1 Reyes 15 - Biblia Dc en Mixe de Quetzaltepec

Ma ja Abiam yajkutukyën jam Judá

¹ Abiam jä'ä ojts yajkutujktso'ontä'äky jam Judá, ma ënety mëmajkmokx tëkëëk jëmëjt tyunyën yë Jeroboam, yë myaank yë Nabat.

² Tëkëëk jëmëjt yajkutujky jam Jerusalén. Ja tyaak jä'ä ijty xyëëwajtyp Maacá, yë'ë Absalón yë nyëëx.

³ Abiam nän yë'ë poky ojts tuny mëti'ipë ja tyeey tyuunën, ma ënety ka'ap tyëkënëm yajkutujkpë, ja jyot wyinma'any ka'ap ojts mëtëy tyaj'ity ma Wintsënën ijxtëm ja David, ja y'aptëjk.

⁴ E mëët ko ja David tja'amyetsy, paaty ojts yajkutuky ets ja kyutujkën ka'ap y'atëkoyëty jam Jerusalén, jëtu'un ja myaank ojty yë'ë kyutëkëty;

⁵ jä'ä ko ja David oy ënety winë të tuny Wintsën wintum, yë'ë ka'ap ojts nijëna'a tja'atyëkoy mëti'ipë ja Wintsën të tyuk'ëne'emyën, tu'k'ok ojts je'eyë tyëkoy ma Urías tyaj'o'kyën, mëti'ipë Hit ja'ayën.

^6-7 Xëmë tmëët'ajtë yë tsip yë Roboam mëët yë Jeroboam, ko Roboam jyuuky'äjty. Näyjyëtu'un yë Abiam xëmë ijty mëët yë Jeroboam tsyiptuny. Tëkokyë yë nyimëtyä'äky yë Abiam, wi'ix tyuunyën ets tii tyuunën ko ojts yajkutuky jap myiny këxja'ay ma ja nokyën mëti'ipë ja yajkutujkpëtëjk jyä'ä'ajtëpën jam Judá.

⁸ Ko yë Abiam y'o'ky jam nyaaxtëjkëy ma ja David ja kyajpnë. Ma ja kutujktaknën yë'ë ojts kyutëkëty yë myaank Asá.

Ma yajkutukyën yë Asá jam Judá

⁹ Yë Asá jää ojts yajkutujktsoony jam Judá ma ënety më'i'px jëmëjt yajkutukyën yë Jeroboam jam Israel,

¹⁰ wëxtyikxy jyëmëjt ojts yajkutuky jam Jerusalén, jä'ä nyanwelë ijty xyëëwajtyp Maacá, Absalón yë nyëëx.

¹¹ Yë Asá oy ojts winë tuny Wintsën wyintum, jëtu'un tä ja y'apteetyën David.

¹² Ojts t'ëxwojpta'ay ja ja'ay mëti'ipë ënety ënantëpën ko oy ko ja'ay jyot nyini'kx tooky ets ko wä'än tyajnixëëwtuny, ojts näjyëtu'un tyajkutëkooytyä'äy ja awinax mëti'ipë ënety ja y'aptëjk të tyajkojtën.

¹³ Ojts ja nyanwelë tpëjkë ja kyutujkën, mëti'ipë xyëëwajtypyën Maacá, jä'ä ko yë'ë ënety të tyajkutuky ets kyojëty ja y'awinax ja Aserá, Asá ojts tyajkutëkoy tääpë awinax, jam tnino'ky ma tu'uk wokjot txëëwatyën Cedrón.

¹⁴ Oy ojts ka'ap tyajkutëkooytyä'äy ja tuuntakn kajpxtakn tunkëjxmëpë kopkëjxmëpë. Yë Asá xëmë oy tmëtuuny ja Wintsën,

¹⁵ ojts jap tsajptëkoty tpëjktä'äky ja pu'ts pujxn ets poop pujxn mëti'ipë ënety yë'ë ets ja tyeety të tuknikoonë'ëkëtën ja Wintsën.

Ma ja käjpxytyu'unën tuntën yë Asá mëët yë Ben-adad

¹⁶ Asá xëmë tsyiptuuny mëët yë Baasá, jampë yajkutukyën Israel.

¹⁷ Ko yë Baasá tnitëjkëy yë Judá, ojts tyajnatuky yë Ramá kajpn, këtiipë mëët nyätyuktëkëtëty ja yajkutujkpë jampë y'ëne'emyën Judá.

¹⁸ Ënet ja Asá tyajpëtsëëmtaay ja pu'ts pujxn ets ja poop pujxn mëti'ipë ënety jap të jyaakwë'ëmyën tsajptëkoty ets jap ma ja kutujkëntëjkën ets ja tyuunpëtëjk tukmëkäjxëy ets tmo'otëty ja Ben-adad, mëti'ipë jam yajkutujkpën Sirië, ja myaank ja Tabrimón, yë y'ok'u'unk yë Hezión, mëti'ipë jam tsënääpyën Damasco. Näyjyëtu'un ja aaw ayuk tuknikejxy:

¹⁹ Tsojk tu'uk yë käjpxytyu'unën ntu'unëm, jëtu'un tä ojts tuntën ja nteety'ajt n'ap'ajtëmë. Tyaa ntuknikexy yë pu'ts pujxn ets poop pujxn mëti'ipë namoopyën. Tyam npëjktsoy ets xykyajpxtukëty yë käjpxytyu'unën mëti'ipë mëët'ajtypyën mëët yë Baasá, jampë yajkutukyën Israel këtiipës nëkoo xyajjotkëxëty.

²⁰ Ben-adad ojts tkupëky ijxtëm ja yajkutujkpë Asá y'ënë'ëmxëtyën, paaty tkejxy ja tsyiptuunpëtëjk ets ja Israel kajpn tnitëkëtëty, ojts kanaak ja kajpn tmëmëtä'äky: Iión, Dan, Abel-bet-maacá, tu'kkë'ëyë ja itjot ma txëëwatyën Quinéret ets ma ja Neftalí ja jyä'äy tnitänën.

²¹ Ko ja Baasá tnija'awëy, tä t'ëxmajtsy ja Ramá, wyimpijnë jatëkok ma ja kyajpnën jam Tirsá.

²² Tä ja Asá tmëkajpxmujktaay ja ja'ay jampë tsyëënëtën Judá, nitu'uk kyatëkoy'äjty ets tyajtso'ontaaytyë ja kepy tsaa mëti'ipë ja Baasá të tyajtunyën ko ja Ramá tyajnatujky ets ojts tmënëjkxtë jam Gueba ets Mizpá, ma Benjamín ja'ay jam y'itën ets jä'ä mëët tyajnatujky.

Ma ja Asá y'o'knën

²³ Ja nyimëtyä'äky ja Asá, mëti'ipë tyuunën, tiijaty tyuunën ets ja kajpn mëti'ipë yajkojën, jap myiinta'ay këxja'ay ma ja nokyën mëti'ipë ja yajkutujkpë jyä'ä'ajtëpën jampë tyuuntën Judá. Ko yë Asá ojts myëjja'ayënë, jap pa'am myajtsë tyekyjoty;

²⁴ e ko ojts y'o'knë jam ojts nyaaxtëkë ma ja David ja kyajpnën, ma nyaaxtëjkëtyën ja y'aptëjk. Ma ja kutujkëntaknën yë'ë ojts kyutëkëty yë myaank Josafat.

Wi'ix yajkutujkyën yë Nadab jam Israel

²⁵ Ma myëmäjtsk jëmëjtpetyën, ma yajkutukyën yë Asá jam Judá, jää ojts yë Nadab yajkutujktsoony jam Israel, yë'ë Jeroboam yë myaank ets mäjtsk jëmëjt je'eyë ojts y'ëne'emy.

²⁶ Je'eyëp ko ja tyuunk ka'ap ojts oy ja Wintsën t'ixy, jëtu'un winë ëxëëkjaty tuuny tä ja tyeetyën, je'eyë ojts tyajpokytyuny ja Israel kajpn.

²⁷ E yë Baasá, myaank yë Ahías, Isacar yë jyä'äy, ojts mëët yë jyä'äy nikanaak nyäkyäjpxyë ets tyaj'o'ktë ja Guibetón, ma ja filistejë nyaaxjotëtyën, mëti'ipë ënety yë Nadab të tyajnatukyën ets tnitëkëja'any mëët ja may Israel ja'ayëty.

²⁸ Baasá jää ojts tyaj'ooky ja Nadab ma ënety mëtëkëëk jëmëjt yajkutukyën yë Asá jam Judá ets yë'ë tyëjkëy yajkutujkpë.

²⁹ Je'eyë tyëjkëy yajkutujkpë, tääts tyaj'o'ktaay tëkokyë ja Jeroboam ja myëku'uktëjk. Jëtu'un y'atëëy tä ënety ja Wintsën të tuknikäjpxyën ja Ahías mëti'ipë jam kukajpn'ajtpën Siló, Baasá wa'ats tyajkutëkooytyääy ja Jeroboam ja jyiiky myëku'uk, nitu'uk ojts kyawë'ëmy juuky.

³⁰ Paatykyëjxm jëtu'un jyäjty kyëpejty, jä'ä ko ojts ja Jeroboam tëkatsy ets ëxëëk winë tuny, ko mëj këjää tyajpokytyuuny ja naax kajpn, mëti'ipë ja Wintsën, yë Israel ja'ay Tyiosëty ojts wiink tjawën ets mëk tyajpojkyën.

³¹ Ja nyikäjpxy nyimëtyä'äky ja Nadab, jap ja myiny këxja'ay ma ja nokyën mëti'ipë nyoky'ajtëpën ja yajkutujkpëtëjkëty jampë tyuuntën Israel.

³² Yë Asá mëët yë Baasá jampë yajkutujkyën Israel, xëmë ojts yë tsip tmëët'atë.

Ma ja Baasá yajkutukyën jam Israel

³³ Ma tyëkëëk jëmëjtpejtyën ma ja Asá yajkutukyën jam Judá, jää jëmëjt ojts tyëkë yë Baasá yajkutujkpë, yë Ahías yë myaank jam Tirsá, ma tnitënaaytyä'äyën yë Israel, i'px taxk jëmëjt ojts yajkutuky jam.

³⁴ Je'eyëp ko Baasá ëxëëk ojts winë tuny jam Wintsën wintum, jëtu'un winë tuuny ijxtëm ja Jeroboamën, ko tyajpokytyuuny ja Israel kajpn.