1 Crónicas 14 - Biblia Dc en Mixe de Quetzaltepec

Ma Hiram tkexyën ja jyä'äy jam ma David yajpaatyën

¹ Ënet ja Tirë yajkutujkpë, mëti'ipë txëëwajtpën Hiram, tkejxy ja tyuunpë jam ma ja David yajpaatyën ets ojts tkexy näjyëtu'un ja tsäjtspë, pojtspë, tsaa ets kepy oyëtypë mëti'ipë jam yajtunantëpën ma ja David ja tyëjk kyojja'anyën.

² Jëtu'un ja David tnija'awëy ko tëë ënety ja Wintsën tjanty tyuknipëjktaakë ets yë'ë yajkutukëty ma ja Israel kajpnën, jä'ä ko y'ijxyp ko aak'oy winë wyinpëtsë'ëm jyëjpëtsë'ëmxëty ma ja kyutujktaknën.

Wiinkëtypë ja y'u'unk y'ëna'k ja David

³ Ojts David wiinkpë ja to'oxytyëjk tpëky t'uuky, jam Jerusalén ets wiinkpë y'u'unk y'ëna'këty myiintë jyajtë naaxwiiny ye'etyëjkpë to'oxytyëjkpë.

⁴ Ja y'u'unkëty mëti'ipë mëxu'unk'ajtën jam Jerusalén jä'ä xyëëwajtë: Samua, Sobab, Natán, Salomón,

⁵ Ibhar, Elisúa, Elpélet,

⁶ Nógah, Néfeg, Jafía,

⁷ Elisamá, Eliadë ets Elifélet.

Ma ja David ka'ap tyajmëtä'äkyën ja filistejë ja'ayëty

⁸ Ko yë filistejë ja'ayëty tnija'awëtyë ko tëë David yajnikajpxpety ets y'ënä'ämëty ma ja Israel ja'ayëtyën, ënätyë tnitso'ontë ets tjayaj'ookantë, e yë David ojts nnijawë tääts tjëjpmëwa'këy.

⁹ Ënet ja filistejë ja'ayëty jam nyäpyëjktakëtë ma joyjyot txëëwatyën Refaim.

¹⁰ Ja David ojts ja Wintsën jëyëjp tyajtëy pën oy'ajtp twinkuwa'akëty ja myëtsip, jëtu'un y'ënäny: ¿Oy'atëp koos yë filistejë ja'ayëty mëët ntsiptuntëtyë, xyajmëta'akëpësë jëtääjë? Tä ja Wintsën y'ëtsoowë: Jëjpkuwa'akë, tyam nyajmëta'akëty.

¹¹ Tä ja David jam pya'tëjkëy ma tu'uk ja itjot txëëwatyën Baal-perasim, jam ojts mëët tsyiptuntë ets ka'ap tyajmëtäky ja filistejë ja'ayëty. Paatykyëjxm jam y'ënäny: Jëtu'unës yë Wintsën yë nnë'ë ntu'u të tyaj'ëwa'atsy maas yë nmëtsipën tä jeexyë muum mëj nëëkomjoty të nnaxyën të'ëts wa'ats. Paatykyëjxm tampë it tyajxëëwpäjtë Baal-perasim.

¹² Ja filistejë ja'ayëty jëtu'unyë jam tnikäktaaytyë ja y'awinaxëty mëti'ipë y'ëwtajtëpën, ko David jëtu'un t'ijxy tääts tnino'ktaay.

¹³ E ja filistejë ja'ayëty ka'ap ninu'un tyimja'akyujkëtë, ënät jatëkok jam nyäpyëjktakëtë ma ja joyjyot txëëwatyën Rafaim.

¹⁴ Tä ja David tyajtëëy ja Dios, ets ja Dios y'ëtsoowë: Këtii xywyinkuwa'akëty wintuuytsyow, jëxkë'ptsow nëjkx xynya'ëwtity ets jëtu'un xymyëmëta'akëty, jää xynyipëtë'ëkëty ko ënety jam të mja'ty ma ja kepyjyotën.

¹⁵ Ko xymyëtowëty myäy'ënä'äny ja ujts'aay jam kepykyëjxm, tääts ënätyë xynyipëtë'ëkëty, jä'ä ko yë'ë nëjkx xytyuk'ixy ko mijts ënety nyajmëta'akäämpy ma ja mëtsiptëjkën, ets nyaj'o'kta'aja'anyës ja filistejë ja'ayëty.

¹⁶ David jëtu'un ojts tjantytyuny, ojts ëxëëk tuntë ja filistejë ja'ayëty, mëti'ipë tsip'ixyëtyën, ëxëëk ojts tuntë; timpyatso'ontë jam ma txëëwatyën Gabaón ets timpyaja'ajtë jam Guézer,

¹⁷ jëtu'un'äämpy ja David mëj'äämpy ja ja'ay nyikäjpxyë ets ojts ja naax kajpn tsyë'ëkëty jyawëty.