty ja nyëë pyoky ja Nabal, jä'ä ko yë'ë mëj këjxm nyätyijyë nyäyajnaxa'anyë, je'eyë oypyënëty twin'ëtsoy tjëjp'ëtsoy. E ëjts kajtsës ënety jam ko ja mtuunpë jam jya'ojtstë.

²⁶ E tyam ka'ap yë Wintsën të tyajkutuky ets nëkoo ne'pny xytyämëty xyjyä'ätsëty ets mëët ja mkë'ë m'aaw mtuuntëkoyëty. Yë Wintsën, yë'ë y'a'ixëp ets tëkokyë yë mëtsiptëjk mëti'ipë m'ëxëëk'ijxëpën näjyëtu'un nëjkx jyatë kyëpätë ijxtëm yë Nabal tyam të jyajata'anyën.

²⁷ E tyamtsës n'amëtoy npëjktsoy ma mijtsën ets wya'kxëty ma mtuunpëtëjkën mëti'ipë mjämyëët'ajtëpën, ya'atë näynyamo'ojë mëti'ipë ya ntuknimiimpyën,

²⁸ etsës xypyokymyä'kxëty. Ëjts wa'atsës nijawë ko yë Wintsën jeky jam myaj'ita'anyë ma mkutujktaknën, jä'ä ko yë'ë mnitsiptuunpy ja oyajtën mëti'ipë ja Wintsën jyä'ä'ajtypyën ets mijts nijëna'a nëjkx ëxëëk mkajaty mkakëpety.

²⁹ Pën jää pën m'ixjëtity mpajëtityë ets myaj'ooka'anyë, ka'ap nëjkx wi'ix mtunyë, jä'ä ko yë njuukyajtën yë'ë ënety kë'ëm Dios tyimkëwen'ajtyp. E yë'ë ënät ja mëtsip jëtu'unyë nëjkx ja Dios tjëpëjkta'ay tä ja'ay yë tsaa t'ixka'atsyën mëët yë tsaawëtu'un.

³⁰ Paaty ko ënety jyänty y'atëy tä ja Wintsën të t'akäjpxyën ko mijts winë xytyuna'any ma Israel kajpnën ets ënety të mnajxnë ënä'ämpë ma ja Israel kajpnën.

³¹ Ka'ap nëjkx tii xymyëkjawë ets xyjyä'ämyetsy ma ja jot ne'pny natëkë të xytyemy të xyjye'etsyën ëkë kë'ëmwinma'any tii ëxëëk të xytyuny të xykyäjpxyën. Ko ënety mijts jam jotkujk myajpatnë mja'amyätsëp ya'atë mmëtuunpë ejxtëm yam m'ënë'ëmxëtyën.

³² Tä ja David y'ëtsooy: Kënu'kxy mëjjawë yë Wintsën yë xyëëw nyaxëty mëët ko tyam të mkexyë ets yaa të xynyiminyës,

³³ ets näjyëtu'un kënu'kxy mijts m'itëty, mëët ko ja wijyajtën kujk'ajtën xymyëët'aty, yë'ëkyëjxm ka'ap tyam ja ne'pny të ntemy të nje'etsyës mëët ja nkë'ë n'aawës ets jëtu'un ka'ap ja näpyaye'eyë kë'ëm të ntunyës.

³⁴ E tyamts yajxon n'ënëëmë mëët yë Wintsën xyëëwkyëjxm mëti'ipë yë Israel ja'ayëty tyios'ajtëpën, ko yë'ë të t'axajtuky ets mijts ka'ap nyaj'ëyo'onpaatëty. Ko jeexyë të mkajotëkoy maas yaa të xypyäätyën, jopy kajxyëp yë Nabal nitu'uk yë jyä'äy kyuxëënyë.

³⁵ Tä ja David t'ëxajëy mëti'ipë ënety të tyukniminyën ja Abigail ets t'ënëmaay: Oy mwinpitëty, nëjkx akujk jotkujk ma mjëën mtëjkën. Ijxtëm yam xy'ixyën, tëëjës nkupëky ets nja'akyukës tä të m'ëna'anyën.

³⁶ Ko ja Abigail jyä'äjty ma tyëjkën, tä t'ijxy ko ja Nabal tyäty xyëëwtuump ënety jam, jëtu'un tä tu'uk yë yajkutujkpë xyëëwtunyën. Janty jotkujk nyäjyawëty ets yajxon myukënë. Paatykyëjxm ka'ap wi'ix t'ënëmaay koonëm ojts wyijy.

³⁷ Komjëpom ma ënety të wyijnën ja Nabal, tä ojts ja Abigail tukmëmëtyä'äky ja nyiye'etyëjk mëti'ipë ënety të tyuny të jyätyën. Ko jëtu'un ja Nabal tmëtooy, jëtu'unyë ojts kyumuuk'ëwtityë ets kujkwä'kxy tyimxujxtaay ja nyini'kx.

³⁸ Kom majk xëëw tääts jatëkok ojts ja pa'am myätsyë ets y'o'ky.

³⁹ Ko ja David tnija'awëy ko tëë ja Nabal y'o'knë ënät y'ënäny: Kënu'kxy yë Dios yë xyëëw nyäxy, mëët ko yë'ë kë'ëm të xynyitsiptunyës mëët Ijxtëmës yë Nabal ojts xytyunyën. Ka'ap t'ëwatsy etsës kë'ëm nyänyitsiptunëtëty. Paaty ja Nabal kë'ëm ja pyoky të tkupëky. Tä ja David ojts tnikäjpxykyäxë ja Abigail ko yë'ë tpëka'any.

⁴⁰ Ko ja David ja jyä'äy jam jyajtë Carmel, ënät t'ënëmaaytyë ja Abigail: David ëëts xykyäjxtëp, jëtu'un y'ënä'äny ko mpëka'any m'uuka'anyë.

⁴¹ Tä ja Abigail nyaaxkooy ets tyajnikëxë'ky jëtu'un ja näywyinkutsë'kën ets y'ëtsooy: Ëjts je'eyës jëtu'unës nyajpaaty tä tu'uk yë tuunpën ma Davidjën, jëjp'ixyës ntimy'ity oy jëna'a yë tyuunpëtëjk yë kyë'ë tyeky npuja'anëtyës, pën yë'ëjës xytyuk'ënä'ämp.

⁴² Ko jëtu'un y'ëtsooy, tääts poj'am nyänyipëjktakëyë ets tsyo'ony mëët nimëkoxk ja tyuunpë, yë'ë tyukwä'tspäjt yë krukts ets tpatso'ony ja David ja tyuunpëtëjk, tääts mëët pyijky y'uky.

⁴³ Ojts yë David ëpëky mëët pyëjkpë y'ukpë yë Ahinóam jampë kyukajpnëtyën Jezreel, nimäjtsk yë tyo'oxytyëjk y'ijty.

⁴⁴ Yë Saúl tëë ënety ja nyëëx Mical tkë'ëyäky ma Palti ets yë'ë to'oxytyëjk'atëty, yë Palti yë'ë myaank yë Lais jampë kyukajpnëtyën Galím.