1 Reyes 7 - Biblia Dc en Mixe de Quetzaltepec

Wiinkëtypë ja jëën tëjk mëti'ipë ja Salomón kyojën

¹ Salomón ojts kë'ëm kyumoontëjk tkojy, kom majktëkëëk jëmëjt tkoj'apejty.

² Ojts näjyëtu'un wiinkpë këmoontëjk tkojy, jä'ä ojts tijy, Yuk Kepyjyot, jä'ä y'ayenyëty i'px mëkoxk xajpk ets myëjwiinëty majkmäjtsk xajpk ja mäjtsk kë'ënux ets kyëjxmëty wëxtujk xajpk ja mäjtsk kë'ënux; jä'ä y'akojtukyëty taxk waats, aakyë'ë ajë kepy ets aakyë'ë kyukap'ajtyp yë ajë kepy.

³ Wëxtyikxy myëkoxk ja tëjkkaa y'ijty, majkmokxjatyëty ojts yaj'apëjkmuky ets tëkëëkpëky, jam kyëxwä'äky ma ja xenyën, ma ja tëjkkaajën; ojts yajtukpajtuta'ay mëët yë ajë kepy, yë'ëts oy yajkëxë'këp.

⁴ Taxk waats ijty ja ventana, aak näywyinku'ijxëyëp.

⁵ Aak taxk täk ja ventana ets ja tëjk'aaw, aak näywyinku'ijxëyëp, tëkëëk waats.

⁶ Ojts näjyëtu'un nyixeny tpëjktakëyë ma ja tëjkwitsë kyëxmëtä'äkyën, mëti'ipë ayenyën majkmäjtsk xajpk ja kujkm ets wëxtujk xajpk ja mäjtsk kë'ënux myëjwiinëty. Tam wintuuytsyow wiinkpë tëkot yajpaaty, mëët ja nyitëjkxeny ets nyitëjk kopk.

⁷ Ojts tpëjktä'äky tu'uk ja tëkot, ma ja nipaye'eyën yajtunëtyën, ma ntijmëty ja tuuntëko'oyën yajpaye'eyëtyën, yë'ë mëët tyajta'tspëjky ja pya'a yë ajë kepy.

⁸ Ja kutujkëntëjk ma ja Salomón ijty tsyëënën, myëët'ajtyp tu'uk ja nyitëja'aw jap jëxkë'ptsow ets ja tu'uk ja nyitëkot mëti'ipë näjyëtu'un kyojyëtyën. E ja kutujkëntëjk mëti'ipë tyuknikojëyën ja Egiptë yajkutujkpë ja nyëëx, mëti'ipë mëët pyijkyën, nän timjëtu'un ijty kyojyëty.

⁹ Tëkokyë ya'atë tëjkëty mëti'ipë yë Salomón kyojën, yë y'ëjx yë kyopk, yë y'ijxën ets nyitëjkpa'a aak'oy tsyaa ojts mëët yaj'oytyuny mëti'ipë tsetsyën ets pajyën, aakjëtu'un jap jootjoty ets nëkëjxytsyow.

¹⁰ Aak oytsyaa tsetsy ets mëjaty oytsyaa ojts tyuny ma ja potsy ëjxën; ojts yë tsaa tyuny mëti'ipë mäjtsk xajpk ja kujkm myëjwiinëtyën ets näjyëtu'un ojts tyuny mëti'ipë mäjtsk xajpk myëjwiinëtyën.

¹¹ Ja tëjk jëxk aak'oy tsyaa mëët kyojyëty, mëti'ipë tsetsyën ets pajyën jëtu'un tä ënety tyuna'anyën; ojts näjyëtu'un tyuny yë ajë kepy.

¹² Ma ja tëjkwiinën, tëkëëk waats jam nyäxy ja tsaapotsy ets tu'kwaats yë ajë kepy; näjyëtu'un jap tëja'ptsow ets ma ja nyitëjkëtyaknën, ja tëkot ma teetyëjk wyit tuktëkëtën.

Ma ja Salomón t'ënu'kxyën ja Hiram

¹³ Yë yajkutujkpë Salomón ojts yë Hiram jam tyajtsoony Tirë,

¹⁴ yë Hiram, yë'ë myaank tu'uk yë ku'ookytyo'oxy, Neftalí jyä'äy, mëët ojts tsyëënë tu'uk ja'ay jampë kyukajpnëtyën Tirë, tyukjajtyp ijty yajxon wi'ix yë tsuxkpujxn tuunk'atëtyën. Hiram janty wijy ijty ets nyija'ap oy ja tyuunk ma ja tsuxkpujxn tuunk'atyën; ënät jam nyäwya'këxë'kë ma ja yajkutujkpën Salomón ets ojts t'oytyuunë winë mëti'ipë ja Salomón tsyojkpyën.

¹⁵ Ojts tyaj'oyë mäjtsk yë xeny, aakyë'ë tsuxkpujxn, jä'ä kyëjxmëty taxk xajpk ja kujkm ets pëkixyëty tëkëëk xajpk.

¹⁶ Ojts näjyëtu'un t'oytyuny mäjtsk yë nyikukë'ë aakyë'ë tsuxkpujxn ets jam tukukëyëjyä'äny ja xeny. Ja kyukë'ë jä'ä kyëjxmëty tu'kxajpk ja kujkm.

¹⁷ Ëpëky ojts mäjtsk nyikukë'ë tya'o'oyëyë ets yë'ë mëët y'atsuumukyëty yë pujxntejpxy ets jä'ä tukmajts'ita'any ja xeny: Tu'ukjaty ja y'atsu'utsë ma ja xenyën.

¹⁸ Y'oytyuun mäjtskwitsy ja xenykyuwits, aakjëtu'un mäjtskëty.

¹⁹ Ja xenykyuwits mëti'ipë pya'tënaaytyëpën ja tëjk ma ja teetytyëjkëty ja wyit y'ityën tu'kxajpkën y'ayenyëty ets jëtu'un y'ixëty tä pëjyën.

²⁰ Jëtu'un kyëjxmëty ja kyukë'ë jëtu'un tä myëjwiinëtyën ets mapaat y'ëwtityën ja tëjkpa'txeny, yë'ë mëët nyämyajts'ityë tu'uk yë potsy mëti'ipë jëtu'un këxë'kën piktsaajën ets jam potsykyëjxm mäjtsk mëko'px ojts tyajkëxkojtë pikjatyëty yaj'ixy.

²¹ Hiram ojts ya'atë tëjk xeny tpëjktä'äky ma ja teetyëjk ja wyit yajpëjkë'ëkëtyën. Ko tyaj'apatëy ja mëti'ipë a'oytsyow yajpatpën jä'ä txëëwmooy Jaquín, e ja mëti'ipë anajnytsyowën Bóaz txëëwmooy.

²² Jam këjxm ma ja xeny jyëjpkëxyën jëtu'un kyëxë'ëky pëjyën. Jëtu'un kyojtaay ja xeny.

Ja apëjk atu'unën japë tsajptëkoty tyuna'anyën

²³ Hiram ojts t'oytyuny tu'uk yë nëë apëjkën mëjpë, aak tsuxkpujxn yajtuun. Pik y'ixëty, tu'kxajpk ja tu'kkë'ënux y'ayenyëty; wëxtujk xajpk ja kujkm kyëjxmëty ets ja jyot jä'ä myëjwiinëty majktëkëëk xajpk ja kujkm.

²⁴ Jap ma ja nëë'apëjkënmpa'tkën ojts tnipotsë mäjtskpëky ja potsy ets t'oytyuuny yajxon, ojts tmo'oy yë y'ijxën mëti'ipë jëtu'un këxë'kpën tä tsi'iw u'unkën yi'inëm jatyëty, majkjaty tpëjktäky ma ja tu'kkë'ënuxjatypë y'ëwtityën ets tu'ukyë mëët tyajnämyätsyë ja nëë apëjkën ja y'atäämpa'tk.

²⁵ Jap ma pya'tkën tsajpkaajën jap tukpa'tpojtsëy aakyë'ë tsuxkpujxn yajtuun; majkmäjtsk ojts tyajkojy, tëkëëk jam nyas'ixë anëkëjxytsyow, tëkëëk apa'tkë'ëmtsow, tëkëëk ma xëëw pyëtsimyën ets tëkëëk ma xëëw kyëtä'äkyën. Ja tyeky jap tyajku'ixë jootjoty, aakjëtu'un nimajkmäjtsk, jamts ja nëë apëjkën kyëxmëtä'äky.

²⁶ Ja nëë apëjkën tuktujk kë'ëwa'axyën myäjpxyëty, yë nyini'kx jëtu'un yaj'ixy tä pëjyën, ja nëë jä'ä jap tyëkë oy mäjtsk mil ja taxtujk mëko'px ja i'px mäjtsk tsiiyën.

²⁷ Ojts näjyëtu'un t'oytyuny majk ja nyipujxnwintëkäämpë ma ja nëë apëjkën tyajye'eytyëtyën, aakyë'ë tsuxkpujxn; tu'kxajpkjaty y'ayenyëty, tu'kxajpkjaty myëjwiinëty ets tëkëëk kë'ënux kyëjxmëty.

²⁸ Ja pujxnwintëkäämpë ojts ja nyipa'awits tpëjktä'äky mëti'ipë mëët nyämyajts'ityën ja pya'a,

²⁹ e ma ja nyipa'awitsën mëti'ipë mëët nyämyajts'ityën ja pya'a ojts tyajkëxkojy yë ijxën jëtu'unpë kyëxë'ëkyën tä kaajën ets tsajpkaa yä'äyën ets tsajpjotmëtë kukajpxpëtyën. Anëkëjxytsow ets ëpa'tkë'ëmtsow ma ja tsajpkaayä'äy ets ja kaa kyëxkojyëtyën ojts tyajkëxkojy yë pëjytyä'äky.

³⁰ Tu'ukjaty ja pujxnwintëkäämpë aakjam kyëxmëtä'äky ma ja taxkpë ja tsuxkpujxnën mëti'ipë pikëtyën ets ja tsuxkpujxn ja pikëtypë yë'ë mëët nyämyajts'ityë yë yenypyujxn; nän tsuxkpujxnëmpë. Ma ja pujxnwintëkäämpë ja tyatskën taxkpëkpyë, ma kyëxmëta'aka'anyën ja nëë apëjkën, jap yajpaaty yë tyënaaypyäjn taxkpëky.

³¹ Ja y'aaw ja nëë apëjkën jap yajpaaty ma ja y'aawën ja y'ënyääypyäjn; ja nëë apëjkën jä'ä jyëjptä'äky tu'kkë'ënux ja tu'ktsa'atsy. Pik ja y'aaw, yë'ë mëët nyämyajts'ityë ja tënaaypyäjn, jä'ä kyëjxmëty tu'kkë'ënux ja tu'ktsa'atsy.

³² Ja taxkpë ja pik pujxn mëti'ipë pya'tpëkë'ajtypyën ma nyipa'awitsën. Ja pujxn mëti'ipë pikëtyën jä'ä kyëjxmëty tu'kkë'ënux ja tu'ktsa'atsy.

³³ Jëtu'un pyikëty tä ja kepy wintëkäämpë ye'eypyäjnën. Mëti'ipë ja pikpujxn mëët tyunyën: Ja yenypyujxn, ja piktëkäänpë, ja nyi'awaxk ets mëti'ipë ja pikpujxn myajts'ijtypyën, aak tsuxkpujxn mëët y'oytyunyëty.

³⁴ Ja taxkpë ja nyi'tënaaypyäjn mëti'ipë yajpatëpën maajaty ja nyuxën, tu'ukyë mëët y'akojmukyëty ja nëë apëjkën ja y'ënyääypyäjn.

³⁵ Ma nyikukë'ëjën pik jam y'ëwa'atsëty jä'ä kyëjxmëty tu'ktsa'atsy; e ja nyipa'awits ets ja pya'a mëti'ipë mëët ja nëë apëjkën ja y'ënyääypyäjn y'oytyunyëtyën, tu'ukyë y'atsaaymyukyëty.

³⁶ Hiram ojts tyajkëxkojy ja'ay käkn mëëtpë, yë kaa ets tëëxykyepy ma ja xenypya'tkën ets ma ja witsëjëjpën; wi'ixjaty tu'ukjaty tjëkyepy ets ëpëky ojts jam tyajkëxkojy jëtu'unpë tä pëjytyä'äkyën.

³⁷ Jëtu'un tyaj'apatëy majk ja potsy'ëjx aak jëënmëët ojts ja pujxn tyajjëëytyä'äky ets tu'knax kyijpxyëty ets tu'knax yaj'ixy.

³⁸ Ojts näjyëtu'un majk tyajkojy potsy ma nëë nyikoompätëtyën, aak tsaptspujxn ojts tyajtuny ets jä'ä kyëjxmjatyëty tu'kxajpk ja majkta'px kë'ë'u'unk ets ja nëë jap tyëkë oy nataxtujk mëko'px tsiiyën, tu'ukjaty jam yajpëjktäky ma ënety të yajnipotsëtën,

³⁹ tëë ënety mëkoxjaty yajpëjktä'äky ja potsy'ëjx ma ja tsajptëjkën, mëkoxk a'oytsyow ets mëkoxk anajnytsyow. Ja mëjpë ja nëë apëjkën jam yajpëjktäky a'oytsyow ma ja tsajptëjkën, najäätsow ma xëëw kyëtä'äkyën.

⁴⁰ Hiram ojts tyajkojy tu'ts, jä'pn, a'ukën ets ja wiinkëtypë ja apëjk atu'unën mëti'ipë jap tsajptëkoty tunaanpën mëti'ipë ja Salomón ojts tyuk'ëne'emyën jëtu'un ojts tyaj'apaatë ja tuunk,

⁴¹ tä ja mäjtskpë ja xenyën, ja xenykyukë'ëjën ets ja mäjtskpë ja kyuwitsë,

⁴² ja taxk mëko'px ja nyikukonë mëti'ipë mëët ja mäjtskpë ja nyi'awits t'oytyuunyën, mëti'ipë tyukuwijtsën ja tëjk xeny mëti'ipë ënety të tyaj'apaatën,

⁴³ ja majkpë ja potsy'ëjx ets ja majkpë ja nëë apëjkën, ja nimajkmäjtskpë ja tsajpkaa ënety të tpotsyën,

⁴⁴ ja mëjpë ja nëë apëjkën ets ja majkmäjtskpë ja tyënaaypyäjn mëti'ipë mëët y'oytyunyëtyën ja tsuxkpujxn.

⁴⁵ Ëpëky ja tu'ts ja jä'pn ets ja tsim, ja texy ets ja apëjk atu'unën. Tëkokyë ya'atë mëti'ipë Hiram yajkojën mëti'ipë ënety ja Salomón të tyuk'ëne'emyën aakpujxn ojts tuk'oytyuunta'ay.

⁴⁶ Ja yajkutujkpë jam tyajkëëwtaay ma ënety të tni'oytyunën jinjoty, jam Jordán y'itjotm, itkujky wyi'imy ma Sucot mëët yë Saretán nyäpyäätyë.

⁴⁷ May wyinmujky ja apëjk atu'unën mëti'ipë mëët ja tsuxkpujxn y'oytyunyëtyën, wi'ix y'ëkyajkijpxëty, paaty ja Salomón ka'ap ojts tkijpxy.

⁴⁸ Ojts ja Salomón näjyëtu'un tni'ënä'ämë ets tyaj'oyëtëty tëkokyë ja apëjk atu'unën mëti'ipë ënety japën tsajptëkoty: Ja wintsë'këntyakn mëti'ipë oytyunyën mëët ja pu'ts pujxn ets ja pëjkënpäjn mëti'ipë oytyunyëty mëët ja pu'ts pujxnën, ma ja tsajpkääky yajpëjktä'äkyën mëti'ipë Wintsën yajtukmëyojxpën,

⁴⁹ ja jëëntooytyakn mëti'ipë aak pu'ts pujxn mëët y'oytyunyëtyën japë y'ityën kënu'kxytyëkoty, mëkoxk ojts yajpëjktä'äky a'oytsyow ets mëkoxk anajnytsyow, mëët ja nyipuxnpëjy ja nyikutë'kxn ets ja nyimä'tn aak pu'ts pujxnpë mëët y'oytyunyëtyën,

⁵⁰ ja a'ukën, ja jëënjä'pn, ja tojkxjä'pn ja jëëntsijtk ets tëkokyë winë mëti'ipë ënety ja pu'ts pujxn mëët y'oytyunyëtyën. Näy pu'ts pujxn ënety mëët y'oytyunyëty ja pujxn mëti'ipë ja tëjk'akaj wyo'on'ijtypyën ma ja wa'atspë tëkotën, mëti'ipë jap tëkotyowën ets yë'ëpaat ja mëjtsajptëjk ja tyëjk'aaw.

⁵¹ Ko y'apatëtyääy ja tuunk mëti'ipë ënety ja yajkutujkpë Salomón të tni'ënä'ämën ma ja tsajptëjkën, ënät tmënëjkxtaay jap tsajptëkoty ja apëjk atu'unën pu'ts pujxn mëëtpë ets ja poop pujxn mëëtpë mëti'ipë ënety ja tyeety David të tukmëyoxyën ja Wintsën ets jap tpëjktaktaay ma nyipetyën ja Wintsën ja jyä'ä.