1 Crónicas 13 - Biblia Dc en Mixe de Quetzaltepec

Ma ja David nimay tyajnëjkxa'anyën ja kaaxë jam Jerusalén

¹ David ojts tyajtëy ja mëti'ipë nyiwintsën'ajtëpën ja tsiptuunpëtëjk, mëti'ipë wyinye'eytyëpën ja myëku'ukëty, ja mëti'ipë wintsën'ajtëpën,

² ets tukmëtooy ja naax kajpn, ja Israel ja'ayëty, tä t'ënëmaay: Pën miitsëty oy xymyëtowtë, ets pën ja Wintsën xypyutëjkëmë, oy ets jeexyë ntukmëto'owta'ayëmë ja nmëku'uk'ajtëmë Israel ja'ayëty, mëti'ipë jam muum kajpntum yajpatëpën, tääts ja teetyëjkëty ets ja Leví ja'ayëty, mëti'ipë jam yajpatëpën ma nyaaxjot kyajpnjotëtyën, ma tkëwent'atën ja jyëyujk tsyajpaxëty, yaj'ënëëmëtëty ko jeexyë xypyuwa'këmë,

³ e jëtu'un tjëkyäpëty nyajmi'inmëty ja Dios ja kyaaxë, e ijxtëm yaj'ixy yajtunyën ijxtëkoy ja'atyëkoy y'ijnë maju'unëm yë Saúl yajkutukyën.

⁴ Tu'kë'ëyë ja naax kajpn oy ojts ja winma'any tmëtowtë ets jëtu'un yajtunëty.

Ma ja David ja kaaxë tjayajtsoonanyën

⁵ David ojts tyajmujkta'ay ja Israel ja'ayëty, jam tsyo'ontäky Sihor ma ja Egiptë mëët nyäpyaatëtën ets tyimja'ty jam ma txëëwatyën Hamat, ja Dios ja kyaaxë jä'ä yajtsoonantëp.

⁶ Tääts jam ni'ëmukë nyëjkxtaaytyë Quiriat-jearim, ma näjyëtu'un yajtijyën Baalá, ma ja Judá ja y'itjotmën, mëët tëkokyë ja Israel ja'ayëty ets tyajtsoona'antë ja Dios ja kyaaxë ma ja xyëëw yaj'ëwtaty yaja'amyetsyën, mëti'ipë myëët'ajtypyën ja y'ënyääytyakn itkujky ma yajpaatën ja Wintsën ja kyukäjpxy.

⁷ Jam ma tu'uk kepy wintëkäämpën jemypyë tkukë'ëyëtë ja Wintsën ja kyaaxë ets jam tmëtso'ontë ma ja Abinadab ja tyëjkën. Ja Uza ets ja Ahio jä'ä tyu'uwinye'eytyëp ja kepy wintëkäämpë.

⁸ E ja David mëët ja Israel ja'ayëty jëyëjp nyëjkxtë ëëpë yaxpë ets äjtspë Dios wintum, tukxoonta'aktë ja Dios ja xyëëw ëmuumtu'ukjot, mëët ja xuxpë wojpë ets ëëpë koowpë.

⁹ Ko jam jyajtë Era ma Quidón y'itjotmën, ënät ja Uza ojts tony ja kaaxë ko t'ijxy tim ka'ajaanp yowë, ja tsajpkaa myë'anäjpëy ja kaaxë.

¹⁰ E ja Wintsën wiink ojts t'ixy ko ja Uza ja kaaxë toony Dios wintum, paaty tim jämyë tyaj'o'ky.

¹¹ David ojts jyoot'anpëky mëët ko ja Wintsën ënätyë tyaj'o'ky ja Uza, paaty txëëwmooy ja it Peres-uzá, mëti'ipë tyaampaat jëtu'un txëëwajtpën.

¹² E jä'ä xëëw, ojts ja David ja tsë'ëkë tyuktëkëty Wintsën wintum ets y'ënäny: Tyam ni'ikë oyës maa Dios kyaaxë nkayajnëjkxëty.

¹³ Paaty ojts ka'ap ja kaaxë tyajnëjkxnëtëpë ma ja David ja myëjkajpnën, jam ojts tni'ënä'ämë tyajnëjkxtëty ma ja tyëjkën ja Obed-edom, yë'ë Gad yë jyä'äy.

¹⁴ Tëkëëk po'o jam y'ijty ets ja Wintsën mëjwiin këjää ojts tkënu'kxy ja Obed-edom ja jyëën tyëjk ets ja y'u'unk y'ëna'k.