1 Samuel 23 - Biblia Dc en Mixe de Quetzaltepec

David tkuwa'any ja Keilá kajpn

¹ Tëkok ojts yë filistejë ja'ayëty tnitëkëtë yë Queilá kajpn, wa'ats tsëëmkäktääytyë mëti'ipë ënety ja ja'ayëty jam të tyajnipätën. Ko tukmëmëtyaktë ja David,

² tääts ja Wintsën ojts tmëkäjpxy ets tyajtëëy: ¿Wintsën, m'a'ijxëpë etsës nëjkx ntsiptuny mëët yë filistejë ja'ayëtyë? Ets ja Wintsën y'ëtsooy: Nëjkx, nëjkx mëët mtsiptuny ets nitsiptun yë Keilá kajpn.

³ E ja David ja jyä'äy tyaa ojts y'ëna'antë: Ëëts'ajtëm yääyë Judá njayajpatëmë, tääts ntsë'këmë. Tiimëk jëtää pën nëjkxëm jam Keilá ets ntsiptu'unmëty mëët yë filistejë ja'ayëty.

⁴ Ënet ja David ojts jatëkok tyajtëy ja Wintsën. E ja Wintsën tyaa y'ëtsoowë: Nëjkx jam Keilá, jä'ä ko tëëjës ntuknipëjktaakë koos nkë'ëmo'oja'any yë filistejë ja'ayëty.

⁵ Ënet ja David mëët ja jyä'äy jam tsyo'ontë ets ojts nyëjkxtë Keilá, jamts mëët yajxon ja filistejë ja'ay tsyiptuuntë, ka'ap tyajmëtaktë, tääts tpëjkëtyääytyë ja jyëyujk tsyajpkaajëty. Jëtu'un'äämpy tyajtsoktë ja ja'ayëty jampë tsyëënëtën Keilá.

⁶ E ja Abiatar, yë myaank yë Ahimélec tëë ënety kye'eky, jam ënety të nyijkxy Keilá, tääts mëët nyäpyaata'anyë ja David, ojts tmënëjkx ja efod.

⁷ Ja Saúl ojts yajtuknijawë ko ja David tam ënety yajpaaty Keilá, ets myääy tyäjy: Tëë yë Dios kyë'ëyäkyë maas ëjtsën, paaty yë të nyëjkxpë jam Keilá ets ni'ëtujkpety jam.

⁸ Ënet ja Saúl tmëkajpxmujktaay yë tsyiptuunpëtëjk ets nyëjkxa'antë jam Keilá, yë'ë myatsantëp ja David ets ja jyä'äy.

⁹ Ko ja David tnija'awëy ko ja Saúl nyimina'anyë ets myatsa'anyë, ënät t'ënëmaay ja teety Abiatar ets tmëminëty ja efod, tääts t'ixëty wi'ix ja Wintsën y'ënä'äny.

¹⁰ Ets ja David t'ënëmaay ja Wintsën: Wintsën Dios mëti'ipë yajpatpën ma Israel kajpnën, ya'atë mtuunpë wa'ats tnijawë ko yë Saúl myina'any yaa Keilá ets tyajkutëkoyä'äny mëët ëjtskyëjxm yë kajpn koos xy'ëxëëk'ixy.

¹¹ ¿Wä'änës jëtää Saúl xyjyäntynyimina'anyë tääjës të nijawënë? ¿Xykyë'ëyaktëpës jëtää yë Queilá ja'ayëtyë mëti'ipë yaa kukajpn'ajtëpë? Wintsën, ya'atë mmëtuunpë npëjktsoyë ets xytyuk'ëwaanëty tii tunan jatanëpën. Ets ja Wintsën y'ëtsoowë: Mniminanëp yë'ë.

¹² Tä ja David tyajtëëy: ¿Xykyë'ëyaktëpës jëtää ja'ayëty yaapë kyukajpn'atën ma Saulënë? Ets ja Wintsën y'ëtsooy: Mkë'ëyakëtëp yë'ëjëty.

¹³ Ënet ja David mëët ja jyä'äy jam tsyo'ontë Queilá, jä'ä nyiwinë'atë nitëtujk mëko'px ets ojts nyëjkxtë muum jëkäm, ni yë'ë tkanijawëtë maajëtën nyëjkxtë. Ko ja Saúl tnija'awëy ko ja David tëë kye'eky, ënät ja Saúl jatëkok t'akajpxtujky ets ka'ap nëkoo tnitsoontëty ja David.

David yajpaaty jam të'ëts'itjotm

¹⁴ Jëtu'un'äämpy ojts yë David jam wyi'imy tsënääpyë të'ëts'itjotm ma yajtijyën Zif ja itjotm mëti'ipë napotsyën. Ja Saúl oy ënety winjëpom jya'ixta'ayë ka'ap nijëna'a pyätë. Jä'ä ko ja David mëk ënety ja Dios kyëwent'atyë.

¹⁵ E oy jyajëtu'unëty ja David tsyë'këp ja Saúl, jä'ä ko tim yaj'ookanëp ko nyitsoonyë. Paatykyëjxm ojts jam tsyënaawyi'imy ma ja Horés kajpnën. Jam të'ëts'itjotm ma yajtijyën Zif.

¹⁶ Tu'kxëëw tu'kjëmëjt ojts ja Jonatán tninëjkxy ja David jam Horés ets tjotmëkmo'oja'any ets yë'ë tu'ukyë tuk'ijxpätëty yë Dios.

¹⁷ Tä t'ënëmaay: Ninu'un mkatsë'ëkëty David, jä'ä ko yë nteetyës ka'ap nijëna'a mpaatëtëty. Mijts kopkpëky ko jëna'a myajkutujkpë'atëty ma Israel kajpnën. Ëjts naxymyës nëjkx n'ity ma mkutujktaknën. Yë nteetyës, Saúl, wa'ats yë tyäty nyijawë ko jëtu'un jyata'any kyëpäta'any.

¹⁸ Ënet ojts jatëkok ja käjpxtyu'unën tuntë ets Wintsën ojts kë'ëm t'ixy tnijawë. Ko jëtu'un tyuuntaay jyajtaayë, tääts ojts ja Jonatán wyimpijnë ma tyëjkën, e ja David jam wyë'ëmnë Horés.

¹⁹ E ja ja'ayëty mëti'ipë jam kukajpnajtëpën Zif ojts nyëjkxtë jam Guibeá ets t'ënëmaaytyë ja Saúl: Yë David tam yajpaaty ëjts naaxjotmëty jam kopkjotm ma txëëwatyën Haquila, jam ma ja mëj kajpnën mëti'ipë yajtijpën Horés, ëpa'tkë'ëmtsow wyi'imy ma ja të'ëts'itjotmën.

²⁰ Paaty yam n'ënëëmëtë mijts Wintsën, pën mnëjkxaanp jam, mijts ix oy jëna'a xytyimtuknipëjktaakëty, ëëtsëty nkë'ëyaktëpës yë'ë ma mijtsën.

²¹ Tä ja Saúl y'ëtsoowëtë: Dios mkënu'kxëtëp mëjwiin këjää mëët ko miitsëty xypya'ëyow xynyajts'ëyowëtës.

²² E tyam ënät miitsëty n'amëtow npëjktsowtë ets yajxon xy'ixtëty xytyuntëty maa yë'ë tso'ontä'äky jyajtä'äky ets miitsës yajxon xytyuk'ëwaanëtëtyës jëtu'untsës nitëyë ninëjkxëty. Ets pën tëë xy'ixtë, jëtu'un yajmëtoy'äty ko yë'ë win'äts oy.

²³ Yajxon ixtë tuntë maajëty yë kyuyu'tstakn tmëët'atyën ets maajaty tmëët'atyën yë tyëjkëtyakn. Jëtu'untsës yajxon xytyuk'ëwaanëtëty ets mpanëjkxtëty. E pën janty jamtsën yajpaaty, kë'ëmës yam nëjkx n'ixta'ay piiwnaxy tajnaxy ma Judá jyä'äyën.

²⁴ Tä ja ja'ayëty ojts nyäjyëkajpxëtë mëti'ipë jam tso'ontëpën Zif, ets ja Saúl t'ëwatsy ets wyimpitëty ets nyëjkxtëty ma ja nyaax kyajpnëtyën. David mëët ja jyä'äy jam ënety yajpaatë Maón, jam mëj joyjotm ëpa'tkë'ëmtsow ma ja të'ëts'itjotmën.

²⁵ Ënet ja Saúl ënätyë tsyo'ony mëët ja jyä'äy ets nëjkx t'ixta'aja'antë ja David. Ko ja David yajtuk'ëwa'anëy jamtsow jyënäjky tsaatunkëjxm ma txëëwatyën Maón. Ko ja Saúl tnija'awëy, ënätyë ojts jam nyijkxy Maón ets ja David tmatsa'any.

²⁶ Ja Saúl pë'aaytsyow tna'ëwtity ja kopk mëët ja jyä'äy, e ja David jëxkë'ptsow nyajxpë mëët ja jyä'äy, ets jotëkoy jap jyantynyäxy tääts tmëjëkämkäktë ja Saúl. Ko ja Saúl ets ja jyä'äy tyajku'ëtujktë ja David ets ja jyä'äy ets tam ënety timmyatsanëtë.

²⁷ Ënet tu'uk myiiny ja kukäjpxy ets t'ënëmaay ja Saúl: Wintsën, poj'am winpit, jä'ä ko yë filistejë ja'ayëty tam yë nnaax'ajtëm tnitëkëja'antë.

²⁸ Tä ja Saúl wyimpijty ënätyë ets ka'ap ojts ja David tmajtsnëpë, jä'ä ko yë'ë mëët tsyiptuuny ja filistejë ja'ayëty. Paatykyëjxm tampë ja it naaxwiinyëtë txëëwaty: Ja tsaatun ma ja näy'ëxmatsë y'ityën.

²⁹ Jam yë David tsyo'ony ets ojts nyijkxy jam En-gadi.