1 Crónicas 3 - Biblia Dc en Mixe de Quetzaltepec

Ja David ja y'u'unk y'ëna'k

¹ Ja y'u'unk y'ëna'k ja David, mëti'ipë jam Hebrón miintën naaxwiiny: ja kä'äxkopk Amnón, mëti'ipë Ahinóam yajmëxu'unk'ajtën, jampë kyukajpnëtyën Jezreel; mëmäjtskpë jä'ä xyëëwajtyp Daniel, mëti'ipë Abigail yajmëxu'unk'ajtën jampë kyukajpnëtyën Carmel;

² Ja mëtëkëëkpë jä'ä xyëëwajtyp Absalón, yë'ë yajmëxu'unk'ajt Maacá, nyëëx yë Talmai, jampë yajkutukyën Guesur; ja mëmajktaxkpë jä'ä xyëëwajtyp Adonías, yë'ë yajmëxu'unk'ajt Haguit;

³ ja mëmëkoxkpë jä'ä xyëëwajtyp Sefatías, Abital yajmëxu'unk'ajt; ja mëtëtujkpë jä'ä xyëëwajtyp Itream, Eglá yajmëxu'unk'ajt, wiinkpë tyo'oxytyëjk David.

⁴ Ya'atë nitëtujkpë David y'ëna'k jam ojts myintë jya'të naaxwiiny Hebrón ko ja David jam yajkutujky wëxtujk jëmëjt ets ja tëtujk po'o. Jam tsyo'ony ets ojts nyijkxy Jerusalén ma yajkutujkyën i'px majktëkëëk jëmëjt,

⁵ ma ojts nimajktaxk jyaakmin jyaakja'tën ja y'u'unkëty, mëti'ipë xyëëwajtën: Simá, Sobab, Natán ets Salomón, tëkokyë aakyë'ë yajmëxu'unk'ajt yë Betsabé, Amiel nyëëx.

⁶ Ojts wiinkpë y'u'unk y'ëna'k tjaakpaat tjaak'ijxtëpë, mëti'ipë xyëëwajtëpën: Ibhar, Elisamá, Elifélet,

⁷ Nógah, Néfeg, Jafía,

⁸ Elisamá, Eliadë ets Elifélet.

⁹ Tëkokyë ya'atë aakyë'ë David ojts t'u'unk'aty, ka'ap yajmëtyoy mëti'ipë y'u'unk'ajtypyën mëët wiinkpë to'oxytyëjk. Tamar yë'ë ojts tmëkä'äx'atë.

Ja Salomón ja y'u'unk y'ok.

^10-14 Ko yë Salomón yi'iyë y'u'unk y'ok yajmëtyoy, jä'ä xyëëwajtë: Roboam, Abías, Asá, Josafat, Joram, Ocozías, Joás, Amasías, Azarías, Jotam, Acaz, Ezequías, Manasés, Amón ets Josías.

¹⁵ Josías y'u'unk y'ëna'k jä'ä xyëëwajtë: Johanán ja kä'äxkopk; mëmäjtsk Joaquim, mëtëkëëk Sedequías ets ja mëmajktaxkpë Salum.

¹⁶ Joaquim, jä'ä y'u'unk y'ëna'k xyëëwajtë: Jeconías ets Sedequías.

¹⁷ Yë y'u'unk y'ëna'k yë Jeconías, mëti'ipë nyaaxjoty kyajpnjoty yaj'ëxwojptën ets ojts tsumy matsy yajmënëjkxtë, jä'ä xyëëwajtë: Salatiel, ja kä'äxkopk,

¹⁸ ets ja Malquiram, Petaías, Senazar, Jecamías, Hosamá, ets Nedabías.

¹⁹ Pedaías y'u'unk y'ëna'k jä'ä xyëëwajtë: Zorobabel ets Simí. Yë Zorobabel y'u'unk y'ëna'k jä'ä xyëëwajtë: Mesulam, Hananías ets ja to'oxytyëjk mëti'ipë xyëëwajtypyën Selomit, mëti'ipë yë'ëjëty y'uty'ajtëpën

²⁰ ets ëpëky wiinkpë nimëkoxk y'u'unk y'ëna'k, mëti'ipë xyëëwajtëpën: Hasubá, Ohel, Berequías, Hasadías ets Jusab-hésed.

²¹ Yë y'u'unk y'ëna'k yë Hananías jä'ä xyëëwajtë: Pelatías ets Jesaías. Yë y'u'unk y'ok yë Jesaías, ko aak yi'iyë yajmëtyoowkojtëty jä'ä xyëëwajtëp: Refaías, Arnán, Abdías ets Secanías.

²² Secanías y'u'unk y'ëna'k jä'ä xyëëwajtë: Semaías, Hatús, Igal, Baríah, Nearías ets Safat, nitëtujk wyinë'ajtë.

²³ Nearías y'u'unk y'ëna'k, nitëkëëk y'ijtë: Elioenai, Ezequías ets Azricam.

²⁴ Elioenai y'u'unk y'ëna'k, niwëxtujk y'ijtë: Hodavías, Eliasib, Pelaías, Acub, Joahnán, Delaías ets Ananí.