1 Reyes 18 - Biblia Dc en Mixe de Quetzaltepec

Ma ja Elías jatëkok twinkuwa'akën ja Ahab

¹ Nyäjxy jëtu'un ja xëëw jëmëjt, kom tëkëëk jëmëjt yë Wintsën ojts tmëkäjpxy yë Elías ets t'ënëmaay: Nëjkx xy'ixy yë yajkutujkpë Ahab ets xytyuk'ëwaanëty koos nkäxäämpyës yë nëë tuu.

² Ënet ojts ja Elías jyänty nyijkxy ets ja Ahab jam twinkuwa'këy. Ja yuu xëëw yajxon ënety jam ni'ikyë myëjë kyëjääjënyë.

³ Ja Ahab, myëjwoow ja Abdías, mëti'ipë pujëtu'unëyëpën, yë'ë y'ëwtatyp ënety winë aaw winëjot yë Wintsën

⁴ paaty ko ojts ja Jezabel may tyaj'ooky ja ja'ayëty mëti'ipë ja Wintsën myëtuuntëpën, yë Abdías, may ojts tyajtso'oky yë Wintsën mëtuunpëty, wëxtyikxy majkjaty tpëjktäky ets tyu'ty, yë'ë tyim yajkaay.

⁵ Tä ja Ahab t'ënëmaay ja Abdías: Ja'am n'ëktukjëtijtëmë it naaxwiinyëtë, kooxyëp muum napatmëty yë nëë mëti'ipë y'uuktëpën yë jëyujk tsajpkaa. Jä'ä ko pën ka'ap maa nëë tsojk jëyujktuk n'ëkwë'ëmënëty.

⁶ Ënet ojts tyajwa'kxtë ja naaxjot mëti'ipë nëjkx tukjëtitëja'antën, Ahab ëpëky ojts ja tu'u tpëk, e ja Abdías nän wiink tu'u pyëjk.

⁷ Jamts tu'ujotm ojts ja Abdías mëët nyäpyäätyë ja Elías, ko ja Elías twinkuwa'këy ja Abdías mëk wyintäky nyaaxkooy tyajkëxë'ëky jëtu'un ja näwyinkutsë'ëkë ets y'ënäny: Mijts yowë mxëëw'ajtyp Wintsën Elías.

⁸ Ëjts jëtu'un nxëëwajtyp, jëtu'un y'ëtsooy ja Elías. Ets ja Elías jyaak'ënany: Nëjkx ënëëmë yë mwintsën koos tyaajës nyajpaaty.

⁹ Jää ja Abdías y'ëtsooy: ¿Tiixës ëjts të ntuuntëkoy, etsës nëjkx nyikäjpxy ko myaajëty, yë Ahab xyaj'ookëptsës yë'ë ko tnijawëty?

¹⁰ Ëjts tyamës ntukajpxpety yë mWintsën yë xyëëw, ko tää yajxon mjanty yaj'ixta'ay ets myaj'ooka'anyë, tëë yajtukjëtijtëtyä'äy yë naax kajpn, ko pën y'ënä'äny ko ka'ap maa Ahab kanaak'ok tuknikäjpxy yë ja'ay ko ka'ap maa pën të mpaatyë.

¹¹ Etsës mijts tyam xy'ënëmääpyë, etsës nëjkx n'ënëëmë ja nwintsënës ko tyamës mijts myajpaaty.

¹² Ëjts wa'atsës ntsyäty nyijawë ko ënät yaa ntsoonëtyës wiinktsow ënät ja Wintsën ja myëk'ajtën y'oyajtën myajnëjkxa'anyë maas ka'ap ninu'un nijawëtyën. E koos ënät ntuk'ëwaanëty ja Ahab, yë'ë kajts ja maa m'ëk patënëty, etsës ënätës xyaj'ookëty. Ëjts nwinkutsë'këpës yë Wintsën mutsknëm.

¹³ ¿Ti këtiijën pën të mtuk'ëwa'anxëty wi'ixës ojts tëëyëp may ja Wintsën ja myëtuunpë nyajtsokënë, ko ja Jezabel tyaj'o'ky mëti'ipë ja Wintsën myëtuuntëpënë? Ëjts mayës ojts nyu'uty, wëxtyikxy majkjaty ojts mpëjkwa'kxës etsës jap aankjoty mpëjktaktaay japtsës ntukninëjkx ja kyä'äyënëty y'ukënëty.

¹⁴ ¿E mijts yë'ëjës ënät tyam xy'amëtoop, tsës ëjts nëjkx n'ixy ja yajkutujkpë, etsës n'ënëëmëty ko mijts tyaa myajpaaty? Yë'ë poj'amës yë ënät xyaj'ookëty.

¹⁵ Tä ja Elías y'ëtsoowë: Ëjts Wintsënës yam ntukajpxpejtyp, mëti'ipës nmëtuumpyën, n'ënëëmë mijts yajxon ko ya'atë xëëw jam näwya'këxë'ëka'anyës ma yajkutujkpën Ahab.

¹⁶ Ja Abdías ojtsën ja nyijkxy jam ma ja Ahab ets tuk'ëwa'anëy wi'ix ënety ja Elías të y'ënë'ëmxëtën, tä ja Ahab ënätyë nitso'ony ja Elías.

¹⁷ Ko t'ijxpaty, tä t'ënëmaay: ¿A mijtstëm jëtu'un, mëti'ipë ja Israel naax Israel kajpn nëkoo je'eyë y'ëxëëkwinkajpxëpën?

¹⁸ Ëjts ka'apës ni pën n'ëxëëk wiinkajpxë, jëtu'un t'ëtsooy yë Elías; mijtsën tëy, mëët yë mja'ay, mëët ko ja Wintsën ja y'ënä'ämën tyiyajtën të xy'ijxmajtsnëtë ets jä'ä oy xymyëjja'awënëtë ja ka'apë Wyintsënëtyën tä ja Baal ja y'awinaxën.

¹⁹ Yë'ë yam mijts ntuk'ënëëmëjäämpy ets xykyäxëty yë mja'ay wä'än tyajtu'ukmujkta'ay yë ja'ay jam ma kopk txëëwatyën Carmel ets jam näjyëtu'un nyäwya'këxë'ëkëtëty yë ja'ayëty nimajktaxk mëko'px ja wëxtyikxy majkpë mëti'ipë yë Baal myëtuuntëpën ets näjyëtu'un yë nimajktaxk mëko'px ja wëxtyikxy majkpë ja ja'ayëty mëti'ipë myëtuuntëpën yë Aserá, mëti'ipë yë Jezabel myëët'ajtypyën ets yajkääpy yaj'ukpyën.

Ma ja Elías yajpaatyën mëët ja ja'ayëty mëti'ipë myëtuuntëpën ja Baal

²⁰ Ojts ja Ahab tjanty wyoowmujkta'ay ja Israel ja'ayëty, ets t'ënëmaay ko jam tyu'ukmuktëty ma ja kopk txëëwatyën Carmel ets tëkokyë ja ja'ayëty mëti'ipë ja awinax myëtuuntëpën.

²¹ Tä ja Elías tmëwinkoony ja naax kajpn ets y'ënäny: ¿Jëna'apaat jëtu'un miitsëty ya'atë jëtu'unpë xytyuunk'ata'antë jëtu'un tä jeexyë je'eyë m'ëyë'ëktën mkëyätën ma xy'ixtën mëjpë mutskpë? Tyam yajxon n'ënëëmëtë, pën yë Wintsën yë'ë mëj ets janty mëtëy ko Tyiosëty panëjkxtëkëtë yë'ë, e pën yë Baal yë'ëts mëj oy yë'ë xypyanëjkxtëkëtëty. Ja naax kajpn nitii ayuk tkapaty.

²² Tääts ja Elías n'ënaan'ëtëty: Ëjtsyë atu'uk tu'uk të njaakwë'ëmyës mëti'ipë yë Wintsën myëtuumpyën, e yë Baal yë myëtuunpë nimay yë oy, jä'ä yë nyiwinë'atë taxk mëko'px ja wëxtyikxy majk.

²³ E ëjts yë'ëjës yam n'amëtoopy mäjtsk yë tsajpkaa ets tu'uk yë tjä'ä'atëty ets wä'än tsujkta'aktë ets ja'axykijxy tpëjkta'aktëty, je'eyë tëy ko ka'ap kë'ëm yë jëën tuk'ixkaatsëtëty. E ëjts ënät nän jëtu'unpë nän tyamës ja njä'ä n'atsujkëpëty etsës näjyëtu'un ja'axykijxy mpëjkta'aka'any, je'eyëp nän ka'apës kë'ëm yë jëën ntuk'ixkaatsëja'any.

²⁴ Ënet miitsëty xymyëpëjktsowtëty ja mwintsënëty, ëjts nän tyamës ja nWintsën nmëpëjktsoowpëty, ja Wintsën mëti'ipë ënety kyukäjxnajxypyën ja jëën yë'ë jëtu'un ënety janty mëtëy. Tääpë winma'any oy yë'ë. Jëtu'un y'ëtsoowtë ja kunaax kukajpnëty.

²⁵ Ënet ja Elías t'ënëmaay ja Baal ja myëtuunpëty: Win'ixtë tu'uk yë mtsajpkaajëty ets xynyi'oytyunëtëty, jä'äxë ko miitsëty mnimay yë'ëjëty. Tääts ënety mëktä'äky xymyëpëjktsowtëty yë mwintsënëty, këtii kë'ëm yë jëën xypyëjkta'aktëty.

²⁶ Ënet ojts ja tsajpkaa tyaj'ooktë ets tsujktaktë, mëti'ipë ënety të yajmo'otën, tä tyëjkëtyë nu'kxtakpë ma ja wyintsënëtyën, jopyëp tyajtso'ontaktë tyimkujky xyëëwëy jëtu'un, tjanty myëpëjktsowtë ja Baal. Tyaa jyänty y'ëna'antë: Ëtsoowinpijtëk ëëtsëty Baal, na'ëwtity jyänty nyëpujt jyänty yujkpujtë jam ma ja wintsë'këntyakn, nimaa tii kya'ëtsoy.

²⁷ Ko ënety jam kyujkyxyëëwënë, tä ja Elías je'eyë nyëxik tyukxikënëtë, y'ënëmaayëtë: Jaakwäänë mëk ya'axtë joktë, jä'äxë ko Wintsën yë'ë. Wä'änxyëp jam mëk tyuny, ëkë wä'änxyëp jam y'ujts ye'ey, ëkë wä'änxyëp të tsyoony. Ëkë wä'änxyëp të myaanajxnë, paaty yuxtë.

²⁸ Yë'ëjëty ni'ikyë ja jyänty ya'ax jyänty joktë, nyänyitsuk nyäkyutsukëtë, mëët yë tsujkn ëkë mëët yë ku'umën, jëtu'un tä ënety tuunk'atën, koonëm yajxon ne'pnytyääytyë.

²⁹ Jëtu'un ojts ja xëëw kyujkënyë ets kyutëjkënë, yë'ëjëty tampaat ya'ax jyoktë ets jyänty nyëpujt jyänty yujkpujtë tä ja'ay mëti'ipë pojëtëpën tpatnë ja xëëw ma ja wintsë'kën jeexyë yajkë'ëyäkyën ka'ap ja ëtsoowinpijtën tpatë. Ni pën kya'ëtsoowëtë ets ni pën kyamëtoowëtë.

³⁰ Ënet ja Elías ojts t'ënëmaay ja mayjyä'äy: Yamës mëwinkoontëk. Tä ja mayjyä'äy myëwinkoontaayë, ets ja Elías tyaj'o'oyëy jatëkok ja Wintsën ja wyintsë'këntyakn, mëti'ipë ënety të myëjitën.

³¹ Tä tkoonë'ky majkmäjtsk yë tsaa, jëtu'un tä ënety ja Jacob ja y'ëna'kën, mëti'ipë yë Israel ja'ayëty y'ap'ajtëpën, mëti'ipë ja Wintsën ojts tyajxëëwpetyën Israel.

³² Yë'ë ojts mëët tyaj'oyë ja Wintsën ja wyintsë'këntyakn ets ojts tnëëtu'utajy na'ëwtity ma ja wintsë'këntyaknën. Jää i'px tsimën ja nëë jap tyëkëty.

³³ Ko jëtu'un tma'ktaay ja ja'axy, ënät ojts ja tsajpkaa tsu'utsy jam tpëjktä'äky.

³⁴ Tä y'ënäny: Tuktä'ämëtya'atë taxk yë tu'ts mëët yë nëë ets xytyuknitamtëty yë tsajpkaa tsu'utsy mëti'ipë yajnino'okaanpën ets näjyëtu'un xytyuknitaanpëtëty yë ja'axy. Mëtëkëëk ok ojts tuk'ëne'emy ets jëtu'un tuntëty, ojts jëtu'un tjantytyuntë.

³⁵ Ja nëë yajxon ojts ja ja'axy tyajtsa'amëtyä'äy ets wa'ats y'ujtstaay ja nëë'tu'u mëti'ipë ënety ja Elías të t'oytyunyën.

³⁶ Ko ojts tpaaty ma ënety ja wintsë'kën tyaka'anyën, tä ja käjpxynyajxpë Elías wyinkoony ets y'ënäny: Wintsën, mëti'ipë y'ëwtajtën yë Abraham, Isaac ets Israel: Mijts myajkutukëp ets tyam yajnijawëty ko mijts jëtu'un mWintsën'ajtp ma Israel ja'ayëtyën ets koos mijts xytyuunpë'ajtp ets tëkokyës mëti'ipës yam ntuunpyën mijtsës të xytyuk'ëne'emy.

³⁷ Ëtsoowkës Wintsën, ëtsoowkës ets jëtu'un tyaapë ja'ayëty nijawëtëty ko mijts jëtu'un mWintsën'ajtp ets ko mijts mwoopy mwijtsyp yë'ëjëty ets wyimpitëty ma mijtsën.

³⁸ Tyam kyajpxta'ay, tyam ja jää kyupëmiimnaxy ma ja wintsë'kën ënety jam y'ityën ets tyajtooytyëkooytyääy, wä'än yë'ëjëty ja kepy tsaa, pujxm naaxway, ja nëë mëti'ipë ënety jam të kyutä'ämëtyääyën ma ja nëë'atu'ujën wa'ats ja tyajtëtstaay.

³⁹ Ko ja mayjyä'äy jëtu'un t'ijxtë, ënät ni'ëmukë nyäkyoxtënaaytyääyëtë ets wyintak nyaaxkoowtë, y'ënantë: Yë Wintsën, yë jëtu'un Wintsën, yë Wintsën yë'ë jëtu'un Wintsën.

⁴⁰ Ënet ja Elías y'ënëmaayëtë: Majtsta'atë mëti'ipëjaty myëtuuntëpën yë Baal. Nitu'uk xyjyaakyajkä'äktëty. Tä tjanty myajtstaaytyë ets ja Elías ojts tyajnëjkta'ay jam ma ja wokjot txëëwatyën Quisón jamts tkupujxtaay.

Elías tmënpëjktsoy ja Wintsën ets tyajtu'ujëty

⁴¹ Ok ja Elías t'ënëmaay ja Ahab: Nëjkx mkay m'uuky ma mjëën mtëjkën, jä'ä ko ja nëë tuu tä kyëjääjë ja myëto'owën tyaj'ëna'any.

⁴² Ja Ahab ojts ja nyijkxy ma jyëën tyëjkën kääpyë ukpë. E ja Elías jam ojts nyijkxy tunkëjxm ma kyëpäjta'ayën ja kopk mëti'ipë yajtijpën Carmel, jamts nyäkyoxtënaaytyakë ëmuumtu'ukjot,

⁴³ ets t'ënëmaay ja tyuunpë: Nëjkx mku'ijxnaxy xim ets jam mnajts'ixëty ma ja mejyën. Tä ojts nyijkx ets jam kyu'ijxnajxy, tä y'ënäny: Ka'ap ma tii. E ja Elías tyaa ojts jatëkok y'ënë'ëmxëty: Wimpit atëj wëxtujk'ok.

⁴⁴ Ma ënety wëxtujk'ok wyimpijnën tä ja tyuunpë y'ënäny: Xim, mëk jëkäm, yaj'ix yë yoots pyëti'iky jëtu'un tä tu'uk kë'ëjën. Ënet ja Elías t'ënëmaay ja tyuunpë: Nëjkx ix yë Ahab ets xy'ënëëmëty, wä'än tnipëjktaakë yë pujxnwintëkäämpë ets tsyoonëty ma ka'anëm ja tuu myinyëmën.

⁴⁵ Tä ja Ahab tukpejty ja pyujxnwintëkäämpë ets ojts nyijkxy jam Jezreel. E ja yoots nëma'a wa'ats tyawintujktaay ja tsajp mëët ja nëë tuu ets ja poj ënääw, tääts kyupëtsajtsnajxy komtuu.

⁴⁶ E ja Elías, ni'ikyë ojts ja Wintsën jyotmëkmo'oyë, ets myëjaawmooyë, paaty jam tsyo'ony pëyi'ikyë ko nyäxyojxtaayë, ets jam jyäjty Jezreel ma ënety ja Ahab jam yajpaatyën.