1 Reyes 20 - Biblia Dc en Mixe de Quetzaltepec

Ma Ahab ka'ap tyajmëtä'äkyën yë Siria ja'ayëty

¹ Yë Ben-adad, mëti'ipë jam yajkutujkpën Sirië, ojts may tyajmuky ja tsyiptuunpëtëjk ets mëët nyämyajtsë ni''i'px majk ja yajkutujkpëtëjk, mëët tëkokyë ja tsyiptuunpëtëjk mëti'ipë këwaaykyëjxm tsiptuuntëpën ets ja pujxnwintëkäämpë mëti'ipë myëtsiptuuntëpën ets ojts nyijkxy jam Samaria, tyajnatujky ets tnitëjkëy.

^2-3 Ojts näjyëtu'un tkexy ja aaw ayuk jam kajpnjotm ets t'ënëëmëtëty ja Ahab, jampë yajkutukyën Israel: Jëtu'un yë Ben-hadad y'ënä'äny: Yë mwit meeny ëjtsës njä'ä'atäämpy ets näjyëtu'un yë mtoxytyëjktëjk ets m'ëna'ktëjk.

⁴ Tä ja yajkutujkpë mëti'ipë jam tuunpën Israel y'ëtsooy: Jëtu'un ijxtëm mijts yajkutujkpë të m'ëna'anyën, ka'ap wyi'ixëty, ëjts ets ntoxytyëjktëjkës ets n'u'unk n'ëna'kës mijts yë mjanty jyä'ä.

⁵ Ja käjpxynyajxpëtëjkëty ojts jatëkok tninëjkxtë ja Ahab ets t'ënëmaaytyë: Jëtu'un yë Ben-hadad y'ënä'äny: Tëë n'ënëëmë ko xymyo'ojëtyës yë mwit meeny, yë mto'oxytyëjktëjk ets m'u'unk m'ëna'k.

⁶ Ets ëpëky jëpom nkäxä'änyës yë ntsiptuunpëtëjkës jam ma mkutujktaknën ets nëjkx tuk'ix tukwoonëtë ja mkutujktakn ets ja jyëën tyëjkëty ja mwintsëntëjk mëti'ipë mëët mtuunmukyën, mëti'ipë ënety tsyojkën'ajtëpën yë'ë tjä'ä'ata'antë.

⁷ Ënet ja Ahab ojts twoowmujkta'ay ja mëjja'aytyëjk mëti'ipë jam yajpatëpën ma ja naaxjot tnitänën ets t'ënëmaay: Ijxtëm miits xynyijawëtën tääpë ja'ay yë'ë y'ixtääpy wi'ix ëxëëk njatëtyës nkëpätëtyës, tëëjës nja'ënëëmë ko oy yë'ë tjä'ä'atëty yë n'u'unk nto'oxytyëjkës, yë n'u'unk n'ëna'kës ets nwit nmeenyës.

⁸ Tä ja mëjja'aytyëjkëty y'ënantë: Këtii nëkoo xytyim mëjpëjktä'äky tä jya'ëna'anyën. Jëtu'un y'ëtsoowtë ja mëjja'aytyëjkëty ets ja mayjyä'äy.

⁹ Ënet ja Ahab t'ënëmaay ja Ben-adad ja kyäjpxynyajxpë: Ënëëmë yë mkutujkpë, ko ntunäämpyës mëti'ipës të t'amëtoyën, je'eyëp ko ja mëmäjtskpë mëti'ipës tyam y'amëtoopyën ka'apës nkupëky. Ja käjpxynyajxpë ojts ja aaw ayuk jëtu'un tukninëjkxtë ja Ben-adad,

¹⁰ ja Ben-adad ojts jatëkok tnikäjpxykyäxë ja Ahab ets t'ënëmaay: Yë tiosës xytyiytyunëp, pën wë'ëmp jam yë naaxway Samaria mëti'ipës jeexyë nmoopyën këëk tu'knuuky ja ntuunpëtëjkës.

¹¹ E ja yajkutujkpë mëti'ipë jam tuunpën Israel, tyaa ja y'ëtsooy: Këtii tii xynya'ëy xynyakäjpxynyëm ma ka'ap tii tyunyënëm jyätyënëm.

¹² Ko ja Ben-adad ojts yajmo'oy ja kajpxwinpijtën, ukp ënety jam mëët ja myëku'uktëjk mëti'ipë näjyëtu'un yajkutujktëpën, jam ënety pyo'kxtë pyëktë ma ja tëjk oywyi'ix të tkojtën. Ënet t'ënëmaay ja tsyiptuunpëtëjk: Nipëtë'ëktë. Ënet poj'am tnipëjktakëtë ets tnipëtë'ëka'antë ja kajpn.

¹³ E ja Ahab mëti'ipë jam ënä'ämpën Israel, ënätyë ojts tu'uk ja käjpxynyajxpë nyiminyë ets y'ënëmaayë: Jëtu'un yë Wintsën të y'ënä'äny, ko oy jënu'un janty nimay xyjya'ixëty yë mëtsiptëjk, yë'ë nkëyakäämpyës yam ma mijts yë mkë'ë m'aawën ets jëtu'un xynyijawëty ko ëjts Wintsënajtp.

¹⁴ ¿E wi'ixës xytyukkë'ëtëkëja'any? Jëtu'un ja Acab tyajtëëy. Yë Wintsën jëtu'un të y'ënä'äny ko yë'ë ëna'ktëjk mëti'ipë pyutëjkëtyëpën yë yajkutujkpëty yë'ë wyinkuwa'akëjantëp yë mëtsip, jëtu'un y'ëtsooy ja Wintsën ja myëtuunpë. ¿E pën ëka'any yajtso'onta'akëp ja tsip? jëtu'un tyajtëëwkojnëpë ja Ahab. Mijts myajtso'onta'akëp, jëtu'un y'ëtsoowë ja Wintsën ja myëtuunpë.

¹⁵ Ënet ja Ahab tmëtyooy ja ëna'ktëjk, mëti'ipë ënety pyutëjkëtyëpën ja yajkutujkpëtëjk maajaty ja kajpnën, jä'ä nyiwinë'ajtë nimäjtsk mëko'px ja i'px majkmäjtsk ets näjyëtu'un ëpëky ja tsiptuunpëtëjk, jä'ä nyimay'atë niwëxtujk mil.

¹⁶ Kujkxyëëw ojts tsyoontë, tam ënety ja Ben-adad yajxon jyänty y'uuk jyänty pyëktë mëët ja myëkutujkpëtëjk, ma jam ja tëjkën nixo'ompyë mëti'ipë ënety jam të tkojtën,

¹⁷ ma ja Ahab tsyo'onyën tsiptuunpë, yë'ë jëyëjp ye'eytyëp ja ëna'ktëjkëty mëti'ipë pyutëjkëtyëpën ja yajkutujkpëty kajpntum. Ko ja Ben-adad yajtuk'ëwa'anëy ko tëë ja ja'ay jam tsyoontë Samaria,

¹⁸ ënät ni'ënä'ämëy ets y'ënäny: Wä'än yë'ëjëty mëti'ipë tsiptunantëpën ëkë tsip kyajpx'oyëjantëpën, aak juukyës ntsojkta'ay xyajmintëty.

¹⁹ Ja ëna'ktëjkëty mëti'ipë pyutëjkëtyëpën ja yajkutujkpëtëjk kajpntum, ojts ja tsyoontë ets yë'ë paye'eyëtëp ja maytsyiptuunpëtëjk.

²⁰ Këëktu'uk ojts tyaj'ooktë ja myëtsipëty ets ja sirië ja'ayëty kyäktaaytyë. Tä ja Israel ja'ayëty tpatso'ontë, ojts mëktä'äky tjanajtspaatëja'antë ja Ben-hadad, yë'ë kwaaykyijxy ojts poj'am kye'eky, mëët nikanaak ja tsyiptuunpëtëjk aak këwaaykyijxëty.

²¹ Ënet ja yajkutujkpë mëti'ipë jam ënä'ämpën Israel, tjä'ä'ajtaay ja mëti'ipë ënety ja Siria ja'ayëty të tnikäktu'utën, tä ja kwaayën ets ja pujxnwintëkäämpë mëti'ipë myëtsiptuuntëpën; jëtu'un'äämpy ja Siria ja'ayëty o'ktëy jyajtë kyëpäjtë ets ka'ap ojts y'ëkmëtaknëtë.

²² Ok ja Wintsën ja myëtuunpë jam jyä'äjty ma ja yajkutujkpën mëti'ipë jam ënä'ämpën ma ja Israel ja'ayëtyën ets t'ënëmaay: Nänyi''ixëty ets nipëjktaakë yë mtsiptuunpëtëjk, jä'ä ko jajëmëjt jatëkok wyimpita'antë tääpë sirië ja'ayëty ets mëët mijts tsyiptuna'antë.

²³ E ja yajkutujkpë jampë y'ëne'emyën Sirië, ja myëkutuunktëjkëty ojts näjyëtu'un y'ënëmaayëtëpë ja tsyiptuunpëtëjk: Yë Wyintsënëty yë Israel ja'ayëty jä'ä ko jam yajpaaty kopkkëjxm tunkëjxm, paaty të xymyëmëtakëmë; tyam jä'ä ntu'unmëty jam mëët ntsipjëtu'unmëty joyjotm jëtu'unts nmëtakmëty ëëtsajtëm.

²⁴ Mëti'ipë tëy mëpaat xytyunyën mijts yajkutujkpë, yë'ë jam myajjëwa'kta'ajëp ja ënä'ämpëtëjk ma yajkutuktën ets jam xypyëjkta'akëty yë tsiptuunpë wintsëntëjk,

²⁵ ets ënät yajma'kxëty yë tsiptuunpëtëjkëty jëtu'un tä ja mëti'ipë ojts ka'ap myëta'aktën, jëtu'un ja mëti'ipë këwaaykyijxyëtyën ets mëti'ipë pujxnwintëkäämpë këjxyëtyën. Ënet jam mëët ntsiptu'unmëty joyjotm tääts xy'ëk'ixëty ko mëtakmëp jëtu'un. Ben-adad oy ja winma'any tmëtooy ets ojts tpatuny.

²⁶ Kom jëmëjt yë Ben-adad t'ijxmujktaay ja Siria ja'ayëty ets ojts jam nyëjkxtë Efec, jamts mëët tsyiptuna'antë ja Israel ja'ayëty.

²⁷ Näyjyëtu'un ja Israel ja'ayëty ojts t'ijxmuktë ja tsyiptuunpëtëjkëty ets tmooytyääytyë mëti'ipëjaty yajtunantëpën, tääts tnitso'ontë ja sirië ja'ayëty. Ko jam nyäpyëjktakëtë awinmtsow ma ja sirië ja'ayëtyën, jëtu'un je'eyë jëkäm yaj'ixtë may tsyajppax yowë jam tënaaytyëp mäjtsk këëyi'iky, jä'ä ko ja sirië ja'ayëty ni'iknimay ënety kyëxë'ëktë ets ojts tyajwintujkta'atë ja joyjyot.

²⁸ Ënet jam tu'uk yë Wintsën yë myëtuunpë tnimiiny yë yajkutujkpë mëti'ipë jam ënä'ämpën Israel ets y'ënëmaayë: Jëtu'un yë Wintsën y'ënä'äny: Jä'ä ko yë sirië ja'ayëty të y'ëna'antë ko jamës nWintsën'aty kopkkëjxm ets ka'ap jyamëty joyjotm, ëjts nkë'ëyakäämpyës nitëkokyë yë'ëjëty ma miitsëtyëty. Jëtu'un xynyijawëty ko ëjts Wintsënajtp.

²⁹ Wëxtujk xëëw ojts jam y'itë ja sirië ja'ayëty ets Israel ja'ayëty nixim niyam nyäwyinku'ixëtë, kom wëxtujk xëëw ojts tsyiptuntë. Jä'ä xëëw yë Israel ja'ayëty ojts tyaj'ooktë yë sirië ja'ayëty mëti'ipë teky'am tsiptuuntëpën nitu'kmëko'px mil.

³⁰ E ja mëti'ipë ojts jyaakwë'ëmtën juuky jam ojts nyaskääkëtë ma ja Afec kajpnën, je'eyëp ko ja kajpn napots ojts kyëtäy ets nyijijtpäjtaaytyë ja ni''i'pxmilpë ja sirië ja'ayëty mëti'ipë ënety të kyä'äktën. Ja Ben-adad ojts näjyëtu'un kye'eky ets jam jyä'äjty kajpntum, winjëën wintëjk ojts jyaaknäyu'utsyë.

³¹ Ënet ja tsyiptuunpëtëjk y'ënëmaayëtë: Yajnijawë'ajtp ko yë Israel ja'ayëty kyuuytyuuntëp yë y'aaw y'ayukëty ko tii mëët nkäjpxy'ajtmëty; paaty tsojk ntuktëjkëmë tukwit tuktujkxy ets nätyukyo'kpëjkëmëty yë tejpxy, jëtu'unts ninëjkxmëty ja yajkutujkpë jampë yajpaatyën Israel ets n'ijxmëty kajekyën xynyapokymyä'kxmëty ma njuukyajtën'ajtëmën.

³² Ënet tuktëjkëtyë ja tukwit tukpatsy ets nyätyukyo'kpëjkëtë ja tejpxy, tä jam ojts nyëjkxtë ma ja yajkutujkpën jam Israel ets t'ënëmaaytyë: Jëtu'un yë Ben-adad y'ënä'äny, ko mëpaatëk jeexyë xytyuny yë mëyajtën ets xynyimä'kxëty yë jyuukyajtën. Tä ja Ahab y'ëtsooy: ¿Tixë juukynyëmën jam yajpaatyë? Jëtu'unës të njawë tääjës yë nmëkä'äxën.

³³ Ja ja'ayëty y'oymëtoowtë jëtu'unpë ja ayuk, paaty ënätyë y'ënantë: Yë Ben-adad jëtu'un yë'ë tä jeexyë xymyëkä'äx'atyën. Nëjkx yajtsoontë, jëtu'un y'ëtsooy ja Ahab. Ënet ja Ben-hadad myiiny jam ma ja Ahab ets ja Ahab yajpäjtë pujxnwintëkäämpë këjxy.

³⁴ Tä ja Ben-adad y'ënëmaayë: Tyam jatëkok nmooytya'ajëty ja kajpn mëti'ipë ja nteetyës pyëjkëyën ja mteety; mijts oy jam mjuyëty mkëpätëty ëkë mtookëty myajkëty Damaskë, jëtu'un tä ja nteetyës jamën Samaria. Ëjts nän tyamës mijts n'ëxmatsëty, jëtu'un y'ëtsooy ja Ahab. Jëtu'un'äämpy ja Ahab tuuny ja käjpxytyu'unën mëët ja Ben-adad ets t'ëxmajtsy ets nyëjkxnë.

³⁵ E jamts ojts tu'uk ja ja'ay pyëtsimy mëti'ipë ja Wintsën myëtuumpyën ets t'ënëmaay ja myëku'uk, tä ënety ja Wintsën të tyuk'ëne'emyën: Yajtsëtyujtkës, tun mëyajtën. Ja myëku'uk ka'ap ojts nyätyukmë'a'ixëty.

³⁶ Ënet ja Wintsën ja myëtuunpë y'ënëmaayë: Mëët ko ka'ap të xytyuny ijxtëm ënety ja Wintsën të tni'ënä'ämën, tim je'eyë yaa mtsoonëty tääts tu'uk yë kaa myaj'ooka'anyë. Jëtu'un ojts jyänty jyäty, tim je'eyë mëët nyäy'ëxmajtsë ja Wintsën ja myëtuunpë tääts ojts jam tu'u'am pyäätyë tu'uk yë kaa ets yaj'o'kë.

³⁷ Ok ojts ja Wintsën ja myëtuunpë wiinkpë nyäpyäätyë ja ja'ay ets t'ënëmaay, ko yajtsëtyutëtëty, ja ja'ay ojts jyänty nyipëtë'ëkyë ets yajtsëtyujtë.

³⁸ Ënet ja Wintsën ja myëtuunpë ojts jam nyijkxy tu'u'am ets jam t'ëwxity ja yajkutujkpë jëna'a jam y'ëknaxy, je'eyë ojts nyäwyinkutsumëty.

³⁹ Ets ko jam nyäjxy ja yajkutujkpë, ënät ja Wintsën ja myëtuunpë mëk yujk'ënany: Yajkutujkpë, mijts yam n'ënëmääpy, ko jamës të nyajpaaty jëjp'am ma ja tsip të tyunyën, e jam ma ja tsiptuunpë jam të yajpaatën, jam tu'uk të pyëtsimy ja ja'ay mëti'ipës të xytyukniminyën tu'uk yë tsumjyä'äy. Etsës të xy'ënëëmë koos nkëwen'atëty tääpë tsumjyä'äy, e pën nyajkekpyës, ëjtsëk n'ëtsoowinpitëp mëët ja nkë'ëmjuukyajtënës, ëkë pën kajts n'ooka'anyës jyëkyejpy näjyuuypëtsëmëtëtyës mëët ja poop pujxn meeny tëkëëk mil

⁴⁰ E ëjts jä'ä ko tamës ënety wiinkpë ja ntuunk, täätsës ja tsumjyä'äy të xykyuke'eky. E ja yajkutujkpë jampë y'ëne'emyën Israel, tyaa y'ëtsoowë: Mijts kë'ëm yam ja mpoky të xynyikäjpxy ets kë'ëm jëtu'un ja tëytyu'unën të mnätyuknikäjpxyë.

⁴¹ E ja käjpxynyajxpë poj'am nyätyukwinpëjktutë ja wyintum ets ja yajkutujkpë t'ijxy ko jä'ätëm ja ja'ay mëti'ipë ja Wintsën myëtuumpyën.

⁴² Ënet ja käjpxynyajxpë y'ënëmaayë: Jëtu'un yë Wintsën y'ënä'äny: Mëët ko të xyajke'eky ja ja'ay mëti'ipë ënety ja Wintsën të tuknipëjktaakën ets y'ookëty, yë mjuukyajtën yë'ë ënät mëët xykyëpätëty ja pyoky ets mnaax mkajpn yë pyoky.

⁴³ Ënet ja yajkutujkpë mëti'ipë jam tuunpën Israel ojts nyëjxnë mon tuk ets a'äkë jam Samaria, jëtu'un jyäjty jam ma ja kyutujktaknën.