1 Samuel 20 - Biblia Dc en Mixe de Quetzaltepec

Ma yë Jonatán tputëkën yë David

¹ Yë David ënätyë jam kyeky Naiot ma Ramá y'itjotmën ets ojts nyijkxy ma ënety yë Jonatán yajpaatyën ets t'ënëëmëja'any: ¿Tiijësën të ntuny? ¿Tiijëstën ëjts npoky'äjtyp? ¿Maajësën yë mteety të nmëtëkoy etsës jëtu'un xy'ixjëtijt xypyajëtitëty ets koonëmës xytyimyaj'ooka'any?

² Ets ja Jonatán y'ëtsooy: Ka'ap, ka'ap yë Dios tyajkutukëty. Ka'ap myaj'ookëtëty. Nijawë ko yë nteetyës jëyëjpës yë winë xytyuk'ëwaanë ko tii tuna'any, wä'än yë'ëjëty yë mëjpë mutskpë ëkë yiinpë wäänpë. ¿E wi'ix ko ënät yë nteetyës ka'ap xy'ëktuk'ëwa'anëpëtyës ko myaj'ooka'anyë? Ka'ap yowë.

³ Tä ja David ni'ikyë y'ënaan'ëtë'ëtsy: Yë mteety wa'ats tnijawë ko ëëtsajtëm oy näjya'awëmë, paaty yë'ë ka'ap mtuk'ëwa'anxëty këtiipë xywyiinkjawëty. Ëjts nikäjpxypyës yam ets wa'ats yë Wintsën t'ixy koos o'kën jëjp'amës n'ity.

⁴ Ënet ojts ja Jonatán tyajtëy: ¿Tiijës ëjts ntunëp mëët mijtskyëjxm?

⁵ Tä ja David y'ëtsooy: Ëk'ix, mijts mnija'ap ko jëpom yajnixëëwtuna'any ma ja po'o pyi'k'atyën, e ëjts kopkpëkyës ko jam nyajpaatëty mëët ja yajkutujkpë. E mooykyës jëpom yë xëëw wä'änës jam yu'utsy nyajpaaty aayjyotm ujtsjotn, wëxtëjkmnëm jënäkyxyëëw näpyatëmëty.

⁶ E pën myajtëëwëp yë mteety mëët ëjts, jëtu'un xy'ënëëmëty ko jamës yë näwyaanpëtsëmë të n'amëtoy ma mijtsën mëët koos jam të nnëjkxy maas yë nkajpnën jam Belén. Jä'ä ko tëkokyë yë njëëky nmëku'ukës yë'ë jam nixëëwtuuntëp ma yajyäkyën winjëmëjt yë wintsë'kën.

⁷ Pën ënaanp ko oy, ënätës jotkujk näjyawëtëty. E pën joot'anpëjkp, täänëm xynyijawëty ko xyjyänty yaj'ookaanpës.

⁸ Paaty yam n'amëtoy ya'atë mëyajtën. Tëëxë nätyukajpxëmë, ko mëku'uk xëmë näjyäwëja'anëmë Wintsën wyintuuy, e jatu'kpëky ja winma'anypë, pën ëjts nëkoo tëkatsy winë ntuunpy, etsës pokymyëët, tim yaj'o'kës yaa mijts kë'ëm. Ka'ap kwanë jam xytyimwoonëjkxëtyës ma mteetyën.

⁹ E ja Jonatán tyaa ja y'ëtsooy: Këtii jëtu'un mmay mtajy. Pën ëjts nijawë'ajtypës koos nteety myaj'ooka'anyë, ntuknijawëp yë'ë ënätyë.

¹⁰ Tä ja David yajtëëwë: ¿Wi'ixës nijawëty ko ënety ja mteety ka'ap oy m'ëtsoyë?

¹¹ Tä ja Jonatán y'ëtsooy: Min, ja'amtë jam tunkëjxm kopkëjxm. Tä ojts nimäjtsk nyëjkxtë,

¹² jam ja Jonatán t'ënëmaay ja David: Mëët yë Wintsën yë xyëëw mëti'ipë Tios'ajtpën ma Israel ja'ayëtyën, tyam yajxon ntuk'ëwaanë koos jëpom ets wëxtëjkm jopy, tëëjës ënety nijawë tiijës yë nteety tyuknipëjktakëpën. Pën oy tsuj mnikäjpxyë, ënätyë ntuk'ëwaanëty,

¹³ e pën nijawë'ajtypës ko mjantyyaj'ookanëp. Yë Dios yë'ëjës mëk xytyiytyunëp pën ka'ap n'ëwaanë ets pën ka'ap yajxon mputëkë ets tjëkyäpëty mkä'äkëty. Yë Dios yë'ë mëj këjää mputëkëjanëp jëtu'un tääjës ja nteety të tputëkën.

¹⁴ E pën jä'ä xëëw ëjts jaakjuuky'ajtpës, jëtu'unës xy'oyjyawëty tä yë'ë tyam m'oyjawëtyën. E pën o'kptsës,

^15-16 këtii nijëna'a xyjyä'äytyëkoyëty ja m'oyjot m'oywyinma'any maas ja n'u'unk n'ëna'kën ets n'u'unk nto'oxytyëjkën. Jëtu'un'äämpy nëjkx tjëkyepy wi'ix mëpaat ja Wintsën näjyëtu'un tëytyuny ja mëtsiptëjk ets tim yajkutëkooytya'ajëty. Jëtu'un'äämpy ja Jonatán ojts ja käjpxytyu'unën tuny mëët ja David.

¹⁷ E ja Jonatán mëj këjää ënety t'oyjyawë ja David, paaty ojts jatëkok tnikäjpxy mëët yë Dios yë xyëëw ko tmëku'ukjawë ja David, jä'ä ko mëk ënety tsoky tjawë.

¹⁸ Tä t'ënëmaay: Yë'ë jëpom yajnixëëtunaanp ma po'o pyi'k'atyën, e ko ënety jëpom yaj'ixy ja m'ënyääypyäjn winwa'ats, tääts nëjkx myajja'amyetsy.

¹⁹ E ko nëjkx tyëkëëkxëëwpety jä'ä yaj'ixëty ko ënety ka'ap mjam'aty. E paaty yam mijts n'ënëëmë ets mnëjkxëty jatëkok ma ojts m'ëknäyu'tsëpën ets mnäpyëjkta'akëtëty winkon ma ja tsaanipiiwpety kyëxë'ëkyën.

²⁰ Ënätës tëkëëk'ok nti'pxë'ëka'any jamtsow, jëtu'un ijxtëm jeexyë tii ntukti'pxtä'äkyësën.

²¹ Täätsës ja ntuunpë n'ënëëmëty: Nëjkx ixta'a ja ti'pxnkepy. Koos n'ënëëmëty: ja ti'pxnkepy tyaatsow jä'ä ma mtänën, mëta'ak ets mëmin, jyëkyäpëp mpëtsëmëty akujk jotkujk. Jä'ä ko mijts ka'ap nitii mjata'any mkëpäta'anyë. Tyampës nikäjpxyën Dios xyëëwkyëjxmës yam jëtu'un n'ëna'any.

²² E koos n'ënëëmëty: Ja ti'pxnkepy jam ja jëkäm, ninëjkx jam. Mijts ënätyë mpëtsëmëty ets mkä'äkëty. Jä'ä ko ja Wintsën jëtu'un ënety të tuknipëjktaakë ko ni'ik oy ko mtimkyä'äkëty.

²³ E yë'ë ja näy'oyjyawë mëti'ipë të nätyukwinwa'anëmën, yë Wintsën wa'ats nyija'ap ko jëtu'unpë ja käjpxtyu'unën të ntu'unëmë.

²⁴ Ënet ja David ojts jam nyijkxy tunkëjxm kopkkëjxm ets jam nyäyu'tsë. Ko jyä'äjty ja xëëw ma tnixëëwtuntën ja po'o u'unk ënät ja yajkutujkpë nyaaxwe'tsy ma ja kaaypyäjnën ets kyäyä'äny y'uuka'any.

²⁵ Jam nyaaxwe'tsy maayëmëtën xëmë nyaaxweetsyën potsywinmtsow, e ja Jonatán wintuuytsyow nyaaxwe'tsy, e ja Abner yë'ë pya'a'ënyääpy ja Saúl. E jä'äts ja David ja y'ënyääypyäjn jëtu'unyë ojts winwa'ats wyi'imy.

²⁶ Jä'ä xëëw yë Saúl ka'ap ojts niwi'ix y'ënä'äny. Jä'ä ko tyaa ënety myäy tyäjy ko yë David wä'änxyëp ënety tii të jyäty të kyëpetyë mëti'ipë të y'ëxëëktunyën, paatykyëjxm ka'ap të myiny

²⁷ E komjëpom ma mëmäjtsk xëëw tnixëëwtuntën ja po'o u'unk, ja David ja y'ënyääypyäjn winwa'ats ojts jatëkok wyi'imy. Tä ja Saúl tyajtëëy ja myaank Jonatán: ¿Wi'ix ko ëxë'ëy ka'ap myiiny ja Jesé myaank kääpyë, e tyam nän ka'ap myiinkojnëpë?

²⁸ Tä ja Jonatán y'ëtsooy: Mëktä'äkyës yë David të xy'ënëëmë ko nyëjkxa'any jam Belén etsës të xypyëjktsoyës n'awa'atsëtyës yë tyu'u'aaw.

²⁹ E mëktä'äkyës të xy'amëtoy koos n'ëwatsëty ja nyëë tyu'u, täätsës të nkexy. Jä'ä ko ja tyeety tyaakëty yë'ë jam yë wintsë'kën yakantëp mëti'ipë winjëmëjt yajktëpën ets ja y'äjty mëktä'äky të nyikäxëty. Täätsës näjyëtu'un të xy'ënëëmë ko pën n'ëwatsëpës ja tyu'u ets näjyëtu'un nëjkx tku'ix tkukajpxë ja jyiiky myëku'uk. E paatykyëjxm ka'ap yaa tyam xy'ixy.

³⁰ Ënet ja Saúl yajxon tukjoot'anpëjky ja Jonatán ets t'ënëmaay: Mëxy kupoj, wi'ix ojts yë mtaak mtimyajminyë naaxwiiny. ¿Tii këtiijës xyij nnijawë ko mijts janty'oy mëët yë Jesé myaank mnäjyawëtyë mëti'ipë yajtsëyuump yajjaaypyäjtp ma mijtsën ets ma mtaakënë?

³¹ Pën yë'ë juuky'ajtp, mijts ets mkutujkën ka'ap nëjkx jotkujk yajpaaty. Paaty yam n'ënëëmë ets nëjkx xy'ixta'ay, ko xypyaatëty yaa xyajminëty, jä'ä ko yë'ë nitëjkëyëp ets y'ookëty.

³² Tä yë Jonatán y'ëtsooy: ¿E tiits ko y'ookëty? ¿Tii të tuuntëkoy?

³³ Ko yë Saúl jëtu'un tmëtooy, ënätyë yë kyu'umën tkajpë'ky ets tjayaj'ookany ja myaank Jonatán. Jëtu'un'äämpy ojts ja Jonatán twinjawë ko ja tyeety jyantyyaj'ookäämpy ënety ja David.

³⁴ Ënet ja Jonatán wyä'ätsë'ky, jam kaaypyäjn wintum, ka'ap ojts ja xëëw t'ëktuktëjkënë ma ja mëmäjtsk xëëwpë xyëëwtuntën. Jä'ä ko yë'ë ënety myëmääpy myëtäjpy ja David mëët ko ënety ja tyeety të tyukjoot'anpëkyë.

³⁵ Komjëpom ma ënety mëët të tkäjpxy'ätyën ja David nyäpyaata'anyë, jam ojts ja Jonatán nyijkxy mëët ja tyuunpë.

³⁶ Ko jam jyajtë, tääts ja tyuunpë t'ënëmaay: Pëyi'ikyë nëjkx ixta'a ya'atë ti'pxn mëti'ipës yam nti'pxë'ëkäämpyën. Tääts ja Jonatán tu'uk ti'pxë'ky ja tyi'pxn. Janty jëkäm ojts tnajtsti'pxë ets ja tyuunpë pyëyë'ktso'ony.

³⁷ E ko ja tyuunpë jam jyä'äjty ma ënety ja ti'pxnkepy të kyä'äyën, ënät ja Jonatán ojts mëk tnajtsyaaxë ets t'ënëmaay: Ja ti'px kepy tam ja jëkäm të kyä'äy, ka'ap jyamëty ma jam mtänën.

³⁸ Tääts jatëkok ja Jonatán t'ënëmaay ja tyuunpë janty mëk: Mëta'ak jotëkoy, pëyi'ikyë nëjkxkoj këtii mwa'ak'oyë. Ënet ja tyuunpë ojts tkajpë'ëky ja ti'pxnkepy ets tkë'ëmooy ja wyintsën.

³⁹ E yë'ë ka'ap ojts nitii t'ixy ets nitii tkaja'akyujkëy, jä'ä ko yi'iyë ja Jonatán ets ja David ënety nyija'awëtyëp mëti'ipë tyuuntëpën.

⁴⁰ Ënet ja Jonatán tkë'ëyäjky ja tyuunpäjn mëti'ipë myëtsiptuunpyën ets tmooy ja tyuunpë, tääts tmënëjkxëty jam kajpntum.

⁴¹ Ko ja Jonatán ojts ja tyuunpë nyëjkxnë, ënät ja David pyëtsiimy jap tsaajëxkë'py ma ënety yu'utsy të y'ityën. Ko twinkuwa'këy ja Jonatán tëkëëk ok ojts nyaaxkoy tyajnikëxë'ëky jëtu'un ja näywyinkutsë'kën, tääts nyämyajts nyämyënäänëtë ets nimäjtsk jyiiytyë yaxtë, tä ja David ojts jyotkujkë.

⁴² Ko jëtu'un kyëjxtaay nyajxtaay, ënät ja Jonatán t'ënëmaay ja David: Nëjkx akujk jotkujk ets ja'amyäts ja käjpxtyu'unën mëti'ipë të ntu'unëmën nimäjtsk, yë Wintsën yë'ë kë'ëm të ntimtyuknija'awëmë ets tëë n'amëto'owëmë ko yë'ë xëmë yajpaatëty ma ëëtsajtëmën ets ma ja n'u'unk'ajt n'ok'ajtëmën. Tä ja David ojts jam tsyo'onë ets ja Jonatán näjyëtu'un wyimpijnë ma kyajpnën.