1 Reyes 17 - Biblia Dc en Mixe de Quetzaltepec

Ma ja Elías tnikäjpxyën ko mëk ja anpë myina'any

¹ Ja käjpxynyajxpë mëti'ipë xyëëwajtypyën Elías, jampë tsyoonyën Tisbé, ma Galaad y'itjotmën, jëtu'un t'ënëmaay ja Ahab: Tyam yajxon mijts n'ënëëmë mëët yë Wintsën yë xyëëw, mëti'ipës nmëtuumpyën, ko ya'atë xëëw ya'atë jëmëjt ka'ap tyajtu'uja'any ets ni tu'ktsunyën yë maanik tkayajka'aja'any, koonëm yë'ë jatëkok tnikajpxëty.

² Paatykyëjxm yë Wintsën t'ënëmaay ja Elías:

³ Nëjkx, jëtu'untsow mnëjkxëty matsow yë xëëw pyëtsimyën ets jam mnäyu'utsëtëty ma ja wok txëëwatyën Querit, xëëwpëtsëmy wyi'imy ma ja Jordán mëjnëë jyënäkyën.

⁴ Ma tääpë itën, jyëkyejpy jam mnëë uukëty ets tyamës n'ënëëmëja'any ets jooky yë'ë mkääky m'uuky tmëminëty.

⁵ Elías ojts jëtu'un tjantytyuny tä ja Wintsën y'ënëmaayën, ojts nyijkxy ets jam nyäyu'tsë ma ja wokjot txëëwatyën Querit, mëti'ipë xëëwpëtsëmy yajpatpën ma ja mëjnëë nyäxyën mëti'ipë yajtijpën Jordán.

⁶ Ja jooky jä'ä myënëjkxtëp ja kyääky y'uuky jopyëp ets jënäkyxyëëw. Ets jä'ä ja nëë y'ukpy mëti'ipë japën wokjoty.

⁷ Je'eyëp ko ja nëë ojts näjyëtu'un tyëtsnë, jä'ä ko ka'ap tsojk y'ëktuunë.

Ma ja Elías mëët nyäpyäätyë ja to'oxytyëjk jampë tsyoonyën Sarepta

⁸ Ënet ja Wintsën t'ënëmaay ja Elías:

⁹ Oy mnëjkxëty jam Sarepta, ma Sidón y'itjotmën, jam m'ijta'akëty. Tëës tu'uk n'ënëëmë ja ku'ookytyo'oxy mëti'ipë jam tsënääpyën ets yë'ë myajkayëtëty.

¹⁰ Tä ja Elías ojts tsyoony ets nyijkxy jam Sarepta. Ko jam jyä'äjty ma ja kajpn yajnitëkën, ënät t'ijxpaty ko tam tu'uk ku'ookytyo'oxy jyä'äxy. Tä ojts tmëkäjpxy ets t'ënëmaay: Tun mëyajtën, yajnëë ukës wäänë, tëtsëpës.

¹¹ Ja nëë ënety nyinëjkxyp ko tmëkajpwinpijty ets t'ënëmaay: Jam wäänë xymyëminëty näjyëtu'un kääky, kayaanpës.

¹² Tä y'ëtsooy ja to'oxytyëjk: Tyam nikäjpxyës mëët ja mWintsën ja xyëëw ko ka'apës tii nmëëtëty kääky. Wäänës jap tsajpmokjëtsy nmëëtëty, mëët wäänë on mëti'ipës jap tu'tsjoty nyaj'ijtypyën ni'atujkpety, tyam yë'ëjës yaa wäänë n'ixtääpy ja'axy etsës nëjkx nyaj'oyëjä'äny yë kääky, mëti'ipës yë n'u'unk ntukayäämpyën etsës ëjts. Yi'iyës jëtu'un njaak kayantëp etsës ënät n'o'knëtëty.

¹³ Tä ja Elías y'ëtsooy: Këtii mtsë'ëkë. Nëjkx yaj'oyë mëti'ipë të xynyikäjpxyën. Jëyëjp ja tsajpmokway xyajtunëty jampë xymyëët'atyën ets xyaj'oyëty tu'uk yë nma'atsyës ets mjä'ä xyaj'oyëty ets mmaank yë jyä'ä näjyëtu'un.

¹⁴ Jä'ä ko yë Wintsën, mëti'ipë Wintsën'ajtpën ma Israel kajpnën, jëtu'un të tnikäjpxy, ko ka'apëk kyukëxëja'any ja tsajpmokjëtsy japë xyaj'ityën mpokjoty ets ja m'on japë xya'ityën mtu'tsjoty, koonëm jatëkok tkukäjxnaxëty ja nëë tuu naaxwiiny naaxkëjxy.

¹⁵ Tä ja ku'ookytyo'oxy ojts nyijkxy jë'kxy oytyuunpë. Jëtu'un yë'ë, ja y'u'unk myääy ets ja Elías akujk jotkujk ojts kyäytyë y'uuktë, nyäjxy jëtu'un kanaak xëëw.

¹⁶ Ka'ap kyijxy ja tsajpmokjëtsy, näjyëtu'un ja on japë tu'tsjoty tyaj'ityën, jëtu'un ijxtëm ënety ja Wintsën të tuknikäjpxyën ja Elías.

¹⁷ Tu'kxëëw tu'ktsuu ojts ja ku'ookytyo'oxy ja y'u'unk pya'ampety, mëk yajxon ja pa'am myajtsë, ojts y'o'ktso'oky.

¹⁸ Ënet ja ku'ookytyo'oxy t'ënëmaay ja Elías: ¿Tii tsipës ëjts mëët mijts nmëët'ajtyp, mijts mëti'ipë Wintsën myëtuumpyën? ¿Ëkë je'eyës mijts nëkoo ja nnëë npoky xypyaye'eyanë etsës ja n'u'unk nmaay y'ookëty tyëkoytyë?

¹⁹ Tä ja Elías y'ëtsooy: Yaajës xymyo'ojëty yë m'u'unk. Tä tukë'ëtsä'äntuty ja u'unktaaak ja y'u'unk ets ojts tmëpa'tëkë jap ma myaataknën ets tko'ky jam wyiitykyëjxm.

²⁰ Tääts tyëjkëy jëëytyak nu'kxtakpë, mëk jyänty kyäjpxy, tmënpëjktsoy ja Wintsën ëmuumtu'ukjot: Wintsën, mëti'ipës n'ëwtajtypyën. ¿Ka'ap yowë tyim oy'ajnë ets mijts ya'atë to'oxytyëjk o'ktëy xytyimtunëty, maas nja'ajtä'äkyën, ko xyaj'ookanë ja y'u'unk?

²¹ Tääts tëkëëk'ok jam nyäkyëxmëtakë ma ja pi'k ëna'k ja nyini'kxën ets tmëpëjktsooy ja Wintsën ëmuumtu'ukjot: Wintsën, ëjts yë nTiosës mëti'ipës n'ëwtajtypyën, tyam mijts nmëpëjktsoy ets ya'atë pi'k ëna'k jatëkok xymyo'ojëty ja jyuukyajtën.

²² Ja Wintsën ojts tmëtoy ja Elías ja wyaantak nyu'kxtakën ets ja pi'k ëna'k jatëkok jyuukpyijky.

²³ Tä ja Elías ënätyë ja pi'k ëna'k tsä'änë'ky ets tyajjënäjky jap ëpa'tkë'p ets tukë'ëtëjkëy ja tyaak, t'ënëmaay: Ix, ja m'u'unk tëë jatëkok jyuukpyiky.

²⁴ Ets ja to'oxytyëjk y'ëtsoowë: Tyamës ënät yajxon nijawë ko mijts Wintsën mja'ay'ajtëp ets ja mëti'ipë mnikäjpxypën aakjä'ä mëti'ipë mëtëyën.