1 Samuel 15 - Biblia Dc en Mixe de Quetzaltepec

Wi'ix ja Wintsën ka'ap tukjotkëtä'äkyën ja Saúl

¹ Tu'kxëëw tu'kjëmëjt ojts yë Samuel tninëkxy yë Saúl ets t'ënëmaay: Yë Wintsën yë'ëjës ojts tëkok xykyexy ets mijts nkënu'kxëty ets m'ënä'ämëty ma Israel ja'ayëtyën mëti'ipë yë'ë kyajpn'ajtypyën. Paaty tyam mëtoow'it ënät mëti'ipë yë'ë mtuknijawëjanëyëpën.

² Jëtu'un y'ënä'äny yë Wintsën, mëti'ipë maaytyääyëpën winë. Ëjts ntëytyunäämpyës yë Amalec ja'ayëty mëët ijxtëm të tuntën yë Israel ja'ayëty, ko tu'u'ëtujktë ma ënety të y'ënu'kxëtyääynyëtën ko Egiptë tsyo'ontë.

³ Paaty tyam n'ënëëmë ninëjkx ets yaj'o'kta'a, wä'än tmëjëty tmutskëty, ye'etyëjk to'oxytyëjkëty, jëyujk tsajpkaa, tsajppax ets kupixyny.

⁴ Jëtu'un'äämpy ojts Saúl tmëkajpxmujkta'ay ja jyä'äy jam Telaim ets t'ijxka'pxtaay. Jä'ä nyiwinë'ajtë mëti'ipë tekyye'epy nëjkxtëpën tëkëëk mëko'px mil ets ëpëky majk mil mëti'ipë jam tso'ontëpën Judá.

⁵ Ënet ja Saúl mëët ja jyä'äy jam tsyo'ontë ets ojts tniwa'aktë ja kajpn mëti'ipë txëëwajtpën Amalec, jam ojts nyäpyëjkta'akëtë winkon ma jam tu'uk ja wokën.

⁶ Ets t'ënëmaay ja quenitëja'ayëty: Näjyëpëkëtë miitsëty. Pëtsëmtë jam ma Amalec ja'ayëtyën, këtiipë mëët tu'ukyë m'a'okmuktëty. Jä'ä ko miitsëty oy ojts yë mjot mwinma'any xyajkëxë'ëktë mëët yë Israel ja'ayëty ko jap tsyo'ontë Egiptë. Jëtu'un yë quenitëja'ayëty jyänty tsyo'ontaaytyë jam ma Amalec ja'ayëtyën.

⁷ Ënet ja Saúl tyëjkëy tsiptuunpë mëët ja Amalec ja'ayëty, jam tyajtso'ontaktë ma txëëwatyën Havilá ets tyimja'ty jam Shur, ma ja tsyëpa'an nyaxtën mëët ja Egiptë ja'ayëty. Saúl ka'ap tyajmëtäky ja myëtsip.

⁸ Ojts tmatsy ja Agag mëti'ipë ënety jam ënä'ämpën ets ojts tyaj'o'kta'ay ja Agag ja tsyiptuunpëtëjk.

⁹ E ja Saúl mëët ja tsyiptuunpëtëjk kajts tyaj'o'ktë ja Agag ets näy ka'ap tyaj'o'ktë ja oyjyätypë ja kupixyny ets ja tsajpkaajëty. Yi'iyë yajkutëkooytyë ka'apë ënety nëkooyë tsyoowpaatyën ets ka'apë mëk tyunyën.

¹⁰ Ënätyë ojts ja Wintsën tmëkäjpxy ja Samuel ets t'ënëmaay:

¹¹ Okës tyam njamëkjawë koos ojts yë'ë Saúl npëjktä'äky ënä'ämpë, yë'ë ka'apës xy'ëkmëj'ijxnë ets ka'apës xy'ëkmëmëtoownë. Samuel ojts jyoot'anpëky, ka'ap t'oyja'awëy ko jëtu'un ja Wintsën y'ënëmaayë, paaty ojts tu'ktsu'um wyanë tsyowë Dios wyintuuy.

¹² Komjëpom, janty tsojk ojts pyëtë'kojy ets nyäpyaata'anyë mëët ja Saúl. Tä yajtuk'ëwa'anëy ko ja Saúl ka'ap ënety jam yajpaaty, ko jam ënety të nyijkxy Carmel, ma tu'uk ja mëjpotsyën të tyajpëtë'ëkyën mëti'ipë jam ëwtijtpën ets jyä'ty Guilgal.

¹³ Tä ja Samuel jam tsyo'ony ets ojts nyijkxy, jam ma ja Saúl ënety yajpaatyën ets y'ënëmaayë: Yë Wintsën mkënu'kxëtëp. Tëës npatuny tä ja Wintsën të tni'ënä'ämën.

¹⁴ ¿Tiixën tääpë xyajnätyijyë ma yaa xyajmu'uy xyajniitsyën yë tsajpkaa, yë tsajppax ets kupixyny mëti'ipës nmëtoopyën? Jëtu'un ja Samuel y'ëtsooy.

¹⁵ Jam të tyajtsoontë Amalec, jëtu'un y'ëtsooy yë Saúl, yë tsiptuunpëtëjkëty paatykyëjxm të tyajmintë ets mWintsën yë'ë yajtukwintsë'ëkëty, e winëjaty tëëjës nyajkutëkooytya'atë.

¹⁶ Amonyë it, tyam yajxon ntuk'ëwaanëty wi'ixës yë Wintsën tsu'uy të xy'ënëëmën. Jëtu'un ja Samuel y'ëtsooy: Nikajpx tyamës n'amëtoow'ity.

¹⁷ Tä ja Samuel y'ënëmaayë: ¿Ti këtiijën ënety mnätyijyë ko mijts ka'ap tii xykyëjxmëtyë? tyam ënä'ämpë myajpatnë ma Israel ja'ayëtyën, ko ja Wintsën mpëjktakë ets myajkutukëty.

¹⁸ Yë'ë të mtuk'ëne'emyë ets xyajkutëkoyëty tääpë pokyjä'äytyëjk, yë Amalec ja'ayëty ets xynyitëkëty koonëm xy'ijxnajxta'ajëty.

¹⁹ ¿E wi'ixts ko ënät ja y'ënä'ämën të xykyumëtoownaxy? ¿Wi'ix ko të xyjyä'äpëjkpë mëti'ipë ja mëtsip të xypyëjkën ets ënät winë tëkatsy xytyuny Wintsën wintuuy?

²⁰ Ënet ja Saúl y'ëtsooy: Ëjts tëëjës yam ntuny mëti'ipës yë Wintsën të xytyuk'ëne'emyën, tëëjës ntsumy nmatsy yë Agag jampë y'ëne'emyën ma Amalec kajpnën ets tëë tëkokyë nyaj'o'kta'ayës yë Amalec ja'ayëty.

²¹ E yë tsiptuunpëtëjkëty tëë tyajwë'ëmtë ja tsajpaxëty, kupixynyëty, jëyujk, tsajpkaajëty mëti'ipë ni'kxëtyën ets oyëty mëkëty, mëti'ipë ënety näjyëtu'un të nyitukëtën ets kyutëkoytyëty; e ëëtsëty tëëjës nyajwë'ëmtë ets jä'ä ja Wintsën yajtukwintsë'ëkëty, mijts yë mWintsën jampë Guilgal nyaaxjotm yajpaatyën.

²² Ënet ja Samuel y'ënäny: Yë Wintsën yë'ë ni'ik y'oyjya'ap ko yajmëmëtowëty, ets ka'ap yë'ëjëty ma winë yajmo'oy yajkexyën, tä yë wintsë'kënën, ëkë ma jëyujk tsajpkaa yajtukwino'okyën. Yajtsoowpatyp ni'ik ko yajkäjpxymyëmëtowëty, ets këtii ko yajmo'ojëty jëyujk'on tsu'utsy'on.

²³ Mëti'ipë ka'ap tkäjpxymyëtoyën yë Wintsën, näjyëtu'un yë pyokytyuny tä najtsja'apën, ets tä yë mëti'ipë yë wiink tios y'ëwtajtypyën, mëti'ipë käjpxykyutëjpën. E komë mijts tëë xy'ijxtijë ja y'aaw y'ayuk, näjyëtu'unts ënät tyam m'ixtijyë ma m'ëne'emyën.

²⁴ Ënet ja Saúl t'ënëmaay ja Samuel: Tëyajtën tëëjës njantytyëkoy mëët koos ja Wintsën ja y'ënä'ämën ka'ap të nmëjpëjktakë ets tääjës mijts të xyjya'ënëëmën: ka'apës jëtu'un të ntuny mëët koos të ntsë'ëkë ja ja'ay etsës yë'ë të ntuny mëti'ipë ënety yë'ë y'amëtoowtëpën

²⁵ E tyamts mijts npëjktsoy etsës xypyokymyä'kxëty, tun yë mëyajtën winpit jatëkok mëët ëjts ets jam yë Wintsën n'ëwtajtmëty tu'knax.

²⁶ Ka'ap yam mpawinpita'any, jëtu'un y'ëtsooy yë Samuel. Jä'ä ko mijts ka'ap yë Wintsën yë tyiyajtën të xypyatuunë, paaty tyam ka'ap näjyëtu'un m'ëkmëj'ijxënë ma myajkutukyën.

²⁷ Ënet ja Samuel amëjaaw jyojkwinpijty ets twinye'eytyuty ja Saúl; ko ja Saúl jëtu'un t'ijxy, tä tmajtsy ja Samuel kyë'ëkëjxy ets twojtswinpijty ets ojts tkë'tsë ja nyijän mëti'ipë ënety nyijän'ajtypyën.

²⁸ Ënet ja Samuel t'ënëmaay ja Saúl: Timjëtu'un tääjës yam yë nwit të xykyë'tsën, jëtu'un yë Wintsën tkëëtsy yë mkutujkën ma Israel kajpn. Ets të tmo'oy tu'uk yë mmëkukajpn mëti'ipë jaak'oy yë jot winma'anymyëët'ajtypyën këtiinëm mijts.

²⁹ Jä'ä ko yë Dios mëti'ipë yë Israel kajpn mëj'äämpy jyëkyejpyën, ka'ap yë wyin'ëëny ets ka'ap yë jyot wyinma'any tyëkatsy tä yë naaxwiinyëtë ja'ayën.

³⁰ Tä ja Saúl jatëkok y'ënäny: Pokyës të ntuny; e tyamts npëjktsoy, nmënu'kxtä'äky ets je'eyëm xywyintsë'ëkëtyës maas nyajkutukyën. E paaty yam n'ënëëmë ko tun yë mëyajtën winpit jatëkok mëët ëjts. Wä'än yë mWintsën tu'knax n'ëwtajtëmë.

³¹ Ënet yë Samuel ojts wyimpity mëët yë Saúl ets ja Wintsën t'ëwtajty.

³² Tä ja Samuel y'ënäny: Yajmintë yaa Agag mëti'ipë jam të y'ëne'emyën ma Amalec ja'ayëtyën. Tääts yë Agag jam myiiny ma Samuelën akujk jotkujk, jëtu'un myäy tyäjy ko tëë jotmay tuknaxy ets ja o'kën ëxëëkpë tsaatsypë ka'ap y'ëktukja'tanënë.

³³ E ja Samuel tyaa y'ënäny: Mëët yë mtëypyujxn may yë u'unktaak yë y'u'unk myääy xytyukyajni'o'ktuty. E timjëtu'un tä tääpë u'unktaak jyajtën, nän timjëtu'un tyam yë mtaak jyata'any. Tä ja Samuel t'apujx tukpujxëy ja Agag jam Guilgal, ma ja Wintsënën.

³⁴ Ko jëtu'un kyijxy nyäjxy tä ja Samuel ojts jam tsyo'onë ets nyëjkxnë Ramá ets ja Saúl näjyëtu'un ojts nëjkxnë ma ja tyëjkën jam Guibeá.

³⁵ E ja Samuel ka'ap ojts nijëna'a t'ëk'ijxnë ja Saúl, je'eyë ojts ok tjaaknimony tjaaknituky, mëët ko ënety ja Dios ok tu wyinmaaytyëkatsy ko ojts tpëjktä'äky ja Saúl ets yë'ë y'ënä'ämëty ma ja Israel kajpnën.