1 Juan 4 - Biblia Dc en Mixe de Quetzaltepec

Ja mëpëjkën mëtëypyë

¹ Mëku'uktëjkëty jënu'un miitsëty myajtsok myajjawëtën, këtii aak xymyëpëktëty mëti'ipë ënantëpën ko ja Dios yajkajpxëtë, jëwyiin xy'ixtëty xytyuntëty yajxon pën myëët'ajtëp ja Kënu'kxymyëkajtën ëkë pën ka'ap. Jä'ä ko tää may naaxwiiny yë win'ë'ëmpë mëti'ipë nëkoo nätyijëtëpën ko Dios tmëtuntë.

² Yë'ë miits mtuknijawëtëp pën myëët'ajtyp ja Dios ja kyënu'kxymyëk'ajtën; mëti'ipë myëpëjkpyën ko Jesukristë të myiny yaa naaxwiiny tä ja'ayën.

³ E pën ënaanpën ko ja Kristë ka'ap të myiny, ka'ap ënety ja Kënu'kxymyëkajtën tmëëtëty, ja ku'oypyë ënety myëët'ajtyp. Tëë xymyëtoy'atë ko y'ita'any ja jëtu'unpë win'ë'ëmpë winxajpë ets tää tyam yajpaatë yaa naaxwiiny.

⁴ U'unk maayëty, Dios miits m'u'unk'ajtëtëp. Tëë ja win'ë'ëmpëtëjk xymyëmëta'aktë, jä'ä ko wäänëni'ik ja mëk'ajtën tmëëtëty mëti'ipë mëët m'itën këtiinëm ja mëti'ipë naaxwiinyëtën.

⁵ Yë'ëjëty naaxwiinypë myëpëjktëp; paaty jëtu'un y'ëwtë kyajpxtë, ets mëti'ipë näjyëtu'un ijtëpën naaxwiiny oy tja'akyyukëtë.

⁶ E ëëtsajtëm, Dios xyjyä'ä''ajtëm. Pën ja Dios y'ixy'äjtypyën myëtoow'ijtyp ja n'ayuk'ajtëm, e mëti'ipë ja Dios kajä'ä'ajtëp ka'ap xymyëtoow'ijtëm. Yë'ës ëëts ntuknija'awëmëp pën ja Kënu'kxymyëkajtën myëët'ajtyp ets pën ka'ap.

Tios, tsojkp yë'ë

⁷ Mëku'uktëjkëty, nätsyojkëmë nixim niyam, jä'ä ko ja tsojkën ja'awën jam ja tsyoony ma Tiosën. Pën ja myëku'uktëjk tsyojkpyën, yë'ë ja Dios u'unk'ajtëp ets nyija'ap ja Dios.

⁸ Pën ja myëku'uk kyatsojkpyën, ka'ap ja Dios tnijawë, jä'ä ko Dios, tsojkp yë'ë.

⁹ Tëë ja Dios xytyuk'ijxëm ja tsyojkën ko ja tu'kpajkpë ja y'U'unk të xytyuknikäjxëmë yaa naaxwiiny ets ja juukyajtën të xytyukpatëmë.

¹⁰ Jëtu'un'äämpy ja Dios të xytsyojkëmë: ka'ap ëëtsajtëm jëwyiin të ntsojkëmë, yë'ë jëwyiin të xytsyojkëmë ets ja y'u'unk të xytyuknikäjxëmë ets të xykyu'o'këmë tääts të nyajpokymyä'kxëmë.

¹¹ Mëku'uktëjkëty, pën tëë ja Dios xytsyojkëmë, nätsyojkëmë ëëtsajtëm näjyëtu'un nixim niyam.

¹² Dios, ka'ap pën të y'ëk'ijxëpë. Pën nätsyojkëm ëëtsajtëm nixim niyam, yë'ë xëmë yajpaata'any ma ëëtsajtëmën ets ja tsojkën ja'awën mëtëy tyaj'awinpita'any ma ëëtsajtëmën.

¹³ Jä'ä ko Dios tëë xymyo'oyëm ja Kënu'kxymyëkajtën, jëtu'un nnija'awëmëty ko Dios y'ity ma ëëtsajtëmën ets ëëtsajtëm n'ijtëm ma yë'ëjën.

¹⁴ Tëë kë'ëm n'ijxëmë, paaty nikajpxëmë ko ja Dios Teety ja y'u'unk të tkexy ets ja naaxwiinyëtë ja'ay të tyajnitso'oky.

¹⁵ Pën nyikäjpxyp ko ja Jesús Dios y'U'unk'atyë, yë'ë mëët ja Dios jyuuky'äty ets Dios jam yajpaaty ma yë'ëjën.

¹⁶ Jëtu'un të nnija'awëm ets të nmëpëjkëmë ko ja Dios xytsyojkëm. Dios, tsojkp ja'ap yë'ë, pën ja tsojkën myëët'ajtyp, Dios mëët yajpaaty ets Dios jam yajpatp ma yë'ëjën.

¹⁷ Jëtu'un'äämpy tyunyë jyätyë ja tsojkën ja'awën ma ëëtsajtëmën; ets ko ja näpyaye'eyë y'ity jotkujk jää nyajpatmëty; jä'ä ko jëtu'un ënety ëëtsajtëm yaa naaxwiiny nyajpatëmë tä ja Jesukristë jyuuky'äjtyën.

¹⁸ Ko ja'ay ja tsojkën tmëët'aty, ka'ap tii tsë'ëkë; jä'ä ko jëwa'kp ja tsë'ëkë ko ja'ay tmëët'aty ja tsojkën. Ko ja ja'ay tsyë'ëkë jyawë, jää ënety ja ëyo'on myiny. Pën tsë'këp, ka'ap tmëëtëty ja tsojkën.

¹⁹ Paaty ja Dios ntsojkëm, jä'äkyëjxm ko yë'ë jëwyiin të xytsyojkëm.

²⁰ Pën ënaanp: Ntsojkpyës ja Dios, ets y'ëxëëk'ijxyp ja myëku'uk, win'ë'ëmp ënety. Jä'ä ko pën kyatsojkpy ja myëku'uk mëti'ipë y'ijxypyën, ¿wi'ix'äämpy ja Dios tsoka'any mëti'ipë ka'ap yaj'ixyën?

²¹ Dios ëëts ya'atë ënä'ämën të xymyo'oyëmë: Pën ja Dios tsyojkpy, näjyëtu'un ja myëku'uktëjk tsokëty.