1 Crónicas 6 - Biblia Dc en Mixe de Quetzaltepec

Ma xyëëw myintën ja teetytyëjkëty, Leví y'u'unk y'ëna'k

¹ Leví y'u'unk y'ëna'k jä'ä xyëëwajtë: Guersón, Quehat ets Merarí.

² Quehat y'u'unk y'ëna'k jä'ä xyëëwajtë: Amram, Ishar, Hebrón ets Uziel.

³ Amram y'u'unk y'ëna'k jä'ä xyëëwajtë Aarón, Moisés ets Maria. Aarón y'u'unk y'ëna'k jä'ä xyëëwajtë Nadab, Abihú, Eleazar ets Itamar.

⁴ Eleazar yë'ë teety'ajtë Finees, Finees yë'ë teety'ajtë Abisúa,

⁵ Abisúa yë'ë teety'ajtë Puquí, Puquí yë'ë teety'ajtë Uzí,

⁶ Uzí yë'ë teety'ajtë Zérahías, Zérahías yë'ë teety'ajtë Meraiot,

⁷ Meraiot yë'ë teety'ajtë Amarías, Amarías yë'ë teety'ajtë Ahitub,

⁸ Ahitub yë'ë teety'ajtë Sadoc, Sadoc yë'ë teety'ajtë Ahimaas,

⁹ Ahimaas yë'ë teety'ajtë Azarías, Azarías yë'ë teety'ajtë Johanán,

¹⁰ Johanán yë'ë teety'ajtë Azarías, mëti'ipë tuunën jap tsajptëkoty, mëti'ipë Salomón kyojën jam Jerusalén.

¹¹ Azarías yë'ë teety'ajtë Amarías, Amarías yë'ë teety'ajtë Ahitub,

¹² Ahitub yë'ë teety'ajtë Sadoc, Sadoc yë'ë teety'ajtë Salum,

¹³ Salum yë'ë teety'ajtë Hilquías, Hilquías yë'ë teety'ajtë Azarías,

¹⁴ Azarías yë'ë teety'ajtë Seraías, e yë Seraías yë'ë teety'ajtë Josadac.

¹⁵ Josadac ojts jam kyajpnjotm tsumy yajmëtso'onë, ko ja Wintsën tyajkutujky ets ja Nabucodonosor tmëtso'onta'ajëty ja Judá ja'ay ets Jerusalén ja'ayëty tsumy matsy.

Ja Leví y'u'unk y'ok

¹⁶ Leví y'u'unk y'ëna'k jä'ä xyëëwajtë Guersón, Quehat ets Merarí.

¹⁷ Guersón y'u'unk y'ëna'k jä'ä xyëëwajtë Libní ets Simí.

¹⁸ Quehat y'u'unk y'ëna'k jä'ä xyëëwajtë: Amram, Ishar, Hebrón ets Uziel.

¹⁹ Merarí y'u'unk y'ëna'k jä'ä xyëëwajtë Mahli ets Musi. Yë'ë ya'atë y'u'unk'ajt y'ok'ajt yë Leví.

^20-21 Guersón y'u'unk y'ëna'k jä'ä xyëëwajtë, Libní, Jáhat, Zimá, Joah, Idó, Zara ets Jeatrai.

^22-24 Ko yë Quehat yi'iyë y'u'unk y'ëna'k yajnikäjpxy jä'ä xyëëwajtë, Aminadab, Coré, Asir, Elcana, Ebiasaf, Asir, Tahat, Uriel, Uzías ets Saúl.

^25-27 Elcana y'u'unk y'ëna'k jä'ä xyëëwajtë Amasai ets Ahimot; ko yi'iyë yajnikäjpxy Ahimot y'u'unk y'ok, jä'ä xyëëwajtë Elcana Zofai, Náhat, Eliab, Jeroham ets Elcana.

²⁸ Samuel y'u'unk y'ëna'k jä'ä xyëëwajtë, Vasni, ja kä'äxkopk ets Abías ja mutskpë.

^29-30 Yë Merarí y'u'unk y'ok jä'ä xyëëwajtë: Mahli, Libní, Simí, Uza, Simea, Haguías ets Asaías.

Ja ëëpëtëjkëty japë tyuuntën tsajptëkoty mëti'ipë ja David pyëjktakën

³¹ Ya'atë ja'ayëty, yë'ë ojts jap tsajptëkoty y'ëwtë ya'axtë mëti'ipë David kë'ëm pyëjktakën, maju'unëm yajpëjktä'äkyën jap ja Wintsën ja kyaaxë.

³² Yë'ë ijty xëmë wyin'ëëp wyinyaxtëp ja Wintsën jap tsajptëkoty ma ja wit tëjkën ma näpyaatë y'ityën mëët ja Wintsën, koonëm ja Salomón ojts tkojy ja tsajptëjk jam Jerusalén, yë'ëjëty je'eyëm tyuuntë tä ënety të yajtuknipëktën.

³³ Ja mëti'ipë jam yajpatëpën mëët ja y'u'unk y'ëna'k yë'ë ënety jam'ajtëp ja Quehat y'u'unk y'ok. Yë Hemán, yë'ë tyeety'ajt Joel; e yë Joel, yë'ë tyeety'ajt Samuel,

³⁴ Samuel yë'ë tyeety'ajt Elcana, Elcana yë'ë tyeety'ajt Jeroham, Jeroham yë'ë tyeety'ajt Eliel, Eliel yë'ë tyeety'ajt Toa,

³⁵ Toa yë'ë tyeety'ajt Zuf, Zuf yë'ë tyeety'ajt Elcana, Elcana yë'ë tyeety'ajt Máhat, Máhat yë'ë tyeety'ajt Amasai,

³⁶ Amasai yë'ë tyeety'ajt Elcana, Elcana yë'ë tyeety'ajt Joel, Joel yë'ë tyeety'ajt Azarías, Azarías yë'ë tyeety'ajt Sofonías,

³⁷ Sofonías yë'ë tyeety'ajt Tahat, Tahat yë'ë tyeety'ajt Asir, Asir yë'ë tyeety'ajt Ebiasaf, Ebiasaf yë'ë tyeety'ajt Coré,

³⁸ Coré yë'ë tyeety'ajt Ishar, Ishar yë'ë tyeety'ajt Quehat, Quehat yë'ë tyeety'ajt Leví, Leví yë'ë tyeety'ajt Israel.

³⁹ Jäätsow ma Hemán y'a'oykyë'ëjën, yë'ë pa'atënaayëp yë Asaf, yë myëku'uk; yë'ë tyeety'ajt Berequías, e Berequías yë'ë tyeety'ajt Simea,

⁴⁰ Simea yë'ë tyeety'ajt Micael, Micael yë'ë tyeety'ajt Baaseías, Baaseías yë'ë tyeety'ajt Malquías,

⁴¹ Malquías yë'ë tyeety'ajt yë Etní, Etní yë'ë tyeety'ajt Zérah, Zérah yë'ë tyeety'ajt Adaías,

⁴² Adaías yë'ë tyeety'ajt Etán, Etán yë'ë tyeety'ajt Zimá, Zimá yë'ë tyeety'ajt Simí,

⁴³ Simí yë'ë tyeety'ajt Jáhat, Jáhat yë'ë tyeety'ajt Guersón, Guersón yë'ë tyeety'ajt Leví.

⁴⁴ Anajny'äämpy ma ja Hemán tyänën, yë'ë ijty pa'atënaayëtëp ja Merarí jyä'äy, yë jyiiky myëku'ukëty: Mëtu'uk tsyo'ontä'äky yë Etán, yë'ë tyeety'ajt Quisi, Quisi yë'ë tyeety'ajt Abdí, Abdí yë'ë tyeety'ajt Maluc,

⁴⁵ Maluc yë'ë tyeety'ajt Hasabías, Hasabías yë'ë tyeety'ajt Amasías, Amasías yë'ë tyeety'ajt Hilquías,

⁴⁶ Hilquías yë'ë tyeety'ajt Amsí, Amsí yë'ë tyeety'ajt Paní, Paní yë'ë tyeety'ajt Semer,

⁴⁷ Semer yë'ë tyeety'ajt Mahli, Mahli yë'ë tyeety'äjty Musi, Musi yë'ë tyeety'ajt Merarí, Merarí yë'ë tyeety'ajt Leví.

⁴⁸ E wiinkëtypë ja myëku'uktëjkëty mëti'ipë Leví jyä'äy'äjtypyën, yë'ë ojts tmëwë'ëmtë ja wiinkëtypë tuunk mëti'ipë jap tuunk'ajtpën ma ja Dios ja tsyajpjëën tsyajptëjkën.

⁴⁹ Aarón mëët ja y'u'unk y'ok, yë'ë ijty tyimtuunk'ajtëp kyë'ëwtë xyo'oxtë ma ja wintsë'këntyaknën ma ja wintsë'kën yajyäkyën nino'okpyë ets ma ja wintsë'këntyaknën ma ja poom tyoyën. Yë'ë ijty näjyëtu'un tyim ijx'ijtëp ja amaaypyë ja tëkot ets yë'ë t'amëtow tpëjktsowtë ja pokywyinmä'kxën ma Wintsënën mëët ko ja Israel ja'ayëty pyoky jyä'äy'atë, tuntë tëkokyë winë tä ënety ja Moisés të tni'ënä'ämën, mëti'ipë ja Dios tuunpë'ajtëpën.

Ja Aarón ja y'u'unk y'ok

^50-53 Yi'iyëpë Aarón ja y'u'unk y'ëna'k jä'ä xyëëwajtë: Eleazar, Finees, Abisúa, Puquí, Uzí, Zérahías, Meraiot, Amarías, Ahitub, Sadoc ets Ahimaas.

Ja Leví ja'ayëty ja nyaax kyajpnëty

⁵⁴ Yaa ja it tsënaaytyakn yajnimëtyä'äky mëti'ipë jyä'äy'ajtën ja Aarón ja y'u'unk y'ok. Ja Quehat ja'ayëty ojts ja jyä'ä yaj'ijxpëtsëmtë ets nyikääkëtë

⁵⁵ ja Hebrón, ma Judá y'itjotmën, mëët ja nyikamtëjk ma ja jëyujk tsajpkaa tyajtänëtëtyën.

⁵⁶ E ja Caleb, Jefuné myaank yë'ë ojts yajmo'oy ja naax kamtëjk mëti'ipë jam kajpnjotm yajpatpën mëët ja nyiyuutakn nyitsënaaytyakn.

⁵⁷ Ja Aarón ja y'u'unk y'ok yë'ë ojts yajmo'otë Hebrón, ja tsoktakn kajpn ma ijty ja'ay kyäktso'oktën, ëpëky näjyëtu'un tjä'ä'ajtë ja nyiyuutakn nyituuntakn, ma txëëwatyën Libná, Jatir, Estemoa,

^58-59 Hilén, Debir, Asán ets Bet-semes, tu'ukjaty ja naax kamtëjk aakmëët ja nyijëyujk tënaaytyakn.

⁶⁰ Ojts näjyëtu'un yajmo'otë kajpn mëti'ipë yë Benjamín ja'ayëty nyitënaaytyëpën, jä'ä ja kajpn yajtijtë: Gueba, Alémet ets Anatot, aakmëët ja nyinaax nyikam ma ja jëyujk tyänëtëtyën. Jä'ä ja kajpn wyinë'ajty majktëkëëk mëti'ipë ja Aarón ja myëku'uktëjk ojts tyuka'ajëtën.

⁶¹ Ko yaj'ijxpëtsëëmy jatëkok, ënät ja Quehat ja jyä'äy ojts tyuka'akojënëtëpë, majk ja kajpn mëti'ipë nyitënaaytyëpën ja Manasés ja jyä'äy nikujkwä'kxypyë,

⁶² e ja Guersón ja y'u'unk y'ok majktëkëëk ojts ja kajpn yajmo'otë, jëtu'un tä ënety nyimay'atën, jam yajmooytyë ma tnitänëtën ja Isacar jyä'äyëty, ma Aser jyä'äyëty, Neftalí jyä'äyëty ets nikujkwä'kxypyë ja Manasés ja jyä'äyëty mëti'ipë jam Basán tsënaaytyaknpëjktën.

⁶³ Ja Merarí y'u'unk y'ok näjyëtu'un ojts ja nyaax kyajpn yajmo'otë tä ënety ja jyä'äy nyimay'atën, ko yaj'ijxpëtsëëmy majkmäjtsk ja kajpn nyikäkëtë, ma ja Rubén, Gad ets Zabulón ja nyaaxjotmën.

⁶⁴ Ja Israel ja'ayëty ojts tmo'otë näjyëtu'un ja jëyujk tënaaytyakn, ja Leví y'u'unk y'okëty.

⁶⁵ Ja ja'ayëty mëti'ipë jyä'äyajtëpën ja Judá, Simeón ets Benjamín, yë'ë ja kajpn yajmooytyë mëti'ipë të yajnikäjpxyën, mëti'ipë ojts tyuka'ajëtën ko yaj'ijxpëtsëëmy.

⁶⁶ Yë Quehat ja'ayëty ojts näjyëtu'un tyukka'ajetë ja kajpn mëti'ipë Efraín nyitënääpyën.

⁶⁷ Ojts yajmo'otë ja Siquem kajpn, ma ijty ja ja'ay kyäktso'oktën mëti'ipë tuuntëkooytyëpën, jam yajpaaty ma Efraín y'itjotmën, mëët ja nyijëyujk tënaaytyakn; ojts näjyëtu'un yajmo'otë Guézer,

^68-69 Jocmeam, Bet-honrón, Aialón ets Gad-rimón, aakmëët ja nyijëyujk tënaaytyaknëty.

⁷⁰ Ja Quehat ja'ayëty mëti'ipë ok jaakniwë'ëmtën, yë'ë ojts yajmo'otë ja kajpn mëti'ipë yajtijpën Aner ets Bileam, mëët ja nyijëyujk tënaaytyakn, mëti'ipë nyitënääpyën yë Manasés yë jyä'äy nikujkwä'kxypyë.

⁷¹ Guersón yë jyä'äy, jëtu'un tä nyimayajtën, yë'ë ojts yajmo'otë ja kajpn mëti'ipë yajtijpën, Golán, jam yajpaaty ma Basán y'itjotmën ets ja Astarot kajpn, mëti'ipë ënety të tjä'ä'atën ja nikujkwä'kxypyë jyä'äyëty Manasés, aakmëët ja nyijëyujk tënaaytyakn.

^72-73 Ojts näjyëtu'un yajmo'otë kajpn ma nyaaxjotëtyën yë Isacar, Cedes, Daberat, Ramot ets Anem, aakmëët ja nyijëyujk tënaaytyaknëty.

^74-75 Ja Aser ja jyä'äyëty yë'ë yajmooytyë ja kajpn mëti'ipë yajtijtën: Masal, Abdón, Hucoc ets Rehob, aakmëët ja nyijëyujk tënaaytyakn.

⁷⁶ Ja Neftalí ja jyä'äy yë'ë yajmooytyë kajpn mëti'ipë yajtijpën: Cedes, jampë yajpaatyën Galilea; Hamón ets Quiriataim, aakmëët ja nyijëyujk tënaaytyakn.

⁷⁷ Ja y'u'unk y'ok ja Merarí, mëti'ipë Zabulón jyä'äy'äjtypyën yë'ë yajmooytyë ja kajpn mëti'ipë yajtijtëp Rimón ets Tabor, aakmëët nyijëyujk tënaaytyaknëty.

^78-79 Rubén yë jyä'äy yë'ë yajmooytyë ja kajpn jampë yajpaatën ma ja Jordán nëë nyäxyën, awinmtsow, winkon mëët ja Jericó kajpn nyäwyinku'ixëty, tääts yë kajpn mëti'ipë yajtijpën Béser, mëti'ipë jamën të'ëts'itjotm ma txëëwatyën Jahas; näjyëtu'un yë kajpn mëti'ipë yajtijpën Cademot ets Mefáat, aakmëët yë nyijëyujk tënaaytyaknëty;

^80-81 e Gad ja jyä'äy yë'ë yajmooytyë, Ramot kajpn, Galaad kajpn, Mahanaim kajpn, Hesbón kajpn ets Jazer kajpn, aakmëët yë nyijëyujk tënaaytyakn.