1 Crónicas 16 - Biblia Dc en Mixe de Quetzaltepec

¹ Ja kaaxë ojts ja yajmënëjkxy ets ojts yajpëjktä'äky ma tu'uk ja wit tëjkën mëti'ipë ënety David të tnipëjktaakën. Ko jëtu'un y'ëkwintu'upëjktaay, tä ja wintsë'kën ojts tyaktë mëti'ipë nino'oky nixämyën ets mëti'ipë yajyajkpën ko ja nay'ëëw'oy näykyajpx'oyë y'ity mëët ja Dios,

² e ko David jëtu'un tyajnajxtaay ja wintsë'kën ma ja Wintsënën ënät ojts ja naax kajpn tkënu'kxy mëët ja Wintsën ja xyëëw,

³ tääts tyajkaaytyääy tëkokyë ja Israel ja'ayëty, ye'etyëjk, to'oxytyëjk.

⁴ David ojts näjyëtu'un tnikajpxpety ja Leví ja'ayëty mëti'ipë y'ijx'itëpën ja Wintsën ja kyaaxë, mëti'ipë xëmë jam kajpxta'aktëpën ets yajnaxtëpën ja kukkajpxën ja'awëkyëtakkën ma ja Wintsën Tiosën mëti'ipë y'ëwtajtëpën ja Israel ja'ayëty.

⁵ Yë'ë ojts yajpëjktä'äky ets ja myëku'uktëjk tnikopk'atëty, ja Asaf ets ok ja Zacarías; tääts näjyëtu'un yë Jeiel, Semiramot, Jehiel, Matatías, Eliab, Benaías, Obed-edom ets Jeiel, mëti'ipë myëët'ajtëpën ja kyowëty, xyuxnëty, ja y'akëty, Asaf yë'ë ijty yaj'ënäämpy pujxn'awojpmujk,

⁶ e ja teetytyëjkëty Benaías ets Jahaziel, jä'ä xëmë tyukxuxtëp ja pujxnxuxn jam ma ja Wintsën ja kyaaxë y'ityën.

Ja nyi'ëy nyiyä'äxy ma ja David ja kukajpxën ja'awëkyëtakën tyajnaxyën

⁷ Jä'ä xëëw ojts ja David tuk'ëne'emy ja Asaf mëët ja myëku'uktëjk ets tyajnaxtëty ja kukkajpxën ja'awëkyëtakkën ma Wintsënën mëët ya'atë aaw ayuk:

⁸ Kukajpxëtë ja'awëkyëta'aktë ja Wintsën. Nikajpxtë ja xyëëw. Tuk'ëwaanëtë ja naax kajpn wi'ix winë tuny tkäjpxyën.

⁹ Mëjjawëtë oyjya'awëtë ja xyëëw. Nikajpx nimëtya'aktë wi'ix winë mëjwiin këjää ttuny tkäjpxyën.

¹⁰ Akujk jotkujkmës timnäjyawëtë mëët ko yë xyëëw wa'ats yë'ë. Tim xo'onta'aktëmës miitsëty ko xy'ixta'atë Wintsën.

¹¹ Paatë ixtë ja Wintsën ets ja myëj'ajtën; yë'ë jëtu'un xëmë paatë ixtë oyjyëna'ajëty.

¹² Ja'amyätstë ja mëjpë këjääpë të tuny të tkäjpxyën ets ja ijx ka'ijxënpë, ja'amyätstë näjyëtu'un ja y'aaw y'ayuk mëti'ipë të tyajwë'ëmyën:

¹³ Miitsëty, ja y'u'unk y'okëty ja tyuunpë Israel, miitsëty ja Jacob ja y'u'unk y'ok, mëti'ipë yë'ë wyin'ijxën.

¹⁴ Yë'ë Wintsënajtp mëti'ipë nTio'ajtëmën; ets yë'ë ënä'ämp yajkutujkp ma tëkokyë naaxwiinyëtë y'ëwtityën.

¹⁵ Oy kanaak najtskä'äxë ja'ay tyimjuuky'atëty, mëti'ipë yë'ë të twinwanën ka'ap nijëna'a tja'atyëkoy.

¹⁶ Ja käjpxytyu'unën mëti'ipë myëët'ajtën mëët ja Abraham, ja käjpxy mëtyä'äky mëti'ipë yaj'ijtën mëët Isaac

¹⁷ ets ojts kanaak'ok tnikäjpxy ko Jacob jyuuky'äjty, tääts ojts y'awinpity tu'uk tëyajtën, mëti'ipë wë'ëmën winë xëëw ma ja käjpxytyu'unën y'ijtyën mëët yë Israel,

¹⁸ ko y'ënäny: Mijts nmo'ojäämpy yë naax kam ma txëëwatyën Canaán ets yë'ë xykyuma'ayën'atëty.

¹⁹ Oy ënety nyiwäänë'atë ets jaaypyaat jaaypyo'kxy yajpaatë muum kajpntum yaa naaxwiiny naaxkëjxy.

²⁰ Je'eyë jyëtitë winnaax wiinkajpn ets xii yaa muum jyanäkyajpxkëxë'ëkëtë maajaty ja ënä'ämpë yajkutujkpën,

²¹ yë Wintsën ka'ap ojts y'ëxmatsëtë ets muum pën ëxaty o'ktëy tyunëtëty; ni'ikyënëm ojts ja yajkutujkpëtëjk t'ënëëmë:

²² Këtii nëkoo xymyëmayëtëty yë nwin'ixyës ets këtii nëkoo ëxaty xytyuntëty yë nkäjpxynyajxpëtëjkës.

²³ Win'ëw winya'axtë Wintsën, nitëkokyë ja'ayëty naaxwiinyëtë apëtsëmy; winjëpom xynyikajpx xynyimëtya'aktëty ja nyitsokën.

²⁴ Nikajpx nimëtya'aktë ja myëj'ajt y'oyajtën oypyë xoontä'äkpyë, maajaty ja naax kajpnën mëjpë mutskpë.

²⁵ Jä'ä ko yë Wintsën mëj'äämpy yë y'ity ets nitëjkëyëp nwin'ë'ëw nwinyaxmëty, jä'ä ko ni'ik kutsë'ëkë yë'ë këtiinëm jyëtu'unëty wiinkëtypë tiosëty.

²⁶ Yë wintsën mëti'ipë wiinkëtypë naax kajpn myëët'ajtëpën nitii tkatsowëty, e yë Wintsën mëti'ipë nija'awëmën yë'ë ojts tsajp timyajkojy.

²⁷ Ma yë'ëjën jam'ajt të'kxën jajën mëjwiin këjää. Ma tsyajptëjkën jam'ajtp mëk'ajtën ets xoontakën.

²⁸ Kukajpxëtë ja'awëkyëta'aktë yë Wintsën, miitsëty ninu'un mtu'kjëën'at mtu'ktëjk'atën wiik naax wiink kajpn, mo'otë Wintsën ja kuttujkën ets ja mëj'ajt oyajtën;

²⁹ mo'otë ja Wintsën ja mëjja'awën jaanty ja'awën mëti'ipë yë'ë patëpën; mëët ja yojxën, wa'këxë'ëktë ma yë'ëjën; ëwtatë ja Wintsën ma tsyajptëjkën oypyë tsujpë.

³⁰ Wä'än tëkokyë ja ja'ayëty naaxwiinyëtë apëtsëmy wyinkutsë'ëkëty. Yë'ë ojts tyajta'tspëky ja naaxwiinyëtë këtiipë yu'kxëty.

³¹ Wä'än ja tsajp ets ja naaxwiinyëtë txoonta'aktë. Wä'än ja aaw ayuk tyajmëtoy ma tëkokyë ja mëj naax mëj kajpnën: Yë Wintsën yë'ë ënä'ämp yajkutujkp.

³² Wä'än ja juukymyejy t'ëëty tkomy ets tëkokyë mëti'ipë jap yajpatpën. Wä'än ja naax kam oy tkëxë'ëktë ets tëkokyë mëti'ipë jam yajpatëpën.

³³ Wä'än ja mëto'owën ja oypyë xoontä'äkpyë tyajmëtoy ma ja yukjotmën Wintsën wyintuuy, mëti'ipë ënä'ämpën ets yajkutujkpën naaxwiiny.

³⁴ Kukajpxëtë ja'awëkyëta'aktë yë Wintsën, mëët yë y'oyjyot y'oywyinma'any, ko tyajnikëxë'ëky yë tsojkën ja'awën xëmëkyëjxm.

³⁵ Jëtu'un xy'ënëëmëtëty: Yajnitsoktëk ëëts, Dios, mijts mëti'ipë ëëtsëty nitsokpë'ajtëpën. Woomujk wijtsmujktëk ëëtsëty, maas ëwä'kxyjyäty nyajpaatën, nitu'ukjaty maas nnaax nkajpnëtyën ets ja mxëëw yajmëjjaw yajjaantyjyawëty ets myajwin'ëw myajwinya'axëty akujk jotkujk.

³⁶ Kënu'kxy mëjjawë ja Wintsën ja xyëëw y'itëty, mëti'ipë yë Israel ja'ayëty y'ëwtajtëpën xëmëkyëjxm. Tä ja naax kajpn y'ëtsooy: Jëtu'un'atëp ets tukxoontaktë ja Wintsën.

³⁷ Tä ja David tuknipëjky ja Asaf mëët ja myëku'uktëjk ets tkëwent'atëty ja Wintsën ja kyaaxë, oy jam tii tyimyajtuna'anëty, winjëpom.

³⁸ Ojts näjyëtu'un tuknipëky ja Obed-edom ets ja myëku'uktëjk, tëkë'px tuktujk ja ja'ay ojts tmëwë'ëmy ja Obed-edom, Jedutún yë myaank; e Hosá, yë'ë ojts wyi'imy ets ja tëjk'aaw tkëwent'atëty.

³⁹ E ja Sadoc mëët ja myëku'uktëjk, aak teety ijtyëty, yë'ë ojts yajtukmëwë'ëmtë ets ja wit tëjk t'ijx'itëty, ma ja Gabaón ja tsyajptëjkën,

⁴⁰ ets yë'ë tyaktëty xëmë ja wintsë'kën ma ja Wintsën ja wyintsë'këntyaknën jam ma ja kaaxë yajpaatyën, jopy tsuu, jëtu'un tä jap myinyën kuja'ay ma ja Wintsën ja nyokyën mëti'ipë tyuk'ënä'ämën ja Israel kajpn ets tpatuntëty.

⁴¹ Ojts näjyëtu'un tukmëwë'ëmy ja Hemán, Jedutún ets ja mëti'ipë ojts yajwin'ixtën ets y'ëwtëty ya'axtëty: Kukajpxëtë yë Wintsën, jä'ä ko tsyojkën jya'awën ijtëëp yë xëmë.

⁴² Ya'atë ja'ayëty yë'ë ijty yaj'ënantëp yë ak, pujxn awojpmujk ets winë mëti'ipë ja ëy tyukpa'ënantëpën mëti'ipë ja Wintsën tyukwin'ëëwtëpën. Ja Jedutún ja y'ëna'k yë'ë ojts yajtuknipëktë t'atänëtëty ja tëjk'aaw.

⁴³ Ko jëtu'un kyëjxtaay nyajxtaay, tä wyimpijtaaynyëtë ma tyëjkëtyën, David ojts wyimpijnë ma tyëjkën ets ojts jam tkënu'kxy ja y'u'unk y'ëna'k, y'u'unk tyo'oxytyëjk.