1 Samuel 24 - Biblia Dc en Mixe de Quetzaltepec

David tnime'kxy yë Saúl

¹ Ko ja tsip jyëjpkëjxy ma ja Saúl mëët tsyiptuunyën ja filistejë ja'ayëty, ënät yajtuk'ëwa'anëy ko yë David jam ënety yajpaaty të'ëts'itjotm ma txëëwatyën En-gadi.

² Ënet ja Saúl twin'ijxy nitëkëëk mil ja ja'ay ets tsyo'ontë, jä'ä yaj'ookantëp ja David mëët yë jyä'äy. Wa'ats t'ixtaaytyääytyë tsaatunjoty tsaakopjoty.

³ E jam ma ënety jëtu'un tyu'uye'eytyën, ënät ojts tye'eypyaatë yë kupixyny kemy ma ënety jam näjyëtu'un winkon yajpaatyën tu'uk yë aank. Jam ënety yë David të tyëkëtë mëët yë jyä'äy, jä'ä ja Saúl wyinkuyu'tstëp. E yë Saúl ko ojts yë jëtityë pyäätyë, jap ojts näjyëtu'un tyëjkëpë ma tääpë ja aankën ninu'un tkanijawë pën yë David jap ënety yu'utsy yajpaaty mëët yë jyä'äy.

⁴ Tä ja David ja jyä'äy y'ënëmaayë: Tyam jëtu'un tniwä'äky ko ja Wintsën m'ënëmaayë ko ja mmëtsip nëjkxëp jëna'a tpëjktä'äky mteky'ix'am. Paaty tyam mijts ix tii mtunäämpy. Ënet ja David pyëti'ky ame'tsyë ets ojts wäänë tputsujkë ja Saúl ja nyijän, ni''ix a'ixë ojts tputsuky këtiipë y'ixëtëty.

⁵ E ko jëtu'un t'ëkputsujky ja Saúl ja wyit, ënät ojts jatëkok kë'ëm tmëmay tmëtajy,

⁶ ets t'ënëmaay ja jyä'äy: Tiosës xypyutëkëp ets ka'apës wi'ix ntunëty yë Saúl, yë nwintsënës mëti'ipë yajkutujkpën. Pën yajkutujkpë yajpaaty, yë'ëkyëjxm yajkutuky mëët ko yë Wintsën të wyin'ixyë.

⁷ Jëtu'un'äämpy ja David t'akajpxtujky ja jyä'äy ets ka'ap t'ëwatsy ets tyaj'ooktëty ja Saúl. Jëtu'un ja Saúl ojts pyëtsëëmnë aankjoty ets ja tyu'u ojts tpanëjkxy.

⁸ E ja David ënätyë tpapëtsëëmy jap aankjoty ets tyaaxwinpijty: Wintsën, Wintsën. Saúl ënätyë y'ijxwinpijty ets ja David nyaaxkooy poj'am, tyajwinkëxë'ëky jëtu'un ja näywyinkutsë'kën.

⁹ Tä t'ënëmaay: ¿Wintsën, wi'ix ko xymyëpëky yë ja'ay mëti'ipë ënaanpën ko yi'iyës nmëmääpy nmëtäjpy wi'ix mijts o'ktëy ntunëtyën?

¹⁰ Tyam tëë kë'ëm xy'ixy, mijts Wintsën, ko ka'apës mijts të nyaj'ooky. Yë Dios tëë mjakë'ëyäkyë ko tyam ojts të mjëtity jap aankjoty, kajxyëp tsyipëty jeexyë mijts të nyaj'ooky, e tëë mpokymye'kxy. Jä'ä ko tyaajës të nmay të ntajy ko mijts m'ëne'emy, Dios jëtu'un të mpëjktä'äkyë m'ënä'ämëty.

¹¹ Paaty tyam Wintsën, ix yajxon mëti'ipës yam nkë'ëpëk'ajtypyën: tu'këëtsy yë Wintsën yë nyijän mëti'ipë të tjajëkyepyën jeexyë të nyaj'ookyës. Yë'ë jëtu'un mtukja'akyukëp ko ka'apës mijts n'ëxëëktuna'any, ka'apës ntsoky ets ëxëëk mjatëty mkëpätëty ets ka'apës ma mëyajtën wintsë'kën nyajtëkoy ma mijtsën. E mijts janty jëtu'unës xy'ixjëtijt xypyajjëtijnë etsës xyaj'ooka'any xyajtëkoyä'äny.

¹² Yë Wintsën yë'ë kyëwentëpëkëp pën pokymyëët ma ëëtsajtëmën nimäjtsk ets tnitsiptunëty yë yajkutujkpë, e ëjts nijëna'ajës yë yajkutujkpë maa nkamëtëkoyëty.

¹³ Jëtu'un tu'uk yë ayuk y'ënä'äny: Yë ëxëëktu'un ëxëëkajpxën, ëxëëkja'aytyëjk jëtu'unpë nitëjkëyëp. Paatyës kajëna'a mijts nkakë'ënixajëty

¹⁴ E yë'ëtsës ënät nkanija'ap ¿wi'ix ko yë yajkutujkpë xypyajëtityës? ¿Wi'ixës ko xyaj'ooka'any xyajtëkoyä'äny? Pën ëjts ka'apës maa nmëtëkoy, jëtu'unës ëjts tä tu'uk yë ukën ëkë tä tu'uk yë pixkën.

¹⁵ Paaty tyam wä'än yë Dios yë'ë tkëwentëpëky pën pokymyëët ma ëëtsajtëmën nimäjtsk. Wä'än yë'ë kë'ëm xykyuwa'anyës ets wä'än yë'ë kë'ëm tpaye'ey pën tiijës të ntuuntëkoy, mëët koos yë yajkutujkpë xy'ixjëtity xypyajëtity.

¹⁶ Ko yë David kyajpxtaay, ënät yë Saúl mëk yujk'ënany: U'unk maay David, mijtstëm jëtu'un. Tääts tyëjkëy yaxpë,

¹⁷ ets t'ënëmaay: Tëy tä m'ënanyën, mijts mëët ja oyjyot oywyinma'any të xyajwinpity ja ëxëëkpë, mëti'ipës ntuunpyën ma mijtsën,

¹⁸ tyamës të xytyuk'ixy, ko mijts jä'ä mtsojkpy wi'ixës mëpaat oy tsuj nyajpaatyën, jä'ä ko ix tëëjës yë Wintsën xyjyakë'ëyäky ma mijtsën etsës jeexyë të xyaj'ooky, e ka'apës të xyaj'o'knëpë.

¹⁹ Tëë yajnijawë ko yë ja'ay yë myëtsip tpaaty ka'ap oy mëk tyajwinpity. Paaty yam n'ënëëmë ets Wintsën yë'ë mkuju'uyxyëtëty mëti'ipë tyam të xytyunyën mëët ëjts.

²⁰ Tyamës yajxon nijawë ko mijts jëtu'un nëjkx jëna'a myajkutujkpë'aty ets Israel yë nyaax kyajpn nëjkxëp jëna'a yeeky pyety.

²¹ E tyam nikäjpxy ënät mëët yë Dios xyëëwkëjxn ko ka'ap nëjkx ëxëëk xytyuny xy'ënëëmë ëjts yë n'u'unk n'okës ets ka'apës yë nxëëw nëjkx xyaj'atëkooyë maas yë njëëky nmëku'ukën, maas yë njëën ntëjkën.

²² David ojts tnikäjpxy mëët yë Dios xyëëwkëjxm ets ja Saúl ojts jatëkok wyimpijnë jam ma kyutujktaknën, e ja David mëët ja jyä'äy jam ojts jatëkok nyëjkxtë ma ja të'ëts'itjotmën napotsypë.