1 Samuel 13 - Biblia Dc en Mixe de Quetzaltepec

Ma tsyippaatën mëët ja filistejë ja'ayëty

¹ Ko yë Saúl ojts tyuuntso'ontä'äky jam ma Israel kajpnën mëj ëna'k ënätynyë, tëë ënety ëka'any tyuny ma yajkutujkpë'atyën,

² ko nitëkëëk mil twin'ijxy ja tsiptuunpëtëjk ma ja Israel ja'ayëtyën. Nimäjtsk mil ojts tmëwë'ëmy jam Micmás ets ma ja kopkjotmën mëti'ipë yajtijpën Betel. E ja nitu'kmil yë'ë ojts mëët wyë'ëmtë ja Jonatán jam Guibeá ma ja Benjamín ja jyä'äy tnitänën. E ja mëti'ipë ka'ap yajwin'ijxtën ojts ja yajkäjxta'atë ma jyëën tyëjkëtyën.

³ Ja Jonatán ojts jam tpawojpkäkta'ay ja filistejë ja'ayëty mëti'ipë ënety jam Guibeá këwent'ajtëpën, e ja filistejë ja'ayëty ojts tnijawëtë ënätyë. Paatykyëjxm ojts ja Saúl tyäky ënätyë ja nija'awën maajaty ja naax kajpn tnitänën ja Israel ets txuxmujkta'atëty ja hebreo ja'ayëty.

⁴ Tëkokyë ja Israel ja'ayëty wa'ats tnija'awëtyääytyë ko ja Saúl ënety tëë tyajkutëkooytyä'äy ja filistejë ja'ayëty mëti'ipë këwent'ajtëpën. Paatykyëjxm ja filistejë ja'ayëty mëk tukjoot'anpëjktë ja Israel ja'ayëty. Ko ja Israel ja'ayëty ye'eymyujktaaytyë ënät tpuwa'këtyë ja Saúl jam Guilgal.

⁵ Yë filistejë ja'ayëty näjyëtu'un ojts nyäyajmujkta'ajëtë ets mëët tsyiptuna'antë ja Israel ja'ayëty. Ja ënety tmëët'atë i'px majk mil yë pujxnwintëkäämpë mëti'ipë myëtsiptuuntëpën, nitëtujk mil mëti'ipë jëyujk këjxy nëjkxtëpën ets ja mëti'ipë tekyye'epy nëjkxtëpën jëtu'un nyimay'ajnëtë nëë'ajinën. Tä nyëjkxta'atë jam Micmás ets jam awinmtsow Bet-avén, jam y'ijtakn tyaj'ixtaktë.

⁶ Yë Israel ja'ayëty mëj jotmayjoty ojts nyäyjyawëtë, jä'ä ko ja filistejë ja'ayëty jëtu'unyë tyukpëtijtmujkëtë. Paatykyëjxm ojts jap muum jyaak näyu'utsëtë aankjoty, jutjoty, wokjoty ets tam mëti'ipë muum mo'ontsjoty näyu'tsëtën, tääts jyaak näyajtsokëtë.

⁷ Nimay ojts tuknajxnëtë ja Jordán nëë ets jamtsow nyajtskäkëtyë ma ja Gad ets Galaad y'itjotmën. Yë Saúl ojts jyaak wë'ëmy jam Guilgal, e tëë ënety tyëkooynyëtë, ja tsyiptuunpëtëjk tsë'ëkë tsë'ëkë jyaak pänëjkxëtë.

⁸ Jam yë Saúl y'ëwxijty wëxtujk xëëw, jëtu'un tä ënety ja Samuel të y'ënë'ëmxëtyën, ma ojts wëxtujk xëëw kyä'pxyën ka'ap yë Samuel jyä'äjty, ojts pyoxnë, paaty ja ja'ayëty ojts wintu'uk patu'uk tsyo'onëtë.

⁹ Ënet ja Saúl ni'ënä'ämëy: Yajmintë yë tsajpkaa mëti'ipë wintsë'kën'ajtpën ets ja nay'ëëw'oy näykyajpx'oyë yajtunëty. Ets ojts yë'ë kë'ëm tnino'oky ja wintsë'kën.

¹⁰ Tam ënety ja Saúl timy nyino'ktaaynyë ja wintsë'kën ko ja Samuel jyä'äjty. Tä ja Saúl pojën tnitso'ony ja Samuel ets tkajpxpo'kxa'any.

¹¹ E ja Samuel tyaa y'ënëmaayë: ¿Wi'ix ko jëtu'un të m'ëtë'ëtsy? Ets ja Saúl y'ëtsooy: Koos të n'ixy mijts ka'ap m'ëkmiinë tä të xyjyanikäjpxyën ets koos të n'ixy ni'ikyë yë filistejë ja'ayëty myiin'ëtë'ëtstë jam Micmás,

¹² ënätës të nmay të ntajy ko ntij yaa Guilgal xy'ëknikëta'akanëtës ets ka'anëm nätyukë'ëtëkëtyës ja Wintsën. E jëtu'un'äämpts kë'ëm ya'atë tsajpkaa të nyaj'ookyës etsës ja wintsë'kën të nyäky.

¹³ Tä ja Samuel y'ëtsooy: Tääpë të xytyunyën ka'ap myëtëyëty. Kooxyëp të xytyuny tä yë Wintsën të m'ënë'ëmxëtyën, yë m'ënä'ämën mkutujkën xëmëkyëjxm jeexyë y'ity ma Israel ja'ayëtyën.

¹⁴ E tyam ënät yë mkutujkën jëjptukaanp yë'ë. Yë Wintsën yë'ë ënät kë'ëm y'ixta'ajëp pën tsyojkpy ets ënät tpëjkta'akëty ënä'ämpë ma kyajpnën, mëët jä'äkyëjxm ko mijts ka'ap të xytyuny tä ënety të mja'ënëmxëtyën.

¹⁵ Ënet ja Samuel ojts jam tsyo'onkojnë Guilgal ets ojts nyijkxy. E ja maytsyiptuunpëtëjk jä'ä ojts tpanëjkxtë ja Saúl ets tsyiptuna'antë. Jam tsyo'ontë Guilgal ets jyajtë jam Guibeá ma ja Benjamín tnitänën. Jam yë Saúl tmëtyooy yë tsyiptuunpëtëjk, jä'ä nyiwinë'ajtë nitëtujk mëko'px.

¹⁶ Saúl ets ja myaank Jonatán mëët ja tsiptuunpëtëjkëty mëti'ipë ënety pänëjkxëtëpën, jam ojts wyë'ëmtë Guibeá ma ja Benjamín ja nyaaxjotmën; e ja filistejë ja'ayëty jam ojts wyë'ëmtë Micmás.

¹⁷ Oy ënety tëkëëkpëky të jyatsoontë ja tsiptuunpë filistejë ja'ayëty. Tu'kpëky ojts jam nyëjkxtë Ofrá ma ja itjot txëëwatyën Sual,

¹⁸ tu'kpëky ojts nyëjkxtë jam Bet-Orón ets tu'kpëky jam tunkëjxm ma txëëwatyën Seboím jam të'ëts'itjotm.

¹⁹ Ma yë Israel ja'ayëtyën ni pën ënety jam tkatuunk'aty yë yajpujxn o'oyëk. Paaty yë filistejë ja'ayëty ojts jotkujk tyimmay tyimtajtë ko yë hebreo ja'ayëty ka'ap tjëkyäptë tyajkojtëty yë yenypyujxn ets kyu'umënëty.

²⁰ Paaty ja Israel ja'ayëty ko tjëjpmä'äja'antë ja tyuunpäjnëty mëti'ipë tyukpujx tyukka'tstëpën ets tyuknaaxjä'ptëpën, jam ijty nyëjkxtë ma ja filistejë ja'ayëtyën.

²¹ Ets ko yajjëjpmä'ätë ja tyuunpäjnëty tsow yajxon tnipëktë ja filistejë ja'ayëty.

²² Paatykyëjxm ja ja'ayëty mëti'ipë ënety jyämyëët'ajtëpën ja Saúl ets Jonatán ka'ap tmëët'atë ja tyi'pxnëty, kyu'umënëty ets ja pyujxnëty. Je'eyë nimäjtsk mëti'ipë myëët'ajtëpën winë.

²³ Tyamts ja filistejë ja'ayëty kä'pxy yajxon yajpaatë. Ënet ja filistejë ja'ayëty tu'kpëky jam tsyo'ontë ets nyëjkxtë jam Micmás.