1 Reyes 10 - Biblia Dc en Mixe de Quetzaltepec

Ma ja yajkutujkpë to'oxytyëjkpë jam tsyoonyën Sabá ets tku'ixëja'any ja Salomón

^1-2 Ja to'oxytyëjk mëti'ipë jam Sabá yajkutujkpën ojts tmëtoy'äty ko ja Salomón mëj'äämpy ja'ay nyikäjpxyë oy tyimmaajëty, mëët ko ja Wintsën ënety jëtu'un të tuknipëjktaakë; ënät tnitso'ony ets tninëjkx jam Jerusalén ets t'ëk'ixa'any wi'ix ja Salomón wyijyëtyën, ojts tuknipëjktaakë tsipëtypë yajtë'ëwën. Ko jyäjty mëj'äämpy jyä'äjty may ja tyuunpëtëjk, ets tmëmiiny may'äämpy ja ujts mëti'ipë pa'akxu'kpën ets tsowëtyën, may näjyëtu'un tmëmiiny ja pu'ts pujxn ets ja tsaa oyëtypë. Ko jam jyä'äjty ma Salomón yajkutukyën, ojts tyajtëëwta'ay tëkokyë winë mëti'ipë ënety të tnimay të tnitajën.

³ E Salomón wa'ats tni'ëtsoowtaay mëti'ipë yajtëëwën ja to'oxytyëjk jampë yajkutukyën Sabá. Nitu'uk ojts jëtu'unyë kyawë'ëmy ëtso'owëntuk, aak tyimni'ëtsootaay ja Salomón.

⁴ Ko ja to'oxytyëjk t'ijxy wi'ix kyuwijyëtyën ja Salomón ets ja akujktëjk mëti'ipë të tkojyën.

⁵ Ets t'ijxtaay ja kyä'äyën y'ukën, ja jyëën tyëjk maajaty ja tyuunpëtëjk y'ityën, ja wyit tyujkxy, ja tyuunpëtëjk, wä'än yë'ëjëty mëti'ipë tojkx apëjkëtyëpën uuky apëjkëtyëpën ets wi'ix ja wintsë'kën tyäkyën mëjwiin këjää ma Wintsënën mëj'äämpy ojts t'ixy.

⁶ Paaty t'ënëmaay ja yajkutujkpë: Mëti'ipës ëjts të nmëtoy'ätyën ko myajnikäjpxy myajnimëtyä'äky wi'ix winë xytyunyën ets wi'ix mkuwijyëtyën janty tëyajtën yë'ë.

⁷ Je'eyëp ko ënätnëmës të nmëpëky koos yaa të niminy etsës të ntim'ixy mëët nkë'ëm wiinës. Mëti'ipës të nyajtukmëmëtyä'äkyën wäänë yë'ë jä'ä ko ijxtëmës tyam n'ixyën mëjwiin këjää mwijyëty ets mëj këjää ja mëk'ajtën xymyëëtëty.

⁸ Aak akujk jotkujk ja mja'ay yajpaatë, janty akujk jotkujk n'ixyës tyuntë yë mtuunpëtëjk, mëët ko xëmë yajpaatë mëët mijts ets xëmë tmëtowtë ja m'aaw m'ayuk mëti'ipë mnikäjpxyp mnimëtyäkpyën, ja oyëtypë ets mëtëyëtypë ja aaw ayuk.

⁹ Kënu'kxy mëjjawë yë mWintsën y'ity, ko të mo'oyë ja oyajtën ets ja kutujktakn ma ja Israel ja'ayëtyën. Mëëtkyëjxm ko ja Wintsën oy tsoky tjawë yë nyaax kyajpn. Paaty mijts të mpëjktä'äkyë yajkutujkpë ets xytyu'uwinwowëty mëët ja tëyajtën jaanty'ajtën.

¹⁰ Tä tukë'ëtëjkëy ja yajkutujkpë tëkëëk mil ja taxtujk mëko'px tsim ja pu'ts pujxn, ëpëky ja ujts nëë mëti'ipë pa'akxu'kpën ets may ja tsaa oyjyätyëtypë mëti'ipë tsowëtyën. Nijëna'a ënety jëtu'un kyayaj'ixynyëm ja ujts nëë pa'akpë xyuukyën jëtu'un tä tyäjkyën ja to'oxytyëjk mëti'ipë yajkutujkpën jam Sabá ets tukë'ëtëjkëy ja Salomón.

¹¹ Ëpëky mëti'ipë ënety ja kepy nëëwinye'epyën të tmëminyën jampë tsyoonyën Hiram, ojts tmëminy yë pu'ts pujxn mëti'ipë jam Ofir tso'onpën, myëmiin näjyëtu'un oyëtypë kepy ets tsaa oyëtypë ets tsowëtypë.

¹² Ja juunkepy yë'ë tyuk'akojë'k ja Wintsën ja tsyajptëjk ets näjyëtu'un ja akujktëjk; yë'ë mëët t'oytyuuny näjyëtu'un ja kow ets ja ak mëti'ipë yajtuntëpën ja ëëwpëty. Ka'ap ënety nijëna'a jëtu'un yaj'ixynyëm ja may kepy oyëtypë.

¹³ E ja yajkutujkpë Salomón ojts may tmo'oy ja to'oxytyëjk Sabá yajkutujkpë mëti'ipë tsyojkën'ajtën, ëpëky mëti'ipë kë'ëmwinma'any myooyën. Tä ja to'oxytyëjk yajkutujkpë wyimpijnë ma ja nyaax kyajpnën mëët ja tyuunpëtëjk.

Wi'ix ja Salomón mëj'äämpy y'ijtyën

¹⁴ Ja pu'ts pujxn mëti'ipë ja yajkutujkpë Salomón ënety y'ëxajëpën winjëmëjt, jä'ä wyimku'ujty mäjtsk mil tsim.

¹⁵ Ëpëky ja meeny mëti'ipë yajktëpën, ko kyëpätë, ja ato'kpëtëjkëty, ajuupyëtëjkëty ets ja yajkutujkpëtëjkëty mëti'ipë jam ënä'ämtëpën Arabië ets ja wintsëntëjkëty mëti'ipë ënä'ämtëpën ma mutsk kajpnëtyën.

¹⁶ Ojts yë Salomón tni'ënä'ämë ets kyojëty majtsp yë akëëytyuk mëti'ipë yajtuuntëpën ko tsyiptuntë, yë'ë tyuk'oytyuuntë yë pu'ts pujxn, je'eyë yajxon tyajwin'ëëtstë, tëtujk tsimjaty tyajtuuntë pu'ts pujxn tu'ukpë akëëytyuk tyaj'o'oyëtyën.

¹⁷ Ojts ëpëky tni'ënä'ämë tëkëëk mëko'px ja akëëytyuk mutskjatypë nän aak pu'ts pujxn, jä'ä jye'emtyëty tu'ktsim ja kujkm ets tpëjkë'ktaay ma këmoontëjkën ma mëti'ipë yajtijpën Líbano Yukjot.

¹⁸ Ojts tni'ënä'ämë yë y'ënyääypyäjn näjyëtu'un ma yajkutukëtyën, yë'ë ojts tyajtuntë tsowëtypë tsaa ets tuknipëjktakëy yajtuknija'axta'ajëty yë pu'ts pujxn.

¹⁹ Ja ënä'ämtakn tëtujk yujkwä'äky ojts tnipotsëtë ets ja jyëxk pik ojts jap tukjëkuwopëtë, ojts yajpotsy ja nyi'ënëënpäjn pë'aaytsyow mäjtskpa'ajëty, kaajën kyëxë'ëky ja potsy, aak tënaaytyëp.

²⁰ Majkmäjtsk ja kuxyëpëjy ojts t'oytyuntë aak tänë, tëtujkjaty yajpaatë tu'kpa'ajaty. Nijëna'a ënety jëtu'un maa kyayaj'ixynyëm ja kutujkëntëjk.

²¹ Tëkokyë ja a'ukën mëti'ipë ja yajkutujkpë yajtuumpyën aak pu'ts pujxn ënety mëët y'oytyunyëty ets aakjëtu'un ja y'apëjk y'atu'unën mëti'ipë jamën ma ja akujktëjkën mëti'ipë yajtijpën Líbano Yukjot. Ka'ap ijty ja'ay nëkooyë tyajtuntë yë poop pujxn, jä'ä ko ka'ap ënety nëkooyë tsyowëty ko ja Salomón jyuuky'äjty.

²² Ëpëky ja yajkutujkpë tmëët'ajty ja kepy nëëwinye'epyë jam Tarsis, jam mejyjyotm, mëët ja kepy nëëwinye'epyë mëti'ipë jam Hiram tso'ontëpën. Wintëkëëk jëmëjtëty ijty tmëmintë ja pu'ts pujxn, poop pujxn, oyëtypë tsaa, patutkëty ets mikë.

²³ Yë Salomón ni'ik ijty kyumeenyëty ets wyijëty këtiinëm jyëtu'unëty ja yajkutujkpëtëjkëty wiink naax wiinkajpnëpë.

²⁴ Oy tyimmaajëty aak y'ixantëp ja Salomón ets aak myëtoow'itantëp ja y'aaw y'ayuk mëti'ipë kyäjpxy myëtyäkpyën mëët ja wijyajtën ets ixpëkyajtën mëti'ipë ja Wintsën mooyëpën.

²⁵ Winë jëmëjt ijty nëjkx winë tnamo'otë. Tä ja poop pujxnën pu'ts pujxnën, wit tujkxyën, nijänën, tääts mëti'ipë tyuktsiptuuntëpën yë ja'ayëty, aaynyëë ujts nëë mëti'ipë xu'kpën ets ja jëyujk ëkë kwaay.

Ma ja Salomón tjuy tkëpetyën ja pujxnwintëkäämpë ets ja kwaay

²⁶ Salomón ojts tyajmujkta'ay ja pujxnwintëkäämpë ets ja nyija'ay mëti'ipë yajye'eytyëpën. Mil ja taxk mëko'px ja pujxnwintëkäämpë ets majkmäjtsk mil ja nyija'ay mëti'ipë yajye'eytyëpën ets jam tyajnëjkxtaay ma ja pujxnwintëkäämpë y'itën ets ma ja akujktëjk yajkëwent'atyën jam Jerusalén.

²⁷ Ja yajkutujkpë yajxon may'äämpy tjanty yajnipejty yë poop pujxn tä tsaajën jam Jerusalén ets ja ajë kepy jyam'atëty may'äämpy, jëtu'un mëti'ipë tyijtëpën higos nyikepy jampë joyjyotmën.

²⁸ Ja kwaay mëti'ipë ja Salomón ijty yajtukniju'uyëpën aakjam tsyoontë Musri ets Cilicia, jä'ä ja'ay ijty jyuuytyëp mëti'ipë yaj'ajjuuypyën ja yajkutujkpë.

²⁹ Tu'uk ja pujxnwintëkäämpë mëti'ipë tyuktsiptuuntëpën jä'ä ijty tsyowpaaty jap Egiptë tëtujk kilë ja kujkm ja poop pujxn, e ja kwaay jä'ä tsyowpaaty naxy tu'kkilë ja kujkm. Ja yajkutujkpë mëti'ipë jam ënä'ämpën ma Hit ja'ayëtyën ets ma siriëja'ayëtyën aakyë'ë ijty tyukmëto'ktëp winë ja Salomón ja y'ato'kpëtëjk.