1 Crónicas 18 - Biblia Dc en Mixe de Quetzaltepec

Ma ja David ja tsip tpajëtityën

¹ Ko jëtu'un ya'atë y'ëkkëjxy y'ëknajxy, ënät ja David mëët tsyiptuuny ja filistejë ja'ayëty ets ka'ap tyajmëtäky ets tpëjkëy ja kyajpnëty mëti'ipë xyëëwajtëpën Gad ets nyaax kyajpn mutskjatyëtypë.

² Ojts näjyëtu'un ja Moab ja'ayëty tsyiptuntë mëët yë David, e ka'ap ja David yajmëtakëtë, paaty kopkpëky ko ojts ja këpäjtën xëmë tyaktë ma ja Israel ja'ayëtyën.

³ David nän ka'ap tyajmëtäky ja Hadad-ézer, jampë Sobá yajkutukyën, jamtsowpë yajpaatyën ma Hamat y'itjotmën, jää ojts ka'ap y'ëkmëtaknë ma ënety tniwa'akanën ja Éufrates mëjnëë itjot.

⁴ David jä'ä ojts jam tpaaty ja pujxnwintëkäämpë mëti'ipë ja'ay myëtsiptuuntëpën tu'uk mil ets ojts tsum tyajnëjkxy niwëxtujk mil ja tsiptuunpë ja'ayëty këwaaykyijxypyë jyëtitën ets i'px mil mëti'ipë tekye'epyën; ëpëky ojts teky tyëjta'ay ja kwaay këtiipë y'ëkpëyë'knëtëty mëti'ipë ënety myëye'eytyëpën ja pujxnwintëkäämpë, je'eyë ojts mëko'px ja pujxnwintëkäämpë tyajwë'ëmy mëti'ipë yajmëtsiptuunpën.

⁵ Yë Siria ja'ayëty ënätyë ojts näjyëtu'un jyamiintëpë ets ja Hadad-ézer jyayajputëkëja'any, jampë Sobá yajkutukyën, je'eyëp ko ja David ka'ap ja siriëja'ay tyajmëtäky, jä'ä ojts y'ooktë ja Siria ja'ayëty ni''i'px mäjtsk mil.

⁶ Ojts ja David jam ja tsyiptuunpëtëjk tyajwë'ëmy Damaskë, ja Siria ja'ayëty ojts tmëtuntë ja Israel ja'ayëty ets ojts yajtukupëktë ets kyëpätëty. Jëtu'un ijty ja David xëmë Wintsën pyutëkëty oy maa tyimnëjkxy.

⁷ David ojts tjä'äpëky mäjtsk yë pujxn mëti'ipë ja'ay ijty nätyuk'akëëytyujkëtëpën aak pu'ts pujxn, mëti'ipë yë Hadad-ézer ijty ja jyä'äy yajtuuntëpën, jam Jerusalén ojts tmënëjkxy.

⁸ Jyä'äpëjk näjyëtu'un tsuxkpujxn, jampë tsyoonyën Tibhat ets Cun, mëti'ipë ja Hadad-ézer nyitënääpyën. Mëët ya'atë tsuxkpujxn ojts yë Salomón ja nëë apëjkën tyaj'oyë janty mëjpë, yë'ë ojts näjyëtu'un tëjkxeny'äty ets yë'ë yajtuun ma ja apëjk atu'unën yaj'oytyuunyën mëti'ipë jap tsajptëkoty tunëpën.

⁹ Ja Toi, mëti'ipë yajkutujkpën jam Hamat, ko tnija'awëy ko tëë ja David tmëmëtä'äky ja Hadad-ézer, jampë Sobá yajkutukyën,

¹⁰ ënät tkejxy ja myaank Adoram, tukmëkäjxëy ja pu'ts pujxn, poop pujxn, tsuxkpujxn ets tkajpxpo'kxa'any ja David mëët ko ënety të tmëmëtä'äky ja Hadad-ézer, jä'ä ko ja Toi nän nämyëtsip'ajtëp ijty mëët ja Hadad-ézer.

¹¹ David aakyë'ë ojts ya'atë Wintsën tmooytyä'äy, mëët tëkokyë ja pu'ts pujxn ets ja poop pujxn, mëti'ipë pyëjkëyën ja Edom, Moab, Amón ja'ayëty, filistejë ja'ayëty ets ja Amalec ja'ayëty.

¹² Ëpëky mëti'ipë ja Abisai, ja Sarvia ja myaank yaj'o'kën nimajkmokxtëkëëk mil, ja Edom ja'ay, jam ma joyjyot yajtijyën Kaanjoyjot.

¹³ David ojts jam jyä'äy t'ëxmatsy mëti'ipë tsiptuuntëpën ma ja Edom y'itjotmën, tëkokyë Edom ja'ayëty aakyë'ë David ojts y'ënä'ämta'ajëtë; David yajxon ënety Wintsën pyutëkëty oy matsow tyimnëjkxy.

Ja David ja tsyiptuunpë wintsëntëjk

¹⁴ David yë'ë ojts y'ëne'emy ma tëkokyë ja naax kajpnën mëti'ipë ja Israel ja'ay nyitënaaytyëpën. David aak'oy winë tuuny ets mëtëy ojts winë tnipaye'ey ma ja naax kajpnën.

¹⁵ Joab ijty xyëëwajtyp ja tsyiptuunpë wintsën, yë'ë Sarvia myaank; e yë Josafat, yë'ë ijty jyääpyë'ajtyp ja yajkutujkpë, yë'ë Ahilut myaank.

¹⁶ Yë'ë ojts tyeety'atë yë Sadoc, yë'ë myaank yë Ahitub, ets Abimélec, yë Abiatar myaank; Savsa yë'ë ijty winë jyääymyujktääpy tii tim tuun tim jajtëpën,

¹⁷ Benaías, yë Joiadá myaank, yë'ë ojts yajtuknipëky ets twinye'eyëty ja ja'ayëty mëti'ipë yajtijtëpën Queret ets peleteos. Yë David y'ëna'k yë'ë ijty mëk putëjkëtyëp.