1 Reyes 19 - Biblia Dc en Mixe de Quetzaltepec

Ma ja Elías kye'ekyën ets nyijkxy jap Horeb

¹ Yë Ahab ojts tukmëmëtyakta'ay yë Jezabel tëkokyë mëti'ipë ënety yë Elías të tunyën ets wi'ix ënety të tyaj'o'kta'ayën ja ja'ayëty mëti'ipë ja Baal myëtuuntëpën.

² Ënet ja Jezabel ënätyë tkejxy tu'uk ja kukäjpxy ma ja Elías jam yajpaatyën ets t'ënëëmëty: Pën mijts mxëëwajtyp Elías ëjts jä'äs nxëëwajtyp Jezabel. Ëjts mëj këjääjës yë wintsëntëjk xytyukpoky'atëty ko mijts ka'ap jëpom ya'atpë horë näjyëtu'un mjatëty mkëpätëty tä yë Baal yë myëtuunpëtëjk të xytyunyën.

³ Elías ojts t'ixy ko nakutsë'ëkë ënety jam yajpaaty, paaty ojts nyijkxy jam Beerseba, mëti'ipë Judá jyä'äy nyitënaaytyëpën ets ja jyuukyajtën tyajtsoky, jam t'ëxmajtsy ja tyuunpë.

⁴ E yë'ë ojts tsyo'onë, jamtsow ojts nyijkxy të'ëts'itjotm, tu'kxëëw ojts yajxon ye'ey, tä jam nyaaxwe'tsy kepypya'tkë'ëm. Nëkooyë y'ënu'kxënyë, mëpaatëp y'o'knë, paaty y'ënäny: Wintsën wä'än jääpaat, pëjkëkës yë njuukyajtën, jä'ä ko ka'apës jëtu'un ntsoowpaaty tääjës yë n'ap n'okën.

⁵ Ets nyäkyo'kë jam kepypya'tkë'ëm, ojts myaanaxy. Ajotkumonë tu'uk yë Wintsën yë kyukäjpxy nyimiinë ets y'ënëmaayë: Pëtë'ëk, kay uuk.

⁶ Tää ja Elías y'ijx'ëwtijty ets pyë'aay t'ijxpaty jëënkëjxy y'ity jë'kxy y'aanpëky ets tu'ktu'ts yë uuky. Ënet pyëti'ky ets kyääy y'uky; ko kyääytyääy tääts jatëkok nyäkyo'kë.

⁷ E ja Wintsën ja kyukäjpxy ojts jatëkok myiny ets tyijyu'kxë, tä y'ënëmaayë: Pëtë'ëk ets kay uuk, jä'ä ko yë mnë'ë mtu'u ni'ikyë yona'any.

⁸ Tä ja Elías pyëti'ky ets kyääy y'uky. Tääpë ka'ayën ukën yë'ë ojts yajxon myëjaawmo'oyë ets tyu'uye'eyëty wëxtyikxy xyëëw wëxtyikxy tsyu'um koonëm jam jyä'äjty Horeb, ma ja Wintsën ja kyopkën.

⁹ Ko jam jyä'äjty jap ojts aankjoty tyëkë ets jap myääy. E ja Wintsën jä'ä tsu'um ojts myëkäjpxyë ets y'ënëmaayë: ¿Tiitën yaa mtuumpy mijts Elías?

¹⁰ Tä ja Elías y'ëtsooy: Mijts Wintsën mëti'ipë maaytyääyëpën winë, yë'ëjës nmëkja'ap ets yë'ë ko ni'ikyë, paatyës yam nikäjpxy ko yë Israel ja'ayëty tëë tja'atyëkooynyëtë ja käjpxytyu'unën mëti'ipë tyuuntën mëët mijts, tëë tjijta'atë ja mwintsë'këntyakn ma myajmëjjawën ets tëë tyaj'o'kta'atë ja mtuunpëtëjk. Ëjtsyë atu'uk të njaakwë'ëmyës juuky, ets nän tääjës nyajpaajëtity etsës näjyëtu'un xyaj'ooka'antë.

¹¹ Ets ja Wintsën ojts y'ënë'ëmxëty: Pëtsëm jap tëja'p ets xywyinkuwa'akëtyës jam kopkkëjxm. Tam ënety jëtu'un yajpaaty kopkkëjxm ko ja Wintsën jam nyäjxy mëët yë mëkpoj, tyimkë'ëtswa'kx ja kopk ets ja tsaa piw nuuk tuuntaay jam Wintsën wyintum; je'eyëp ko ja Wintsën ka'ap ënety jap yajpaaty pojjoty. Ko jëtu'un y'ëknajxy ja mëkpoj tä ojts ja naaxwiinyëtë tyëkë yu'kxpë, mëk jyänty yu'kxy, je'eyëp ko ja Wintsën ka'ap ënety jap yajpaaty.

¹² E ko ja naaxwiinyëtë yu'kxtaay, tääts yaj'ijxy mëj jëën myiny; je'eyëp ko ja Wintsën ka'ap ënety jap jëënjoty. Ko jëtu'un ja jëën nyajxtaay, ënät ojts tu'uk yajmëtoy ja'ay kyäjpxy ame'tsyë.

¹³ Ko ja Elías tmëtooy, tä ënätyë nyäwyinkuju'uxëyë mëët yë nyijän, pëtsëëm jap aankjoty ma ënety yajpaatyën ets tyënaay'o'oyëy ma ja aank yajnitëkën. Tä tu'uk ja mëto'owën tyukja'ajtë, mëti'ipë nëmaayën: ¿Tiitën jää mtuumpy mijts Elías?

¹⁴ Tä y'ëtsooy: Mijts Wintsën mëti'ipë maaytyääyëpën winë, yë'ëjës nmëkja'ap ets mëët yë'ë ko ni'ikyë paatyës yam nikäjpxy, ko yë Israel ja'ayëty tëë tja'atyëkooynyëtë ja käjpxytyu'unën mëti'ipë tyuuntën mëët mijts, tëë tjijtaaynyëtë ja mwintsë'këntyakn ma myajmëjjawën ets tëë tyaj'o'kta'atë ja mtuunpëtëjk. Ëjtsyë atu'uk të njaakwë'ëmyës juuky, e ëjts nän tääjës nyajpatity etsës näjyëtu'un xyaj'ooka'antë.

¹⁵ Ënet ja Wintsën y'ënëmaayë: Nëjkx ets winpit jatëkok ma të minyën, jam të'ëts'itjotm ma txëëwatyën Damaskë. Nëjkx kënu'kx yë Hazael ets yë'ë jam y'ënä'ämëty Sirië,

¹⁶ e yë Jehú, yë y'o'k u'unk yë Nimsi ets yë'ë jam y'ënä'ämëty Israel; e yë Elisejë yë myaank, yë myaank yë Safat, jampë kyukajpnëtyën Abel-meholá, yë'ë kënu'kx ets yë'ë xymyëtunëtyës tä mijts tyam xymyëtunyënës.

¹⁷ Jëtu'un'äämpy ko pën jyakä'äka'anëty ma ënety ja Hazael yaj'ooka'anyën, yë Jehú yë'ë yaj'ookëtëp, e ko ënety pën jyake'eky ma ja Jehú, yë Elisejë yë'ë nëjkx yaj'ookyë.

¹⁸ E kajts ënät ntimy ëna'anmëty ja'ay tyim o'kta'aja'antë, nyajwë'ëmäämpyës jam ma Israel kajpnën niwëxtujk mil yë ja'ay mëti'ipë ka'ap të twinkoxtänëtën yë Baal ets nän ka'ap të tsu'kxtë.

Ma yajmëkäjpxyën ja Elisejë

¹⁹ Ënet ja Elías ojts jam tsyo'onë ets nyäpyatë mëët ja Elisejë jam kamjotm, yajtsajp kaa yuup ënety jam. Ja Elisejë jä'ä ja tsajpkaa wyinye'eyë ni''i'px taxk, e ja nimäjtskpë yë'ë wyinye'epy. Ënet ja Elías ojts nyinëjkxyë ets tyuknijëpijpë ja nyijän.

²⁰ Ënätyë ja Elisejë ojts ja tsyajpkaa t'ëxmatsy ets ojts tpanëjkxy ja Elías, tä t'ënëmaay ko tnajtspatëy: Nëjkxës je'eyë n'ëknäjyëëkäjpxyë maas yë nteety ntaakën ets mpanëjkxëty. Oy, nëjkx, je'eyëp ko mja'amyätsëp mëti'ipë tyam të ntuknipëkyën.

²¹ Tä ja Elisejë ojts tpuwa'ktu'uty ja Elías ets ojts nyijkxy, ojts mäjtsk tsajpkaa tyaj'ooky ets jëën tyajmëjjëy mëët ja kepy mëti'ipë ënety yajtuumpyën ma ja tsajpkaa tyajyu'uyën; jamts tsaay ja tsu'utsy, tä tyajkaay tyaj'uky ja mayjyä'äy. Ko jëtu'un tyajkaaytyääy tyaj'uktaay ja ja'ay tä ojts tpanëjkxy ja Elías ets yë'ë tmëtuna'any.