1 Samuel 22 - Biblia Dc en Mixe de Quetzaltepec

¹ David ënätyë kyeky, jam ojts nyijkxy ma ja aankën mëti'ipë xyëëw'ajtyp Adulam. Ko jam ja y'äjty tnija'awëtyë ets ja jyiiky myëtu'uk, ënätyë ojts nyiminëtë.

² Tëkokyë ja ja'ayëty mëti'ipë ënety o'ktëy jajtëp këpäjtëpën ojts ja David tpuwa'këtya'atë ets mëti'ipë ënety jam ja nyu'kxëtyën ets näjyëtu'un ja mëti'ipë ënety ka'ap jyotkujk'atën, yë David yë'ë nikopk'ajtëtë. Ya'atë ja'ayëty mëti'ipë ja David pyuwa'këtyën, jä'ä nyiwinë'ajtë nimajktaxk mëko'px.

³ Jam ja David tsyo'ony ets ojts nyijkxy Mizpá ma ja Moab ja y'itjotmën, ënät t'ënëmaay ja yajkutujkpë ja jampë y'ëne'emyën: Wintsën, mijts yam nmënu'kxtäkpy ets xy'a'ixëty wä'än yë nteety ntaakës yaa t'itë ma mnaax mkajpnën koonëmës yajxon nijawëty tii yë Wintsën tyunäämpyën mëët ëjts.

⁴ Jëtu'un'äämpy ojts ja David jam ja tyeety tyaak tyajnëjkxy ma ja yajkutujkpën mëti'ipë ënä'ämpën jam Moab. Jam y'ijtë mapaat ja David jam yajpatyën ma tääpë mëj kajpnën.

⁵ Ënet ja Gad, ja käjpxynyajxpë, ojts tkajpxtë'ëy ja David ets t'ënëmaay: Ka'ap y'oypyëtsëmëty ko yaa jeky m'itëty ma ya'atë mëj kajpnën. Paaty yam n'ënëëmë ets mtsoonëty ënätyë, nëjkx jam ma Judá y'itjotmën. Paatykyëjxm ojts yë David jam tsyoony ets ojts nyijkxy jam ma yuk'itën mëti'ipë xyëëwajtypyën Haret.

Ma may y'o'ktën ja teetyëjkëty jam Nob

⁶ Jam ënety yë Saúl yajpaaty Guibeá, jam y'u'unyë ma ja tamarisco kepypya'tkën, winkon ma ja tsajptëjkën mëët ja tyiypyujxn kyë'ëkëjxm, aaktam yajpaatë ja tsyiptuunpë wintsëntëjkëty. E ko tnija'awëy ko ja David mëët ja jyä'äy tëë ënety yaj'ixtë.

⁷ Ënet t'ënëmaay ja tsiptuunpë wintsëntëjk: Miitsëty Benjamín yë jyä'äy, mëtowtë yajxon mëti'ipë yam ntuk'ënëëmëjantëpën: ¿Wä'än tääjën yë David mmo'ojëty yë mnaax mkamëtyë ets ënät näjyëtu'un mpëjkta'akëtëty tsiptuunpë wintsën ma kyutujktaknënë, tä tyam miits nmo'otënë?

⁸ Tëkokyë miitsëty aak jëtu'unës n'ijxnë aak xymyëtsip'ajtëpës yowënë. Ni pënës të xykya'ëwaanë ko yë nmaankës tëë yë käjpxytyu'unën tuny mëët tapë Jesé myaank. Ni pën yowë ëjts xykyä'ëkjot'ajnë paatyës ka'ap të nyajtuk'ëwaanë ko yë nmaankës tëëjës xymyëtsiptsoony etsës yë njuukyajtën o'kënjëjp'am xypyëjktakë.

⁹ Ënet ja Doeg yujk'ëtsooy, ja Edom ja'ay, mëti'ipë ënety jam näjyëtu'un yajpatpë ma ja tsiptuunpëwintsëntëjkëtyën: Wintsën, ëjts tëëjës n'ixy ja Jesé ja myaank jam Nob, ko të tni'otsy yë teety Ahimélec, yë myaank yë Ahitub, ets mëët të kyäjpxy të myëtyä'äky.

¹⁰ Yë Ahimélec tëë yë Wintsën tmëkäjpxy mëët ja David kyëjxm, tëë näjyëtu'un tmo'oy yë jë'kx pëky ets ja Goliat ja yenypyujxn.

¹¹ Ënet ja yajkutujkpë tnikäjxëy ja teety Ahimélec ets tëkokyë ja teetytyëjkëty jampë ënety yajpaatën Nob ets tëkokyë jënu'un mëët nyäjyiiky'at nyämyëku'uk'atëtën. Ko jam myiintaaytyë,

¹² tä ja Saúl t'ënëmaay: Mëtoow'it yajxon mijts Ahitub yë myaank mëti'ipë yam ntuk'ënëëmëjäämpyën. Nikajpx tii mnikäjpxäämpy Wintsën, tyamës nmëtoow'ity, jëtu'un yë Ahimélec y'ëtsooy:

¹³ Tä ja Saúl tyajtëëy: ¿Wi'ix ko mijts mëët yë myaank yë Jesé xynyikäjpxytyunëtës? Tëë xymyo'oy yë tsajpkääky ets tu'uk yë yenypyujxn, ¿Këtiijë? ets tëë näjyëtu'un të Dios xymyëkäjpxy mëët yë'ëkyëjxm ¿këtii?, e tyam oytyës ënät maa xytyu'u'u'unyëty etsës xyaj'ooka'anëty tä tyam y'ëti'itsyën.

¹⁴ Tä ja Ahimélec t'ëtsooy ja yajkutujkpë: ¿Wintsën, pën jëtää janty wintsë'ëkë m'ëk yaj'ijtëp ets janty'oy janty tsuj m'ëkmëtunyë ma nitëkokyë yë mtsiptuunpëwintsëntëjkën, ets aak'oy winë tuny ma kutujktaknën tä yë Davidjën?

¹⁵ ¿Tëkokëmës jëtää yam yë Dios nmëkajpxa'anyë mëët yë'ëkyëjxmë? Këtii jëtu'unpë winma'any xypyääty Wintsën. Paaty këtii nëkoo xynyiwaanpety ya'atë mtuunpë mëët yë jyiiky myëku'uk, jä'ä ko ëjts ka'apës nijawë jëtu'unpë winma'any.

¹⁶ Ja yajkutujkpë ni'ikyë y'ënaan'ëtë'ëtsy: Tyam yajxon ntimy'ënëëmë mijts Ahimélec ko mijts ets tëkokyë yë m'u'unk m'ëna'k kopkpëky ko m'o'kta'atëty.

¹⁷ Ënet ja yajkutujkpë t'ënëmaay ja tsiptuunpë mëti'ipë këwent'ajtëpën: Yaj'o'kta'atë tëkokyë yë teetytyëjkëty mëti'ipë yë Dios myëtuuntëpën. Jä'ä ko yë'ëjëty, David pyutëjkëtyëp, wa'ats nijawëtë ko yë'ë käk pujtp, e yë'ëjëty ka'ap xytyuk'ëwaanëtës. E ja tsiptuunpëty mëti'ipë ja yajkutujkpë kyëwent'ajtëpën ka'ap tnixajjë'ktë nëkoo ja teetytyëjkëty.

¹⁸ Paaty ja yajkutujkpë t'ënëmaay ja Doeg, ja Edom ja'ay: Doeg, yaj'ook mijts. Ënet ja Doeg tjanty yaj'o'ktaay ja teetytyëjk, jä'ä xëëw jä'ä ja teetytyëjk y'o'ktë nitëkë'px mëkoxk, aaktam tnijän'atë ja efod.

¹⁹ Ko jëtu'un yë Doeg t'ëkyaj'o'ktaay ja teetytyëjkëty, tä ojts jam nyijkxy Nob, ma teety kyukajpn'atën ets tyaj'o'ktaay ja to'oxytyëjkëty, ye'etyëjktëjk, pi'k ëna'këty ets ja mëti'ipë ënety je'eyë myinyëmën naaxwiiny. Näy ots tyaj'o'kta'ay ja jëyujk, tsajpkaa ets tsajppax.

²⁰ Ojts tu'uk myaank kye'eky ja Ahimélec, jä'ä xyëëwajtyp Abiatar, jam ojts pëyi'ikyë nyijkxy ma ja David ënety jam yajpaatyën.

²¹ Ets tuk'ëwa'anëy ko ja Saúl tëë ënety tyaj'o'kta'ay ja teetytyëjkëty mëti'ipë myëtuuntëpën ja Wintsën.

²² Ets ja David y'ëtsooy: Jëtu'unës ënety nmay ntajy jä'ä xëëw, komë tam'ajtp ënety ja Doeg, kopkpëky ko t'ëwaanëja'any ja Saúl. Ëjts yë poky nmëët'ajtyp ko yë mjëëky mmëku'uk të y'o'kta'atë.

²³ E këtiits mtsë'ëkë mjawë wë'ëm yaa mëët ëjts, jä'ä ko pën myaj'ookanëp, näjyëtu'unës xyaj'ooka'any. E ko yaa myajpaatëty mëët ëjts jotkujk m'itëty ets ka'ap tii mjatëtëty.