1 Crónicas 5 - Biblia Dc en Mixe de Quetzaltepec

Rubén y'u'unk y'ok

^1-3 Ja Rubén ja y'u'unk y'ëna'k mëti'ipë ja Israel kyä'äxkopk'ajtypyën, jä'ä xyëëwajtë: Hanoc, Falú, Hesrón ets Carmí. Rubén yë'ë ojts jyakä'äxkopk'aty, je'eyëp ko ojts tyajtëkoy ko ojts ja tyeety ja tyo'oxytyëjk ojts tmëëtko'knaayë, tääts ojts yë'ë ja José tmëwë'ëmy ja kä'äxkopk'ajtën, nän yë'ë Jacob Israel myaank. Je'eyëp ko Judá mëj'äämpy ojts ok pyëtsimy, ma yë'ë jyä'äyën jam tu'uk Wintsën y'ijty, ja José yë'ë myëwë'ëm ja kä'äxkopk'ajtën.

^4-6 Joel ja y'u'unk y'ëna'k, ko jëjpwitsë nmëtsyo'owmëty, jä'ä xyëëwajtë: Semaías, Gog, Simí, Micaías, Reaia, Baal ets Beerá, mëti'ipë nyikopk'ajtën ja Rubén ja'ayëty, mëti'ipë yajnëjkxëtën tsumy ja Sirië yajkutujkpë, mëti'ipë xyëëwajtypyën Tiglat-piléser.

⁷ Ja Beerá myëkä'äxtëjk jä'ä xyëëwajtë: Jeiel, mëti'ipë nyikopk'ajtypyën ja myëku'uk, tääts näjyëtu'un ja Zacarías

⁸ ets Belá, yë'ë myaank Azaz, yë'ë y'ok'u'unk Semá, Joel myaank. Belá jam tsyënaay Aroer, ja nyaax kyamtëjk jampaat y'ëwtijty Nebo ets Baal-meón.

⁹ Jam awinmtsow, aakyë'ë nyiwa'ktaay ja naax kamtëjk, tyimja'ty ma ja të'ëts itjotmën mëti'ipë tso'onpën jam nëë'ëkë'ëm ma yajtijyën Éufrates, paatykyëjxm mëj këjää ja naax kam tniwä'ky jä'ä ko may ijty tmëëtëty ja jëyujk tsajpkaa, jam Galaad jam ojts nyimayëtë.

¹⁰ Ma yajkutujkyën ja Saúl, jää tsyiptuuntë yë Rubén ja'ayëty mëët yë Agar ja'ayëty, e kajts myëtaktë yë Agar ja'ayëty paaty ja Rubén ja'ayëty ojts yë'ë jam tsyënaaytyaknpëjktë ma Galaad itjotmën.

Gad y'u'unk y'ok

¹¹ Gad ja y'u'unk y'ok mëti'ipë tsënaaytyën jam winkon ma ja Rubén ja'ay tsyëënëtën, ma y'itjotmën yë Basán ets tyimja'ty jam ma ja Salcá kajpnën, jä'ä xyëëwajtë:

¹² Joel, mëti'ipë ja myëkä'äxtëjk kyutënääpyën, tääts yë Safán, Jaanai ets Safat.

¹³ Yë'ë myëku'uk'ajtë: Micael, Mesulam, Sebá Jorai, Jacán, Zia ets Éber, niwëxtujk nyiwinë'atë.

¹⁴ Ya'atë yë'ë y'u'unk'ajtë Abihail, mëti'ipë y'u'unk'ajtën yë Hurí, mëti'ipë y'u'unk'ajtën yë Jaróah, mëti'ipë y'u'unk'ajtën Galaad, mëti'ipë y'u'unk'ajtën Micael, mëti'ipë y'u'unk'ajtën yë Jesisai, mëti'ipë y'u'unk'ajtën yë Jahdo, mëti'ipë y'u'unk'ajtën yë Buz.

¹⁵ Ahí, mëti'ipë y'u'unk'ajtën yë Abdiel, y'okmaank yë Guní, mëti'ipë nyikopk'ajtën ja jyiiky myëku'uk.

¹⁶ Tëkokyë ya'atë ja'ayëty aakjam tsyënaaytyë Galaad, Basán ets maajaty ja nyaaxjot nitënën, jampaat ma ja kam tu'ujën mëti'ipë jëyujk tsajpkaa tsyënaaytyakn'ajtëpën ets jampaat tsëpa'an ëkë'ëm.

¹⁷ Tëkokyë ya'atë ja'ayëty aak jää ojts yajkuja'ayëtya'atë nokyjoty ko yajkutujky ja Jotam, ma ja Judá ja'ayëtyën ets ko yajkutujky ja Jeroboam ma ja Israel ja'ayëtyën.

Ma yajnikäjpxy yajnimëtyä'äkyën mäjtsk kajpn ja kujkwä'kxy ja ja'ayëty

¹⁸ Ja y'u'unk y'ok ja Rubén, ja Gad ets kujkwä'kxy ja Manasés ja y'u'unk y'ok, aak tsiptuunpë ja'ay ijtyëty, ets jotmëkjatyëty; yë'ë ijty myëtsiptuuntëp pujxn, ku'umën ets ti'pxn; xëmë tuunta'aktë wi'ix tsyiptuntëtyën. Jä'ä nyiwinë'atë niwëxtyikxymyajk taxk mil ja wëxtujk mëko'px ja tëkë'px, aak ye'etyëjktëjk mëti'ipë maayëtëp tsyiptuntëtyën.

¹⁹ E ojts mëët ja Agar ja'ayëty tsyiptuntë ets ja ja'ayëty mëti'ipë xyëëwajtypyën Jetur, Nafís ets Nodab;

²⁰ ojts pyutëkëtë ja Dios, paaty ka'ap tyajmëtaktë ja Agar ja'ayëty ets ja mëti'ipë mëët të nyäpyëkëtën, yë'ëjëty ënätyë ja Dios ijty tmëkajpxtë jam tsipjotm ets pyutëkëtëty. Ojts pyutëkëtë jä'ä ko nän jam ja wyinma'any ets ja myëpëjkën tpëjktaktë.

²¹ Yajnëjkxtaaytyë ja jëyujk mëti'ipë tyukyajni'o'ktutën ja myëtsip, wëxtyikxy majk ja jëyujk jëku'ux, mäjtsk mëko'px ja wëxtyikxy majk mil ja kupixyny ets mäjtsk mil ja krukts. Ëpëky ojts nimëko'px mil ja tsumjyä'äy tyajnëjkxtë.

²² May ja mëtsip y'o'ktë jä'ä ko yë'ë Dios kë'ëm tim tsiptuun. Paatykyëjxm jam tsyënaaytyaknpëjktë mëti'ipë mëtaktën, koonëm ja wiink kajpn ojts ok myëmëta'ëkëtë.

²³ Kujkwä'kxy yë Manasés yë y'u'unk y'ok jam tsyënaaytyë ma ja itjotmën mëti'ipë jam yajpatpën ma ja Basán ja y'itjot tsyo'ontä'äkyën ets jyëjpkëxy jam Baal-hermón, ets jatëkok kyutëkë ma yajtijyën Senir ets kyëtä'äky jam ma txëëwatyën Hermón, tyaapë ja'ayëty nimay ijty oyëty.

²⁴ Mëti'ipë nyikopk'ajtën ja jyä'äy jä'ä xyëëwajtë: Efer, Isí, Eliel, Azriel, Jeremías, Hodavías ets Jahdiel, tëkokyë ya'atë ja'ayëty aak tsiptuunpë ja'ay ijtyëty ets aak jotmëkëty. Aak mëj'äämpy muum ja'ay nyikajpx nyimëtyakëtë ets yë'ë nyikopk'ajtëp ja jyä'äyëty.

²⁵ Je'eyëp ko yë'ëjëty ojts ja Tyios t'ixtijënëtë mëti'ipë ojts ja y'aptëjk t'ëwtatën, ojts wiink wintsën t'ëwtajtnëtë, mëti'ipë ja naax kajpn y'ëwtajtëpën mëti'ipë ja Wintsën yajkutëkooyën ma yë'ëjëtyën.

²⁶ Paatykyëjxm ja Wintsën nän kë'ëm ojts naskajpxë ets ja Pul wyinma'anypyaatëty, mëti'ipë Tiglat-piléser xyëëwajtypyën, ja Asiria yajkutujkpë ets tmëtsiptsoonëty ja Israel ja'ay; jëtu'un tyajnëjkxtaay tsumy matsy ja Rubén ja'ayëty, Gad ja'ayëty ets nikujkwä'kxy ja Manasés ja jyä'äy; jam ojts yajmënëjkxtë Halah, Habor, Hara ets ma ja Gozán mëjnëë jyënäkyën, ma tyampaat yajpaatën.