1 Reyes 21 - Biblia Dc en Mixe de Quetzaltepec

Ahab ets ja tsyätym kyam ja Nabot

¹ Nyäjxy jëtu'un ja xëëw jëmëjt, jam ënety tu'uk yë ja'ay tsyëënë Jezreel, jä'ä xyëëwajtyp Nabot, jam ijty tmëëtëty tu'uk yë tsatsymkyam, winkon ma ja yajkutujkpë Ahab ja kyutujktaknën mëti'ipë jam ënä'ämpën Samaria.

² Tu'kxëëw ojts yë Ahab t'ënëëmë yë Nabot: Mooykyës yë mkam ma jam xyaj'ityën yë mtsatym kyam, jamës ja një'kxy npëky npänëty nkojëty, paatyës ntsojkën'aty jä'ä ko winkon wyi'imy maajës yë nkutujktaknën. Tyam nmo'ojëty nän yë'ë tsatsymkyam je'eyëp ko jaakwäänë oy, ëkë pën m'ënaanp tyamës nkujuyëty.

³ E ja Nabot tyaa t'ëtsooy ja Ahab: Ka'ap mëpaat yë Wintsën tyajkutuky etsës nyakëty mëti'ipës yë nteety të xytyukkumayën.

⁴ Ja Ahab mon tuk ojts nyëjkxnë ma tyëjkën jä'ä ko ënety jëtu'un ja Nabot të y'ëtsoyë, ko ka'ap tjëkyepy myo'ojëtëty mëti'ipë ja tyeety tyaak tukumaayën. Ko jyä'äjty ma tyëjkën ënätyë nyäkyo'kë, jam nyämyëjjujpetyë potsywinm ets ka'ap ojts y'ëkaaynyë.

⁵ Ënet ja Jezabel, mëti'ipë yë'ë tyo'oxytyëjk'ajtypyën, nyimiinë ets y'ënëmaayë: ¿Wi'ixën ko je'eyë mmay mtajy, ix ka'appaat m'ëk kayanë?

⁶ Tä ja Ahab y'ëtsooy: Jä'ä ko tëëjës njamëtyä'äky mëët yë Nabot, nja''amëtoyës yë kyam, ma y'uvë tyaj'ityë etsës të nja'ënëëmë ko oyës wiinkpë nmo'ojëty ëkë oyës nkujuuyëty, e yë'ë ka'ap tkupëky.

⁷ Ënet ja Jezabel, mëti'ipë ja Ahab tyo'oxytyëjk'ajtypyën y'ëtsoowë: Yaa Israel, mijts yaa m'ënä'ämp ¿këtiijë? Kay uuk akujk jotkujk. Ëjts nija'ap wi'ixës yam tääpë Nabot y'uvëkam mpatës ets mijts xyjyä'ä'atëty.

⁸ Tä ojts tja'ay may ja noky mëti'ipë kyäjxwa'kxën, yajxon tsaaytyääy mëët ja yajkutujkpë Ahab ja kyë'ëkaa, yajtuknikäjxtë ja mëjja'aytyëjkëty ets ja kopktëjkëty jampë yajpaatën ma Nabot kajpnën.

⁹ Ma ja nokyën tyaa jap y'ënä'äny: Ënëëmëtë ja ja'ay wä'än t'ayuu'atë ets xy'ënyääytya'aktëty ja Nabot itkujky.

¹⁰ Tääts näjyëtu'un xymyëjwowtëty mäjtsk yë ja'ay mëti'ipë win'ëënëpën ets tpokynyitijtëty yë Nabot, jëtu'un y'ëna'anëty ko wiinkjaty yë Wintsën të tijy ets nän wiinkjaty yë yajkutujkpë të tnikäjpxy. Tääts ënät ok xyajpëtsëmtëty ets xykyuka'atstëty.

¹¹ Ja ja'ayëty mëti'ipë jam kukajpnajtëpën Nabot ets ja mëjja'aytyëjkëty ets ja kopktëjkëty ojts tuntë jëtu'un tä ja Jezabel të tyuk'ënä'ämëtën jap nokyjoty:

¹² Ojts tni'ënä'ämëtë ets ja ja'ayëty nitëkokyë y'ayuu'atëty, tääts t'ënyääytyaktë ja Nabot itkujky ma ja mayjyä'äyën.

¹³ Tä myiintë nimäjtsk ja ja'ayëty mëti'ipë win'ëënantëpën ets tpokynyitija'antë ja Nabot, tukmëtoowtë ja mayjyä'äy; ko ja Nabot ëxëëkjaty ënety ja Wintsën të tijy ets näjyëtu'un ja yajkutujkpë. Ënätyë tju'të ja Nabot jam ma ja mayjyä'äyën ets jam kajpnpë'am ojts tyajnëjkxtë, jam tkuka'tstë.

¹⁴ Ënätyë tuk'ëwa'anëtyë ja Jezabel ko ja Nabot tëë yajkuka'atsy ets tëë y'ooky.

¹⁵ Ko ja Jezabel tnija'awëy, tä t'ënëmaay ja Ahab: Nëjkx ets jä'ä'at yë Nabot yë nyaax kyam jampë yajpaatyën Jezreel, mëti'ipë ënety ka'ap mtukmëtooka'anyën. Nabot ka'ap ja y'ëkjuuky'ajnë, tëë ja y'ooky.

¹⁶ Ko ja Ahab tnija'awëy ko ja Nabot tëë y'ooky, ënät ojts ënätyë ja Nabot ja y'uvëkam tniwa'kë.

¹⁷ Ënet ja Wintsën ojts tmëkäjpxy ja Elías, jampë kyukajpnëtyën Tisbé ets t'ënëmaay:

¹⁸ Nëjkx xy'ixy yë yajkutujkpë Ahab mëti'ipë yajkutujkpën ma ja Israel ja'ayëtyën timtyämyë, jampë tsyëënën Samaria, tyam tam yajpaaty ma ja tsatsym kamën ja Nabot, jam të nyijkxy ets yë'ë tjä'äpëka'any.

¹⁹ Ets xy'ënëëmëty: Jëtu'un yë Wintsën y'ënä'äny: Mijts mëët ko ja Nabot të xyaj'ooky ets të xypyëjkë mëti'ipë jyä'ä'ajtypyën, jam ma yë'ë ja nye'pny të tyemy të jye'etsyën ets ja uk jam të jyë'kxmujkxëty, nän jam ja mjot mne'pny tyäma'any jyä'ätsa'any ets ja uk tjë'kxmukëty.

²⁰ Tä ja Ahab t'ëtsooy ja Elías: ¿Tyamës nijawë ko mijts, nmëtsiptëmës jëtu'un të xypyääty? Jëtu'un, tëë yam npaaty, jëtu'un y'ëtsooy ja Elías. Jä'ä ko mijts nitii oy xykyatuny, aakyë'ë mtuumpy ka'apë myëtëyëtyën Wintsën wyintum.

²¹ Paaty tyam jëtu'un yë Wintsën m'ënë'ëmxëty: Nyajkëta'akäämpyës yë ëyo'on jotmay ma mijtsën ets nyajkëjxta'ajäämpyës yë m'u'unk m'ok, ja ye'etyëjktëjk wa'atsës nyajkëjxta'aja'any ma ja mnaax mkajpnën mëti'ipë mja'ay'äjtypyën.

²² E ëjts nän tim jëtu'unës ntuna'any ja m'u'unk m'ëna'k ets ja m'u'unk mto'oxytyëjk, mjëëky mëku'uk, tääjës ntuunyën ja Jeroboam, yë myaank yë Nabat ets tä yë Baasá, yë myaank yë Ahías, mëët ko ojts xyajjoot'anpëktë ko tyajpokytyuuntë ja Israel ja'ayëty.

²³ E mëët yë Jezabel ënätpë, yë Wintsën jëtu'un të y'ënä'äny: Yë uk yë'ë nëjkx tsu'utstë twëtstë ja Jezabel ja nyini'kx jam kamjotm tu'ujotm ma txëëwatyën Jezreel.

²⁴ E ja mjëëky mëku'uk mëti'ipë ënety o'kpën kajpntum, uk nëjkx tsyu'tsta'ayë; e ja mëti'ipë jam o'ktëpën kamjotm tu'ujotm joon jëyujk nëjkx tsyu'utsyë.

²⁵ Ka'ap ojts maa jëtu'unpë yajkutujkpë nijëna'a tyuny, mëti'ipë ojts yi'iyë tyo'oxytyëjk nyätyuk'ëne'emyën, ijxtëm yë Ahab tyuunën yë tyo'oxytyëjk Jezabel ets je'eyë ojts nëkoo tii ëxëëkjaty tyuktuuntëkoyë jam Wintsën wyintum.

²⁶ Ka'ap mëtëy tii t'ëktuunë, je'eyë të twinkoxtënaaynyë ja awinax ets ja tsaapotsy ka'apë jyuukyëtyën, jëtu'un tä ijty yë Amor ja'ayëty y'ëtë'ëtstën, mëti'ipë yë Wintsën y'ixkäjxtaayën ma ja Israel ja'ayëty jam nyajxtën.

²⁷ Ko yë Ahab tmëtooy jëtu'unpë ja aaw ayuk mëkpë, ënät ojts tkë'tsta'ay ja wyit, aakjä'ä ëxëëk wit ojts nyätyuknijenyë ets y'ayuu'ajty y'ëxëëwajty. Jëtu'un tmëma'ay ja y'ëxëëkwit ets myony tyuk.

²⁸ Ënet ja Wintsën y'ënëmaayë ja Elías:

²⁹ ¿Tëë xy'ixyë wi'ix yë Ahab yë jootwinpijtën të tmëët'atyë ets wi'ix ëmaay amutsk të nyäpyëjktä'äkyë ma ëjtsënë? Mëët yë'ë ko të mjootwinpity ets ëmaay amutsk të mnäypyëjktä'äkyë ma ëjtsën, yë'ë ets jyiiky myëku'uk ka'apës wi'ix ntuna'any ma tyam jyuuky'ätyën, jäänëm tëy nëjkx ja ëyo'on nyajkëtä'äkyës ko ënety yë'ë ja myaank jyuuky'äty.