1 Crónicas 4 - Biblia Dc en Mixe de Quetzaltepec

Ja Judá y'u'unk y'ok

¹ Yë Judá y'u'unk y'ok jä'ä xyëëwajtë: Fares, Hesrón, Carmí, Hur ets Sobal.

² Reaia, myaank yë Sobal, jä'ä myaank xyëëwajt, Jáhat, e Jáhat jä'ä myaank xyëëwajt Ahumal ets Lahad. Yaa jëtu'un ojts tsyoontë yë ja'ayëty mëti'ipë ojts yajtijtën soratitas.

^3-4 Hur y'u'unk y'ëna'k jä'ä xyëëwajtë: Etam, Jezreel, Ismá Idbás, Penuel, tyeety yë Guedor ets Éser, tyeety yë Husá. Ya'atë ja'ayëty tam ijty tu'uk myëkä'äxëty to'oxytyëjkpë mëti'ipë xyëëwajtën Has-lel-poni. E yë'ëts ojts ya'atë Hur t'u'unk'aty t'ëna'k'aty, yë Efrata kyä'äxkopk, mëti'ipë y'ok'ajtën Belén.

⁵ Ashur, tyeety Tecoa, mäjtsk ijty yë tyo'oxytyëjk: Tu'uk mëti'ipë xyëëwajtypyën Helá ets tu'uk mëti'ipë xyëëwajtypyën Naara.

⁶ Naara jä'ä y'u'unk y'ëna'k xyëëwajtë: Ahuzam, Héfer, Temeni ets Ahastarí. Ya'atë ojts t'u'unk'aty t'ënä'äk'aty yë Naara.

⁷ E ja y'u'unk y'ëna'k ja Helá, jä'ä xyëëwajtë: Zéred, Jesohar ets Etnán.

⁸ Cos jä'ä y'u'unk y'ëna'k xyëëwajtë: Anub ets Sobebá, mëti'ipë y'ap'ajt y'ok'ajtën yë Aharhel, myaank yë Harum.

⁹ Mëti'ipë xyëëwajtën Jabés, mëj'äämpy ojts ni'ik nyäxy këtiinëm jyëtu'unëty ja myëkä'äxtëjk, yë tyaak paaty ojts jëtu'un yajxëëwpetyë Jabés, jä'ä ko tyaa y'ënäny: Tyaapë u'unk mëët ja mëk pëjkën të nyajminyës naaxwiiny.

¹⁰ Jabés myëpëjktsoow yë Dios, mëti'ipë y'ëwtajtëpën yë Israel ja'ayëty, jëtu'un t'ënëmaay: Tyam n'amëtoy npëjktsoy yë mkënu'kxën ets xymyo'ojëtyës mëj këjää naax kam ets xypyutëk xypyupätëtyës ets xyjyëpëkëty ma ëjtsën tëkokyë ëxëëkpë këtiipës n'ëyowëty. Dios ojts jyänty myo'oyë mëti'ipë y'amëtoow pyëjktsoowën.

¹¹ Quelub, myëkä'äx yë Sua, jä'ä myaank xyëëwajt: Mehir, Mejir jä'ä myaank xyëëwajt Estón;

¹² Estón jä'ä myaank xyëëwajtë: Bet-rafá, Paséah ets Tehiná, mëti'ipë yajtso'ontakën ja Nahas kajpn. E yë'ë ya'atë ja'ayëty ojts jam tsyëënëtë ma txëëwatyën ja kajpn Recá.

¹³ Quenás jä'ä y'u'unk y'ëna'k xyëëwajtë Otoniel ets Seraías. Otoniel jä'ä y'u'unk y'ëna'k xyëëwajtë Hadad

¹⁴ ets Meonotai, mëti'ipë tyeety'ajtën yë Ofrá. Seraías jä'ä myaank xyëëwajt Joab, ja y'aptëjkëty ja ja'ayëty mëti'ipë jam tsënaaytyën joyjotm ma txëëw'ajtyën Harisim, mëti'ipë ijty kojtëpën taktëpën.

¹⁵ Caleb y'u'unk y'ëna'k, Jefuné myaank, jä'ä xyëëwajtë: Ir, Elá ets Naam. Elá jä'ä myaank xyëëwajt Cenaz.

¹⁶ Jahaleel y'u'unk y'ëna'k jä'ä xyëëwajtë: Zif, Zifa, Tirías ets Asarel.

^17-18 Esdras y'u'unk y'ëna'k jä'ä xyëëwajtë: Jéter, Méred, Efer ets Jalón. Méred yë'ë ojts mëët pyiky ja to'oxytyëjk mëti'ipë xyëëwajtën Bitiá, yë'ë nyëëx tu'uk yajkutujkpë japë Egiptë yajkutukyën, jä'ä y'u'unk y'ëna'k xyëëwajtë: Maria, Samai ets Isbah, mëti'ipë tyeety'ajtën Estemoa. Méred ojts näjyëtu'un mëët pyiky tu'uk ja to'oxytyëjk mëti'ipë Judá jyä'äyajtën, jä'ä myaank xyëëwajt Jéred, mëti'ipë Guedor, Héber, Socó, Secutiel ets Zanóah tyeety'ajtën.

¹⁹ Yë tyo'oxytyëjk yë Hodías, yë Náham myëkä'äx to'oxytyëjkpë tyeety yë Keilá, jä'ä y'u'unk y'ëna'k xyëëwajtë: Dalia, mëti'ipë garmitë ja'ayën ets Estemoa mëti'ipë Maacat ja'ayën.

²⁰ Simón y'u'unk y'ëna'k jä'ä xyëëwajtë, Riná, Ben-hanán ets Tilon. Isí y'u'unk y'ëna'k jä'ä xyëëwajtë Zohet ets Ben-zohet.

²¹ Yë y'u'unk y'ok yë Selá, myaank yë Judá, jä'ä xyëëwajtë Er, mëti'ipë tyeety'ajtën Lecá, Ladá mëti'ipë tyeety'ajtën Maresá, ja myëku'uktëjkëty mëti'ipë ijty tyuunk'ajtën ja yajwitkojk oyjyätyëtypë jam Bet-asbea.

²² Joaquim ets ja ja'ayëty mëti'ipë jam tsënaaytyëpën Cozebá, Joás ets Saraf, ojts mëët pyëktë ja to'oxytyëjktëjkëty mëti'ipë Moab ja'ayëtyën ets yë'ë jam mëët Belén jyajtë, jëtu'un jap myiny kuja'ay ma ja nokyën mëti'ipë tëëyëp yajjaayën.

²³ Ja ja'ayëty tu'tspojtsk wejkxypyojtstëp ijtyëty ets jam tsyënaaytyë Netaim ets Guederá, yë'ë pyutëjkëtyë ja yajkutujkpë.

Ja y'u'unk y'ok ja Simeón

²⁴ Simeón yë y'u'unk y'ëna'k jä'ä xyëëwajtë: Nemuel, Jamín, Jarib, Zérah ets Saúl.

²⁵ Saúl yë'ë teety'ajtë Salum; Salum yë'ë teety'ajtë Mibsam, e yë Mibsam yë'ë teety'ajtë Mismá.

²⁶ Mismá yë'ë teety'ajtë Hamuel; ya'atë myaank xyëëwajt Zacur, Zacur myaank xyëëwajt Simí;

²⁷ Simí majkmokx tu'uk ijty yë myaank ets tëtujk yë nyëëx; e yë myëkä'äxtëjk ka'ap nëkooyë y'u'unk y'ijtë, paaty yë jyä'äyëty ka'ap nëkooyë nyimayëtyë tä yë Judá jyä'äyën.

²⁸ Yë'ë jam tsënaaytyë Beerseba mëti'ipë xyëëwajtën: Moladá, Hasar-sual,

²⁹ Bilhá, Ésem, Tolad,

³⁰ Betuel, Hormá, Siclag,

³¹ Bet-marcabot, Hasar-susim, Bet-birai ets Saaraim. Ya'atë ojts tkajpn'atë mapaat yë David yajkutujkyën.

³² Ëpëky näjyëtu'un ojts taxk tyajkojtëpë kyajpnëty: Etam, Aín, Rimón, Toquén ets Asán,

³³ mëët tëkokyë ja mutsk kajpnëty mëti'ipë jam nanux napa'ajën yajpatëpën jampaat jyä'ty Baalat. Ya'atëts jëtu'un kyajpn'ajtë aakmëët ja y'u'unk y'ëna'këty y'u'unk tyo'oxytyëjkëty.

³⁴ Yë Mesobab, Jamlec, Josia, myaank yë Amasías,

³⁵ Joel, Jehú, myaank yë Josibías, myaank yë Seraías ets ya'atë yë'ë myaank yë Asiel;

³⁶ tääts näjyëtu'un yë Elioenai, Jaacoba, Jesohaías, Asaías, Adiel, Jesimiel, Benaías,

³⁷ Zizá, yë'ë myaank yë Sifi, e ya'atë yë'ë myaank yë Elón, e ya'atë yë'ë myaank yë Jedaías, e ya'atë yë'ë myaank yë Simri, myaank yë Semaías.

³⁸ Ya'atë mëti'ipë të yajnikajpxtën, yë'ë ojts y'itë mëj'äämpy ma jyä'äyëtyën. Jä'ä ko ojts ja y'u'unk y'ëna'këty yajxon nyimayëtë,

³⁹ jampaat jyajtë ma ja nyaaxjotmën ja Guerar, a'oytsyow; yë'ë y'ijxtaaytyëp aay ujts tii ja kyupixyny ets ja tsyajppax jyë'kxtëpën,

⁴⁰ e ojts jam tjanty pyaatë oypyë jëyujk tënaaytyakn, tam jyätyë ja mëëy, aay ujts ets mëjwiin këjää jam ja it naaxwiinyëtë ma tääpë itjotmën; jä'ä ko yë Cam yë y'u'unk y'ok ojts jam tsyëënëtë.

⁴¹ E jää ma yajkutujkyën ja Ezequías, Judá jyä'äy; jää ojts ya'atë ja'ay jam jya'të, mëti'ipë të yajnikajpxtën ets tyajkutëkootyääytyë winë, tääts yë'ë ojts tmëwë'ëmtë ja naax kam, jä'ä ko janty'oy t'ijxtë ja it naaxwiinyëtë, jyëkyejpy ja jëyujk jam tyänëtëty.

⁴² Ëpëky ojts nimëkoxk mëko'px jam Seir nyëjkxtëpë, jä'ä ja Simeón ja y'u'unk y'ok, yë'ë tu'uwinwoowëtë Pelatías, Nearías, Refaías ets Uziel, myaank yë Isí, Simeón jyä'äy,

⁴³ mëti'ipë yajkutëkooytyën ja Amalec ja'ayëty. Jëtu'un ojts jam yë'ë wyë'ëmnëtë tsënääpyë, tyaampaat yë'ë jam tsënaaytyëp.