1 Reyes 4 - Biblia Dc en Mixe de Quetzaltepec

Ma ja Salomón yajkutukyën

¹ Yë Salomón ojts t'ënä'ämta'ay yë Israel kajpn.

² Tyaa yë xyëëw myintë kuja'ay mëti'ipë ojts mëët tyunyën ko yajkutujky: Azarías, yë myaank yë teety Sadoc;

³ Elihóref ets yu Ahías, yë y'ëna'k yë Sisá, ja ja'ayëty mëti'ipë jyääywyë'ëmtën winë; Josafat, yë myaank yë Ahilut, yë'ë ojts y'ity jääpyë ma ja yajkutujkpën;

⁴ Benaías, yë myaank yë Joiadá, yë'ë ojts niwintsën'aty yë tsiptuunpëtëjk; yë Sadoc ets Abiatar, yë'ë ojts y'itë teety;

⁵ Azarías, yë myaank yë Natán, jä'ä ojts y'ity tëjk këwent'ajtpë; e yë Zabud, yë myaank yë teety Natán, jä'ä ojts y'ity kajpxtëëpë ma ja yajkutujkpën;

⁶ yë Ahisar, jä'ä ojts y'ity pukë'ëy puxajëpë ma ja kutujkëntëjkën; yë Adoniram, myaank yë Abdá, yë'ë ojts t'ixy tuny winë ma ja tuunk tyu'uye'eyën ja atsipë.

⁷ Salomón ojts tpëjktä'äky nimajkmäjtsk yë kutuunk mëti'ipë kyëwent'ajtëpën ja naax kajpn mëti'ipëjaty ja Israel kajpn nyitënääpyën ets jä'ä t'ixtëty tuntëty winë këtiipë tii ja yajkutujkpë ja y'u'unk y'ëna'k tyëkoy'ajtxëtëty. Nitu'ukjaty këëktu'uk po'o ijty t'atänëtë.

⁸ Ya'atë nimajkmäjtskpë ojts tyuntën jä'ä xyëëwajtë: Ben-Hur, jam t'atänë ma ja kopkjotmën mëti'ipë ja Efraín ja jyä'äy nyitënaaytyëpën;

⁹ Yë Ben-Decar, jam t'atënaay Macás, Saalbim, Bet-semes, Elón ets Bet-hanán;

¹⁰ Ben-Hésed, jam t'atënaay: Arubot, Socó ets ma ja Héfer tnitänën;

¹¹ Ben-Abinadab, jam ojts t'atänë ma ja itjot txëëwatyën Dor; jä'ä tyo'oxytyëjk'ajtyp ja Tafat, yë nyëëx yë Salomón;

¹² Baaná, yë myaank yë Ahilut, jam ojts t'atänë Taanac, Meguido ets ma tëkokyë ja Bet-sean tnitänën, wiinkonpë yajpaatyën ma Seredán, ëpa'tkë'ëytsyow ma Jesreel y'itjotmën ets tyimtsoony jam Bet-sean, tyimja'ty jampaat Abel-meholá ets jëtu'un nyijkxy Jocmeam;

¹³ Ben-guéber, jam ojts t'atänë Ramot mëti'ipë Galaad nyitënääpyën, yë'ë ojts timy'awintumjaty ja kajpn mutskjatyëtypë jam Galaad y'itjotm, mëti'ipë nyiwantëpën ja Jair ja'ayëty jampë tsyëënën ma ja Manasés ja y'itjotmën ets nän jëtu'un ma ja itjot yajtijyën Argob, jampë yajpaatyën Basán, ma ënety nitëkë'px ja mëj kajpnën napotsypë ets ku'ëtuky ta'tspëky mëët yë pujxn;

¹⁴ Ahinadab, yë myaank yë Idó, jam ojts t'atänë Mahanaim;

¹⁵ Ahimaas, mëti'ipë mëët pyijkyën ja to'oxytyëjk mëti'ipë xyëëwajtypyën Basemat, yë nyëëx yë Salomón, jam ma ja Neftalí ja y'itjotmën;

¹⁶ Baaná, myaank yë Husai, jam ojts t'atänë Aser ets jam Alot;

¹⁷ Josafat, myaank yë Tarua, jam ojts t'atänë Isacar;

¹⁸ Simí, myaank yë Elá, jam ojts t'atänë ma ja y'itjotmën ja Benjamín;

¹⁹ Guéber, myaank yë Urí, jam ojts t'atänë ma ja y'itjotmën yë Gad, mëti'ipë ijty nyitënääpyën yë Sihón, jampë ojts y'ëne'emyën ma ja Amor ja'ayëtyën ets jam näjyëtu'un Ok, mëti'ipë jam ënä'ämën Basán. Ojts näjyëtu'un tu'uk ëpëky y'ijtpë ja ja'ay mëti'ipë ni'ëmukë nyiwintsën'ajtën ya'atë ja'ayëty ma tëkokyë ja naax kajpnën.

Wi'ix ja Salomón wyijyëtyën ets wi'ix tyajwinpety ja nyaax kyajpn

²⁰ Judá ets Israel, aak mëj aak këjääjëty ënety tmëët'atë ja nyaax kyajpnëty, ka'ap tjëkyepy nmëtsyo'owmëty; jëtu'un ja jyä'äyëty nyimay'ajtë tä nëë ajinën. Ma tääpë kajpnëtyën jë'kxy pëky ka'ap ënety y'ëmaaytyä'äky, aak akujk jotkujk ja ja'ay yajpaatë.

²¹ Yë Salomón wäänë mëj ijty muum ja kyutujkën yajnikäjpxy, këtiinëm jyëtu'unëty ja wiinkëtypë ja kutujkëntëjk; jampaat ja kyutujktakn y'ëwtijty ma nëëjoy yajtijyën Éufrates ets nyäxy ma ja filistejë ja'ayëtyën; tyimja'ty jam Egiptë. Tëkokyë ja ja'ayëty aak ayajk aak ako'onëtyëp ijty mapaat ja Salomón yajkutujkyën.

²² Ja jyi'kxy pyiky ja Salomón jä'ä ijty xëmë jyä'ty winjëpom, i'px majk tu'ts yë tsajpmokway ets tëtujk mil ja tëtujk mëko'px ja tëkë'px mëjtsim ja jo'oypyë;

²³ majk yë tsajpkaa aak yä'äypyë ets ni'kxëtypë; i'px wiinkpë tsajpkaa aak yä'äypyë mëti'ipë tyukniyä'ktëpën yë mëëy ets mëko'px yë kupixyny; ëpëky näjyëtu'un yë tutk këtsey may; aakyë'ë ni'kxëtypë ets jëtyu'ujëty ets wiinkëtypë jëyujk.

²⁴ Ko jëtu'un winë nyipety, yë'ëkyëjxm ko ja Salomón aakyë'ë ënety y'ënä'ämtääpy tëkokyë ja naax kajpn mëti'ipë jam yajpatëpën matsow xëëw kyëtä'äkyën ma yajtijyën Éufrates, tsyo'ontä'äky jam Tirsá, tyimja'ty jampaat Gaza, aak ojts yë Salomón ya'atë ënä'ämpëtëjk tmëmëtakta'ay ets ko ënety nimay mëët ja näykyajpx'oyë të tuny.

²⁵ Mapaat ja Salomón jyuuky'äjtyën, yë Israel ja'ayëty ets Judá ja'ayëty jampë Dan yajpaatën ets tyimja'ty jam Beerseba aak jotkujk y'ijtë; nitu'ukjaty aak kyë'ëmtuunk tyuunk'ajtëp; nyiyu'ujëtëp ja higo kepy ets ja parrë.

²⁶ Salomón ojts tmëët'aty taxk mil yë këwaaytyënaaytyakn ma tyaj'ityën ja jyëyujk mëti'ipë pujxnwintëkäämpë pyajëtujtëpën ets majkmäjtsk mil ja tsiptuunpëtëjkëty mëti'ipë këwaaytyuk'ënyääytyëpën.

²⁷ Ja kutuunktëjkëty mëti'ipë ja xyëëw të yajnikajpxtën, yë'ë ënety winë y'ijxtëp tyuuntëp ma winë tyëkoy'ätyën tu'kpo'ojaty ma ja Salomón ja jyëën tyëjkën ets ma ja wyintsëntëjkën ets tyuunpëtëjkën.

²⁸ Wi'ixëty ijty tyuka'ajëtë jëtu'un jam ja jë'kxy tkäxtë mëti'ipë tyijtëpën cebadë ets ja mëëy mëti'ipë ja jyëyujk jyë'kxtëpën, ja kwaay mëti'ipë wyo'ontëpën ja kepy wintëkäämpë ets mëti'ipë winë pyatsëëmtëpën.

²⁹ Yë Wintsën ojts mëk tkënu'kxy yë Salomón mëët ja wijyajtën kujk'ajtën ets ja ijxkujk ja'aykyujkën mëjwiinpë këjääpë mëti'ipë ka'ap pën tmëpaatëtyën.

³⁰ Yë Salomón ja wyijy'ajtën ojts twinnajxta'ay ja Egiptë ja'ayëty ets ja ja'ayëty xëëwpëtsëmtsyowpë tsyëënëtën.

³¹ Ni'ik wijy ojts y'ity këtiinëm jyëtu'unëty ja ja'ayëty mëti'ipë xyëëwajtën: Etán, ja Sera ja y'u'unk y'ok; Hemán, Calcol ets Dardá, ja y'u'unk y'ëna'këty ja Mahol. Akäjpxy ojts y'ity oymyaajëty.

³² Jä'ä t'oytyuuny tëkëëk mil ja käjpxy mëtyä'äky mëti'ipë mëj këjääjëty niwijpën ets tu'uk mil ja mëkoxk ja oyëtypë ja aaw ayuk.

³³ Ojts tnikäjpxy tnimëtyä'äky wi'ix ja aay kepy y'ixë'atën, mëti'ipë jam Líbano; yë'ëpaat ja aay ujts potsykyijxypyë yonyën; ojts näjyëtu'un tnikajpxtaay ja aayjëyujk ujtsjëyujk, mëjatypë ets pixkënpë, mëti'ipë naaxwiinye'eytyëpën, mëti'ipë naaxjotyën, mëti'ipë nëëjotyën, kepyjotyën ets mëti'ipë kääkjëtijtëpën.

³⁴ Oymyaatsowëty ma wiinkëtypë naax kajpnën, tëkokyë ja ja'ayëty mëti'ipë nyija'awëtyën ja Salomón ja wyijy'ajtën, maajëty ojts muum tnitsoontë ets tnimiintë tmëtoow'itë ja Salomón ja kyäjpxy myëtyä'äky.