1 Crónicas 25 - Biblia Dc en Mixe de Quetzaltepec

Ja ëëpë xuxpëty

¹ Ja David ets ja mëjja'aytyëjk, mëti'ipë ënety myëtuuntëpën ja Wintsën, ojts ëpëky tmo'otë ja tyuunk ja Asaf ja y'ëna'k, Hemán ets Jedutún, mëti'ipë ijty y'akajpxtëpën tii ja Wintsën tyunäämpyën ëkë wi'ix ja aaw ayuk ënety tyaka'anyën; yë'ëjëty yë'ë ijty mëët tyuntë ja xuxn, kow, ak, ets pujxn akojxmujk. E tsyaats myiny këxja'ay ja xyëëwëty mëti'ipë jëtu'unpë ja tuunk yajtuknipëjktën.

² Ja Asaf ja y'u'unk y'ëna'k mëti'ipë xyëëwajtën: Jacur, José, Netanías ets Asarelá, Asaf ijty tu'uwinye'eyëtëp; ja tyeetyëty mëti'ipë nyikäjpxyp nyimëtyäkpyën ja Wintsën ja y'aaw y'ayuk mëti'ipë tunan jatanëpën, jä'ä yajkutujkpë ijty myëtuumpy.

³ Jedutún ja y'u'unk y'ok jä'ä xyëëwajtë: Guedalías, Zeri, Jesaías, Simí, Hasabías ets Matatías. Yë'ë ijty tu'uwinye'eyëtëp ja tyeetyëty Jedutún; yë'ë näjyëtu'un nyikajpx nyimëtyäkpy ja Wintsën ja y'aaw y'ayuk mëti'ipë tunan jatanëpën, yë'ë mëët tyuny ja xuxpë wojpë ets jëtu'un tnijawë ja aaw ayuk mëti'ipë ja Dios nyikajpxäämpyën ets jä'ä xëmë yajnajxyp ja kukkajpxën ja'awëkyëtakkën.

⁴ Ja Hemán y'u'unk y'ëna'k, mëti'ipë xyëëwajtëpën: Buquías, Matanías, Uziel, Sebuel, Jeremot, Hananías, Hanán, Eliadë, Guidalti, Romanti-ézer, Josbecasa, Malotí, Hotir ets Mahaziot.

⁵ Tëkokyë ya'atë ja'ayëty aakyë'ë Hemán y'u'unk y'ëna'k ijtë, mëti'ipë ojts ja Wintsën tkäjpxynyajxpë'atyën mëti'ipë myëtuuntën ja yajkutujkpë, jëtu'un ijxtëm ënety ja Dios të y'ënë'ëmxëtyën ko mëj'äämpy yajnaxa'anyë ma ja naax kajpnën; e jëtu'un jyänty ixë'ajty, yë Dios ojts Hemán y'u'unk y'ëna'k tmo'oy, majkmajkts ye'etyëjkpë ets tëkëëk to'oxytyëjkpë.

⁶ Tëkokyë yë'ëjëty, yë'ë tyeety ijty tu'uwinwoowëtëp, ko ijty jap yajpaatë ma ja Wintsën ja jyëën tyëjkën ets y'ëwtë ya'axtë jap, tyaj'ëna'antë ja pujxn, ak ets xuxn. Asaf, Jedutún ets Hemán yë'ë ijty tyimmëtuuntëp yajkutujkpë.

⁷ Jä'ä nyiwinë'atë ja ëëpë koowpë ets mëti'ipë jämyëët'ajtëtëpën mëti'ipë të yajtukni''ixëtën wi'ix y'ëwtëty ya'axtëty ma ja Wintsënën, nimäjtsk mëko'px ja majkta'px tuktujk.

⁸ Ënet ojts nyäyyajwa'kxëtë, aak ijxpëtsëmy ma ja nija'awënën wi'ixjaty ja tuunk tyuka'ajëtën, mëjpë mutskpë, mëti'ipë winë jyajtnëtëpën ets mëti'ipë ka'apën.

^9-31 Ko t'ijxpëtsëëmtë ma ja nija'awënën, jëtu'un ojts tyuka'ajëtë, tsyo'ontä'äky mëtu'uk ets tukjëjpkëxy ja mëti'ipë yajpatpën ma më'i'px majktaxkpën: José, Guedalías, Zacur, Izri, Netanías, Buquías, Jesarelá, Jeséas, Matanías, Simí, Azarel, Hasabías, Subael, Matatías, Jeremot, Hananías, Josbecasa, Hananí, Malotí, Eliadë, Hotir, Guidalti, Mahaziot, Romanti-ézer. Nitu'ukjaty aakmëët ja myëkä'äxtëjkëty ets ja y'u'unk y'ëna'këty, nimajkmäjtsk teety nimajkmäjtsk taak wyinë'ajty.