1 Samuel 17 - Biblia Dc en Mixe de Quetzaltepec

David y'awinpity tsiptuunpë ja'ay ma ja kajpnën

¹ Yë filistejë ja'ayëty ojts yë tsyiptuunpëtëjk tyajtu'ukmujkta'atë ets jam myiintaaytyë Socó, mëti'ipë yë Judá jyä'äyëty nyitënääpyën, jamts jya'ajtaktë ma txëëwatyën Efes-damim, mëti'ipë wë'ëmpën itkujky ma Socó mëët yë Azecá nyäpyäätyë.

² E ja Saulpë mëët ja tsyiptuunpëtëjk jam ja ojts tyu'ukmuktë ma ja joyjyot txëëwatyën Elá ets nyäjyëjp'ixëtë tsyiptuna'antë mëët ja filistejë ja'ayëty.

³ Yë'ë filistejë ja'ayëty jamtsow ojts nyäpyëjkta'akëtë ma tu'uk ja kopkën, e yë Israel ja'ayëty yaatsow ma ja wiinkpë ja kopkën ets këjää nyämyëjëkäm'atëtë, yë'ë itkujky wë'ëmp ja joyjyot.

⁴ Ajotkumonë tu'uk pyëtsiimy yë ja'ay jam ma filistejë ja'ayëtyën, janty këjxm tyänë jä'ä yenyëty tu'kxajpk ja kujkm ets ja tu'kë'ë. Jä'ä txëëwaty Goliat, jam kyukajpnëty Gad.

⁵ Yë kyujup'ajtyp yë pujxn mëti'ipë yajtijpën tsuxkpujxn ets nän yë'ë nyijän'ajtyp, jä'ä niwinë jye'emtyëty wëxtyikxy majk mokx kilë.

⁶ Näyjyëtu'un mëti'ipë nätyuk'ëtujkëpën pyuuykijxy yë'ë pujxn ets ja kyu'umën mëti'ipë jam kyejkyijxy myënëjkxypyën.

⁷ Yë kyu'umn jëjp jëtu'un kyëxë'ëky tä yë kepyën ma ja'ay yë pyiity tkëxpitën mëti'ipë yajwitkojtëpën ja jyëjp jä'ä jye'emtyëty tëtujk tsimënmokën. Ja tyuunpë jä'ä winye'eyëp.

⁸ Tä ja Goliat wya'akwë'ëmëy ets t'ënëmaay ja tsiptuunpëtëjk mëti'ipë Israel ja'ayëtyën: ¿Wi'ix ko miitsëty janty wääpy mtimmyiinëtë ets mtsiptuna'antë? ¿ëkë jä'ä koos nfilisteëja'ay'atë, miitsëty yë Saúl mëtuuntëpë? tyam n'ënëëmëtë ets xywyin'ixtëty tu'uk yë ja'ay wä'änës mëët n'ëktsiptuny.

⁹ Pën yë'ë mëtakp, mijts nmëtuntëp, e pën ëjts mëtakp, miitsëty kopkpëky ko xymyëtuntëtyës.

¹⁰ Ya'atë xëëw yam miitsëty nkajpx'aanpëktë, miitsëty tsiptuunpëtëjkëty mëti'ipë Israel ja'ayëtyën: Mooytyëkës tu'uk ja'ay wä'änës mëët n'ëktsiptuny.

¹¹ Ko ja Saúl ets ja Israel ja'ayëty jëtu'un tmëtoowtë y'ënä'äny ja filistejë ja'ay, ojts ja jotmay tyuktëjkëtya'ajëtë ets ja tsë'ëkë näjyëtu'un.

¹² Jä'ä jëmëjt ma ja Saúl y'ëne'emyën, jam Belén, tam ijty tu'uk yë ja'ay tsyëënë, jä'ä xyëëwajtyp Jesé, tëë ënety myëjja'ayënë. Nituktujk ijty ja myaank: tu'uk David xyëëwajtyp.

^13-14 Ja nitëkëëkpë, ja mëjatypë, jä'ä xyëëwajtëp Eliab, Abinadab ets Samá, yë'ëjëty tëë ënety nyëjkxtë mëët ja Saúl tsiptuunpë. E ja David, jä'ä ko jaakmutsk'ajtpnëm ënety,

¹⁵ je'eyë nëjkx jam kyääky yäky ma ja Saúl ja ja'ajtakn jam tmëët'atën mëët ja tsyiptuunpëtëjk. Ja David ënätyë ijty wyimpijtkojnë jam Belén ets ja tyeety ja tsyajppax ets ja kyupixyny tkëwent'ajtë.

¹⁶ E tääpë ja filistejë ja'ay xëmë ijty je'eyë pyëtsimy jopyëp ets jënäkyxyëëw ets tkajpx'ëtsë'ëkë, tkajpxjoot'anpëky ja Israel ja'ayëty. Ets jëtu'un ijty xëmë y'ëti'itsy tyim'ity jëtu'un wëxtyikxy xyëëw y'apejty.

¹⁷ Ënet tëkok ja Jesé t'ënëmaay ja myaank David: U'unk maay, mënëjkx ya'atë i'px tsim yë tsajpmoktë'ëts ets majk yë tsajpkääky, jam ma m'ajty yajpaatën, ma t'atsëënëtën ja myëtsipëty.

¹⁸ Mënëjkx näjyëtu'un ya'atë kesë ets xymyo'ojëty yë tsiptuunpë Wintsën. Jam xy'ixëty yajxon wi'ix ja m'ajty yajpaatë ets mëminëp oynatii mëti'ipës ntuk'ixëpën ko oy mëk jamëty.

¹⁹ E ja Saúl ets ja David ja y'äjtytyëjk tam ënety yajxon tsyiptuntë ma tu'uk joyjotmën mëti'ipë xyëëwajtypyën Elá, mëët ja filistejë ja'ayëty.

²⁰ Komjëpom ja David ojts tsojk pyëtë'kojy ets ja tsyajppax kyupixynyëty wiink ja'ay tuknipëjky, tääts jotkujk tsyo'ony ets ojts tmënëjkxy winë mëti'ipë ja tyeety të tyukë'ëtëkëtyën. Ko jam jyä'äjty ma ja tsiptuunpë y'ijta'aktën, tam ënety tyimtsoontë ja tsiptuunpëtëjk, janty jëtu'un yaxnëtë jyojknëtë.

²¹ Tä yë Israel ja'ayëty ets näjyëtu'un yë filistejë ja'ayëty poj'am nyäwya'ptaayëtë ets mäjtskpëky nyäwyinkuwa'këtyë.

²² E tëkokyë mëti'ipë ënety ja David myënëjkxypyën, jä'ä ojts poj'am tukkë'ëtëjkëtyä'äy ja ja'ay mëti'ipë kyëwent'ajtypyën ja ku'umën, yenypyujxn ets ti'px, tëkokyë mëti'ipë ja ja'ay myëtsiptuuntëpën ets ojts nyijkxy pëyi'ikyë ma ënety ja y'äjty yajpaatën ets t'ixa'any wi'ix jam jyatë kyëpätën.

²³ E tam ënety jëtu'un myëtyä'äky ja David mëët ja y'äjtyëjk ko ja filistejë ja'ayëty pyëtsiimy mëti'ipë xyëëwajtypyën Goliat, jampë tsyoonyën Gad ets ja Israel ja'ayëty yajkajpx'anpëjktë ets yaj'ëtsë'ëkëtë, jëtu'un tä ënety winjëpom xëmë y'ëti'itsyën. Ja David ojts tmëtoy.

²⁴ E ko ja Israel ja'ayëty t'ijxtë tääpë ja'ay, ojts ja tsyë'këtya'atë ets tkukäktääytyë,

²⁵ ets y'ënantë: ¿Tëë xy'ixtë tääpë ja'ay të pyëtsimyënë? Xëmë jëtu'un tyajjoot'anpëky yë Israel ja'ayëty. Pën näy'a'ijxëyëp tsyiptunëty mëët ets pën yaj'o'kpy tääpë ja'ay xëmë pyëtsimyën winjëpom, yë yajkutujkpë mëj nëjkx myo'oyë wit meeny, nëjkxëp myo'oyë tu'uk ja nyëëx ets yë'ë to'oxytyëjk'atëty ets ja tyeety tyaak ja ja'ay ka'ap nëjkx ja y'ayajk y'ako'onën t'ëkyajknë.

²⁶ Ënet yë David tyajtëëy yë ja'ay jampë ënety winkon tyänëtën: ¿Tii jëtää yajmo'ojëp ja ja'ay mëti'ipë ënety yaj'o'kpyën xiipë filistejë ja'ay, ets kyëxëty nyaxëty ma je'eyë ja Israel ja'ay t'atsë'ëk t'ajawën. Jä'ä ko tääpë filistejë ja'ay tim pën yë'ë tyimnäjya'awënë ets ëxaty tijëty yë Dios yë tsyiptuunpëtëjk.

²⁷ Tääts yë'ëjëty nän je'eyëm ojts y'ëtsowtë tä ënety të y'ëk'ënantëpën, mëti'ipë yajmo'ojëpën ja ja'ay pën yaj'o'kpyën ja Goliat.

²⁸ E ja Eliab, ja David ja y'äjty kyopk, ojts tmëtoy ko ja David jëtu'un myëtyä'äky mëët ja ja'ayëty ets ojts tyukjoot'anpëkyë tä y'ënëmaayë: ¿Tii yaa të xynyiminy mijts David? ¿Pën të xytyukmë'ëxmatsë jam të'ëts'itum ja tu'ukpë mäjtskpë ja tsajppax ets ja kupixyny mëti'ipë jaakjamën? Ëjts wa'atsës nijawë ko mijts yi'iyë mëtijtyp nämyëjkäxë winma'any, paaty yaa atu'uk të mminy ets mtsip'ixa'any.

²⁹ Tääts ja David y'ëtsooy: ¿E ëjts tiixës të ntuny? Ëjts je'eyës yam tu'k'aaw mäjtsk'aaw të nkäjpxy?

³⁰ Ënet ojts ja y'äjty twinwa'ktu'uty ets ojts wiinktsow tyajtëy, e ja wiinkpë näjyëtu'un y'ëtsoowë.

³¹ E ja ja'ayëty mëti'ipë myëtoowtën ko ja David jëtu'un tyajtëy, ënät ojts tuk'ëwaanëtë ja Saúl. Tä ja Saúl tyaxëy ja David ets tmëjwooy.

³² Ënet ja David ojts t'ënëëmë ja Saúl: Ka'ap mëpaat pën jyotëkatsy wyinmaaytyëkatsy mëët tääpë filistejë ja'ay, jä'ä ko ëjts, mëti'ipë mijts mëtuunëpën, nëjkxaanpës etsës ntsiptuna'any mëët yë'ë.

³³ Jëtu'un ja ijty, je'eyëp ko ka'ap tjëkyepy atu'uk xywyinkuwa'akëty tääpë filistejë ja'ay, jëtu'un y'ëtsooy yë Saúl, ix mijts ëmuumnën mutskëty, e yë'ë tsiptuunk të tukjuuky'äty.

³⁴ Tä ja David y'ëtsooy: Koos yë nteety yë tsyajppax ets kyupixyny nkëwent'ajtës ets tu'uk myiny yë kaa ëkë osë ets tmatsy ja kupixyny,

³⁵ ënetyës npatsoony ets y'awakëjxyës kë'ëm ntimpyëjkë ja mëti'ipë të tjamatsyën, e koos xyjyanipëtë'ëky poj'amës ja y'aaw ënätyë ntukxajëyë etsës ntuknaaxwopy täätsës nyaj'ooky.

³⁶ E wä'än tmëti'ipë jëyujkëty, tä yë kaajën ëkë osë ëjts poj'amës ijty nyaj'ooky. E nän tim jëtu'untsën ënät jyatëty kyëpätëty tääpë yë filistejë ja'ay mëti'ipë ka'ap nijawën pën y'ëwtatëpën mëti'ipë nëkoo yajoot'anpëjkpyën, ja Wintsën ja tsyiptuunpëtëjk.

³⁷ Yë Wintsën mëti'ipës xëmë xyajtsokpën ma kaajën ets ma jëyujkën ëwa'anëtypë, nän yë'ëjës xyajtso'okaanp ma tääpë yë filistejë ja'ayën. Ënet ja Saúl y'ënëmaayë: Nëjkxts ets yë'ë Wintsën mputëkëtëp.

³⁸ Ënet ja Saúl ojts tni'ënä'ämë ets ja David tuknijäntëty ja wit nän jëtu'unpë tä ja Saúl ja jyä'äjën ets tu'uk ja pujxn kujup tukujuptëty ets tuk'ëtuktëty ja nyini'kx mëët tu'uk ja pujxn nijän.

³⁹ Tä ja David ok tkëxtëy ja yenypyujxn ma ja wyëënën, mëti'ipë ja wyit tyukwë'ën'ijtypyën, tääts ojts jyaye'eytsyoony, e jä'ä ko jemnyëm ënety ja jëtu'unpë ja nijän tpëjktä'äky. Tä t'ënëmaay ja Saúl: Ka'ap tyaapë tjëkyepy wi'ixës nmëye'eyëty, jä'ä ko ka'apës jëtu'unpë nijëna'a nyajtuny. Ënet ojts jatëkok nyätyuknijääntu'utyë.

⁴⁰ Tääts tkajpë'ky ja tyajk, ko jap wyoknajxy jap ojts mäjtsk tëkëëk ja tsaa tkonë'ëky ets t'apëjkëy xyuumyjoty, tam ja tsyaawëjëtu'un tpawitsy ets twinkuwa'këy ja filistejë ja'ay.

⁴¹ E ja filistejë ja'ay näjyëtu'un myëwinkoonë, ets jä'ä winye'eyëp ja tyuunpë.

⁴² Ko ja filistejë ja'ay tuk'ijxpejty ja David ets t'ijxy ko janty pi'k ëna'knëm, janty tsapts ja wyiin jyëjp ets janty'oy kyëxë'ëky, ka'ap ojts mëj timy pyiky,

⁴³ je'eyë t'ënëmaay: ¿TI wi'ixës xy'ixy, ukënë, paatyës xynyiminy mëët yë kepyë? Ets ojts tpoky ja David mëët ja kyë'ëmtios xyëëwkëjxm.

⁴⁴ Ëpëky t'ënëmaay: Nimiinkës yaa winkon, wä'änës yë mxixy yë'ë nmo'oy yë joon jëyujk ets nyätyuk'ix nyätyukmëyatëtëty, ëkë jëyujk mëti'ipë ëwa'anëtyën, aayjotypë ujtsjotypë jyëtitën.

⁴⁵ Ja David tyaa ojts y'ëtsoy: Mijts jä'äs xynyiminy mëët yë mpujxn, mku'umën ets tëypyujxn. E ëjts mijts ninëjkxy mëët yë Wintsën yë xyëëw mëti'ipë yë Israel tsiptuunpëty Tyios'ajtëpën, mëti'ipë mijts je'eyë xëmë nkajpxjoot'anpëjkpyën.

⁴⁶ E tyam yë'ëts yë Wintsën mkë'ëyakanëp ëjts nkë'ë'amjotmës, tyam nyaj'ookäämpy yam ets nëëpuxa'anyës yë mkëpajk. E tëkokyë yë jyot nyini'kxëty yë tsiptuunpëtëjkëty mëti'ipë filistejë ja'ayëtyën, ooykyës yam ntuk'ajëpijpëtya'aja'antë yë joon jëyujk, jëyujk ëwa'anëtypë mëti'ipë jëtijtëpën aayjoty ujtsjoty. Jëtu'unts nijawëtëty tëkokyë yë ja'ayëty naaxwiinyëtë apëtsëmy ko tää tu'uk yë Dios yajpaaty ma Israel ja'ayëtyën.

⁴⁷ Tëkokyë jënu'un tyam yaa yajpaatën nyija'awëtëp jëtu'un ko yë Wintsën ka'ap yë'ëjëty mëët yajtso'oky pujxn ku'umën, ëkë ti'pxn. Jä'ä ko ya'atë tsip Dios yë'ë kë'ëm tyimtunäämpy ets yë'ë mkë'ëyakanëp ma ëëtsëtyën.

⁴⁸ Ënet ja filistejë ja'ay ëka'any pyëti'ky ets mëët tsyiptuna'any ja David. Ja David nän ënätyë nyäpyëjktakëyë jëjp'ijxp ets twinkuwa'akëja'any yë filistejë ja'ay.

⁴⁹ Tääts tu'uk tju'ty ja tsyaa jap xuumyjoty ets tpëjktäky ma ja tsyaawëtu'unën. Tääts tukwinjëpijpë'ky ja filistejë ja'ay, kujk ojts timmyo'oy ma ja wyinpokën. Tääts pojën jyëpijpkëtäky winta'akjupy naaxkëjxy, tap ja tsaa y'ity wyimpokjoty.

⁵⁰ Jëtu'un ja David ja nyitsaa mëët ja tsaawëjëtu'un kujk tmooy ma tjawëtyën wintu'upëky ets yë'ë tmë'ookëty. E ja David ka'ap ja pyujxn ënety tii,

⁵¹ paaty ojts pëyi'ikyë tninëjkxy ja myëtsip ets tuk'ixju'tuty ja kyë'ëm yenypyujxn ets yë'ë tukyo'kpujxtuty. Ko ja filistejë ja'ayëty t'ijxtë ko tëë y'ooky ja tsyiptuunpë kopk, tä ënätyë kyäktaaytyë.

⁵² Ënet ja tsiptuunpëtëjkëty mëti'ipë Israel ja'ayëtyën ets mëti'ipë Judá tso'ontëpën tyëjkëtyë yaxpë jojkpë ets tni'ënä'ämëtë ja tsip, tpatso'ontaaytyë ja myëtsip, tpaja'ajtë jampaat ma ja Gad ja y'itjot yajtuktëkën ets ma yajnitëkën ja kajpn mëti'ipë yajtijpën Ecrón. Tu'ktu'u aakyë'ë filistejë ja'ayëty yaj'ijxnëtë kujy jëpipy jëtu'un Saaraim ets yjä'ty Gad ets Ecrón.

⁵³ Ko tpapooytyääytyë ja filistejë ja'ayëty, ënät ja Israel ja'ayëty wyimpijtë jam ma ënety të y'itën ja filistejë ja'ayëty ets winë tpëjktaaytyë mëti'ipë ënety jëtu'unyë të tnikäkta'atën.

⁵⁴ Ja David jam ojts tmënëjkxy Jerusalén ja Goliat ja kyëpajk, e ja yenypyujxn tyi'pxn ets ja kyu'umën jam ojts tyajwë'ëmy ma ja wyittëjkën.

⁵⁵ Ko ja David twinkuwa'këy ja filistejë ja'ay, yë Saúl tëë ënety tyajtëy ja Abner, ja tsiptuunpë Wintsën: Mijts Abner, tuk'ëwa'anëkës, ¿Pën yë David tyeety'äjtyp?

⁵⁶ Ets ja Abner y'ëtsooy: Wintsën, tyam yajxon ntuk'ëwaanëty Dios xyëëwkëjxn, ko ka'apës nijawë. Ka'apë, tyamts mijts ntuknipëky ets xypyaye'eyëty. Jëtu'un y'ëtsooy ja Saúl.

⁵⁷ Paaty ko ja David ojts wyimpijnë ma ënety mëët të tsyiptunyën ja filistejë ja'ay ets tam ja Goliat ja kyëpajk tmëmiinë, tä ja Abner poj'am tkë'ëmajtsy ja David ets ojts twoownëjkxy ma ja Saulën.

⁵⁸ Tä ja Saúl tyajtëëy ja David: Tuk'ëwa'anëkës u'unk maay ¿Pën mteety'äjtyp? Tä ja David y'ëtsooy: Yë nteetyës jä'ä txëëwaty Jesé, jam tsyëënë Belén mëti'ipë mijts mtuunpë'ajtypyën.