1 Samuel 11 - Biblia Dc en Mixe de Quetzaltepec

Ma Saúl ka'ap tyajmëtäkyën yë Amón ja'ayëty

¹ Nahas mëti'ipë jam yajkutujkpën Amón, ojts nyijkxy jam Jabés ma ja Galaad itjotmën ets tyajtu'ukmujky ja tsyiptuunpëtëjk, tä tnitëkëja'any ja naax kajpn. E ja ja'ayëty jampë tsyëënëtën Jabés tyaa t'ëtsoowtë ja myëtsipëty: Tsojk ntu'unëm tu'uk yë käjpxtyu'unën ets tyam miits nmëtuntëty.

² E Nahas mëti'ipë Amón ja'ayën tyaa y'ëtsoowëtë: Oy, tyam yë käjpxtyu'unën yajtunëty, je'eyëp tëy ko këëktu'ukës yë m'a'oywyiin njuutëty, jëtu'unts yë Israel ja'ayëty o'ktëy jyatëty kyëpätëty.

³ Tä ja mëjja'aytyëjk y'ëtsoowtë jampë tsyëënëtën Jabés: Mooytyëk ëëts wëxtujk xëëw ets ntuk'ëwaanëtëtyës yë Israel ja'ayëty, e pën kajts pën myiny mëti'ipës mëpaat xypyutëkën, ënät ëëtsëty näkyë'ëyakëtëty ma miitsëtyën.

⁴ Tä ja kukäjpxy jam jyajtë Guibeá ma ja Saúl ënety tsyëënën ets tuknija'awëtyë ja naax kajpn mëti'ipë ënety amay'ajtp jotmay'ajtpën. Tä ja ja'ayëty tyëjkëtyääpyë jëëpyë yaxpë.

⁵ E ja Saúl, tsajpkaa ënety ojts të tyajjë'kxy ko jam jyä'äjty kajpnjotm, ënät tyajtëëy: ¿Tii ja'ay jajtëtëp? ¿Wi'ix ko jyë'ëtë ya'axtë? Ënet yajtukmëmëtyäky ja amay jotmay mëti'ipë ënety të tnikajpxtën ja ja'ayëty jampë tsyoontën Jabés.

⁶ Ko ja Saúl jëtu'un tmëtooy ja aaw ayuk, ënät tyuktëjkëyë ja Wintsën ja myëk'ajtën y'oyajtën ets yajxon jyoot'anpëjky.

⁷ Tääts mäjtsk yë tsajpkaa tyaj'o'ky ets tukpujxëtyääy, ojts tkäjxwä'kxy ma tëkokyë ja it naaxwiinyëtë tnitänën ja Israel kajpn. Ets ja kukäjpxyëty y'ëna'antë: Jëtu'un yajtunëty ja jyëyujk tsyajpkaa ja ja'ay mëti'ipë ka'ap tpuwa'akën ja Saúl ets ja Samuel. E komë ja ja'ayëty ojts ja tsë'ëkë tyuktëjkëtya'ajëtë, poj'am myujktaaytyë ets tpuwa'këtyë ja Saúl ets ja Samuel.

⁸ E ko ja Saúl ojts tmëtoy ja jyä'äy jä'ä nyiwinë'ajtë tëkëëk mëko'px mil, yi'iyë mëti'ipë jam kukajpnajtëpën Israel, ëpëky i'px majk milpë mëti'ipë jam kukajpnajtëpën Judá.

⁹ Ënet t'ënëmaay ja mëti'ipë ënety të tmëmintën ja aaw ayuk: Ënëëmëtë yë ja'ayëty mëti'ipë jam tsënaaytyëpën Jabés, ko jëpom kujkxyëëw ëëts nëjkx nyajtso'oktë. Ënet ojts jyänty nyëjkxtë ets tukmëmëtyaktë ja ja'ayëty jampë kyukajpn'atën Jabés, e ko jëtu'un tmëtoowtë mëk xyoontaktë.

¹⁰ Tääts t'ënëmaaytyë ja Nahas: Jëpom ëëts nekyë'ëyaka'anëtë ma miitsëtyën ets xy'ixtëty wi'ix ëëts xytyuntë xy'ënëëmëtë.

¹¹ Komjëpom tëkëëkpëky ojts yë Saúl tyajwä'kxy yë tsiptuunpëtëjk, e kajts ënety xyiinyënëm ko jam tyëjkëtyë ma ja myëtsipëty jam jyajta'aktën. Wa'ats tyaj'o'ktaaytyë ja Amón ja'ayëty ets jëtu'un tyimkujkxyëëwëy. E mëti'ipë ojts jyaakwë'ëmtën juuky ojts nyäpyuwa'ktuta'ajëtë ets nitu'uk ojts kyawë'ëmtë.

¹² Tam mëti'ipë y'ënëmaaytyën ja Samuel: ¿Pën jëtu'un të y'ëna'antë ko yë Saúl ka'ap tjëkyepy yajkutujkpë'atëty? Mooytyëk ëëtsëty wä'än tyämyë t'ooktë.

¹³ E ja Saúl ënätyë ojts tukkajpxë ets y'ënäny: Tyam ni pën mëpaat kya'ooky, jä'ä ko yë Wintsën yë'ë të tyajtso'oky yë Israel kajpn.

¹⁴ Ja Samuel, tëkokyë ja ja'ay t'ënëmaaytyääy: Ja'amtë Guilgal, wä'än jam yë Saúl yë y'ënä'ämën tyajtso'ontä'äky.

¹⁵ Ënet tëkokyë ja naax kajpn nyëjkxtaaytyë jam Guilgal ets nikajpxpäjtë ja Saúl ets yajkutujkpë'atëty. Tääts näjyëtu'un tyajktë ja wintsë'kën Dios wintum ma mëët ja nay'ëëw'oy näykyajpx'oyë tyaj'apatëtyën. Saúl mëët tëkokyë ja'ayëty jotkujk nyäjya'awëtyë.