1 Juan 2 - Biblia Dc en Mixe de Quetzaltepec

Kristë ëëtsajtëm xynyikajpxtutëm

¹ Miitsëty, u'unk maayëty, ya'atë yam ntuknija'ayëtëp këtiipë mpokytyuntëty. E pën jää pën pyokytyuny, nmëët'ajtëm ja nikajpxtutpë Dios wintum, Jesukristë, mëti'ipë ka'ap tii poky tmëëtëtyën.

² Tëë ja Jesukristë y'ëyoy kruutskëjxm ets ja npoky'ajtëm yajmä'kxëty ets ka'ap yi'iyëty npoky'ajtëm, näjyëtu'un ni'ëmukë ja naaxwiinyëtë ja'ay.

³ Pën nmëmëto'owëm ja Dios ja y'ënä'ämën tyiyajtën, jyëkyejpy akujk jotkujk n'ëna'anmëty ko Dios n'ixy'ajtëmë.

⁴ Pën ënaanp ko Dios t'ixy'äty ets ka'ap tpatuny ja y'ënä'ämën, win'ë'ëmpë ënety ets ka'ap ja Dios ja tyiyajtën tmëët'ajtë.

⁵ E pën pyatuunëp ja y'aaw y'ayuk, kä'pxy tmëëtëty ja Dios ja tsyojkën. Jëtu'un nnija'awëm ko tu'ukyë n'ijtëm mëët ja Dios:

⁶ Pën ënaanp ko ja Dios mëët y'ity, jëtu'un jyuuky'atëty ijxtëm ja Jesukristë jyuuky'äjtyën.

Jempyë ënä'ämën

⁷ Mëku'uktëjkëty, ka'ap ya'atë ënä'ämën jemy yam myajtukmëmëtya'aka'antë mëti'ipë yam myajtuknija'ayëtëpën, yë'ë mëti'ipë ojts xy'ëxajëtën më''ëka'any, ko mëpëjktso'ontë.

⁸ Tyam näjyëtu'un ntuknijayëtë yë jempyë ënä'ämën, nätsyokëtë nixim niyam ijxtëm ja Kristë xytsyojkëmën. Yë'ë jëtu'unpë ja winma'any yajkutëkoopy ja ëxëëk winma'any ets y'oyë ja juukyajtën.

⁹ Pën ënaanp ko yajpaaty ma ja jajën të'kxën, e y'ëxëëk'ijxyp ja myëku'uk, jam ja yajpaatynyëm akootstum.

¹⁰ Pën ja myëku'uk tsyojkpy, yë'ë yajpatp ma ja jajën të'kxën, ets ka'ap tjëkyepy wi'ix ëxëëk jyatëtyën.

¹¹ Pën ja myëku'uk y'ëxëëk'ijxyp, jam y'ity ets jyuuky'äty akootstum, ka'ap nijawë maa nyijkx, jä'ä ko ka'ap tii t'ixy akootstuuy.

¹² U'unk maayëty, tyam miits nnijäyëtë, jä'ä ko Dios të mpokymyä'kxëtë ko ja Jesukristë të xymyëpëktë.

¹³ U'unk teetyëty tyam nnijäyëtë, jä'ä ko tëë xynyijawëtë mëti'ipë tääyëm yajpatpën. Ëna'ktëjkëty, tyam nnijäyëtë jä'ä ko tëë xymyëmëta'aktë ja mëjku'u.

¹⁴ Tyam miits nnijäyëtë, u'unk maayëty, jä'ä ko tëë ja Dios Teety xy'ixy'atë. Tëë miits nijayëtë u'unk teetyëty, jä'ä ko tëë xynyijawëtë mëti'ipë tääyëm yajpatpën. Tëë miits nnijäyëtë ëna'ktëjkëty, jä'ä ko mëk mnäyjyawëtë ets tëë ja Dios ja y'aaw y'ayuk xy'ëxajëtë mjootjoty mwinma'anyjyotyëty ets ko tëë xymyëmëta'aktë ja ku'oypyë.

¹⁵ Këtii xy'atsoktëty ja naaxwiinyëtë juukyajtën ets mëti'ipë jää yajpatpën naaxwiiny. Pën ja naaxwiinyëtë y'atsojkpy, ka'ap ja Dios Teety ja tsyojkën tmëëtëty,

¹⁶ jä'ä ko tu'kë'ëyë mëti'ipë yë naaxwiinyëtë ja'ay y'ixk'ajtypyën ëkë y'atsojkpyën ka'ap jyamëty tsyoony ma Tiosën. Ko tii tsojkën'aty, ko tii pëk maay tjawë ets ko yi'iyë tmëmay tmëtajy yë wit meeny.

¹⁷ Yë naaxwiinyëtë winma'any këjxnëp najxnëp yë'ënë mëët tëkokyë winë mëti'ipë ja'ay tsyojkën'ajtëpën; e pën ja Dios ja jyä'ä pyatuunëp xëmëkyëjxm jyuuky'ata'any.

Mëtëypyë ets ja ënëëmëtyä'äky

¹⁸ U'unk maayëty, tëë ja tiempo tpaaty ma ja naaxwiinyëtë kyëxanën. Tëë myaj'ëwaanëtë ko myina'antë ja mëti'ipë myëtsip'atantëpën ja Kristë ets tää ja tyamëtynyë may mëti'ipë ja Kristë myëtsip'ajtëpën; paaty nnija'awëmë ko tëë ja tiempo tpaaty ma ja naaxwiinyëtë kyëxanën.

¹⁹ Yë'ëjëty tëë jam yajpaatë ma ëëtsajtëmën. Je'eyëp ko ka'ap oy të myëpëktë. Ko jeexyë tu'ukyë ja jyot wyinma'any të tpëjkta'aktë, ka'ap jeexyë të xypyuye'eytyutëmë. Jëtu'un të nyikëxë'ëky ko ka'ap ëëtsajtëm nja'ay'ajtëmë.

²⁰ Tëë miits ja Dios mmo'ojëtë ja Kënu'kxymyëkajtën, paaty ja tëypyë jaantypë xynyijawëtë.

²¹ Ka'ap yë'ëkyëjxmëty miits nnijäyëtë ko xykyanijawëtë ja tëypyë jaantypë, paaty miits nnijäyëtë ko të xynyijawëtë ets mnija'awëtëp ko ka'ap tii anëëmëtyä'äky tsyoony ma ja tëypyë jaantypën.

²² ¿Pën jëtää win'ë'ëmpë'ajtp? Yë'ë mëti'ipë ënaanpën ko Jesús ka'ap yë'ëjëty mëti'ipë ënety yajjëjp'ijxpën. Jëtu'umpë ja'ay myëtsip'ajtyp ja Kristë, ka'ap tkupëky ja Dios Teety ets nän ka'ap tkupëky ja Dios U'unk.

²³ Pën ja Dios U'unk kyakupëjkpy, nän Dios Teety ënety kyakupëjkpy.

²⁴ Paaty miits nëëmëtë, yaj'itë mjootjoty mwinma'anyjyotyëty ja Dios ja y'aaw y'ayuk mëti'ipë ojts ëka'any xymyëtowtën, pën jap xymyëët'atë mjootjoty mwinma'anyjyotyëty mëti'ipë më''ëka'any mmëtoowtën, näjyëtu'un miitsëty tu'ukyë myajpaata'antë mëët ja Dios Teety ets ja Dios U'unk.

²⁵ Ets yë'ë ya'atë mëti'ipë ja Wintsën Jesukristë të xytyukwinwa'anëmën, ja juuky'ajtëm xëmëkyëjxmëpë.

²⁶ Paaty miits nnijäyëtë këtiipë myajwin'ëëntëty.

²⁷ Mmëët'ajtëp ja Kënu'kxymyëkajtën, mëti'ipë ja Wintsën Jesukristë mëët të mkënu'kxëtën, ets ka'ap xyajmëyatë ets pën myaj'ijxpëkëtëty, jä'ä ko ja Kënu'kxymyëkajtën mëti'ipë të mmo'ojëtën yë'ë mtuk'ijxpëjkëtëp winë, ets aakjä'ä yaj'ijxpëjkpy mëti'ipë mëtëyën, yë'ë ka'ap wyin'ëëny. Tu'ukyë mëët ja Kristë yajpaatë, jëtu'un tä ja Kënu'kxymyëk'ajtën të mtukni''ixëtën.

²⁸ E tyam, u'unk maayëty, itë tu'ukyë mëët ja Kristë, ets akujk jotkujk npatmëty n'ijxmëty ko ënety myiny jatëkok; nitii tsë'ëkë ets nitiitsëtyu'un ënety nkamëët'ajtëm ko myinëty.

²⁹ Mnija'awëtëp ko ja Jesukristë mëtëy winë tuny, ets mnijawëtëp näjyëtu'un ko pën tyuunpyën ja oypyë, yë'ë ënety ja Dios u'unk'ajtëp.