1 Samuel 16 - Biblia Dc en Mixe de Quetzaltepec

Ma David yajkënu'kxyën ets yë'ë y'ënä'ämëty

¹ Ënet ja Wintsën t'ënëmaay ja Samuel: ¿Mapaatën mon tuk m'ita'any mëëtkyëjxm yë Saúl? Ëjts ka'apës n'ëktsojknë ets yë'ë y'ënä'ämëty ma Israel kajpnën. Yaj'uts yë mxuty mëët yë on ets mnëjkxëty jam Belén ma Jesé tsyëënën, jä'ä ko tëëjës tu'uk yë myaank nwin'ijxë ets yë'ë y'ënä'ämëty ma Israel kajpnën.

² ¿E tiijës ntunëp etsës jam nëjkxëty? Jëtu'un y'ëtsooy yë Samuel, ko yë Saúl tnijawëty xyaj'ookëpës yë'ë. Tä ja Wintsën y'ëtsoowë: Mëtsoon tu'uk yë tsajpkaa'u'unk ets m'ëna'anëty koos nëjkx xytyukwintsë'ëkëja'any.

³ Ënet xywyowëty ja Jesé ets mjämyëët'atëtëty ma ja wintsë'kën xyaka'anyën ets tyam njaaktuk'ëwaanëty tii mëpaat xytyunyën. Ets xykyënu'kxëty mëti'ipë ënety ntukni''ijxëpën ets yë'ë y'ënä'ämëty ma Israel kajpnën.

⁴ Samuel ojts tjantytyuny tä ënety ja Wintsën të y'ëne'emyën. Ko jam jyä'äjty Belén ënät ojts ja mëjja'aytyëjk jyëjpye'eyë'ëkëtë ets y'ënëmaayëtë mëët ja tsë'ëkë: ¿Ja jotkujk'ajtën mmëmiimpy myajmiinpyë?

⁵ Jëtu'un, oypyës yë jot winma'any nmëmiinpy nyajmiinpy, jëtu'un y'ëtsooy yë Samuel. Yë Wintsën Dios yë'ë wyintsë'kën nmo'ojäämpyës. Paaty tyam näkyajpxkëxë'ëkëtë wa'ats ma Tiosën etsës xyjyämyëët'atëty maas ja wintsë'kën nyajka'anyën. Ënet ja Samuel ojts tkajpxkëxë'ëky ma Tiosën wa'ats ja Jesé, mëët ja y'u'unk y'ëna'k ets twoowtaay, tääts mëët ja wintsë'kën tyaka'any.

⁶ Ko jyajtë jam ets ja Samuel t'ijxy ja Eliab, tääts ojts myäy tyäjy: Wa'atsës ntsatsy nyijawë ko yë'ë xiipë ja'ay mëti'ipë yë Wintsën të twin'ixyën ets yë'ë y'ënä'ämëty ma Israel kajpnën.

⁷ Tä ja Wintsën y'ënëmaayë: Këtii yë'ë xy'ixëty yë wiin jëjp, wi'ix y'ixë'atyën yë ja'ay, wi'ix kyonëtyën ëkë yenyëtyën. Jä'ä ko ka'apës yë jëtu'unpë nmëjpëjktä'äky. Ka'ap yë'ë tyuna'any mëti'ipë yë naaxwiinyëtë ja'ay y'oy'ijxypyën. Yë naaxwiinyëtë ja'ay yë'ë y'oy'ijxyp mëti'ipë je'eyë nëkëjxy oykyëxë'kpën, ëjts ka'apës yë'ëjëty jëtu'unpë n'ixy, yë'ëjës n'ijxyp wi'ix yë ja'ay jyot wyinma'anyëtyën.

⁸ Tä ja Jesé ojts jä'ä tmëkäjpxy ja Abinadab ets tukwinkuwo'owëy ja Samuel. E ja Samuel tyaa y'ënäny: Nen ka'ap tyaapë yë'ëjëty yë Wintsën të wyin'ixyë.

⁹ Tä ja Jesé tmëjwooy ja Samá. E ja Samuel tyaa y'ënäny: Ka'ap tyaapë yë'ëjëty yë Wintsën të wyin'ixyë.

¹⁰ Jesé ojts wëxtujk ja myaank tukwinkuwowë ja Samuel. E ja Samuel ka'ap ojts nitu'uk tpaaty mëti'ipë ja Wintsën ënety të twin'ixyën.

¹¹ Ko t'ijxtaay, tääts tyajtëëy: ¿Ti këtii jam wiinkpë maankë? Tëkoy'ajtp tu'uk, tam ja tsajppax tkëwent'aty. Jëtu'un y'ëtsooy yë Jesé. Tä ja Samuel y'ënäny: Nëjkx yajtsoontë, jä'ä ko pën tëkoy'ajtp tu'uk ka'ap tjëkyepy nyajtso'ontakmëty ya'atë tu'unën kajpxën.

¹² Ënet ja Jesé ojts tnikäxë ja myaank, tääpë mëxy'u'unk janty'oy ënety y'ixëty. Janty tsapts ja wyiin jyëjp ets janty'oy kyëxë'ëky. Ënet ja Wintsën t'ënëmaay ja Samuel: Ya'atë jëtu'un të nwin'ixyës, paaty kënu'kx ets yë'ë y'ënä'ämëty ma Israel kajpnën.

¹³ Tä ja Samuel tu'ktsim yë on tpëjkë'ky. Ja nëë jëtu'unpë kyëxë'ëkyën waay tsyooyën ets tukuja'axy ja David tam ënety ja myëkä'äxtëjk y'ixëtë. Ko jëtu'un tyuunë jyajtë, ënätyë ja Wintsën ja myëk'ajtën y'oyajtën tyukëtakë. Ok ja Samuel ojts tsyo'onë ets nyëjkxnë jam Ramá.

David tyuny ma ja Saúl y'ëne'emyën.

¹⁴ E tyam ja Saúl ni'ikyë ja Wintsën ja myëk'ajtën y'oyajtën myajtstutënë ets ëxëëk tyuunënë ja ëxëëk poj mëti'ipë yë Dios kyäjxën.

¹⁵ Paaty ja ja'ay y'ënëmaayëtë mëti'ipë ënety jam mëët tyuunmuktën: Ijxtëm mijts xy'ixyën xytyunyën Wintsën, yë ëxëëk poj yë'ë myajkumoon myajkutujkëyëp tyam mëti'ipë yë Wintsën kyejxypyën

¹⁶ Paaty yam n'ënëëmëtë ets xynyi'ënä'ämëty etsës n'ixta'atëty tu'uk yë ja'ay mëti'ipë tyukjajtypyën wi'ix tukkowëtyën yë kepykyow, jëtu'unts yë'ë ënätyë tyëkëty koowpë ko mijts mtuktëkëtëty ja monyëtukyë ets ja kuma'ay kutajën.

¹⁷ Tä y'ënäny ja Saúl: Oy nëjkx xy'ixta'atë tu'uk ja'ay mëti'ipë tyukjajtypyën kyowëty ets xyajmintëty.

¹⁸ Tääts tu'uk y'ënäny: Tëkokës ojts n'ixy jam ma Jesé yë tyëjkën ko tam tu'uk yë myaank mëti'ipë janty'oy koowpën, jampë tsyëënën Belén, tyukjajtyp kyowëty jotmëk näjyëtu'un, nikääkë kyäjpxy myëtyä'äky, wijy kujk ets oy y'ixëty.

¹⁹ Ënet yë Saúl tkejxy yë kyukäjpxy ma ja Jesé ja tyëjkën ets y'ënäny: Tuknikäjxkës yë mmaank mëti'ipë xyëëwajtypyën David, mëti'ipë yë tsajppax, kupixyny kyëwent'ajtypyën.

²⁰ Yë Jesé ojts yë myaank David tjantytyuknikexy ja Saúl. Ko yë David ojts nyijkxy jam ma Saulën, tu'kjëyujk ojts tmënëjkxy ja tsajpkääky, tu'kxu'ty ja uuky ets tu'uk yë tsajppax.

²¹ Tä ja David jam myiiny ma ja Saulën ets ojts jam wyë'ëmnë, yë Saúl oy tukjotkëtäky yë David, paaty ojts tpëjktä'äky ets yë'ë pyutëkëtëty.

²² Ojts ja Saúl tu'uk ja noky tkexy ma ja Jesé yajpaatyën ets t'ënëmaay: Tun yë mëyajtën ëxmats wä'än yë David twë'ëmy mëët ëjts. Jä'ä ko yë Saúl janty jotkujk ënety nyäjyawëty ko jyam'aty ja David.

²³ E paaty ko ënety yë Saúl tyukminyë yë ëxëëk poj mëti'ipë yë Wintsën kyejxypyën ets tyëkë kuma'ay kutajëpë, David ënätyë ijty ja kyow tkëëyi'iky ets tyëkë koowpë. Ko ja Saúl ijty jëtu'un tmëtoy, tääts jatëkok jyotkujkë ets y'ëxmatsyë ja ëxëëk poj.