1 Samuel 10 - Biblia Dc en Mixe de Quetzaltepec

Samuel tkënu'kxy yë Saúl ets yë'ë yajkutujkpë'atëty

¹ Ënet yë Samuel ojts tpëjkë'ëky tu'k'apëjkën yë on ets tukuja'axy yë Saúl, tä t'ënëmaay: Yë Wintsën yë'ë tyam mtuknipëjkëp ets mijts xy'ënä'ämëty yë Israel kajpn ma mijts mkukajpnëtyën. Mijts jëtu'un mtsiptunëp ets xyajtso'okëty ma myëtsiptëjkën. E ya'atë mtuk'ixëp ets xymyëpëkëty ko mijts jëtu'un tyam myajtukmëkënu'kxëp ets xy'ënä'ämëty yë nyaax kyajpn.

² Tyam ko ënät yaa näy'ëxmajtsëmëty, jam xypyata'any nimäjtsk yë ja'ay ma nyaax kyajpnën yë Raquel, jam ma txëëw'atyën Selsah mëti'ipë yë Benjamín nyitënääpyën. Yë'ë mtuk'ëwaanëjanëtëp ko ja mjëyujk tëë ja yajpaaty mëti'ipë ënety m'ixtääpyën ets ja mteety ka'ap ja t'ëkmëmaay t'ëkmëtajnë, mijts ja tyam je'eyë mëmaay mëtajënëp.

³ E ko wäänë mjaaktu'uye'eyëty, jam ma txëëwatyën Tabor, nitëkëëk jam yë ja'ay xypyata'any mëti'ipë pa'tëjkëtyëpën Betel ets nëjkx t'ëwtata'antë yë Dios, tu'uk tmënëjkxy tëkëëk yë tsajppax, tu'uk tëkëëk yë tsajpkääky ets tu'uk yë'ë myënëjkxyp yë tsatym nyëë po'oxuyjoty.

⁴ Ënet nkajpxpo'kxa'anyë ets mäjtsk yë tsajpkääky mo'oja'anyë, m'ëxajëp.

⁵ Ko jam mja'tëty Guibeá mëti'ipë Dios jyä'ä'ajtypyën, ma filistejë tsyiptuunpëtëjk jya'ajta'aktën. Ko jam nkajpntëkëty jam xypyata'any nikanaak yë käjpxynyajxpëtëjk mëti'ipë yaj'ijxtëpën mukëtëp yowë, jam tsyoontë ma tsajptëjkën. Ets ma yë'ë ye'eytyën kanaak yë ja'ay wyinye'eyëtë mëti'ipë yaj'ënantëpën ak, xijn, xuxn ets kow.

⁶ Ënet yë Wintsën yë myëk'ajtën y'oyajtën mtuktëkëja'anyë ets näjyëtu'un myaj'ixa'any mukëp yowë, tëkatsyjyä'äy mkawinpita'any.

⁷ Ko jëtu'un tyunëtëty jyatëtëty ma mijtsën mëti'ipës yam n'akäjpxypën, mijts kë'ëm m'ixëp tii ënety mtunäämpy, yë Wintsën yë'ë mputëkëjanëp.

⁸ Ets ënät jam mnëjkxëty ok Guilgal, jamts näpyatëmëty ets ja Wintsën ja wyintsë'kën yajmo'ojëty tu'ukmukyë mëti'ipë yajyajkpën, ko ja nay'ëëw'oy näykyajpx'oyë mëët y'ity. Jam m'ëwxitëty oy wëxtujk xëëwën, koonëmës nja'tëty eets ntuk'ëwaanëty tii mtunëpën.

⁹ Tim je'eyë yë Saúl jam tsyo'ony ma Samuelën, ënät ojts yë Dios yajtëkajtsxëty yë jyot wyinma'any; jä'ä xëëw wa'ats y'atëëwtaay mëti'ipë ënety të yajtukmëmëtyä'äkyën.

¹⁰ Ko yë Saúl mëët ja tyuunpë jam jyä'äjty Guibeá, ënätyë ojts nyipëtsëmëtë ja käjpxynyajxpëtëjkëty mëti'ipë ënety jëtu'un këxë'ktëpën ëmu'ukyë ja'ayën. E ja Saúl nän ënätyë ja Dios ojts ja myëk'ajtën tyuktëkëty ets y'awinpijty ijxtëm ëmu'ukyë ja'ayën.

¹¹ E ja ja'ayëty mëti'ipë ënety ja Saúl ixy'ajtëpën, ko jëtu'un y'ijxëtë näjyëtu'un y'ëtitsy y'ënäny tä ja käjpxynyajxpëtëjkëtyën, ënät nyäyajtëëwëtë: ¿Tiijën yë Quis myaank jajtëp këpäjtëp? ¿näjyëtu'unën yë Saúl të y'awinpijnë käjpxynyajxpën?

¹² Ënet tu'uk y'ënäny: ¿Pën yë'ëjëty tyeety'ajtëp? Jam tu'uk yë ayuk tsyoony mëti'ipë ënaanpën: ¿Yë Saúl käjpxynyajxpën näjyëtu'un të y'awinpijnë?

¹³ Ko ja Saúl jatëkok y'awinpijty wijy kejy, ënät jam jyä'äjty ma tyëjkën.

¹⁴ Ets ja jyämy yajtëëwëtë: ¿Maaxën të m'otstë? Tä ja Saúl të y'ëtsooy: Kruktsës ojts të n'ixta'atë, e koos të n'ixtë ka'ap maa, täätsës të ninëjkxtë yë Samuel.

¹⁵ Tä ja Saúl ja jyäm y'ëtsooy: E yë Samuel ¿Wi'ix të m'ënë'ëmxëtë? Tukmëmëtyakës tun yë mëyajtën.

¹⁶ Tä ja Saúl ojts t'ëtsoy ja jyäm. Yajxonës të xytyimtukwinjawëtës ko ja krukts tëëjëk ja yajpaaty. Je'eyëp ko a Saúl, ka'ap ojts ja jyäm tukmëmëtyä'äky ko ënety ja Samuel të kyënu'kxyë ets yajkutukëty.

¹⁷ Kom ok Samuel tmëkajpxmujktaay ja Israel ja'ayëty ets jam tyu'ukmuktëty Mizpá ma t'ëwtata'antën ja Wintsën.

¹⁸ Jamts t'ënëmaay: Yë Wintsën, mëti'ipë Tios'ajtpën ma Israel ja'ayëtyën jëtu'un y'ënä'äny: Ëjts jëtu'un miits të njuutë ja Egiptë, miitsëty Israel ja'ayëty, ojts nyaj'ëwaatsë pëtsëmtë ma ënety yë Egiptë ja'ayëty o'ktëy mtunëtën ets jam wiink naax wiink kajpn ma ënety ëxëëk mjatën mkëpätën.

¹⁹ E tyam m'ixtijnëtëp ja Tiosnë mëti'ipë të mjuutëtën ma ënety ja amay jotmay xymyëët'atën. Yë'ë jëtu'un m'ixtijtëp ko miits tu'uk yë yajkutujkpë xy'amëtowtë mëti'ipë m'ënä'ämëtëpën. E paaty ënät tyam n'ënëëmëtë ets xywyinkuwa'akëtëty yë Wintsën tu'kkajpnjaty ets tu'kja'ayjyäty.

²⁰ Tä ojts ja Samuel tni'ënä'ämë ets ja ja'ayëty wyinkontëty tu'kkajpnjaty. E yë'ë ojts tyuka'ayë ja Benjamín ja jyä'äy.

²¹ Ënet t'ënëmaay ja Benjamín ja jyä'äyëty ets jyaak mëjwa'aktëty jawäänë, e ko ja xyëëw pyo'o yaj'ijxpëtsëëmy yë'ë ojts tyuka'ayë ja Matrí jyiiky myëku'uk, e ko jatëkok ja xyëëw pyo'o yaj'ijxpëtsëëmy, yë'ë ojts tyukjka'ayë ja Saúl ja myaank yë Quis. Tääts t'ijxtaaytyaktë ets kamaa tkapatë.

²² Tä ojts ja Wintsën tmëkajpxtë ets tnijawëja'antë pën ja Saúl jam yajpaaty. Ënet Ja Wintsën y'ëtsoowinpijty ko ja Saúl tam ja ënety yajpaaty je'eyëp ko tëë ënety nyäyu'utsyë ma ja xyuumy tyaj'itën ja mayjyä'äyëty.

²³ Ënet ojts poj'am tninëjkxtë ets jap tyajpëtsëëmtë ma ënety të nyäyu'utsyën. Ko jam may ja'aywyintum nyäjxy, ënät ojts yaj'ixy ko ni pën ënety jëtu'un kyayenyëty tä yë'ëjën.

²⁴ Tä ja Samuel tyajtëëy ja mayjyä'äy: ¿Tëë xy'ixtë pën jëtu'un yë Dios të twin'ixyën ets yajkutujkpë'atëty? Ka'ap maa wiinkpë, pën mëpaat yaj'ijxkijpxy mëët yë'ë. Tääts tëkokyë ja mayjyä'äy yujk'ënantë: Yajkutujkpë, yajkutujkpë.

²⁵ Tä ja Samuel ojts tkë'ëyäky ma ja naax kajpnën ja ënä'ämën tëyajtën mëti'ipë tunëpën ma ja ënä'ämpë tyuna'anyën. Yajxon tkëjxjaaytyääy nokykyijxy ets tpëjktäky jap tsajptëkoty. Ko jëtu'un tyuuntaay jyajtaayë, tä ja Samuel ojts ja ja'ay t'ënëëmë ets jatëkok wyimpijta'atëty ma tyëjkëtyën.

²⁶ Ja Saúl ojts näjyëtu'un nyëjkxnë jam ma tyëjkën jam Guibeá, e yë Dios ojts tuktëkë nimäjtsk nitëkëëk yë ja'ayëty mëti'ipë jyämyëët'ajtën.

²⁷ E jëtu'un ijxtëm xëmë jyäty kyëpetyën ka'ap ma ja ja'ay tyëkoy'äty mëti'ipë je'eyë wyiin y'aaw myëtitypyën ets mëti'ipë ënantën: ¿Tääpë jëtää ënät xy'ëkyajtsokmëpë? je'eyë ojts nëëxi'ik tukxi'iktë ets ka'ap tyajnikëxë'ktë ja winkutsë'kën ma yë'ëjën; e ja Saúl ka'ap timmyëjpëjktäky oy ja ja'ayëty wi'ix y'ëna'antë.