1 Reyes 13 - Biblia Dc en Mixe de Quetzaltepec

Ma tu'uk yë käjpxynyajxpë t'ojyën yë Jeroboam

¹ Yë Jeroboam yë'ë ënety jam pyëjktäkpy yë poom ma wintsë'këntyaknën, ko tu'uk yë Wintsën yë kyäjpxynyajxpë jyä'äjty jam Betel, Judá tsyoony, Wintsën ënety të kyexyë.

² Mëët ja Wintsën ja kyutujkën, mëk ojts yajxon kyäjpxy, jä'ä nyi'ojëp ja wintsë'këntyakn, jëtu'un y'ënäny: Wintsë'këntyakn, wintsë'këntyakn, jëtu'un yë Wintsën y'ënä'äny: Jam ma David yë jyä'äyën jam tu'uk yë ja'ay myëxu'unk'ata'any, jä'ä txëëwata'any Josías, yë'ë nëjkx tyaj'o'kta'ay ja teetytyëjk mëti'ipë jam tuuntëpën ma ja nyitsajptëjkën ja awinax ka'apë Wyintsënëtyën, ma xëmë xykyë'ëyäkyën yë poom ets jam xyajtoy; e mijts mnëkëjxm nëjkx tno'oktë txamtë ja wyääy pyajkëty ja teetytyëjkëty.

³ Jä'ä xëëw ja käjpxynyajxpë ojts tu'uk ja mëj'ajtën tyaj'ixyë ets y'ënäny: Ya'atë mëj'ajtën jëtu'un yë Wintsën yaj'ijxëp: Ko ya'atë wintsë'këntyakn piw nuuk jyajta'ajëty ets ja nyijaam jëtu'unyë pyojwa'kxta'ajëty.

⁴ Ko ja Jeroboam tmëtooy wi'ix ja käjpxynyajxpë y'ënä'änyën mëëtpë ja wintsë'këntyakn jampë Betel y'ityën, ënät ja kyë'ë nëkooyë txajë'ky jam tyänë ma ja wintsë'këntyaknën ets y'ënäny: Matstë. E ja kyë'ë mëti'ipë ënety të txajtëyën jëtu'unyë ojts wyi'imy ka'ap t'ëkjëkyäjpnë t'otsëty.

⁵ Ma jëtu'un y'ënänyën piw nuuk ojts jyajta'ay ja wintsë'këntyakn ets ja jaam mëti'ipë jam nëkëjxmën jëtu'unyë pyojwa'kxtaay; jëtu'un jyäjty kyëpejty tä ënety ja Wintsën ja myëtuunpë të tnikäjpxyën.

⁶ Ënet ja yajkutujkpë ojts ënätyë yë käjpxynyajxpë tninëjkxy ets t'ënëmaay: Tun yë mëyajtën, mëpëjktsow yë mWintsën wä'änës yë nkë'ë xyajtsokë. Tä ja käjpxynyajxpë ojts ja Wyintsën tmënu'kxtä'äky ets ja yajkutujkpë ojts ja kyë'ë tsyo'oky, je'eyëm tä ënety të y'oy'ätyën.

⁷ Tä ja yajkutujkpë t'ënëmaay ja käjpxynyajxpë: Ja'amtë maas yë ntëjkën ets mkayëty, tam tu'uk yë näynyamo'ojë nmo'oja'any.

⁸ E ja Wintsën ja myëtuunpë tyaa t'ëtsooy ja yajkutujkpë: Oyxyëp jeexyë kujkwä'kxy xyjyamooypyës yë mkutujktakn, ëjts, ka'apës yam mijts mpanëjkxëty ets ka'apës yam nkayëty ma mjëën mtëjkën ets ni nëës nka'uukëty ma ya'atë itjotmën;

⁹ jä'ä ko yë Wintsën jëtu'unës të xy'ënëëmë: Këtii jam mkay m'uukëty ets këtii nän yë'ë tu'u xye'eyëty ko mwinpitëty ma ënety mnëjkxyën.

¹⁰ Paaty ja Wintsën ja myëtuunpë wiink tu'u ojts tpëjknë ko wyimpijnë, ja tu'u mëti'ipë ënety të tkuuynyijkxyën ko jyä'äjty jam Betel ka'ap ojts yë'ë t'ëk'awinpijtënë.

¹¹ Ma Betel kajpnën, jam ijty tu'uk yë käjpxynyajxpë tsyëënë, mëjja'aypyë, ojts ja y'ëna'k tyukmëmëtyä'äkyë mëti'ipë ënety ja Wintsën ja kyäjpxynyajxpë jam Betel të tunyën mëti'ipë Judá tso'onpën; ojts näjyëtu'un tyukmëmëtyä'äkyë ja y'ëna'k wi'ix ja yajkutujkpë të y'ëtsoyën.

¹² Tääts ja u'unkteety tyajtëëy: ¿Mëti'ipë tu'u të tmatsy? Tääts ja y'ëna'k tyuk'ëwa'anëyë mëti'ipë tu'u ënety të tpanëjkxyën ja käjpxynyajxpë jampë tsyoonyën Judá.

¹³ Ënet ja y'ëna'k t'ënëmaay: Niwëëntë yë krukts. Tääts jëtu'un tuuntë ets tukwä'tspejty.

¹⁴ Jam tnajtspatëy ma tu'uk xoj'ëjxën ets tyajtëëy: ¿Mijts jëtu'un mkäjpxynyäjxpë'ajtp mëti'ipë jam Judá tso'onpënë? Ëjts, jëtu'un y'ëtsooy ja käjpxynyajxpë.

¹⁵ Jam mkay m'uuky maas yë ntëjkën, jëtu'un ja käjpxynyajxpë y'ënäny ja mëjja'aypyë.

¹⁶ E ja käjpxynyajxpë jampë tsyoonyën Judá, tyaa y'ëtsooy: Ka'ap tjëkyepy nëjkxëtyës ma mtëjkën, nitu'k'aawënës mëpaat nkajawë kääky, ëkë uuky ma ya'atë itjotmën;

¹⁷ Jä'ä ko yë Wintsën yajxonës të xytyim ënëëmë: Nitu'k'aawën xykya''apëkëty yë kääky ma m'aawën ëkë nëë ma tääpë naax kajpnën ets këtii nän yë'ë tu'u xy'awinpitëty mëti'ipë ënety mpanëjkxypyën.

¹⁸ E ja mëjja'ay ni'ikyë y'ënaan'ëtë'ëtsy: Käjpxynyajxpës ëjts näjyëtu'un, jëtu'un tä mijtsën, e yë'ëts yë Wintsën tu'uk yë kyukäjpxy të xy'ënëëmës, ko mijts nwoownëjkxëty maas yë ntëjkën ets jam nyajkay nyaj'uuky. Ya'atë ja mëjja'ay, antakp ënety,

¹⁹ ja käjpxynyajxpë mëti'ipë jam tso'onpën Judá ojts pyanëjkxyë ets mëët kyääy y'uky ma tyëjkën.

²⁰ E tamtsën ënety jëtu'un kyäytyë kaaypyäjn wintum, ko ja Wintsën ojts tmëkäjpxy ja tyuunpë mëti'ipë mëj ja'ayën, mëti'ipë ënety të tyajwinpityën ja käjpxynyajxpë mëti'ipë jam tso'onpën Judá,

²¹ ets mëk tuk'ëwa'anëy ja käjpxynyajxpë mëti'ipë Judá tso'onpën: Jëtu'un yë Wintsën y'ënä'äny: Mëët yë'ë ko të xykyapatuny mëti'ipë të mtuk'ëne'emyën xytyunëty,

²² ko të mwinpity kääpyë ukpë ets tëë yë Wintsën m'ënë'ëmxëty ko nitu'uk aawën mëpaat tii yaa mkanätyuk'apëkëty ma ya'atë naax kajpnën, ko m'ookëty, yë mjot mnini'kx ka'ap nëjkxy jam nyaaxtëkë ma ja m'ap m'ok nyaaxtëjkëtyën.

²³ Ko ja käjpxynyajxpë mëti'ipë Judá tso'onpën ojts kyääytyä'äy y'ukta'ay jampë tsyoonyën Judá, tä ja mëjja'aypyë ojts tniwë'ënë ja krukts,

²⁴ tää ojts nyijxy. E tamtsën ënety jëtu'un tyu'uye'ey ko jam tu'ujotm y'aye'eyëy tu'uk yë mëj kaa, tim näyaj'o'kë; ja käjpxynyajxpë ja nyini'kx jëtu'unyë ojts jam wyi'imy wijtstëy tu'ujotm. E ja krukts ets ja kaa je'eyë nyaaxmë'ixëyë.

²⁵ E nëjkxëp ja ja'ay nyajxtëpë ets t'ijxtë ja o'kpë ets ko ja mëj kaa nän tam pya'atänëty. Ko jam jyajtë ma ja naax kajpnën ma ënety tsyëënën ja käjpxynyajxpë ja mëjja'aypyë, tääts tukmëmëtyaktë mëti'ipë ënety të t'ixtën.

²⁶ Ko tnija'awëy, ja käxynyajxpë ja mëjja'aypyë, mëti'ipë ënety ja myëku'uk të tyajwinpityën, ënät mëk yujk'ënany: Jä'ä ja käjpxynyajxpë mëti'ipë ja Wintsën të tkäjpxykyutëjyën. Paaty yë Wintsën të tyuk'akäxëty tu'uk yë mëj kaa ets të yaj'ookyë, jä'ä ko jëtu'un ojts kë'ëm y'ënë'ëmxëty.

²⁷ Ënet ojts ënätyë ja y'ëna'k t'ënëëmë ets ja kyërukts tniwëëntëty, yë'ëjëty ojts ënätyë jëtu'un tuntë.

²⁸ Ënet ja mëjja'aypyë käjpxynyajxpë ojts nyijkxy, ma jam ja o'kpën, tu'ujotm tpaty, tamnëm nyatänëty ja kaa ets ja krukts. Ja mëj kaa ka'ap ënety tsu'utsynyëm ja o'kpë, nän ka'ap ënety wi'ix të tuny ja krukts.

²⁹ Ënet ja mëjja'aypyë ja käjpxynyajxpë tyajpëtë'ky ja nyini'kx ja käjpxynyajxpë jampë tsyoonyën Judá ets jam tyajpejty krukts këjxm ets ojts tmënëjkxy ma kyajpnën; jamts ojts tnimony tnituky ets tyajnaaxtëjkëy.

³⁰ Jam tyajnaaxtëjkëy ma ja y'o'kpëjutën mëti'ipë kë'ëm nätyukni'oytyu'unëyën; ojts tnijë'ëy tniyä'äxy, y'ënäny: Jëëky mëku'uk, jëëky mëku'uk, ix m'ëkjaty m'ëkkëpety.

³¹ Ko tyajnaaxtëjkëtyääy, tää ja y'ëna'k t'ënëmaay: Koos ënety ëjts n'ooky, yaajës nëjkx näjyëtu'un xyajnaaxtëkëtë, ma ya'atë ja'ay tyam nyaaxtëkën, mëti'ipë Wintsën myëtuunën. Yë nwaay npajkës yë'ë nëjkx ya'atë ja'ay yë wyääy pyajk xytyukpukonëtë,

³² jä'äxë ko mëti'ipë nyikajpxën, Wintsën ojts tyuk'ëne'emyë ko y'ënäny ko tëkokyë ja wintsë'këntyakn ets ja nyitsajptëjk mëti'ipë yaajën Betel, kopkpëky nëjkx kyutëkooytyä'äy ets näjyëtu'un tu'kë'ëyë maajaty yë Samaria kajpn tnitänën.

³³ Ja aaw ayuk mëti'ipë ja Wintsën ja myëtuunpë jyakajpxën, Jeroboam kä'äpyëm t'ëxmajtsy ja y'ëxëëk winma'any, ni'ikyënëm ojts tpëjktä'äky ja teety jam tsajptëkotm maajaty ja awinax y'ityën ka'apë mëpaat yaj'ëwtatyën. Pënjatyëty ënety jëtu'unpë ja tuunk y'atsojkpyën, Jeroboam poj'am ja tyuunkmooyë ets kyënu'kxyë ets tyeety'atëty ma ja tsajptëjkën, ma jap myäy'itën ja awinax ka'apë mëpaat yaj'ëwtatyën.

³⁴ Ya'atë jëtu'unpë ja tu'unën kajpxën, yë'ë ojts këjää yajpokytyunëtë ja Jeroboam ja y'u'unk y'ok, e paatykyëjxmën ojts ni'amukë kyutëkooytya'atë.