1 Reyes 6 - Biblia Dc en Mixe de Quetzaltepec

Ma ja Salomón tkojyën ja tsajptëjk

¹ Salomón jää ja tsajptëjk tkojtso'ontä'äky ma ënety mëmajktaxk jëmëjt tyajtu'uye'eyën ja jyëmëjt ma y'ityën yajkutujkpë jam Israel, yë'ë ënety aanp yë po'o mëti'ipë tyijtëpën Ziv, yë mëmäjtskpë, ma të nyajxnën taxk mëko'px jëmëjt maju'unëm tsyoontën jap Egiptë.

² Ja tsajptëjk mëti'ipë ja Salomón tyuknikojëyën ja Wintsën, jä'ä y'ayenyëty majkmokx xajpk, mëkoxk xajpk myëjwiinëty ets kyëjxmëty wëxtujk xajpk ja mäjtsk kë'ënux.

³ Ja tyëjkwiin jä'ä y'ayenyëty mëkoxk xajpk, jëtu'un tä nyitëjk myëjwiinëtyën ets mäjtsk xajpk ja mäjtsk kë'ënux matsow ja tëjk nyajts'ixën.

⁴ Salomón jä'ä ojts ja tsajptëjk ja nyi'ëwa'atsajtën t'oytyuunë aakmëët yë nyi'akap.

⁵ Ojts näjyëtu'un ëpëky yë tëjk tukjëjpkojë ma ja potsypya'a nyäxyën, jëtu'un ojts tkojy na'ëwtity ets ojts mutskjatyëty yë nyitëkot tyajkojë pa'apa'a.

⁶ Ja tëjk mëti'ipë jap ëpa'tkë'pën ojts yajtukpa'akojën, jä'ä myëjwiinëty tu'kxajpk ja tu'kkë'ënux; e ja mëti'ipë itkujky wë'ëmpën, tu'kxajpk ja mäjtsk kë'ënux, e mëti'ipë jam tim'oykyëjxmën, tu'kxajpk ja tëkëëk kë'ënux; jap tëja'ptsow ojts wäänë ja kijpxën tyajmuky këtiipë yu'unk wyë'ëmëty ja tëjkkaa.

⁷ Ma ja tëjk ojts kyojyën aakyë'ë ojts tyuny yë tsaa oytyunypë ets tsetsypë, paaty ko ojts kyojy ja tsajptëjk ka'ap ojts tii nëkooyë y'ëkwojp y'ëka'tsnëtë ets ka'ap ojts nëkooyë tii tpuxtë tka'atstë.

⁸ Ja nyitëjk'aaw ja tëjk mëti'ipë ojts yajtukpa'akojën ja tsajptëjk ëpa'tkë'ëytsyowpyë, a'oytsyow ojts yajpëjktä'äky; e ja nyiye'eypyäjn ja mëmäjtsk nikë'ëpë ets ja mëtëkëëk nikë'ëpë yë'ë ojts tu'uk tpotstë yë nyi'escalerë, nawinjë'ëk tpojtstë.

⁹ Ko ja Salomón ojts tkoj'apaatë ja tsajptëjk, yë'ë ojts mëët tyajnituky mëjatyëtypë tëjkkaa aak xeey aak pëky yajxon ets aakyë'ë ajë kepy tyukëwa'ptaay.

¹⁰ Ojts ëpëky näjyëtu'un tuknakoj'ëwtity ja tëjk, jä'ä kyëjxmëty tu'kxajpk ja tu'kkë'ënux, mëti'ipë ojts mëët ja tsajptëjkpotsy nyämyajts'ityën, yë'ë tyukuwijtstë ajë kepy.

¹¹ Ënet ja Wintsën ojts tmëkäjpxy ja Salomón ets t'ënëmaay:

¹² Yë'ë yam ntuk'ënëëmëjäämpy mëëtpë ja tsajptëjk tyampë xykyojyën, pën jëtu'un winë xytyuny tääjës ja n'ënä'ämën ntëyajtënës ets mpatuunpy jëtu'un tääjës ja n'aaw n'ayuk të nyajwë'ëmyën,

¹³ ëjts nän nëjkxëpës jëtu'un winë ntuny tä ja David ojts ntukwinwanënës mëët mijts; ëjts tsëënëpës yë'ë ma ja Israel ja nyaax kyajpnën ets ka'apës nijëna'a n'ëxmatsa'antë.

¹⁴ Ojts ja Salomón tyaj'apaatë ja tsajptëjk.

¹⁵ Ja nyipotsy tëkotytsyowpë ojts tukwinwojpëtyä'äy ja ajë kepy, näjyëtu'un ja tëjk nikë'ë ets ja nyiye'eypyäjn yë'ë tyukwinwojpëy yë tsiin.

¹⁶ Ojts näjyëtu'un jap tëkotsyow t'apëjktuky, mëkoxk xajpkën ets yajxon t'oytyuuny, ma jap yaj'ëwtatëtyën ja Wintsën, jap ma yajtijyën ëmaaytyëkot, wa'atspë.

¹⁷ Jap tsajptëkoty, jap ojts ëpëky wyi'imy ja tëkoty mëjpë mëti'ipë ayenyën majk xajpk, wintuuytsyow wyi'imy ma ja mëti'ipë ja tëkoty kënu'kxy ijtpën.

¹⁸ Ja tëkoty aakyë'ë ojts mëët y'oyëtyä'äy yë ajë kepy, tsetsypë ets xeepyë, ma tu'uktu'uk ja taaplën ojts jam tyajkëxkojtë oyëtypë pëjy ets ijxën. Kamaa ja tsaa kyakëxë'ëky mëti'ipë ënety të yajtukpotsyën.

¹⁹ Salomón ojts tyaj'oyë ja tëkoty ma yajtijëtyën ëmaaytyëkot wa'atspë, ma yajpëjkta'akëtyën ja Wintsën ja kyaaxë mëti'ipë myëët'ajtyp ja käjpxtyu'unën mëët Wintsën.

²⁰ Ja tëkoty mëti'ipë yajtijpën kënu'kxy, jä'ä ënety y'ayenyëty mëkoxk xajpk, mëkoxk xajpk yë y'ok ets mëkoxk xajpk kyëjxmëty. Jam wyintuuytsyow ma ja tëkot ja kënu'kxypyën, ojts yë Salomón tu'uk tyaj'oyë yë wintsë'këntyakn, ajë kepy yajtuun, ets ojts tuknikoy pu'ts pujxn.

²¹ Ojts näjyëtu'un yë tsajptëkot tukkooytyä'äy yë pu'ts pujxn ets näjyëtu'un ma ja kënu'kxypyën ets ma ja tëkotjëjpën pujxtä'äky jam pyëjktak nän aak pu'ts pujxn.

²² Jëtu'un wyë'ëmtaay ja tsajptëjk ja nyi'kx aak pu'ts pujxn nyikoyëty, näjyëtu'un tä ja wintsë'këntyaknën mëti'ipë jap ijtpën ma ëmaaytyëkotën wa'atspë.

²³ Ojts näjyëtu'un t'oytyuny mäjtsk yë kepy tsyetsy jëtu'unpë kyëxë'ëkyën tä Dios kyukexyën, aaktam kyäknëty, aakyë'ë yajtuun olivë kepy mëti'ipë jap itëpën ma ja ëmaaytyëkotën wa'atspë. Jä'ä kyëjxmjatyëty taxk xajpk ja kujkm,

²⁴ tu'uk pa'ajaty ja kyäkn jä'ä yenyëty tu'kxajpk ja tu'kkë'ënux. Paatykyëjxm ënety y'ayenyëty mäjtsk xajpk ja mäjtsk kë'ënux ko mäjtskpa'a n'akijpxmujkmëty.

²⁵ Ja tyaapë ja kepy tsyetsy, aakjëtu'un ënety y'ixë'atë nimäjtskëty, tu'knax mëj ets tu'knax ijxën.

²⁶ Ja kyëjxm'ajtën, jä'ä näjyëtu'un kyijpxyëty mäjtsk xajpk ja mäjtsk kë'ënux.

²⁷ Jam yë Salomón tpëjktäky, ma ja tëkotën mëti'ipë kënu'kxyën. Tyaapë ja nimäjtskpë ja kepy tsyetsy jëtu'unpë kyëxë'ëkyën ja'ayën käknmëët, tu'uk ijty yajxon ja tëkot timyajtuktuktë, tu'uk jam ja kyäkn tu'kpa'a tyimja'ty potsywinm ets näjyëtu'un ja tu'uk ets tu'uk pa'a ja kyäkn näjyëtu'un nyäwyinkuja'tëty.

²⁸ Ojts yë Salomón tukniku'tsta'ay yë pu'ts pujxn, ya'atë ja ja'aypyën kyëxë'ëkyën käknmëët,

²⁹ Tä jap tëkotyowën ets jap jëxkë'ptsow, ojts ja Salomón tkooyta'ay ja potsy, yajnikojtut jam potsykyëjxm yë kepy yë pëjy jëtu'unpë ja'ay kyëxë'ëkyën käknmëët yowë Wintsën yë kyukäjpxy.

³⁰ Ojts näjyëtu'un tnikooyta'ay ja nyiye'eypyäjn ja tëkot ets ja tëja'aw.

³¹ Ma ja tëkot yajnitëkën mëti'ipë yajtijpën wa'atstëkot kënu'kxytyëkotën, yë'ë tyuk'akaj'ajt, olivë kepy, e ja nyikukap ets ja nyipa'ateeny mäjtskpa'a ets mäjtskpëky jam anëkëjxmtsow nyajxë'ëky, awinax jam yajkoj mëti'ipë mëkoxk yë pya'ajën.

³² Mäjtskëty ja tëjk'aaw aakyë'ë olivë kepy yajtuun ets tkooy mëët yë pu'ts pujxn, ojts näjyëtu'un jam tyajkëxkojy ja'ayënpë kyëxë'ëkyën ets käknmëët, ojts tyajkëxkojy kepy ets pëjy.

³³ Ma ja tëkot ja mëjpë yajnitëkën jap tsajptëkoty, taxk yë xeny jap tpëjktäky aakyë'ë olivë kepy ets ojts taxk täk wyi'imy.

³⁴ Mäjtsk ajujpminy ja tëjk'aaw ojts kyojy, aak tsiin kepy yajtuuntë aak ëwtijtëp mäjtskpa'ajëty.

³⁵ Ojts näjyëtu'un jam tyajkëxkojy yë ja'ayënpë kyëxë'ëkyën, palmera kepyënpë ets pëjyënpë kyëxë'ëkyë, tääts näjyëtu'un tukwinkooy ok yë pu'ts pujxn.

³⁶ Jap tëkotsyow, ojts tyajkojy yë nyitëja'aw, tëkëëkpëky t'apojtstujky, ma tyajtuunyën yë tsaatsetsy ets tu'kwaats yë ajë kepy.

³⁷ Ma ënety kyëjääjë taxk jëmëjt yajkutukyën yë Salomón, ma ja po'o y'änyën mëti'ipë tyijtëpën Ziv, jä'ä ojts ja potsy ëjx yajpëjktä'äky, mëti'ipë tsyajptëjk'atäämpyën ja Wintsën,

³⁸ e ma myajktu'uk jëmëjtpetyën ja kyutujkën, ma ja po'o y'änyën mëti'ipë yajtijpën Bul, mëti'ipë mëtuktujkpo'ojën ma tääpë jëmëjtën, jää ojts ja tsajptëjk yajkoj'apety, jëtu'un tä ënety të tuknipëjktaakëtën. Wëxtujk jëmëjt ja Salomón tuunk'ajty.